Don ki fè Bondye plezi

JEZI ak disip li yo t ap manje yon bon repa ak plizyè lòt zanmi entim nan zòn Betani. Mari ak Mat te la tou ansanm ak Laza ki te fèk resisite. Mari pran yon demi lit luil ki koute byen chè li vide l sou pye Jezi. Lè sa a Jida Iskaryòt kontrarye, li pwoteste e l di konsa : “ Poukisa yo pa t vann luil santi bon sa a pou twa san denye (ki koresponn ak salè yon ane) epi yo ta bay pòv li ? ” Lamenm lòt yo te pran plenyen menm jan an tou. — Jan 12:1-6 ; Mak 14:3-5.

Sepandan, Jezi te reponn : “ Kite l trankil. [...] Paske nou toujou gen pòv avèk nou, e lè n vle nou toujou ka fè byen pou yo, men mwen menm nou pa toujou genyen m. ” ​(Mak 14:6-9). Dapre sa chèf relijye juif yo te anseye, don charite se pa sèlman yon bagay ki gen anpil valè sou plan moral men li kapab menm repare peche. Jezi, bò kote pa l, montre aklè don ki fè Bondye plezi a pa rete sèlman nan fè pòv charite.

Yon brèf koudèy sou fason premye kongregasyon yo te konn fè don pral pèmèt nou wè klè fason pratik nou kapab montre nou gen sousi pou moun e konsa don nou yo ap fè Bondye plezi. Sa pral montre nou tou kalite don ki pi bon an.

“ Bay don mizerikòd ”

Nan anpil okazyon, Jezi te ankouraje disip li yo pou yo “ bay don mizerikòd ”, oswa tankou yon lòt tradiksyon di l, “ separe lajan an bay pòv ” ​(Lik 12:33 ; Bib la). Sepandan, Jezi te mete moun yo an gad kont tandans pou fè wè, nan entansyon pou glorifye moun k ap bay la olye pou glorifye Bondye. Li te di : “ Lè w ap fè don mizerikòd, pa sonnen twonpèt devan w, tankou ipokrit yo fè nan sinagòg yo ak nan lari yo, pou moun ka fè lwanj pou yo. ” ​(Matye 6:1-4). Pou mete avètisman sa a an pratik, premye kretyen yo te konn evite fè moun wè tankou chèf relijye nan epòk yo a te konn fè sa e yo te chwazi ede moun ki nan bezwen lè yo rann yo sèvis pèsonèl oswa lè yo ba yo kado an prive.

Pa egzanp nan Lik 8:1-3, yo di nou Mari Magdalèn, Jàn, Sizàn ak lòt medam ankò te sèvi ak “ byen yo te genyen ” avèk imilite pou soutni  Jezi ak apot li yo. Malgre mesye sa yo pa t pòv, yo te abandone byen yo te genyen pou yo konsantre efò yo sou ministè a sèlman (Matye 4:18-22 ; Lik 5:27, 28). Annefè, medam sa yo glorifye Bondye lè yo te ede mesye yo akonpli misyon Bondye te konfye yo a. E Bondye te montre li apresye sa lè li fè ekri nan Labib jan yo te demontre yo donan e yo gen mizerikòd, yon fason pou tout jenerasyon alavni kapab li sa. — Pwovèb 19:17 ; Ebre 6:10.

Dòka se te yon lòt dam ki te gen bonjan e ki “ te konn fè anpil zèv ak anpil don mizerikòd ”. Nan vil Jope kote l te abite, yon vil ki te bò lanmè, li te konn fè rad pou vèv ki nan bezwen. Nou pa konnen si se li ki te konn peye pou tout founiti yo oswa si se kòb mendèv la sèlman li pa t konn pran nan men yo. Toutfwa, akoz bon travay li te fè, tout moun li te konn ede yo te renmen l e Bondye ki plen mizerikòd la e ki te renmen l menm jan an tou te rekonpanse l pou byenveyans li. — Travay 9:36-41.

Bon entansyon trèzenpòtan

Ki sa ki te motive moun sa yo pou yo bay ? Se pa t yon senp konpasyon devan yon moun ki sipliye yo pou vin pote l sekou. Se yo menm pèsonèlman chak jou ki te santi li bon pou yo fè sa yo kapab pou ede moun ki pòv, moun ki nan malè, moun ki malad e ki gen lòt difikilte (Pwovèb 3:27, 28; Jak 2:15, 16). Se kalite don konsa ki fè Bondye plezi. Toudabò, se te pwofon lanmou pou Bondye ak dezi pou imite mizerikòd li ak jenewozite li ki te pouse yo fè sa. — Matye 5:44, 45 ; Jak 1:17.

Apot Jan te souliye aspè enpòtan sa a ki gen nan fè don lè l te di : “ Men, yon moun ki gen mwayen nan monn nan e ki wè frè l nan nesesite e malgre sa li fèmen pòt kè sansib li a sou li, nan ki sans lanmou Bondye a rete nan li ? ” ​(1 Jan 3: 17). Repons lan byen klè. Lanmou pou Bondye pouse moun fè zèv. Bondye apresye sa e li rekonpanse moun ki montre yo gen yon etadespri donan menm jan avè l (Pwovèb 22:9 ; 2 Korentyen 9:6-11). Èske nou wè kalite jenewozite sa a jodi a ? Annou konsidere sa ki te rive tou dènyèman nan yon kongregasyon Temwen Jewova.

Gen yon dam aje, yon kretyèn, ki te gen kay li ki te bezwen bonjan reparasyon. Li t ap viv poukont li e l pa t gen fanmi ki pou ede l. Pandan plizyè ane, li te konn bay kay li pou fè reyinyon kongregasyon an, e souvan li te konn pataje yon repa ak moun ki te aksepte envitasyon l te fè yo (Travay 16:14, 15, 40). Lè manm kongregasyon an wè nan ki sitiyasyon grav li twouve l, yo te met tèt yo ansanm pou ede l. Genyen ki te bay lajan, gen lòt ki te ofri fòs kouraj yo pou travay. Nan kèk wikenn, volontè yo te mete yon twati tounèf, yo enstale yon nouvo saldeben, yo fè randuisaj nan tout premye etaj la, yo pentire l, e yo te enstale yon plaka tounèf nan  kuizin nan. Non sèlman don yo a te satisfè dam nan, men tou, zèv sa a te pèmèt manm kongregasyon an vin pwòch youn ak lòt e egzanp sa a, ki montre jan vrè kretyen yo donan, te enpresyone vwazen yo.

Gen anpil fason nou kapab ede lòt moun pèsonèlman. Èske nou kapab pase yon ti tan avèk yon tigason oswa yon tifi ki san papa ? Èske nou kapab koud oswa fè kèk acha pou yon granmoun nou konnen ki vèv ? Èske nou kapab kuit manje oswa kouvri yon depans pou yon moun ki pa gen gwo mwayen ? Menmsi nou pa rich, nou kapab bay èd. Apot Pòl te ekri : “ Si volonte a la anvan, li aseptab sitou selon sa moun nan genyen, e non selon sa l pa genyen. ” ​(2 Korentyen 8:12). Èske se bay don pèsonèl dirèk sèlman Bondye ap beni ? Non.

E nan ka operasyon sekou ?

Gen de lè efò pèsonèl pa sifi. Annefè, Jezi ak apot li yo te gen yon kès pou pòv, e yo te konn aksepte kontribisyon nan men moun ki gen lanmou yo te konn rankontre nan travay yo a (Jan 12:6 ; 13:29). Menm jan an tou, lè sa te nesesè, kongregasyon premye syèk yo te konn ranmase lajan e yo te konn òganize gwo operasyon sekou. — Travay 2:44, 45 ; 6:1-3 ; 1 Timote 5:9, 10.

Nan zòn ane 55 nan epòk nou an, te gen yon okazyon konsa ki te prezante, lè kongregasyon nan Jide yo te tonbe nan mizè. Petèt sa te rive akoz gwo grangou ki te fèk fin frape zòn nan (Travay 11:27-30). Apot Pòl, ki te toujou ap sousye l de pòv yo, te mande kongregasyon yo pou yo potekole, menm kongregasyon ki te lwen tankou kongregasyon Masedwàn. Pèsonèlman li te òganize yon kotizasyon e li te chwazi moun ki apwouve pou voye al fè distribisyon an (1 Korentyen 16:1-4 ; Galat 2:10). Ni li menm ni lòt yo pa t resevwa lajan pou sèvis yo te fè a. — 2 Korentyen 8:20, 21.

Jodi a tou, Temwen Jewova yo tou pare pou pote èd yo lè gen katastwòf ki frape yon zòn. Pandan ete 2001 an pa egzanp, yon tanpèt te fè gwo inondasyon nan Youstonn, Tegzas, Ozetazini. Antou, te gen 723 kay Temwen Jewova ki te sibi domaj, anpil nan kay sa yo te nan yon move eta. Lapoula, yo te fòme yon komite sekou pou katastwòf avèk ansyen, kretyen ki kalifye, pou detèmine moun ki nan bezwen, pou distribye fon sekou bay Temwen nan zòn dezas la, pou ede yo fè fas ak sitiyasyon an e pou repare kay yo. Se volontè nan kongregasyon vwazin yo ki te akonpli tout travay la. Gen yon Temwen ki te tèlman rekonesan pou èd sa a, lè l te resevwa lajan konpayi asirans li te ba l pou repare kay li a, imedyatman li pran lajan an li bay li nan fon sekou a pou ede lòt moun ki nan bezwen.

 Konsènan òganizasyon k ap fè zèv yo, nou bezwen pridan lè n ap egzamine demann n ap plede resevwa. Kèk òganizasyon k ap fè zèv gen gwo administrasyon oubyen yo fè depans nan fè piblisite pou ankouraje moun fè don e yo kite sèlman yon ti pòsyon nan lajan yo ranmase a pou sa yo te prevwa fè a. Pwovèb 14:15 di : “ Yon moun ki nayif kwè nan tout pawòl, men moun ki entèlijan an fè atansyon kote l ap met pye l. ” Konsa, nòmalman li saj pou nou egzamine fè yo avèk anpil swen.

Don ki pi bon an

Gen yon don ki pi enpòtan toujou pase fè zèv. Jezi te pale de sa lè yon jèn chèf rich te mande l ki sa l dwe fè pou l jwenn lavi etènèl. Jezi te di l : “ Al vann sa w genyen e bay pòv epi w ap gen yon trezò nan syèl, e vin suiv mwen. ” ​(Matye 19:16-22). Nou remake Jezi pa t senpleman di l : ‘ Bay pòv epi w ap jwenn lavi. ’ Men pito, li te ajoute : “ Vin suiv mwen. ” Sa siyifi, menmsi sa bon e sa itil pou moun fè zèv, pou yon moun disip Kris, sa mande plis pase sa.

Prensipal objektif Jezi se te ede lòt yo espirityèlman. Yon ti tan anvan l mouri li te di Pilat : “ Se poutèt sa mwen fèt, e se poutèt sa mwen vini nan lemonn : pou m rann temwayaj pou laverite. ” ​(Jan 18:37). Pandan li te pran latèt nan ede pòv, nan geri moun ki malad, nan bay moun ki grangou manje, avantou Jezi te montre disip li yo preche (Matye 10:7, 8). Anfèt, nan dènye enstriksyon l t ap bay yo te gen kòmandman sa a : “ Ale non, epi fè disip pami moun tout nasyon. ” — Matye 28:19, 20.

Se vre, predikasyon pa pral rezoud tout pwoblèm limanite. Men, pataje bon nouvèl Wayòm nan ak tout kalite moun glorifye Bondye paske predikasyon an akonpli volonte Bondye e li louvri wout pou moun ki aksepte mesaj ki sot nan Bondye a jwenn byenfè etènèl (Jan 17:3 ; 1 Timote 2:3, 4). Poukisa w pa koute sa Temwen Jewova yo gen pou yo di pwochèn fwa yo pase lakay ou ? Yo vin ak yon kado espirityèl. E yo konnen se pi bon fason yo kapab fè w yon don.

[Foto nan paj 6]

Gen plizyè fason pou montre nou pran ka moun.

[Foto nan paj 7]

Lè nou preche bon nouvèl la sa fè Bondye plezi e sa louvri wout pou byenfè etènèl.