Kesyon lektè yo poze

De ki moun Pòl t ap pale lè l te itilize ekspresyon “ non kwayan ” nan 2 Korentyen 6:14 la ?

Nan 2 Korentyen 6:14, men sa nou li : “ Pa mete tèt nou anba jouk miwomiba avèk non kwayan. ” Si nou gade kontèks la, li evidan Pòl t ap pale de moun ki pa t manm kongregasyon kretyèn nan. Gen lòt vèsè nan Bib la, kote Pòl itilize ekspresyon “ non kwayan ” an, ki apiye konpreyansyon sa a.

Pa egzanp, nan 1 Korentyen 6:6, Pòl reprimande kretyen yo poutèt yo t al nan tribinal “ devan non kwayan ”. Non kwayan sa yo se jij ki te an fonksyon nan vil Korent. Nan dezyèm lèt Pòl te ekri kretyen Korent yo, li di Satan “ vegle entèlijans non kwayan yo ”. Je non kwayan sa yo te “ vwale ” parapò ak bon nouvèl la. Yo pa t manifeste okenn enterè pou yo sèvi Jewova, piske yon ti tan anvan sa, Pòl te di : “ Lè yon moun tounen vin jwenn Jewova, vwal la soti. ” — 2 Korentyen 3:16 ; 4:4.

Gen kèk non kwayan ki mele nan pratik ilegal, oswa nan idolatri (2 Korentyen 6:15, 16). Sepandan, se pa yo tout ki opoze ak sèvitè Jewova yo. Gen ladan yo ki montre enterè pou laverite. Anpil nan yo gen konjwen yo ki kretyen e yo byen kontan rete avèk yo (1 Korentyen 7:12-14 ; 10:27 ; 14:22-25 ; 1 Pyè 3:1, 2). Jan nou sot wè la a, Pòl toujou aplike ekspresyon “ non kwayan ” an nan ka moun ki pa fè pati kongregasyon kretyèn nan, ki konpoze li menm ak moun ki “ kwayan nan Seyè a ”. — Travay 2:41 ; 5:14 ; 8:12, 13.

Prensip nou jwenn nan 2 Korentyen 6:14 la se yon gid ki gen anpil valè pou kretyen yo nan tout sitiyasyon nan lavi a, e souvan yo site l pou bay moun k ap chèche konjwen yo konsèy ki saj (Matye 19:4-6). Yon kretyen ki vwe tèt li bay Bondye e ki batize, lojikman, li pap chèche konjwen pami non kwayan, etandone prensip moral moun ki non kwayan yo, objektif yo ak kwayans yo pa menm ditou ak pa vrè kretyen yo.

Men, e moun k ap etidye Labib e ki asosye yo ak kongregasyon kretyèn nan ? E moun ki pwoklamatè ki poko batize yo ? Èske yo se non kwayan ? Non. Moun ki aksepte verite ki nan bon nouvèl la e ki ap fè bonjan pwogrè pou yo batize, yo pa dwe rele yo non kwayan (Women 10:10 ; 2 Korentyen 4:13). Anvan Kònèy te batize, yo te pale de li kòm “ yon nonm ki te fèvan e ki te gen krent pou Bondye ”. — Travay 10:2.

Alò, èske li saj pou yon kretyen ki batize ap chèche renmen epi pou l marye ak yon moun yo aksepte kòm pwoklamatè ki poko batize, etandone konsèy Pòl bay nan 2 Korentyen 6:14 la, nan yon sans strik, pa aplike nan ka sa a ? Non, li pa saj. Poukisa ? Poutèt yon lòt konsèy dirèk Pòl te bay konsènan kretyen ki vèv yo. Pòl te ekri : “ Li lib pou l marye ak moun li vle, nan Seyè a sèlman. ” ​(1 Korentyen 7:39). Ann amoni ak konsèy sa a, yo ankouraje kretyen ki vwe lavi yo bay Bondye pou yo chèche konjwen sèlman pami moun ki “ nan Seyè a ”.

Ki sans ekspresyon “ nan Seyè a ” ansanm ak ekspresyon “ nan Kris ”, ki sanble ak li a, genyen ? Nan Women 16:8-10 ak Kolosyen 4:7, Pòl ap pale de moun ki “ nan Kris ” oubyen moun ki “ nan Seyè a ”. Si w li vèsè sa yo, w ap wè moun sa yo se  “ konpayon travay ”, ‘ moun ki apwouve ’, “ frè byenneme ”, “ minis fidèl ”, “ esklav parèy ” nou, yo ye.

Men, ki lè yon moun vin yon “ esklav nan Kris ”? Sa rive lè, volontèman, moun sa a fè sa yon esklav sipoze fè e lè li renye tèt li. Men sa Jezi fè konnen : “ Si yon moun vle mache dèyè m, se pou l renye tèt li, se pou l pran poto soufrans li e se pou l suiv mwen nètale. ” ​(Matye 16:24). Yon moun kòmanse suiv Kris e li soumèt tèt li konplètman pou l fè volonte Bondye lè li vwe lavi l bay Bondye. Apresa, li batize, li vin yon minis Bondye konsakre, e li vin gen yon pozisyon moun apwouve devan Jewova Dye. * Konsa, ‘ marye nan Seyè ’ a vle di marye ak yon moun ki demontre li se yon kwayan toutbon, yon moun ki vwe lavi l bay Bondye, yon “ esklav Bondye ak Jezi Kris, Seyè a ”. — Jak 1:1.

Yon moun k ap etidye Labib ak Temwen Jewova yo e k ap fè bonjan pwogrè nan domèn espirityèl merite felisitasyon. Sepandan, li poko vwe lavi l bay Jewova e li poko bay tout li menm nan sèvis Bondye pou l mennen yon vi sakrifis. Se yon moun ki toujou gen chanjman nesesè pou l fè nan lavi l. Li bezwen fin fè gwo chanjman sa mande pou yon moun vwe lavi l bay Bondye e pou l batize antanke kretyen, anvan l anvizaje lòt gwo chanjman nan lavi a, tankou maryaj.

Èske sa t ap saj pou nou renmen ak yon moun ki sanble ap fè bon pwogrè nan etid biblik li, avèk lide n ap tann li fin batize pou nou marye ak li ? Non, li pa t ap saj. Si etidyan an rann li kont gen yon kretyen batize ki vle marye ak li, men se tann kretyen sa a ap tann li fin batize pou l fè sa, sa ka lage etidyan an nan konfizyon kanta rezon ki pouse l batize.

Jeneralman, yon pwoklamatè ki poko batize pap toujou ret nan sitiyasyon sa a, li gen pou l pwogrese rive nan pwen pou l batize. Kidonk, konsèy pou yon moun marye nan Seyè a sèlman an pa yon konsèy derezonab. E ki sa nou ta di pou yon moun ki gen laj pou l marye, ki leve nan yon fanmi kretyen, ki aktif nan kongregasyon an depi plizyè ane, e k ap sèvi antanke pwoklamatè ki poko batize ? Si se konsa sitiyasyon an ye, ki sa ki anpeche l vwe lavi l bay Jewova ? Ki sa ki fè l ezite ? Èske l gen dout ? Menmsi li pa yon non kwayan, yo pa ka pale de li nonplis kòm yon moun ki “ nan Seyè a ”.

Konsèy Pòl bay konsènan maryaj la se pou byen nou (Izayi 48:17). Lè tou de moun ki anvizaje marye yo vwe lavi yo bay Jewova, angajman yo pran youn anvè lòt nan maryaj la gen yon fondman solid, yon fondman espirityèl. Yo bay menm bagay valè e yo gen menm objektif. Sa jwe yon wòl enpòtan pou yo gen yon maryaj ki bay kè kontan. Mete sou sa, lè yon moun “ marye nan Seyè ” a, li montre li fidèl devan Jewova, e sa ap fè l jwenn byenfè dirab, paske “ avèk yon moun ki fidèl, [Jewova] ap aji ak fidelite ”. — Sòm 18:25.

[Nòt anba paj]

[Foto nan paj 31]

“ Avèk yon moun ki fidèl, [Jewova] ap aji ak fidelite. ”