Konsole moun ki nan lapenn

“ Jewova wenn mwen [...] pou m konsole tout moun ki andèy. ” — IZAYI 61:1, 2

1, 2. Ki moun nou bezwen konsole, e poukisa ?

JEWOVA, Bondye ki bay vrè konsolasyon an, anseye nou pou nou pran ka moun ki nan malè. Li montre nou pou nou “ pale yon fason pou konsole nanm ki deprime ” e pou nou rekonfòte tout moun ki andèy (1 Tesalonisyen 5:14). Lè se adoratè Jewova parèy nou ki bezwen èd nan sans sa a, nou ba yo l. Men, nou montre moun ki pa fè pati òganizasyon an nou renmen yo tou, li te mèt moun ki pa t vle wè nou anvan sa. — Matye 5:43-48 ; Galat 6:10.

² Jezi Kris te li yon pwofesi ki pale de yon misyon e li te aplike l sou li. Men ki sa pwofesi a di : “ Lespri Jewova, Souvren Seyè a, sou mwen, paske Jewova wenn mwen pou m anonse moun enb yo bon nouvèl. Li voye m panse moun kè yo ap dechire [...] pou m konsole tout moun ki andèy. ” ​(Izayi 61:1, 2 ; Lik 4:16-19). Depi lontan, kretyen wen k ap viv nan epòk nou an konnen yo gen misyon sa a tou e “ lòt mouton ” yo byen kontan ede yo fè travay sa a. — Jan 10:16.

3. Lè moun yo ap mande poukisa Bondye kite malè rive, ki jan nou ka ede yo ?

³ Lè gen katastwòf ki frape yon zòn e ki kite  moun yo ak chagren nan kè yo, souvan yo konn mande : “ Poukisa Bondye kite malè konsa rive ? ” Repons lan byen klè nan Bib la. Sepandan, pou yon moun ki pa etidye Labib, sa ka pran yon ti tan pou l byen konprann repons nou jwenn ladan l. Piblikasyon Temwen Jewova yo bay èd nan sans sa a. * Men, dapre sa nou konstate, gen moun, pou kòmanse, ki santi yo konsole lè yo annik wè yon vèsè nan Bib la tankou Izayi 61:1, 2, piske li esplike jan Bondye ta renmen lèzòm jwenn konsolasyon.

4. Ki jan yon Temwen k ap viv Polòy te ede yon tifi ki deprime ? Ki jan eksperyans sa a ede w wè fason ou ka ede moun ?

⁴ Timoun kou granmoun bezwen konsolasyon. Nan peyi Polòy, yon jèn tifi ki te deprime te mande yon zanmi l kèk konsèy. Avèk jantiyès, zanmi an, yon Temwen Jewova, te poze l kèk kesyon e li te vin wè tifi a gen yon seri dout nan lespri l e dout sa yo te fè tifi a ap poze tèt li yon seri kesyon k ap toumante l tankou : “ Poukisa gen tout mal sa yo ? Poukisa moun ap soufri ? Sa k fè sè m nan ki paralize a ap soufri ? Ki sa k fè m soufri kè ? Yo di nan Legliz la se Bondye ki vle sa konsa. Si se sa, mwen pa bezwen kwè nan li ankò ! ” Temwen an te priye Jewova nan kè l epi li di : “ Mwen byen kontan ou poze m kesyon sa yo. M ap eseye reponn ou. ” Lèfini, Temwen an fè l konnen li menm tou, lè l te timoun, li te konn ap poze tèt li kesyon konsa, men Temwen Jewova te ede l jwenn repons yo. Epi li di l : “ Mwen te aprann se pa Bondye ki fè moun soufri. Li renmen lèzòm, li vle byen pou yo e, talè konsa, li pral fè gwo chanjman sou tè a. Maladi, pwoblèm vyeyès, lanmò, tout sa pral disparèt. Moun ki obeyisan yo pral viv pou toutan isiba, sou planèt sa a. ” Li te montre tifi a Revelasyon 21:3, 4 ; Jòb 33:25 ; Izayi 35:5-7 ak Izayi 65:21-25. Apre yo te fin fè yon bon ti pale, ou te ka wè tifi a te santi l soulaje. Li di : “ Kounye a mwen konnen pou ki rezon m ap viv. Èske mwen ka retounen kote w ? ” Sè a te fè yon etid biblik ak tifi a de fwa pa semèn.

Konsole moun avèk konsolasyon Bondye bay la

5. Ki jan nou ka bay bon konsolasyon lè n ap montre moun yo sa k rive yo a fè nou mal ?

⁵ Lè n ap chèche konsole yon moun, li bon pou nou di l pawòl ki montre sa k rive l la fè nou mal. Se pou nou fè efò pou montre moun nan nou gen sousi pou li nan mo nou itilize e nan ton nou pale. Nou pap ka fè sa si sa n ap di a pa sot nan kè nou. Bib la di “ nou ka gen esperans grasa andirans e grasa konsolasyon nou jwenn nan Ekriti yo ”. (Women 15:4.) Sa fè, nan yon moman ki apwopriye pou sa, nou ka esplike moun nan ki sa Wayòm Bondye a ye. Nou ka sèvi ak Bib la pou nou montre l ki jan Wayòm nan pral rezoud pwoblèm ki gen jodi a. Apre sa, nou ka esplike sa k fè nou met konfyans nou nan espwa Bib la bay la. Nan fason sa a, n ap bay konsolasyon.

6. Pou konsolasyon ki gen nan Bib la ka gen bon efè sou yon moun, ki sa nou bezwen ede l konprann ?

⁶ Lè n ap konsole yon moun, pou sa ka gen bon efè sou li, moun nan bezwen konnen vrè Bondye a, kalite Moun li ye e li bezwen konnen nou ka fè pwomès li yo konfyans. Lè n ap chèche konsole yon moun ki pa ko ap sèvi  Jewova, li bon pou nou esplike l pwen sa yo : 1) Se Jewova, vrè Bondye a, ki bay konsolasyon ki gen nan Bib la. 2) Jewova se Toupisan, se li ki Kreyatè syèl la ak tè a. Li se yon Bondye ki gen lanmou e li chaje ak bonte nan kè l e ak verite. 3) N ap jwenn fòs pou nou andire yon seri de sitiyasyon si nou pwoche bò kote l e n ap fè sa lè nou chèche genyen yon konesans egzak sou Pawòl li. 4) Gen vèsè nan Bib la ki pale sou yon seri eprèv byen presi ki koresponn ak sa kèk moun ap rankontre jodi a.

7. a) Ki sa nou ka rive fè si nou chita sou pwen sa a : konsolasyon Bondye “ bay la vin anpil grasa Kris ” ? b) Ki jan nou ka konsole yon moun ki rann li kont li te gen yon move konduit ?

⁷ Gen frè oubyen sè ki sèvi ak 2 Korentyen 1:3-7 pou yo konsole moun ki nan chagren e ki deja abitye ak Labib. Yo peze sou espresyon “ konsolasyon nou jwenn nan vin anpil tou grasa Kris ”. Vèsè sa a ka ede yon moun konprann Bib la se yon sous konsolasyon li bezwen bay plis enpòtans. Li ka kreye baz pou pale plis sou Bib la, sa ki ka fèt nan yon lòt okazyon. Si yon moun gen enpresyon pwoblèm li yo se konsekans move bagay li te konn fè, san nou pa kritike l, nou ka montre l se yon konsolasyon lè yon moun konnen sa ki di nan 1 Jan 2:1, 2 ak Sòm 103:11-14. Lè nou fè sa, nou vrèman konsole moun yo avèk konsolasyon Bondye bay la.

Lè gen vyolans ak gwo pwoblèm ekonomik

8, 9. Ki jan nou ka konsole moun ki viktim anba vyolans yon fason ki apwopriye ?

⁸ Gen anpil moun, lavi yo gache akoz vyolans, swa vyolans ki fèt nan katye bò lakay yo, swa vyolans ki fèt lè gen lagè. Ki jan nou ka konsole yo ?

⁹ Lè gen konfli nan monn nan, vrè kretyen yo pran prekosyon pou yo pa pran pati pou okenn kan ni nan pawòl y ap di ni nan aksyon y ap fè (Jan 17:16). Men, yo sèvi ak Bib la yon fason ki apwopriye pou yo montre sitiyasyon difisil moun ap viv jodi a pap rete konsa nètale. Yo ka li Sòm 11:5 pou montre jan Jewova wè moun ki renmen vyolans. Yo ka sèvi ak Sòm 37:1-4 pou montre Bondye pa ankouraje nou vanje tèt nou, men pito li ankouraje nou mete konfyans nou nan li. Jezi Kris, Gran Salomon an, ap domine kounye a nan syèl la antanke Wa. Sòm 72:12-14 montre nou sa l santi nan kè l pou inosan ki viktim anba vyolans.

10. Si yon moun fè plizyè ane ap viv kote ki gen lagè, ki konsolasyon li ka jwenn nan vèsè ki site yo ?

¹⁰ Gen moun ki fè vi yo nan sitiyasyon kote ki gen lagè, kote gen kan k ap batay youn ak lòt pou pouvwa. Moun sa yo panse lagè ansanm ak konsekans ki mache avè l yo se yon bagay ki nòmal e sa fè pati lavi a. Sèl fason yo panse yo ka gen yon alemye, se si yo te ka chape poul yo pou y al viv nan yon lòt peyi. Men, pifò ladan yo pa janm reyisi fè sa, e genyen, nan eseye chape, ki tou pèdi lavi yo. Sa ki reyisi travèse nan yon lòt peyi rann yo kont se kouri pou lapli, tonbe nan rivyè. Nan yon ka konsa, nou ka sèvi ak Sòm 146:3-6 pou nou ede moun sa yo mete konfyans yo nan yon bagay ki pi asire pase al viv nan yon lòt peyi. Pwofesi ki nan Matye 24:3, 7, 14 oubyen 2 Timote 3:1-5 kapab ede yo konprann sitiyasyon y ap andire a pi byen. Vèsè sa yo ka ede yo konprann evènman sa yo vle di n ap viv nan fen sistèm de choz sa a. Lòt tèks tankou Sòm 46:1-3, 8, 9 ak Izayi 2:2-4 ka ede yo wè ki bèl espwa ki genyen pou demen : moun pral viv nan lapè.

11. Ki tèks ki te konsole yon madanm ann Afrik oksidantal e poukisa ?

 ¹¹ Ann Afrik oksidantal, nan yon epòk ki te gen yon lagè ki pa t ka fini, gen yon madanm ki te sove kite kay li anba bal. Li te vin ap viv ak kè sote, ak tristès e li te jwenn yon seri gwo desepsyon. Pi devan, pandan fanmi l t ap viv nan yon lòt peyi, mari l te deside boule Ak maryaj li, li te deside mete l deyò, aktout li te ansent, ansanm ak yon pitit yo ki te gen dizan. Mari a te fè sa pou l te ka vin prèt. Yo te li Filipyen 4:6, 7 ak Sòm 55:22 avèk dam sa a e yo te egzamine kèk sijè nan Toudegad ak Réveillez-vous ! avè l. Finalman, li te santi li resi jwenn konsolasyon li t ap chèche a, li te wè pou ki rezon l ap viv.

12. a) Ki jan Labib montre moun k ap viv nan sitiyasyon ekonomik difisil yo gen pou yo delivre ? b) Ki jan yon Temwen ann Azi te ede yon kliyan ?

¹² Gen plizyè milyon moun, se kriz ekonomik ki fini ak lavi yo. Pafwa, se lagè ki konn koz sa. Gen lòt lè, se gouvènman ki gen politik ki pa bay bon rezilta, mete sou otorite ki ava e ki malonèt, ki konn koz moun pèdi tout ti ekonomi yo te fè e ki konn fòse yo bay byen yo posede. Gen moun ki fè tout vi yo, yo pa janm posede anyen. Tout moun sa yo ka jwenn konsolasyon lè yo konnen Bondye asire moun ki fè l konfyans yo l ap delivre yo, lè yo konnen li bay garanti pral gen yo monn ki jis kote moun pral jwi travay yo fè ak men yo (Sòm 146:6, 7 ; Izayi 65:17, 21-23 ; 2 Pyè 3:13). Nan yon peyi ann Azi, gen yon Temwen ki te tande jan yon moun ki te vin achte nan yon magazen t ap plenyen pa rapò ak jan sitiyasyon ekonomik la ye nan peyi a. Li te esplike l sitiyasyon sa a se yon aspè nan sa k ap pase nan monn nan. Li te pale avè l sou Matye 24:3-14 ak Sòm 37:9-11, e sa te debouche sou yon etid biblik.

13. a) Ki jan nou ka sèvi ak Bib la pou nou ede moun ki desi akoz pakèt pwomès ki fèt men ki pa janm reyalize ? b) Nan ka kote moun konsidere move sitiyasyon y ap viv kòm prèv ki montre pa gen Bondye, ki jan nou ka eseye rezone avèk yo ?

¹³ Lè yon moun fè anpil ane ap pase mizè, oubyen li desi akoz pakèt pwomès ki te fèt, men ki pa janm reyalize, li ka vin menm jan ak Izrayelit yo, lè yo te ann Ejip, ki pa t koute paske yo te ‘ dekouraje ’. (Egzòd 6:9.) Nan yon ka konsa, l ap byen itil si w montre moun nan fason Bib la ka ede l byen debouye l anba pwoblèm l ap rankontre jodi a ak fason li ka evite pyèj ki gache lavi anpil moun pou granmesi (1 Timote 4:8b). Anpil moun ka konsidere move sitiyasyon y ap viv kòm prèv ki montre pa gen Bondye, oswa Bondye pa gen okenn sousi pou yo. Pou w ede yon moun konsa, ou ka rezone avèk li sou yon seri vèsè ki apwopriye, yon seri vèsè ki montre Bondye ofri èd li, men anpil moun refize l. — Izayi 48:17, 18.

Lè gen siklòn ak tranblemanntè

14, 15. Ki jan Temwen yo te pran ka moun ki te sou emosyon akoz yon atak teworis te fè ?

¹⁴ Siklòn, tranblemanntè, dife oubyen eksplozyon konn plonje moun nan malè. Sa konn lage anpil moun nan chagren. Ki konsolasyon nou ka pote bay moun ki chape yo ?

¹⁵ Moun yo bezwen konnen gen yon moun ki gen sousi pou yo. Apre yon atak teworis te fin fè nan yon peyi, gen anpil moun ki te sou emosyon. Anpil ladan yo te pèdi moun nan fanmi yo, yo te pèdi moun ki te konn pran swen yo oubyen yo te pèdi zanmi yo. Genyen ki te pèdi travay yo. Genyen tou ki te panse yo byen chita, men ki vin rann yo kont sa yo te panse a se pa sa. Temwen Jewova yo t al ede moun ki rete bò lakay yo, yo te di yo jan malè ki rive yo a fè yo mal e yo te ba yo konsolasyon ki soti nan Bib la. Gen anpil moun ki te kontan jan Temwen yo pran ka yo.

16. Apre yon tranblemanntè te fin frape Salvadò, sa k fè de sè te jwenn bon rezilta nan predikasyon ?

¹⁶ Nan ane 2001, apre yon gwo tranblemanntè te fin pase Salvadò, anpil moun te mouri anba gwo mas labou. Gen yon Temwen ki te pèdi yon pitit gason l ki te gen 25 an e fyanse pitit gason an te pèdi de sè l. Menm kote a, manman frè ki mouri a ansanm ak tout fyanse a te vin travay anpil nan predikasyon. Gen anpil moun ki te di yo se Bondye ki pran moun ki mouri yo. Genyen ki di sa k rive a se volonte Bondye. Temwen yo te sèvi ak Pwovèb  10:22 pou yo montre Bondye pa ta renmen nou soufri. Yo te li Women 5:12 pou montre se peche ki fè gen lanmò, se pa t volonte Bondye pou moun mouri. Yo montre konsolasyon ki genyen nan Sòm 34:18, Sòm 37:29, Izayi 25:8 ak Revelasyon 21:3, 4. Moun yo te koute yo, sitou de sè yo te gen moun pa yo ki mouri tou nan tranblemanntè a. Sa te fè yo jwenn anpil etid biblik.

17. Lè gen katastwòf ki pase, ki kalite èd nou ka bay ?

¹⁷ Lè gen katastròf ki frape yon zòn, ou ka rankontre moun ki gen ka ijan. Yo ka bezwen pou yo rele doktè pou yo oubyen pou yo mennen yo lopital. Yo ka bezwen moso manje oubyen yon kote pou yo rete. An 1998, te gen yon katastwòf ki te pase ann Itali, e nan okazyon sa a, dapre sa yon jounalis te di, Temwen Jewova yo te “ byen òganize bagay yo yon fason pou yo te ka lonje men bay moun ki nan nesesite. Yo te fè sa san yo pa chèche konnen nan ki relijyon moun yo ye. ” Gen zòn, evènman yo te predi ki gen pou rive nan dènye jou yo lage moun nan gwo soufrans. Lè konsa, Temwen Jewova yo montre moun yo pwofesi ki gen nan Bib la. Yo konsole yo grasa asirans Bib la bay ki montre Wayòm Bondye a pral fè lèzòm viv ak kè poze toutbonvre. — Pwovèb 1:33 ; Mika 4:4.

Lè yon moun gen yon fanmi l ki mouri

18-20. Lè gen moun ki mouri nan yon fanmi, ki sa w ka di e ki sa w ka fè pou w konsole moun yo ?

¹⁸ Chak jou, se pa ni de ni twa milyon moun ki nan chagren poutèt yo gen yon moun ki mouri. Ou ka rankontre ka konsa nan predikasyon oubyen lè w nan aktivite pa w. Ki sa w ka fè pou konsole yo ?

¹⁹ Èske depi w gade moun nan ou wè l nan gwo lapenn ? Èske plen moun nan kay la ki nan lapenn tou ? Petèt gen anpil bagay ou ta renmen di yo, men li enpòtan pou nou gen bon jijman (Eklezyas 3:1, 7). Sa k ta ka pi bon nan yon sikonstans konsa, se prezante moun nan kondoleyans ou, se kite yon piblikasyon ki apwopriye nan men yo (yon bwochi,  yon peryodik oubyen yon feyè) san ou pa bliye pase vizite yo apre detwa jou pou wè sa w ka fè. Lè moman an apwopriye, mande moun nan pou w fè yon ti pale sou kèk pwen ankourajan nou jwenn nan Bib la. Sa ka soulaje l e sa ka fè l santi l byen (Pwovèb 16:24 ; 25:11). Ou pa ka fè menm jan ak Jezi pou resisite moun ki mouri a, se vre, men ou ka di l sa Bib la di sou kondisyon mò yo. Natirèlman, se pa lemoman pou n ap eseye retire fo doktrin nan tèt moun nan (Sòm 146:4 ; Eklezyas 9:5, 10 ; Ezekyèl 18:4). Ou ka li pwomès Bib la ansanm avè l ki montre moun pral resisite (Jan 5:28, 29 ; Travay 24:15). Ou ka pale sou enpòtans pwomès sa a genyen, e si sa posib, ou ka pale de yon rezirèksyon Bib la rapòte ki te fèt (Lik 8:49-56 ; Jan 11:39-44). Ou ka atire atansyon moun nan sou bèl kalite Bondye ki gen lanmou an genyen, Bondye ki ban nou esperans sa a (Jòb 14:14, 15 ; Jan 3:16). Esplike moun nan ki pwofi ou menm ou tire nan sa Bib la di a e fè l konnen ki rezon ki fè w kwè ladan l.

²⁰ Ou ka envite moun nan nan Sal Wayòm. Petèt sa ka ede l fè konesans ak moun ki renmen pwochen yo toutbonvre e ki konnen ki jan pou yo ankouraje youn lòt. Gen yon dam an Syèd ki rekonèt se sa li t ap chèche pandan tout vi l. — Jan 13:35 ; 1 Tesalonisyen 5:11.

21, 22. a) Lè n ap bay konsolasyon, ki sa sa mande pou nou fè ? b) Ki jan ou ka konsole yon moun ki deja gen konesans sou Bib la ?

²¹ Lè w konnen gen yon moun ki nan lapenn, kit li Temwen Jewova kit li pa Temwen Jewova, èske pafwa ou santi w pa konn sa pou w di l, ou pa konn sa pou w fè pou li ? Mo grèk “ konsolasyon ” tradui a vle di mo pou mo “ yon envitasyon pou al bò kote yon moun ”. Pou w yon bon konsolatè, sa mande pou w rann ou disponib pou moun ki nan lapenn. — Pwovèb 17:17.

²² E si moun ou vle konsole a deja konnen sa Bib la di sou lanmò, sou ranson an ak sou rezirèksyon ? Prezans ou sèlman antanke zanmi ki gen menm kwayans avè l ka rekonfòte l. Si moun nan bezwen pale, tande l. Ou pa bezwen panse w oblije fè yon diskou. Si sa rive nou li vèsè biblik, montre se nou toule de ki jwenn fòs nan sa Bondye di a. Pale de konviksyon nou toule de genyen nan asirans ki kache dèyè pwomès biblik sa yo. Si w imite konpasyon Bondye genyen e si w pale moun yo de bèl verite ki gen nan Pawòl Bondye a, ou ka ede moun ki nan lapenn yo jwenn konsolasyon ak fòs nan men Jewova, “ Bondye tout konsolasyon an ”. — 2 Korentyen 1:3.

[Nòt anba paj]

Ki sa w ta di ?

• Kiyès anpil moun bay tò lè malè rive yo ? Ki jan nou ka ede yo ?

• Ki sa nou ka fè pou nou ede moun yo tire anpil pwofi nan konsolasyon Bondye bay la ?

• Ki sa k konn rive nan zòn pa w ki lage moun yo nan lapenn ? Ki jan ou ka konsole yo ?

[Kesyon]

[Foto nan paj 30]

Bay yon mesaj ki gen bonjan konsolasyon nan moman difisil.

[Liy kredi]

Kan refijye : UN FOTO 186811/J. Isaac

[Foto nan paj 31]

Prezans yon zanmi sèlman, ka yon konsolasyon.