“ Se pou nou gen yon bon konsyans ”

“AJI selon konsyans ou ” se yon konsèy moun abitye tande. Men pou konsyans nou sèvi nou yon bon gid, nou bezwen byen fòme l sou sa ki byen ak sa ki mal e nou bezwen toujou prèt pou nou koute sa l di nou.

Annou konsidere istwa yon mesye ki te rele Zache. Jan sa rapòte nan Bib la, Zache t ap viv nan yon vil ki rele Jeriko. Se te yon prepoze kontribisyon ki te rich. Li te rekonèt se nan kase ponyèt moun li te ranmase richès sa a. E sa pa t manke pa fè moun li te konn fè abi yo soufri. Men, èske konsyans Zache te konn toumante l pou enjistis li te konn ap fè ? Si se ta sa, sanble li pa t konn okipe konsyans li. — Lik 19:1-7.

Sepandan, gen yon sitiyasyon ki te rive e ki te fè Zache egzamine tèt li parapò ak fason li te konn ap aji. Se te lè Jezi te rive Jeriko. Zache te anvi wè l ak pwòp je l, men akoz li te twò kout, foul moun nan bare l. Konsa, li te kouri pran devan foul la epi li monte sou yon pye bwa pou l ka wè Jezi pi byen. Jezi te tèlman remake jan Zache enterese pou l wè l, li te di l li pral lakay li. Zache te byen kontan akeyi envite espesyal sa a lakay li.

Sa Zache te tande nan konvèsasyon li te genyen ansanm ak Jezi a te touche kè l e sa te pouse l chanje fason li te konn aji. Men sa li te di li pral fè : “ Gade ! Seyè, tout sa m genyen m ap bay pòv yo mwatye ladan l e kèlkeswa sa m te pran nan men yon moun nan move kondisyon, nan fè fo akizasyon, m ap remèt li kat fwa lavalè. ” — Lik 19:8.

Konsyans Zache te vin reveye, li te koute l, li te obeyi l. E li pa t pran tan pou l te wè bon rezilta sa te bay. Imajine jan Zache te kontan lè Jezi te di l : “ Jodi a delivrans lan rive nan kay sa a. ” — Lik 19:9.

Ala yon egzanp ankourajan ! Egzanp sa a montre nou kèlkeswa jan de vi nou t ap mennen, nou ka chanje. Menm jan ak Zache, nou ka koute pawòl Jezi nou jwenn nan Bib la e nou ka devlope bon jijman nou gen lakay nou an rapò ak sa ki byen e ak sa ki mal. Si nou aji konsa, n ap ka suiv envitasyon apot Pyè fè a lè l di “ pou nou gen yon bon konsyans ”. N ap ka tande konsyans nou ki byen fòme e n ap ka fè sa ki byen. — 1 Pyè 3:16.