“ Li ranpli yon twou vid nan kè m ”

“ MWEN di nou mèsi ak tout kè m, pou bèl kado sa a : liv Approchez-vous de Jéhovah a. Li ranpli yon twou vid nan kè m, anpalan de nesesite m te genyen pou m santi Jewova renmen m, Jewova cheri m. Kounye la a, mwen santi m tèlman pi pre Jewova ak Pitit li a li renmen anpil la. Mwen vle fè tout moun konnen liv sa a e mwen vle bay chak moun pa m youn. ” Se santiman sa a yon Temwen Jewova te eksprime konsènan liv 320 paj sa a ki te parèt nan kongrè distri “ Moun ki zele nan preche Wayòm nan ” ki te fèt an 2002/03. Annou egzamine kèk aspè nan nouvo liv la, e annou wè poukisa yo te pibliye l.

Kèk aspè nan nouvo liv la

Ki sa ki genyen nan nouvo liv la ? Li gen tout enfòmasyon ki parèt nan de dènye atik etid ki nan nimewo sa a, e li gen anpil lòt toujou ! Liv la gen 31 chapit, e chak chapit sa yo gen apeprè menm longè ak yon atik etid Toudegad. Apre entwodiksyon an ak twa premye chapit yo, liv la divize an kat seksyon, youn pou chak kalite prensipal Jewova yo. Chak seksyon kòmanse ak yon rale sou kalite yo pral egzamine a. Apre sa, yo pran kèk chapit pou yo montre ki jan Jewova manifeste kalite sa a. Nan chak seksyon, nou jwenn yon chapit sou Jezi. Poukisa ? Nou pap bliye, Jezi te di : “ Moun ki wè m wè Papa a tou. ” ​(Jan 14:9). Jezi se reflè Jewova, yon reflè ki san defo. Konsa, lè w gade lavi Jezi, ou kapab wè kalite Bondye yo ann aksyon. Nan fen chak seksyon, gen yon chapit ki montre nou ki jan nou kapab imite Jewova lè nou demontre kalite y ap egzamine a. Nouvo liv sa a k ap egzamine kalite Jewova yo voye nou nan tout liv ki nan Bib la.

Liv Approchez-vous de Jéhovah a gen kèk lòt aspè ki enteresan. Depi nan chapit 2 a, gen yon kare nan chak chapit ki rele : “ Éléments de méditation ”. Vèsè yo bay yo ansanm ak kesyon yo poze yo pa la pou fè revizyon sou chapit la. Yo la pito pou ede nou sèvi ak Bib la pou nou medite afon sou sijè a. Nou bezwen li chak vèsè avèk anpil atansyon. Apre sa, reflechi sou kesyon yo poze a, epi fè efò pou nou aplike pwen an nan lavi nou. Si nou fè sa konsa, sa ka fè kè nou vibre, e sa ap ede nou pwoche pi pre Jewova toujou. — Sòm 19:14.

Yo te chwazi imaj ki nan liv Approchez-vous de Jéhovah a avèk swen e yo te prepare yo yon fason pou anseye nou epi pou pouse nou aji. Gen disèt chapit ki gen bèl imaj sou yon seri sèn biblik, e imaj sa yo pran tout yon paj pou yo.

Poukisa yo te pibliye liv sa a ?

Poukisa yo te pibliye liv Approchez-vous de Jéhovah a ? Prensipal objektif nouvo piblikasyon sa a se pou ede nou rive konnen Jewova pi byen, yon fason pou nou bati yon relasyon ki pi solid avèk Bondye nou an.

Èske w panse a yon moun ki ta ka tire pwofi nan liv Approchez-vous de Jéhovah a, tankou yon etidyan Labib, oubyen menm yon frè oswa yon sè ki vin inaktif ? E ou menm ? Èske w deja kòmanse li nouvo liv sa a ? Si w poko fè sa, poukisa w pa pwograme yon tan pou w kòmanse li l kou sa posib ? Pran tan pou w reflechi sou sa w ap li a. Nou swete pou nouvo piblikasyon sa a ede w pwoche pi pre Jewova Dye toujou, yon fason pou w pwoklame bon nouvèl Wayòm li an ak plis kè kontan, ak plis zèl.