Lè pap janm gen lahèn ankò!
Menmsi nou derasinen lahèn nan kè nou, nou pa ka kontwole aksyon ak atitid lòt moun. Moun ki inosan kontinye viktim akoz lahèn. Donk, ki sa k ka retire pwoblèm lahèn nan nèt?
Se sèlman Jewova Dye ki ka kase chenn lahèn nou wè jodi a pou toutan. Se egzakteman sa Bib la pwomèt li pral fè. — Pwovèb 20:22.
BONDYE PRAL ELIMINE RASIN LAHÈN YO
-
1. SATAN LEDYAB. Se Satan, zanj rebèl la, ki responsab lahèn nou wè jodi a. Bondye pral detwi Satan ansanm ak tout moun ki gen lahèn menm jan avè l yo. — Sòm 37:38; Women 16:20.
-
2. MONN SATAN AN KI CHAJE AK LAHÈN. Bondye pral elimine tout move bagay ki gen nan monn sa a, sa gen ladan l politisyen ak chèf relijye k ap pouse moun gen lahèn. Bondye pral elimine tou sistèm komèsyal ava sa a ansanm ak tout koripsyon ak tout moun k ap eksplwate lòt moun. — 2 Pyè 3:13.
-
3. ENPÈFEKSYON LÈZÒM. Bib la montre tout moun te eritye enpèfeksyon, sa vle di tandans pou yo panse, pou yo gen santiman e pou yo fè sa ki mal (Women 5:12). Youn nan tandans peche lakòz yo se gen santiman lahèn ak montre lahèn pou lòt moun. Bondye pral ede lèzòm pot laviktwa sou tout kalite tandans enpafè sa yo, konsa tout tras lahèn pral disparèt pou toutan. — Ezayi 54:13.
BIB LA PWOMÈT YON MONN SAN LAHÈN
-
1. PÈSONN PAP SIBI ENJISTIS. Se Wayòm Bondye a ki pral dirije tè a, yon gouvènman ki nan syèl la ki jis e k ap la pou toutan (Dànyèl 2:44). Pap gen prejije ak entolerans ankò. Bondye pral korije tout enjistis lèzòm ap sibi jodi a. — Lik 18:7.
-
2. TOUT MOUN PRAL VIV ANPÈ. Pèsonn pap soufri ankò akoz vyolans ak lagè (Sòm 46:9). Tè a pral tounen yon kote pou moun viv an sekirite kote se moun ki renmen lapè sèlman k ap viv sou li. — Sòm 72:7.
-
3. TOUT MOUN PRAL VIV POU TOUTAN NAN BONJAN KONDISYON. Tout moun ki pral viv sou tè a pral montre vrè lanmou an pou pwochen yo (Matye 22:39). Pèsonn pap gen enkyetid ankò, yo pap menm gen move panse oswa move souvni ankò (Ezayi 65:17). Nan moman sa a kote pap gen lahèn ankò, lèzòm “ap kontan anpil akoz yo pral viv nan yon lapè total.” — Sòm 37:11.
Èske w ta renmen viv nan yon monn konsa? Jodi a menm, anpil moun ap aprann voye lahèn jete lè yo aplike prensip ki nan Bib la (Sòm 37:8). Se menm bagay la pou plizyè milyon Temwen Jewova toupatou nan monn nan. Byenke yo soti nan diferan kilti ak kouch sosyal, yo kontan viv ansanm tankou yon fanmi nan lanmou ak inite. — Ezayi 2:2-4.
Temwen Jewova yo ap byen kontan pataje avè w sa yo aprann sou fason pou w andire enjistis ak diskriminasyon. Sa w aprann yo ap ede w ranplase lahèn ak lanmou tikras pa tikras. Ou pral aprann fason pou w trete lòt moun avèk jantiyès, menm moun ki sanble pa merite sa oswa ki montre lahèn. Kòm rezilta, w ap gen plis kè kontan depi kounye a, e se pa ti bèl relasyon w ak lòt moun pral bèl. Pou fini, ou pral aprann fason w ka viv anba dominasyon Wayòm Bondye a lè lahèn pral disparèt pou toutan. — Sòm 37:29.
Lòt sijè ki enteresan
TOUDEGAD
Ki sa Wayòm Bondye a pral fè?
Jezi te konnen Wayòm Bondye a se sèl gouvènman ki gen pouvwa pou l rezoud pwoblèm ki gen sou tè a. Ki sa Wayòm nan deja fè pou l ka fè moun gen konfyans nan li?
KÈK LÒT SIJÈ
Èske moun k ap rele pou mande sekou yo ap jwenn jistis?
Bib la montre se nan Bondye vrè jistis la soti, e li bay lavi tout moun menm enpòtans lan.
REVEYE N!
Prejije — Yon remèd k ap la pou toutan!
Ki kat bagay Wayòm Bondye a pral fè pou l elimine prejije?
