Èske nou ka kwè toutbonvre tout pwomès Bondye yo ap reyalize? Jezi te kwè sa, e ansèyman l te bay yo te ede moun ki t ap koute l yo gen plis lafwa. Ann konsidere yon pawòl li te di nou jwenn nan Matye 5:18 nan Diskou sou mòn nan: “Anverite m ap di nou sa: Li pi fasil pou syèl la ak tè a pase olye pou youn nan pi piti lèt oswa yon ti moso nan yon lèt ki nan Lalwa ta pase san tout bagay pa reyalize.”

Pi piti lèt nan alfabè ebre a se י (yòd). Li se premye lèt nan Tetragram nan ki reprezante non Bondye, ki se Jewova, yon non ki sen *. Nonsèlman espè nan Lalwa yo ak Farizyen yo te bay mo ak lèt ki nan Lwa Bondye a anpil enpòtans, men tou yo te fè sa pou chak “ti moso nan yon lèt”.

Jezi te vle di si l pa posib pou syèl la ak tè a pase, donk, li enposib pou pi piti lèt ki nan Lalwa a pa reyalize. Nan Bib la nou jwenn asirans tè a ak syèl la ap toujou egziste (Sòm 78:69). Kidonk, bèl deklarasyon sa a fè nou konprann pi piti bagay ki nan Lalwa a pa t ap janm pa reyalize.

Èske ti detay yo gen enpòtans pou Jewova? Wi, pa gen dout nan sa. Ann pran yon egzanp. Lalwa te anseye nasyon Izrayèl tan lontan an pa t gendwa kase okenn zo nan timouton yo lè yo t ap manje yo pandan fèt pak la (Egzòd 12:46). Sa te ka sanble jis yon ti detay. Men, èske Izrayelit yo te konprann poukisa yo pa t dwe kase okenn nan zo yo? Petèt yo pa t menm konprann. Epoutan, Jewova li menm te konnen pawòl sa yo te anonse yon pwofesi kote yo pa t ap kraze menm youn nan zo Mesi a lè yo t ap mete l sou yon poto soufrans pou l mouri. — Sòm 34:20; Jan 19:31-33, 36.

Ki sa nou aprann nan pawòl Jezi yo? Nou menm tou nou dwe gen asirans tout pwomès Jewova yo ap reyalize e tout ti detay ki ladan yo ap reyalize tou. Toutbonvre, pi piti lèt ebre a ban nou yon bèl asirans!