Ansèyman veridik ki fè Bondye plezi

POU moun k ap viv sou tè a ta rive konnen ki ansèyman ki veridik e ki fè Bondye plezi, fòk Bondye ta revele lèzòm panse li. E fòk li ta rann sa li revele yo disponib pou tout moun. Ki lòt fason ankò lèzòm ta ka rive konnen ki doktrin, ki fòm adorasyon oswa ki konduit Bondye apwouve ? Èske Bondye bay enfòmasyon sa yo ? Si wi, sou ki fòm li bay yo ?

Èske li posib pou yon moun ki viv kèk dizèn ane sèlman rive kominike pèsonèlman ak tout limanite epi pou l ta sèvi kòm mwayen kominikasyon pou Bondye ? Non. Men, yon dokiman ekri ki pèmanan ka rive fè sa. Kidonk, èske li pa t ap apwopriye pou revelasyon ki soti bò kote Bondye a ta disponib sou fòm yon liv ? Pami ansyen liv ki afime se Bondye ki enspire yo, youn ladan yo se Labib. Men sa youn nan ekriven liv sa a deklare : “ Tout Ekriti se Bondye ki enspire li, e li itil pou anseye, pou reprimande, pou mete bagay yo annòd, pou disipline nan ladwati. ” ​(2 Timote 3:16). Annou egzamine Bib la pi byen pou nou wè si li se sous ansèyman ki veridik.

Konbyen tan li genyen ?

Pami pi gwo liv relijye yo, Bib la se youn nan pi ansyen yo. Sa gen anviwon 3 500 ane depi yo te ekri premye pati Bib la, e yo te fin ekri liv sa a nan ane 98 epòk nou an *. Byenke se 40 òm ki te ekri l pandan yon peryòd 1 600 ane, Bib la gen yon amoni estrawòdinè. Se paske se Bondye ki fè ekri l ki fè li gen amoni sa a.

Bib la se liv yo plis pibliye e yo plis tradui nan tout listwa. Chak ane, yo distribye anviwon 60 milyon bib, swa ann antye, swa an pati. Yo tradui tout Bib la oswa yon pati ladan l nan plis pase 2 300 lang ak patwa, e gen plis pase 90 pousan fanmi sou tè a ki gen posiblite gen yon bib oubyen yon pati  nan Bib la nan pwòp lang yo. Liv sa a travèse baryè nasyonal, li venk divizyon rasyal ak divizyon etnik.

Ki jan liv ki nan Bib la klase ?

Si w gen yon bib, sa w panse si w ta ouvè l pou w gade ki jan liv yo klase * ? Premyèman, ouvè l nan lis liv yo. Pifò bib gen youn nan kòmansman yo, nan lis sa a gen non chak liv ansanm ak nimewo paj kote ou ka jwenn li. W ap remake Bib la se koleksyon yon seri liv li ye an reyalite. Chak liv sa yo gen pwòp non yo. Premye a rele Jenèz, e dènye a rele Revelasyon, oubyen Apokalips. Liv yo gwoupe an de pati. Yo rele 39 premye liv yo Ekriti ebrayik, paske se ann ebre yo te ekri pifò ladan yo. Yo te ekri 27 dènye yo an grèk e yo fòme Ekriti grèk yo. Gen moun ki rele de pati sa yo Ansyen Testaman ak Nouvo Testaman.

Nan Bib la, liv yo gen chapit e yo gen vèsè, sa fè li fasil pou nou jwenn tèks yo. Lè yo site yon vèsè nan peryodik sa a, premye chif ki apre non liv biblik la reprezante chapit liv sa a e lòt la reprezante vèsè a. Pa egzanp, lè yo site “ 2 Timote 3:16 ”, sa vle di dezyèm liv Timote chapit 3 vèsè 16. Gade pou w wè si w ka jwenn vèsè sa a nan Bib la.

Èske ou pa dakò meyè fason pou yon moun vin abitye ak Bib la se pou l li l regilyèman ? Gen moun ki twouve li bon pou yo li Ekriti grèk yo toudabò, ki kòmanse nan liv Matye a. Si w li twa a senk chapit pa jou, ou ka li tout Bib la nèt nan yon ane. Men, ki jan w ka fè sèten sa w ap li nan Bib la se Bondye ki enspire l toutbonvre ?

Èske ou ka fè Bib la konfyans ?

Èske yon liv Bondye enspire pou tout moun pa ta dwe gen konsèy k ap toujou itil sou fason pou moun viv ? Bib la ede nou konprann fason lòm ye e sa aplike pou kèlkeswa jenerasyon k ap viv sou tè a. Prensip li yo pratik jodi a menm jan ak lè yo te fèk ekri. Nou ka wè sa byen nan yon diskou estrawòdinè Jezi Kris te bay, li menm ki Fondatè krisyanis la. Yo rapòte diskou sa a nan Matye chapit 5 rive nan chapit 7. Yo rele l Sèmon sou montay la. Nonsèlman diskou sa a montre nou ki jan nou ka jwenn vrè bonè a, men tou, li montre ki jan pou nou regle pwoblèm nou genyen ak lòt moun, ki jan pou nou priye, ki jan pou nou konsidere bezwen materyèl ansanm ak anpil lòt bagay ankò. Bib la di klèman, nan diskou sa a e atravè tout rès paj li, ki sa pou nou fè e ki sa pou nou evite pou nou fè Bondye plezi e pou nou amelyore lavi nou.

Yon lòt rezon ankò ki fè w ka fè Bib la konfyans, se paske lè liv ansyen sa a pale sou sijè syantifik, sa li di yo egzak. Pa egzanp, gen yon lè pifò moun te panse tè a plat, men Bib la te gentan pale de “ wonn [oubyen boul] tè a * ”. (Izayi 40:22.) Plis pase 3 000 an anvan gwo syantifik ki rele Isaac Newton nan te vin esplike planèt yo pa gen anyen ki soutni yo, se fòs gravite ki kenbe yo, Bib la te gentan di sa sou fòm yon powèm : ‘ Latè pandye sou anyen. ’ ​(Jòb 26:7). Gade tou yon lòt deskripsyon powetik Bib la fè sou sik dlo sou tè a, sa gen anviwon 3 000 an : “ Tout dlo larivyè desann nan lanmè, men lanmè pa janm plen. Dlo a tounen kote larivyè a te soti a. ” ​(Eklezyas 1:7, Bib la). Wi, Kreyatè linivè a, se menm li menm nan ki fè ekri Labib.

Lefètke Bib la egzak nan domèn istorik se yon lòt prèv ki montre se Bondye ki  enspire l. Evènman Bib la rapòte yo se pa senp lejann yo ye. Yo bay dat yo te fèt, yo site non moun yo ak non andwa yo. Pa egzanp, Lik 3:1 rapòte yon fason egzak : “ Nan kenzyèm ane rèy Tibè Seza, lè sa a Pons Pilat te gouvènè Jide, e Ewòd te chèf distri Galile. ”

Byenke prèske tout istoryen lantikite yo se sèlman viktwa ak bèl kalite dirijan yo yo rapòte, ekriven Bib la yo menm yo onèt, yo pa kache ata pwòp erè yo. Pa egzanp, wa David ki t ap reye sou peyi Izrayèl te rekonèt : “ Sa m fè a se yon peche ki grav anpil. [...] Mwen montre mwen sòt anpil nan fason m aji. ” Se Bib la ki site deklarasyon sa a ki fèt avèk anpil franchiz (2 Samyèl 24:10). Moyiz, yon ekriven biblik, li menm li rapòte yon evènman kote li pa t demontre konfyans nan Bondye. — Nonb 20:12.

Gen yon lòt prèv ki montre se Bondye ki enspire Bib la. Prèv sa a se akonplisman pwofesi ki ladan l yo, yon seri istwa ki ekri alavans. Gen kèk nan pwofesi sa yo ki te konsène Jezi Kris. Pa egzanp, plis pase 700 an anvan nesans Jezi, Ekriti ebrayik yo te gentan predi egzakteman Moun yo te pwomèt la ta gen pou l fèt nan vil “ Betleyèm nan Jide ”. — Matye 2:1-6 ; Mika 5:2.

Annou konsidere yon lòt egzanp. Nan 2 Timote 3:1-5, Bib la di : “ Nan dènye jou yo, pral gen tan ki kritik e ki difisil pou moun sipòte. Paske lèzòm ap renmen pwòp tèt yo, y ap renmen lajan, y ap awogan, ògeye, blasfematè, y ap dezobeyi paran yo, y ap engra, san fidelite, san afeksyon natirèl, san lespri antant, medizan, san metriz, fewòs, san lanmou pou sa ki byen, trèt, tèti, gonfle ak ògèy, y ap renmen plezi pito pase pou yo renmen Bondye, y ap gen atachman pou Bondye pou lafòm, men y ap rejte fòs li. ” Èske vèsè sa yo pa dekri atitid moun yo an jeneral jodi a ? Pawòl sa yo te ekri nan ane 65 epòk nou an, sa gen plis pase 1 900 ane !

Ki sa Bib la anseye nou ?

Ofiramezi w ap dekouvri mesaj ki nan Bib la, w ap vin rann ou kont Bib la se sous sajès ki pi siperyè a. Li founi repons ki bay satisfaksyon sou yon seri kesyon tankou : Kiyès Bondye ye ? Èske Dyab la egziste toutbonvre ? Kiyès Jezi Kris ye ? Poukisa gen soufrans ? Ki sa ki rive nou lè nou mouri ? Tou kòm moun yo gen anpil kwayans ak anpil koutim, se konsa tou yo bay anpil repons pou kesyon sa yo. Men, Bib la revele laverite sou kesyon sa yo ak sou anpil lòt sijè ankò. Anplis de sa, nan sa ki gen rapò ak konduit ak konpòtman nou dwe genyen anvè lòt moun e anvè otorite siperyè yo, konsèy Bib la bay yo san parèy *.

Ki sa Bib la revele konsènan objektif Bondye pou latè ak limanite ? Li pwomèt : “ Nan yon tikras tan ankò mechan an pap la ankò [...]. Men moun ki enb yo yo menm, yo pral posede tè a. E vrèmanvre, yo pral pran tout plezi yo nan abondans lapè. ” ​(Sòm 37:10, 11). “ Bondye li menm ap avèk [limanite]. Epi li pral siye tout dlo nan je yo, e lanmò pap la ankò, ni dèy, ni rèl, ni doulè pap la ankò. Ansyen bagay yo disparèt. ” ​(Revelasyon 21:3, 4). “ Moun ki jis yo pral posede tè a, e sou li, y ap rete pou toutan. ” — Sòm 37:29.

Bib la predi tou lagè, krim, vyolans, ak mechanste pral fini talè konsa. Maladi, vyeyès ak lanmò pap la ankò. Selon sa l pwomèt nou, lavi etènèl nan yon paradi sou tè a pral vin reyalite. Ala yon bèl pèspektiv ! Tout sa vrèman montre lanmou Bondye genyen pou limanite !

Ki sa w ap fè ?

Bib la se yon bèl kado Kreyatè a ban nou. Ki sa w ta dwe fè ak liv sa a ? Gen yon mesye ki leve nan relijyon endou ki panse, pou tout limanite ta tire pwofi nan yon revelasyon  Bondye bay, fòk revelasyon sa a ta fèt depi nan kòmansman sivilizasyon an. Lè li vin reyalize gen pati nan Bib la ki pi ansyen pase ekriti endou ki la pi lontan yo, anpalan de Veda a, li te deside li Bib la pou l egzamine sa ki ladan l *. Gen yon pwofesè inivèsite nan peyi Etazini ki te rive konprann nesesite pou l li liv sa a ki se liv yo plis pibliye sou tè a, anvan li vin gen pwòp opinyon l sou li.

Si w li Bib la epi w aplike sa w aprann yo, sa ap pote anpil byenfè pou ou. Bib la di : “ Byennere moun [...] tout plezi l se nan lwa Jewova, e nan lwa l, li li tou ba lajounen kou lannuit. E vrèmanvre, l ap vin tankou yon pyebwa ki plante bò kouran dlo, ki bay fwi lè sezon l rive, fèy li pa fennen, e tout sa l fè ap reyisi *. ” ​(Sòm 1:1-3). Si w etidye Bib la e ou reflechi sou sa li di yo, sa ap pote kè kontan pou ou paske bezwen espirityèl ou ap satisfè (Matye 5:3). Bib la ap montre w ki jan pou w viv yon fason pou w ka reyisi e ki jan w ka fè fas ak pwoblèm yo avèk siksè. Wi, “ gen yon gwo rekonpans lè nou obsève [lwa Bondye yo ki nan Bib la] ”. (Sòm 19:11.) Anplis de sa, lè nou mete konfyans nou nan pwomès Bondye yo, sa ap pote byenfè pou nou depi kounye a e sa ap ban nou yon bèl esperans pou lavni.

Men egzòtasyon Bib la ban nou : “ Menm jan ak timoun ki fèk fèt, se pou nou gen anvi pou lèt san melanj pawòl la. ” ​(1 Pyè 2:2). Yon tibebe depann de manje y ap ba li e li ensiste pou li satisfè bezwen sa a. Menm jan an tou, nou vrèman depann de konesans Bondye bay la. Donk, “ se pou nou gen anvi ” oubyen se pou nou gen gwo dezi pou Pawòl li a. Bib la se yon liv ki gen ansèyman veridik ladan l ki soti nan men Bondye. Chèche gen objektif pou w etidye Bib la regilyèman. Temwen Jewova ki nan kominote kote w ap viv la ap byen kontan ede w tire pwofi o maksimòm nan etid la. Nou ankouraje w pou w abòde yo, oubyen ou ka ekri biwo ki pibliye peryodik sa a.

[Nòt anba paj]

[Liy kredi pou foto nan paj 5]

Foto NASA

[Foto nan paj 7]

“ Se pou nou gen anvi ” pou Pawòl Bondye a. Etidye Bib la regilyèman.