Èske se senpleman yon koutim oswa se koripsyon ?

NAN kèk kolèj an Polòy, elèv yo gen abitid ranmase lajan pou achte kado pou pwofesè yo, ak espwa y ap jwenn pi bèl nòt nan egzamen. Nou pa bezwen mande ki jan yon jèn kretyèn ki rele Katarzyna t ap fè fas ak yon sitiyasyon difisil. Li t ap mande tèt li : “ Èske m ta dwe bay kòb oswa èske m pa ta dwe bay ? ” Etidyan parèy li yo te rezone avè l konsa : “ Se yon koutim tout moun aksepte. Pa gen anyen pou w pèdi, men w ap benefisye anpil. Donk, sa w pè la a ? ”

Men sa Katarzyna rekonèt : “ Mwen dwe admèt nan premye ane etid mwen, mwen te patisipe nan kotizasyon an. Se sèlman apre, mwen vin rann mwen kont nan fason sa a m ap ankouraje koripsyon, sa ki kondane nan Bib la. ” Li sonje vèsè ki montre Jewova pa dakò ditou ak koripsyon (Detewonòm 10:17 ; 16:19 ; 2 Kwonik 19:7). Katarzyna di : “ Mwen te konprann kòman sa fasil pou yon moun pran nan presyon kamarad ou ap fè sou ou. Mwen fè yon lòt refleksyon e depi lè a mwen pa janm patisipe nan koutim sa a ankò. ” Pandan twa dènye ane yo, malgre lòt etidyan ap pase l nan jwèt, li te kapab esplike kèk ladan yo se akoz kwayans li ki baze sou Bib la ki fè li pa patisipe nan “ kado ” sa yo.

Gen elèv ki akize Katarzyna, yo di li egoyis e li pa sosyab. Men sa Katarzyna di : “ Mwen toujou pa alèz ak kèk ladan yo. Yon lòt bò, anpil ladan yo respekte pwennvi m nan, e sa fè m kontan. ” Yo te vin konnen Katarzyna kòm youn nan Temwen Jewova k ap obsève prensip ki gen nan Bib la chak jou nan lavi l.