Èske n ap janm gen bonjan sekirite ?

TIMOUN yo ap jwe ak kè kontan ak paran yo ki renmen yo. Kiyès ki pap kontan gade yon tablo konsa ? Timoun yo santi yo totalman an sekirite lè yo ansanm ak paran ki sousye de yo. Poutan, pou anpil jèn, moman ki bay kè kontan konsa egziste raman. Olye de sa, gen timoun ki oblije ap kase tèt yo chak jou pou yo jwenn yon kote pou yo dòmi lannuit. Èske gen yon espwa pou timoun san fwaye sa yo ansanm ak lòt timoun k ap viv san sekirite yo ?

Malgre lavni kapab sanble pa ofri espwa, Pawòl Bondye a bay espwa. Pwofèt Izayi predi gen yon jou k ap vini kote tout moun pral viv nan yon sekirite total. Men sa l ekri : “ Sètènman y ap bati kay e y ap abite nan yo, e sètènman y ap plante jaden rezen e y ap manje fwi yo. Yo pap bati pou yon lòt moun abite, yo pap plante pou yon lòt moun manje. ” — Izayi 65:21, 22.

Men èske espwa sa a byen chita ? Fòk nou pa bliye, mo “ espwa ” a pa toujou vle di asirans. Pa egzanp o Brezil, souvan moun tande ekspresyon : “ A esperança é a última que morre. ” Se tankou nou ta di : “ Espwa se dènye bagay k ap mouri. ” Sa siyifi gen anpil moun k ap viv ak espwa, menm lè pa gen baz toutbonvre pou espwa. Sepandan, espwa Bondye vivan an ban nou an se pa menm bagay. Men sa apot Pòl ekri : “ Nenpòt moun ki mete lafwa l nan li [Bondye] pap desi. ” ​(Women 10:11). Pwofesi biblik ki deja akonpli yo ban nou konfyans tout lòt pwomès Jewova fè yo ap reyalize tou. Lè pwomès sa yo tounen reyalite, sitiyasyon ki fòse timoun viv nan lari pral yon bagay pase.

Menm jodi a, konsèy pratik nou jwenn nan Bib la kapab ede moun ki san espwa yo amelyore lavi yo, epi pou yo jwenn vrè sekirite. Ki jan sa fè posib ? Temwen Jewova ki abite nan kominote w la ap kontan ede w jwenn repons kesyon sa a.