Li ekri Noye yon lèt

“ ALO Noye, mwen li istwa w nan Bib la plizyè fwa, mwen li kòman ou te konstwi yon lach ki te pèmèt ou menm ak fanmi w sove lè delij la. ”

Se konsa Minnamaria, yon tifi ki gen 15 an, te kòmanse yon lèt li te ekri pou l te patisipe nan yon konkou redaksyon yo te òganize pou elèv ki gen ant 14 ak 21 an. Konkou sa a, se sèvis lapòs nan peyi Finlann, Federasyon pwofesè lang matènèl Finlann ansanm ak Sosyete literati Finlann ki te òganize l. Patisipan yo te dwe ekri yon lèt ki baze sou yon liv. Yo te ka ekri l swa bay otè liv la swa bay yon pèsonaj ki nan liv la. Pami tout devwa elèv yo, pwofesè yo te chwazi plis pase 1 400 ladan yo e yo te voye yo bay manm jiri konkou a. Ansuit, manm jiri yo chwazi pi bon devwa a yo ba l premye pri, yo chwazi dis lòt pi bon, yo ba yo dezyèm pri, e dis lòt resevwa twazyèm pri. Minnamaria te byen kontan dèske lèt li a te fè pati gwoup ki resevwa twazyèm pri a.

Poukisa Minnamaria, yon ti elèv adolesan, te ekri yon lèt bay Noye, yon moun ki t ap viv sa gen anviwon 5 000 an ? Men sa l di : “ Premye sa k te pase nan tèt mwen se Bib la. Mwen abitye anpil ak pèsonaj ki nan Bib la. Mwen tèlman li istwa yo, se tankou yo vivan pou mwen. Mwen chwazi Noye paske vi l enteresan anpil, e vi pa l pa menm ak pa m. ”

Lèt Minnamaria ekri Noye a fini ak pawòl sa yo : “ Jiska prezan, ou se egzanp yon moun ki gen lafwa ak obeyisans. Fason w te viv ankouraje tout moun ki li Bib la pou yo aji ann amoni ak lafwa yo. ”

Lèt sa a jèn ti lektris Bib la ekri a montre klè kòman Bib la “ vivan e li gen pouvwa ” toutbonvre sou moun, jèn kou granmoun. — Ebre 4:12.