“ Suiv mwen nètale ”

“ Se nan chemen sa a yo te rele nou pou nou mache, paske menm Kris te soufri pou nou, li kite yon modèl pou nou, pou nou ka suiv tras li fidèlman. ” — 1 PYÈ 2:21.

1, 2. Poukisa egzanp pafè Jezi antanke anseyan, pa nan yon nivo ki twò wo pou nou imite ?

JEZI KRIS se pi gwo anseyan ki te pase sou tè a. Pa t janm gen tankou l. Anplis, li te pafè, li pa t janm fè peche pandan tout tan l t ap viv sou tè a (1 Pyè 2:22). Men, èske sa vle di egzanp Jezi antanke anseyan nan yon nivo ki sitèlman wo, nou menm moun ki enpafè, nou pa ka imite l ? Non, se pa sa.

² Tankou jan nou te wè sa nan atik anvan an, baz ansèyman Jezi a, se lanmou. E lanmou se yon kalite nou tout ka fè efò pou l grandi lakay nou. Detanzantan, Pawòl Bondye a ankouraje nou amelyore kalite lanmou nou genyen pou lòt moun, epi fè lanmou sa a vin pi plis chak jou (Filipyen 1:9 ; Kolosyen 3:14). Jewova pa janm mande moun li kreye yo yon bagay li konnen yo pa ka fè. Anfèt, kòm “ Bondye se lanmou ”, epi li te kreye nou pòtre ak li, nou ka di li te fè nou pou nou manifeste lanmou (1 Jan 4:8 ; Jenèz 1:27). Donk, lè nou li pawòl apot Pyè di nan vèsè prensipal atik sa a, nou mèt sèten nou ka reyisi mete yo an pratik. Wi, nou ka suiv tras Kris la deprè. An reyalite, nou ka obeyi kòmandman sa a Jezi te ban nou an : “ Suiv mwen nètale. ” ​(Lik 9:23). Annou egzamine ki jan nou ka imite lanmou Jezi Kris te montre, toudabò pou verite li te konn anseye yo, ansuit pou moun li te konn anseye yo.

Ann ogmante lanmou nou pou verite n ap etidye yo

3. Poukisa gen moun ki twouve li difisil pou yo etidye, men, ki egzòtasyon nou jwenn nan Pwovèb 2:1-5 ?

³ Pou nou renmen verite n ap anseye lòt moun yo, nou dwe pran plezi nan aprann verite sa yo pou kont nou. Nan monn n ap viv la, li pa toujou fasil pou nou gen yon lanmou konsa. Lè yon moun pa t fè gwo klas, oswa li te pran yon seri move abitid lè l te jèn, sa ka fè l pa janm renmen etidye. Toutfwa, li esansyèl pou nou aprann nan men Jewova. Men sa Pwovèb 2:1-5 di : “ Pitit gason m, si w resevwa pawòl mwen yo, e si w konsève kòmandman m yo bò kote w tankou yon trezò, dekwa pou w koute sajès  ak zòrèy ou, poutèt pou w ka panche kè w sou disènman, si, mete sou sa, ou rele entèlijans e si w ouvè vwa w byen fò ou rele disènman, si w kontinye ap chèche sa tankou lajan, e si w kontinye ap chèche l san rete tankou trezò kache, lè sa a, w ap rive konprann krent Jewova, e w ap rive jwenn konesans Bondye. ”

4. Ki sa sa vle di pou nou “ panche ” kè nou, e ki jan fason nou wè bagay yo kapab ede nou fè sa ?

⁴ Remake nan vèsè 1 rive nan vèsè 4, nou jwenn ankourajman plizyè fwa non sèlman pou nou fè efò pou nou “ resevwa ” e pou nou “ konsève ”, men tou pou nou ‘ kontinye chèche ’ e pou nou ‘ chèche san rete ’. Men, ki sa k ap pouse nou fè tout sa ? Ebyen, sonje pawòl sa yo, “ panche kè w sou disènman ”. Gen yon liv referans ki di egzòtasyon sa a “ pa la pou mande nou rete atantif sèlman, li mande nou tou pou nou gen yon dispozisyon mantal, pou nou santi nou enpasyan pou nou resevwa ansèyman an. ” E ki sa ki ka fè nou enpasyan pou nou resevwa sa Jewova ap aprann nou ? Se fason nou wè bagay yo. Nou bezwen konsidere konesans Bondye a tankou “ lajan ”, tankou “ trezò kache. ”

5, 6. a) Ki sa ki ta ka rive nou yon lè, e ki jan nou ka evite sa ? b) Poukisa nou ta dwe toujou ap ogmante trezò konesans nou jwenn nan Bib la ?

⁵ Li pa difisil pou nou konsidere konesans Bondye a konsa. Pa egzanp, lè w t ap aprann “ konesans Bondye ” a, ou te aprann verite sa a : objektif Jewova se pou limanite ki fidèl la viv nan Paradi sou tè a pou tout tan (Sòm 37:28, 29). Lè w te fèk aprann verite sa a, ou pa t gen okenn dout se te yon vrè trezò, se te yon dekouvèt ou te fè ki te ranpli ni lespri w ni kè w ak lespwa, ak lajwa. E kounye a ? Èske, tank tan ap pase, ou vin gen mwens apresyasyon pou trezò sa a ? Si sa rive w, gen de bagay ou ka eseye fè. Toudabò, detanzantan, chèche repase nan tèt ou rezon ki fè w apresye verite Jewova anseye w yo, menm sa ou te aprann depi lontan yo.

⁶ Yon lòt bagay ou ka fè, se chèche ogmante trezò w la. Lè w byen gade, si sa ta rive, pandan w ap fouye anba tè, ou tonbe sou yon pyè presye, èske w t ap annik pran l ou foure l nan pòch ou epi w mache ? Oswa èske w t ap fouye toujou pou w wè si pa gen lòt ankò ? Pawòl Bondye a chaje ak bonjan verite ki tankou pyè presye, ki tankou yon seri ti boul lò. Kèlkeswa kantite w jwenn nan, ou ka jwenn plis toujou (Women 11:33). Lè w dekouvri yon nouvo aspè nan laverite, ki fè l sanble ak yon boul lò, li bon  pou w poze tèt ou kesyon sa yo : ‘ Ki sa ki fè l se yon trezò ? Èske sa fè m vin pi byen konprann pèsonalite Jewova, oswa pwogram li yo ? Èske m twouve se yon gid pratik ki ka ede m suiv Jezi pazapa ? ’ Si w medite sou yon seri kesyon konsa, sa ap ede w ogmante lanmou w genyen pou verite Jewova anseye w yo.

Ann montre nou renmen verite n ap anseye yo

7, 8. Site kèk fason nou ka montre moun yo nou renmen verite nou aprann nan Bib la ? Bay yon egzanp.

⁷ Ki jan nou ka montre, pandan n ap anseye lòt moun, nou renmen verite nou aprann nan Pawòl Bondye a ? Piske n ap suiv egzanp Jezi, nou apiye anpil sou Bib la ni nan predikasyon, ni nan ansèyman n ap bay. Sa pa gen lontan, nan lemonnantye, yo te ankouraje pèp Bondye a pou l sèvi ak Bib la piplis nan predikasyon. Etan n ap suiv sijesyon sa a, chèche mwayen pou nou fè moun n ap pale avè l la konnen, nou menm tou, nou bay pawòl sa yo ki soti nan Bib la anpil valè. — Matye 13:52.

⁸ Pa egzanp, tousuit apre atak teworis ki te fèt ane pase nan Nouyòk, yon sè te konn li Sòm 46:1, 11 ak tout moun li te rankontre nan predikasyon. Pou kòmanse, li mande moun yo ki jan yo te degaje yo apre trajedi ki te fèk fin pase a. Li pran tan l pou l koute repons yo bay, li dakò ak repons yo, epi li di : “ Ou pèmèt mwen montre w yon vèsè nan Bib la ki te konsole m nan moman difisil sa a ? ” Pa t gen anpil moun ki te refize, e sa te pèmèt sè a kòmanse anpil bèl konvèsasyon. Menm sè sa a, lè l ap pale ak kèk jèn, souvan li di yo : “ Sa fè 50 an m ap anseye Bib la. Men w konnen ? Mwen poko janm tonbe sou yon sèl pwoblèm liv sa a pa ka rezoud. ” Lè n ap pale ak moun yo, si nou sensè, e nou antouzyas, n ap montre moun yo nou renmen sa nou aprann nan Pawòl Bondye a e nou bay sa enpòtans. — Sòm 119:97, 105.

9, 10. Poukisa li enpòtan pou nou sèvi ak Bib la lè n ap reponn kesyon sou kwayans nou ?

⁹ Lè gen moun ki poze nou kesyon sou kwayans nou, se yon bèl okazyon nou genyen pou nou montre nou renmen Pawòl Bondye. Piske n ap suiv egzanp Jezi, nou pap annik reponn  moun nan daprè sa nou menm nou panse (Pwovèb 3:5, 6). Okontrè, n ap sèvi ak Bib la pou nou reponn. Èske nou pè pou yon moun ta poze nou yon kesyon nou pa ka reponn ? Ann konsidere de bon fason nou ka rezoud pwoblèm sa a.

¹⁰ Fè sa w kapab pou w prepare. Apot Pyè te ekri pawòl sa yo : “ Sangtifye Kris nan kè nou kòm Seyè. Se pou nou toujou pare pou n defann nou chak fwa yon moun mande nou rezon ki fè nou gen espwa ki nan nou an. Men, se pou nou fè sa an dousè epi ak anpil respè. ” ​(1 Pyè 3:15). Èske w pare pou w defann kwayans ou ? Pa egzanp, si yon moun vle konnen poukisa w pa patisipe nan kèk koutim oswa kèk aktivite ki pa baze sou Bib la, pa kontante w pou annik di : “ Relijyon m nan pa vle sa ”. Yon repons konsa ka lese konprann se lòt moun k ap pran desizyon pou ou, e ou fè pati yon sèk. Li ta pi bon pou w di moun nan : “ Bib la, Pawòl Bondye a, pa vle sa ”, oswa “ Bondye pap kontan ”. Epi, bay yon esplikasyon lojik ki esplike poukisa. — Women 12:1.

11. Ki zouti pou fè rechèch ki ka ede nou pare pou nou reponn kesyon sou verite ki nan Pawòl Bondye a ?

¹¹ Si nou santi nou manke prepare, poukisa nou pa pran yon ti tan pou n fè rechèch nan liv “ Comment raisonner à partir des Écritures ” la ? * Chwazi kèk sijè ki ka enterese moun yo, epi fè efò pou nou sonje kèk vèsè. Toujou gen liv Comment raisonner a ak Bib la soulamen. Pa ezite sèvi ak toule de. Fè moun nan konnen nou gen yon zouti ki ede moun fè rechèch, e nou ta renmen sèvi avè l pou ede l jwenn repons Bib la bay sou kesyon l poze a.

12. Ki sa nou ka di si yo poze nou yon kesyon sou Bib la, epi nou pa konn repons lan ?

¹² Eseye pa bay tèt nou pwoblèm pou granmesi. Pa gen moun ki ka reponn tout kesyon ki egziste, piske pèsonn pa pafè. Donk, lè yo poze nou yon kesyon sou Bib la nou pa ka reponn, nou ka toujou di moun nan pawòl sa a: “ Mwen byen kontan w poze yon kesyon ki enteresan konsa. Pou m sensè avè w, mwen pa konn repons lan. Men, mwen sèten Bib la pale sou sa. Kòm mwen renmen fouye nan Bib la, m pral chèche jwenn repons kesyon w lan, epi m ap retounen pote l pou ou. ” Lè w fran ak moun nan konsa, ou pa pran pòz konesè w, se pòt ou ouvri pou w fè lòt konvèsasyon avè l. — Pwovèb 11:2.

Ann montre nou renmen moun n ap anseye yo

13. Poukisa nou ta dwe toujou gen yon bon pwennvi sou moun n ap preche yo ?

¹³ Jezi te montre li renmen moun l ap anseye yo. Ki jan nou ka imite l sou pwen sa a ? Nou pa ta dwe janm montre nou endiferan ak moun ki bò kote nou yo. Se vre, “ lagè gran jou Bondye Tou Pisan an ” menase pou l deklanche sanzatann, e pami milya moun k ap viv sou tè a, anpil ladan yo gen pou yo detwi (Revelasyon 16:14 ; Jeremi 25:33). Toutfwa, nou pa konn kiyès k ap gen lavi e kiyès k ap detwi. Jijman  sa a pral fèt alavni e sa nan men moun Jewova nonmen pou sa a, anpalan de Jezi Kris. Jiskaske jijman an fin fèt, pou nou menm, chak moun gen posiblite pou l vin yon sèvitè Jewova. — Matye 19:24-26 ; 25:31-33 ; Travay 17:31.

14. a) Ki kesyon nou ka poze tèt nou pou nou wè si nou konn mete nou nan plas lòt moun ? b) Ki sa nou ka fè toutbonvre pou nou montre nou konn mete nou nan plas lòt moun, e nou gen enterè pèsonèl pou yo ?

¹⁴ Se sa k fè, menm jan ak Jezi, n ap chèche mete nou nan plas moun yo. Nou ka mande tèt nou : ‘ Èske kè m fè m mal pou moun sa yo relijyon, komès, oswa politik ap fin touye anba manti, moun sa yo ki pran desepsyon sou desepsyon ? Si mesaj nou pote pou yo a sanble l pa enterese yo, èske m chèche konn sa k fè sa ? Èske mwen rekonèt, ni mwen menm, ni lòt moun k ap sèvi Jewova fidèl kounye a, se konsa nou te ye yon lè ? Èske m adapte fason mwen preche a nan sans sa a ? Oswa èske mwen rejte moun sa yo kòm kwa yo se ka pèdi (Revelasyon 12:9) ? ’ Lè moun yo santi jan nou mete nou toutbonvre nan plas yo, li pi fasil pou yo byen reyaji ak mesaj nou an (1 Pyè 3:8). Lè n aprann mete nou nan plas lòt moun, sa pouse nou tou pou nou enterese pi plis ak moun nou rankontre nan predikasyon. Nou ka note ni kesyon yo poze, ni sa ki enkyete yo. Lè nou retounen, fè yo konnen nou te reflechi sou sa yo te di nou nan dènye vizit la. Si yo gen yon nesesite ijan pou moman an, selon posiblite nou, nou ka ofri yo yon èd k ap itil yo.

15. Poukisa se sa ki bon nou ta dwe chèche lakay moun yo, e ki jan nou ka fè sa ?

¹⁵ Menm jan ak Jezi, n ap chèche sa ki bon lakay moun yo. Petèt, yon paran ka ap fè bèl efò pou l elve pitit li pou kont li. Yon gason gen dwa ap lite pou l soutni fanmi l. Yon moun ki granmoun anpil kapab enterese nan bagay espirityèl. Èske nou remake bèl kalite sa yo lakay moun nou rankontre yo, epi èske nou felisite yo pou sa ? Lè nou aji konsa, nou chèche yon pwen nou toule de dakò, sa ka ouvri chemen pou nou bay temwayaj sou Wayòm nan. — Travay 26:2, 3.

Imilite esansyèl nan demontre lanmou

16. Poukisa li enpòtan pou nou janti ak moun n ap preche yo e pou nou respekte yo ?

¹⁶ Lanmou nou genyen pou moun n ap anseye yo pral pouse nou koute avètisman saj sa a nou jwenn nan Bib la : “ Konesans fè moun gonfle lestomak yo, men lanmou bati moun. ” ​(1 Korentyen 8:1). Jezi te gen anpil konesans, men se pa t yon moun ki sekwa. Donk, lè n ap pale de kwayans nou, evite antre nan diskisyon, pa pran pòz siperyè nou. Objektif nou se pou nou touche kè moun yo, e se pou nou atire yo ak mesaj verite nou sitèlman renmen an (Kolosyen 4:6). Pa bliye, lè Pyè te konseye kretyen yo pou yo mete yo prè pou yo defann yo, li te tou pwofite raple yo pou yo fè sa “ avèk dousè ak anpil respè ”. (1 Pyè 3:15.) Si nou janti e nou respekte moun, l ap pi fasil pou nou atire yo vin sèvi Bondye ansanm avèk nou.

17, 18. a) Si moun ta soti pou kritike nou kòmkwa nou pa kalifye kòm kretyen k ap fè travay Bondye, ki jan nou ta dwe reyaji ? b) Poukisa yon konesans sou lang yo te ekri Bib la nan tan lontan pa nesesè pou etidyan Labib yo ?

¹⁷ Nou pa bezwen chèche enpresyone moun ak konesans nou oswa ak fòmasyon nou resevwa. Si yon moun nan tèritwa a refize koute yon pwoklamatè paske l pa t pase nan inivèsite, oswa paske l pa gen diplòm, pa kite sa dekouraje nou. Lè moun yo te konn di Jezi pa t pase nan gwo lekòl rabinik ki te egziste nan epòk pa l la, li pa t konn bay sa enpòtans, ni non plis li pa t konn suiv prejije ki te popilè nan epòk sa a, pou l sèvi ak tout sa l te aprann yo pou l enpresyone moun. — Jan 7:15.

¹⁸ Pou yon kretyen k ap fè travay Bondye, imilite ak lanmou pi enpòtan lontan pase fòmasyon pwofàn. Se Jewova, Gran Fòmatè nou an, ki kalifye nou pou ministè n ap akonpli a (2 Korentyen 3:5, 6). E kèlkeswa sa yon seri manm klèje kretyente a di, li pa nesesè pou nou aprann lang yo te ekri Bib la nan tan lontan an pou nou kalifye pou n anseye Pawòl Bondye a. Jewova te fè ekri Bib la yon fason ki byen klè, ak mo ki egzak, se sa k fè, an reyalite tout moun kapab konprann verite enpòtan ki ladan l yo. Verite sa yo rete entak, atout yo tradui yo nan  plizyè santèn lang. Donk, menmsi konesans nan lang sa yo ka sèvi yon moun yon lè konsa, li pa endispansab pou ede yon moun konprann Bib la. Yon lòt bò, ògèy yon moun genyen nan kapasite l pou l konnen plizyè lang, ka fè l pèdi yon kalite ki endispansab pou vrè kretyen yo. Kalite sa a, se dispozisyon yon moun genyen pou l ranmase ansèyman. — 1 Timote 6:4.

19. Nan ki sans ministè nou an se yon sèvis n ap akonpli ?

¹⁹ Pa gen dout nan sa, antanke kretyen, nou dwe enb pou nou akonpli ministè nou an. Se tout tan n ap fè fas ak opozisyon, ak endiferans, ak pèsekisyon (Jan 15:20). Toutfwa, lè nou fidèl nan ministè nou, n ap akonpli yon travay k ap bay lavi. Si nou kontinye sèvi lòt moun avèk imilite, n ap imite lanmou Jezi te montre li genyen pou moun yo. Fè yon ti reflechi : si nou ta dwe preche mil moun ki endiferan oswa ki opoze, pou n ka rive jwenn yon sèl moun ki sanble ak yon mouton, nou pa panse sa t ap vo lapenn ? San mank ! Donk, si nou kenbe nan travay n ap fè a, san nou pa lage, se yon fason pou nou atenn moun nou poko touche yo, moun ki sanble ak mouton. Pa gen dout nan sa, Jewova ak Jezi Kris ap veye pou nou jwenn plis moun toujou, moun sa yo ki gen enpòtans, pou nou ede yo anvan lafen an vini. — Agayi 2:7.

20. Site kèk fason nou ka anseye moun grasa egzanp nou bay ?

²⁰ Yon lòt fason nou ka montre nou devwe pou n sèvi lòt moun, se lè nou anseye yo grasa egzanp nou bay. Pa egzanp, nou vle montre moun yo, sèvi Jewova, “ Bondye ki gen kè kontan an ”, se meyè fason nou ka viv, se meyè fason pou nou reyisi lavi nou (1 Timote 1:11). Lè y ap suiv konduit nou, fason n ap boule ak vwazen nou, kamarad lekòl nou, konpayon travay nou, èske yo ka wè nou kontan, e nou satisfè ? Se menm jan an tou, nou fè etidyan Labib yo konnen vrè kongregasyon an se yon ti paradi ki chaje ak lanmou, nan mitan yon mond ki ensansib, yon mond ki sovaj. Èske l fasil pou etidyan nou yo remake nou renmen tout moun nan kongregasyon an e n ap fè tout sa n kapab pou n viv an pè youn ak lòt ? — 1 Pyè 4:8.

21, 22. a) Yon egzamen konsyans sou travay predikasyon nou an ka fè nou santi nou pare pou nou pwofite ki posiblite ? b) Ki sa nou pral wè nan atik ki vini apre yo ?

²¹ Si nou gen yon etadespri pozitif sou ministè nou, sa ap motive nou tanzantan, pou nou fè yon egzamen konsyans. Gen plizyè moun, apre yo fin fè sa onètman, yo wè li posib pou yo etann travay predikasyon yo a. Konsa, yo deside antre nan sèvis aplentan, oswa yo deside deplase pou y al sèvi kote yo bezwen plis bra. Gen lòt moun ki deside aprann yon lòt lang pou yo ka ede etranje ki deplase vin viv nan tèritwa a, e kantite etranje sa yo ap ogmante chak jou piplis. Si w gen posiblite fè youn nan bagay sa yo, pran sa oserye epi lapriyè sou sa. Lè w viv pou w sèvi moun, sa bay anpil kè kontan, sa bay satisfaksyon e sa fè lespri w an pè. — Eklezyas 5:12.

²² Ann fè sa n kapab pou n kontinye imite Jezi Kris, etan n ap ogmante lanmou nou ni pou verite n ap anseye yo, ni pou moun n ap anseye yo. Lè nou kite lanmou grandi lakay nou, e nou montre nou gen lanmou nan de domèn sa yo, sa pral ede nou poze yon bon baz antanke anseyan k ap imite Kris. Men, ki jan nou ka konstwi sou baz sa a ? Atik ki vini apre yo pral bay detay sou kèk metòd ansèyman Jezi te konn itilize.

[Nòt anba paj]

Ki repons nou ta bay ?

• Ki jan nou fè sèten egzanp Jezi kite antanke anseyan pa nan yon nivo ki twò wo pou nou imite ?

• Ki jan nou ka montre nou renmen verite nou aprann nan Bib la ?

• Poukisa li enpòtan pou nou toujou rete enb menmsi konesans nou ap ogmante ?

• Bay kèk fason nou ka demontre nou renmen moun n ap fè efò pou nou anseye yo ?

[Kesyon]

[Foto nan paj 9]

Fè sa nou kapab pou nou prepare.

[Foto nan paj 10]

Si nou konsidere “konesans Bondye a” tankou yon trezò, n ap ka sèvi ak Bib la yon fason efikas.

[Foto nan paj 11]

Nou demontre nou renmen moun yo lè nou ba yo bon nouvèl la.