Kesyon lektè yo poze

Si yon kretyen ap plede tande vwa k ap pale avè l, èske sa vle di li gen demon sou li pou sa ?

Non. Sa konn rive demon yo manifeste konsa. Toutfwa, anpil moun ki konn tande vwa k ap pale avèk yo, ki konn viv lòt eksperyans yo pa ka esplike oswa ki konn gen yon seri sansasyon ki dwòl, apre yo fin egzamine sitiyasyon yo byen egzamine, yo rann yo kont se maladi doktè yo genyen.

Menm nan premye syèk la, sanble kèk moun ki te gen demon sou yo te konn prezante menm sentòm ak moun ki te gen yon maladi doktè. Matye 17:14-18 pale de yon jèn gason Jezi te geri. Jèn gason sa a te gen yon maladi ki prezante menm sentòm ak malkadi. Poutan, se demon yo ki te lakòz l ap soufri. Men, nan yon okazyon anvan sa, te gen yon foul moun ki te vin jwenn Jezi pou l te geri yo, e pami yo te gen moun ki ‘ gen demon sou yo ak moun ki fè malkadi ’. (Matye 4:24.) Sanble moun yo te konnen se pa tout moun ki gen malkadi ki gen demon sou li. Gen de lè, se senpleman yon maladi doktè moun nan genyen.

Skizofreni se yon maladi mantal, yon maladi souvan yo ka trete avèk medikaman. Men, yo rapòte maladi sa a konn fè kèk moun tande vwa oubyen li ba yo lòt kalite sentòm ki ka parèt mistik. * Gen lòt eta moun konn ye fizikman ki ka fè yo vin gen twoub mantal e kèk moun ka menm panse se demon ki lakòz. Se poutèt sa, lè yon moun remake li tande vwa k ap pale oubyen li gen lòt kalite sansasyon ki dwòl, li pap inyore gen dwa se demon k ap toumante l. Men, yo dwe ankouraje l verifye si pwoblèm li rankontre a pa yon maladi doktè.

[Nòt anba paj]