Ki kesyon ou ta renmen poze Bondye ?

TOUPATOU sou tè a moun ap poze tèt yo anpil gwo kesyon sou lavi a. E ou menm ? Gen anpil moun se anseyan ki nan relijyon yo yo poze kesyon, men yo pa jwenn repons ki satisfè yo. Gen lòt ki tou senpleman kenbe kesyon yo pou yo. Gen lòt menm ki priye pou yo ka jwenn direksyon. Men, èske li vrèman posib pou w jwenn repons nan men Bondye sou kesyon k ap toumante w ? Pami tout kesyon anpil moun di yo ta renmen poze Bondye, nou jwenn kesyon sa yo :

Bondye, ki moun ou ye menm ?

Edikasyon yon moun, relijyon l ak pwòp konsepsyon li deja genyen gen anpil efè sou fason li wè Bondye. Anpil moun bay dye y ap adore a yon non, tandiske gen lòt ki annik rele l Bondye. Èske gen yon pwoblèm nan sa ? Èske vrèman gen yon sèl vrè Dye ki esplike nou ki jan de moun li ye e ki di nou ki jan l rele ?

Poukisa gen tout soufrans sa yo ?

Si yon moun aji avèk neglijans kòmsi anyen pa di l anyen, oubyen l ap mennen yon vi imoral ki fini ak sante l oswa ki lage l nan mizè, li ka ap plenyen. Men li konnen byen ki sa k fè l ap soufri.

Sepandan, gen anpil moun se gade yo gade yo wè y ap soufri. Gen moun menm ki toujou malad. Gen lòt k ap batay pou wè si y a jwenn yon ti kote aseptab pou yo rete, e se nan redi pou yo jwenn ase manje pou fanmi yo. E gen plizyè milyon lòt tou ki viktim anba krim, lagè, vyolans ki fèt san gade dèyè, katastwòf natirèl, oubyen ki sibi enjistis anba men moun ki gen otorite.

 Li nòmal pou moun ap mande tèt yo : ‘ Poukisa tout kote se sitiyasyon sa yo nou jwenn ? Poukisa Bondye pèmèt tout soufrans sa yo ? ’

Poukisa m egziste ? Ki bi lavi a ?

Byen souvan, sa k konn pouse anpil moun poze kesyon sa yo, se degoutans yo genyen dèske yo pa jwenn satisfaksyon nan travay y ap fè chak jou. Yon lòt bò, gen plizyè milyon moun ki panse Bondye te pwograme ki jan vi chak moun ap dewoule. Men, èske se vre ? Anfèt, si Bondye gen yon rezon ki fè l te kreye w, san dout ou ta renmen konnen rezon sa a. Èske se pa vre ?

Nan tout liv ki genyen sou latè, se yon sèl ki di byen klè se sou inspirasyon Bondye li te ekri. Tankou w te ka atann, liv sa a disponib nan plis lang pase tout liv ki ekri, e se nòmal, piske mesaj ki ladan l lan, se Bondye menm ki bay li, se yon mesaj ki konsène tout moun. Men, de ki liv n ap pale ? N ap pale de Lasent Bib. Nan liv sa a, Bondye ki kreye syèl la ak tè a esplike ki jan de moun li ye e li bay non l. Èske w konnen non sa a ? Èske w konnen sa Bib la di sou jan de moun Bondye ye ? Èske w konnen, dapre Bib la, ki sa Bondye vle w fè ?

 [Liy kredi pou foto nan paj 2]

PREMYE PAJ : Chad Ehlers/Index Stock Photography

[Liy kredi pou foto nan paj 3]

Foto mòn nan : Chad Ehlers/Index Stock Photography