Èske nou vrèman bezwen moun ?

“ LÈ NOU egzamine vi nou ak aktivite nou, nou rann nou kont byen vit prèske tout sa n ap fè ak tout sa nou vle gen rapò ak egzistans lòt moun. ” Remak sa a, se yon syantifik anpil moun konnen ki rele Albert Einstein ki te fè l. Men sa l te ajoute : “ Nou manje manje lòt moun pwodui, nou mete rad lòt moun fè, nou viv nan kay lòt moun bati. [...] Chak moun se sa li ye a li ye, e li gen valè li genyen an, non pa akoz sa li menm li reprezante, men antanke manm yon gran kominote moun k ap dirije egzistans materyèl ak espirityèl li depi lè l fèt jiskaske l mouri. ”

Nan mitan bèt yo, li fasil pou nou wè yo rete ansanm pa ensten. Elefan yo deplase an gwoup pandan y ap pwoteje pitit yo. Femèl lyon yo fè lachas ansanm e yo pataje sa yo pran yo ak mal yo. Dofen yo jwe ansanm e yo konn menm pwoteje lòt bèt oswa najè ki an detrès.

Sepandan, sosyològ yo remake lakay moun yon tandans ki bay kè kase chak jou pi plis. Selon yon jounal yo pibliye nan peyi Meksik, gen sosyològ ki panse “ piske moun yo pase plizyè dizèn ane ap izole yo, e kòm lavi an kominote a vin deteryore, sa vin lakòz gwo domaj sou moun k ap viv Ozetazini ”. Jounal la di : “ Byennèt nasyon an depann de chanjman pwofon ki pou fèt nan sosyete a e sa enplike yon retou nan lavi an kominote. ”

Pwoblèm sa a gaye espesyalman pami moun k ap viv nan peyi devlope yo. Nan peyi sa yo gen yon tandans pou anpil moun izole yo, e tandans sa a ap ogmante rapidman. Moun yo vle ‘ viv ti vi yo ’ e yo lite pou anpeche moun ‘ antre nan vi prive yo ’. Gen moun ki fè konnen atitid sa a fè moun ki nan sosyete a tonbe pi fasil nan pwoblèm afektif, nan depresyon ak nan touye tèt yo.

Sou pwen sa a, doktè Daniel Goleman deklare : “ Izòlman sosyal, sa vle di lefètke yon moun pa gen okenn lòt moun pou l pataje santiman entim li yo oswa pou l kenbe yon kontak sere, sa double posiblite pou l malad oswa pou l mouri. ” Dapre konklizyon yon rapò ki te pibliye nan jounal Science, ‘ nan pousantaj moun k ap mouri ’, izòlman sosyal ‘ nan menm kategori ak abitid fimen, tansyon, kolestewòl, [moun ki] gwo depase ak manke fè egzèsis ’.

Donk, pou plizyè rezon diferan, nou vrèman bezwen moun. Nou pa kapab izole nou. Nan ka sa a, kòman nou kapab rezoud pwoblèm izòlman an ? Ki sa ki bay lavi anpil moun yon vrè sans ? Atik k ap vin apre a pral reponn kesyon sa yo.

[Antrefilè nan paj 3]

“ Prèske tout sa nou fè ak tout sa nou vle gen rapò ak egzistans lòt moun. ”— Albert Einstein.