Tire pwofi nan pi bon enstriksyon ki egziste a

BIB la idantifye Jewova Dye antanke Kreyatè tout bagay, sa vle di lèzòm ladan l tou (Jenèz 1:27 ; Revelasyon 4:11). Piske li se Gran Pwofesè a, li te enstwi premye koup la, anpalan de Adan ak Èv, e li te prepare yo pou yo viv nan bèl jaden Edenn nan. Li te gen objektif pou l kontinye ba yo fòmasyon e pou l pran swen yo etènèlman (Jenèz 1:28, 29 ; 2:15-17 ; Izayi 30:20, 21). Èske se pa t yon bèl posiblite ki te devan yo ?

Men, malerezman, premye koup la kraze tout bagay. Wout dezobeyisans yo te pran an lakòz limanite ap depafini, ni nan domèn moral, ni nan domèn fizik (Jenèz 3:17-19 ; Women 5:12). Men sa Bib la di konsènan moun ki t ap viv kèk jenerasyon sèlman apre kreyasyon lèzòm : “ Jewova te wè jan mechanste lèzòm te vin anpil sou tè a e lide ki nan kè yo te toujou panche sou bagay ki mal. ” — Jenèz 6:5.

Gen prèske 4 500 ane ki pase depi lè Jewova te konstate lòm toujou panche sou bagay ki mal, e jodi a sitiyasyon limanite vin pi mal pase tout lòt epòk. Anpil moun ap bay manti san yo pa jennen, yo vòlè, oubyen yo atake lòt moun. Pwoblèm yo ap ogmante chak jou pi plis, e anmenmtan, moun vin pi pa enterese nan pwochen yo. Èske se pa vre gen gwo pwoblèm nan pifò relasyon moun ak moun, e sa rive menm nan relasyon anndan fanmi ? Sepandan, se pa Bondye ki responsab sitiyasyon sa yo, ni nonplis li pa sispann enterese nan pwoblèm n ap rankontre jodi a. Jewova te toujou enterese nan byennèt lèzòm, e li dispoze enstwi moun ki chèche direksyon nan men l pou yo rive jwenn yon vi ere. Sa gen anviwon 2 000 an, li te voye Jezi Kris, Pitit li a, sou tè a, e konsa li demontre li enterese enstwi moun ki vle reyisi lavi yo. Nan sa ki gen rapò ak enstwi lòt moun, Jezi kite yon modèl pafè paske li menm se Gran Pwofesè a ki anseye l depi yon kantite tan moun pa ka konte.

Vrè krisyanis la se yon fòmasyon

Vrè krisyanis la se yon fason moun viv ki baze sou lanmou, e se Jezi Kris ki fonde l. Tout panse ak tout aksyon moun ki nan vrè krisyanis la dwe ann amoni ak volonte Bondye, nan objektif pou atire onè ak glwa sou non li (Matye 22:37-39 ; Ebre 10:7). Se Jewova, Papa Jezi, ki alabaz ansèyman Jezi te bay sou vrè krisyanis la. Men sa nou li nan Jan 8:29 konsènan soutyen Jezi te resevwa nan men Bondye : “ Moun ki voye m nan avè m. Li pa t lage m poukont mwen, paske mwen toujou fè sa ki fè l plezi. ” Wi, Jezi te gen soutyen Papa l e li te toujou jwenn direksyon nan men l pandan ministè l. Lè pou premye disip Jezi yo te fè fas ak pwoblèm ki gen nan lavi a, yo te jwenn direksyon. Jewova te enstwi yo pa mwayen Pitit li a. Lefètke yo te suiv ansèyman Jezi yo ansanm ak egzanp li, sa te fè yo vin pi bon moun. Se menm bagay la pou disip Jezi yo nan epòk pa nou an. — Gade kare “ Enfliyans Jezi ak ansèyman l yo genyen ” ki nan paj 6 la.

Youn nan karakteristik vrè krisyanis la, sèke li gen ladan l enstriksyon ki gen efè sou lespri moun ak sou kè moun opwen li pouse yo fè chanjman ki pwofon (Efezyen 4:23, 24). Pou nou site yon sèl egzanp, annou konsidere sa  Jezi te anseye konsènan kesyon pou konjwen yo fidèl youn ak lòt. Men sa li di : “ Nou tande yo te di : ‘ Ou pa dwe fè adiltè. ’ Men, mwen menm mwen di nou, nenpòt moun ki kontinye gade yon fi jiskaske l vin gen yon pasyon pou li, moun sa a deja komèt adiltè avèk li nan kè l. ” ​(Matye 5:27, 28). Pa mwayen pawòl sa yo, Jezi te anseye disip li yo kè a ta dwe rete pwòp, e panse ak dezi enpwòp, menm lè yo poko rive nan aksyon, yo ka gen konsekans grav. Èske se pa vre move panse ka mennen nan aksyon ki ofanse Bondye e ki kapab fè lòt moun soufri ?

Se sa k fè, Bib la bay konsèy sa a : “ Sispann konfòme nou selon sistèm de choz sa a, men transfòme nou, lè nou refòme entèlijans nou, dekwa pou nou menm pèsonèlman nou ka konstate ki sa ki volonte Bondye, yon volonte ki bon, ki agreyab e ki pafè. ” ​(Women 12:2). Men, petèt ou ka ap mande : ‘ Èske sa posib vrèman pou enstriksyon refòme entèlijans moun ? ’ Pou nou refòme entèlijans nou, sa mande pou nou oryante l nan yon direksyon ki diferan, lè nou ranpli l ak prensip ansanm ak enstriksyon Bondye bay nan Pawòl li a. N ap rive fè sa si nou aksepte enstriksyon Bondye bay pa mwayen Pawòl li a.

Li pouse moun chanje

“ Pawòl Bondye a vivan e li pisan. ” ​(Ebre 4:12). Jis jodi a, li toujou gen yon enfliyans pisan sou moun, se sa k pwouve li pa pase mòd. Li ka motive yon moun pou l chanje fason l ap viv pou li vin aksepte vrè krisyanis la e pou li vin yon pi bon moun. Egzanp ki vin apre yo montre enpòtans enstriksyon ki nan Bib la genyen.

Emilia, nou te pale de li nan atik ki vin anvan an, fè deklarasyon sa a : “ Efò m te konn fè poukont mwen pa t sifi pou amelyore sitiyasyon ki te gen lakay mwen. Lè mwen te kòmanse etidye Labib ak Temwen Jewova yo, mwen te vin rann mwen kont te gen espwa e mwen te kòmanse chanje atitid mwen. Mwen te vin aprann demontre plis pasyans e pou mwen pa plede fè kòlè. Avèk letan, mari m te vin nan etid la tou. Sa pa t fasil pou li te sispann bwè, men finalman li te reyisi kite. Sa te vin fè maryaj nou reviv. Kounye a, nou ere antanke kretyen e n ap fè bèl prensip ki nan Bib la antre nan lespri pitit nou yo. ” — Detewonòm 6:7.

Enstriksyon vrè krisyanis la ka libere moun anba vis ak fason imoral moun konn ap viv. Pawòl sa yo aplike nan ka Manuel *. Lè li te gen 13 an, li te sove kite kay li e li te antre nan fimen mariwana. Apre sa, li vin lage kò l nan ewoyin. Li te tonbe nan relasyon seksyèl ni ak gason ni ak fi pou l te ka jwenn kòb ak kote pou l rete. Pafwa, pou Manuel pran swen tèt li, li te konn agrese moun. Li te prèske toujou anba enfliyans dwòg. Konpòtman vyolan li te  genyen te konn fè yo mete l nan prizon souvan. Yon lè, li te pase katran nan prizon, e pandan l tou nan prizon an, li te vin enplike nan trafik zam. Apre Manuel te fin marye, li te toujou kenbe menm fason li t ap viv la, e li te kontinye sibi konsekans sa pwodui. Men sa li deklare : “ Nou te rive nan yon pwen kote nou te oblije al viv nan yon vye poulaye. Mwen pa janm bliye se sou kèk moso brik madanm mwen te konn ap fè manje. Sitiyasyon nou te tèlman mal, pwòp fanmi m konn ap ankouraje madanm mwen pou l kite m. ”

Ki sa ki te chanje lavi Manuel ? Men repons li bay : “ Yon moun mwen rekonèt te vin lakay nou pou l pale nou de Labib. Mwen te aksepte pale avè l jis pou mwen montre l zafè gen yon Bondye ki enterese nan moun nan sa pa egziste. E mwen te pran pwòp vi m kòm egzanp pou m pwouve l sa. Mwen te etone wè jan Temwen an pasyan e jan li te janti avè m, sa te fè mwen aksepte al nan reyinyon nan Sal Wayòm nan. Byenke gen kèk moun ki te konnen lavi mwen t ap mennen, yo te salye m yon fason amikal. Yo te mete m alèz, e sa te rekonfòte m anpil. Sa te tèlman gen efè sou mwen, mwen te deside kite zafè dwòg la pou mwen jwenn yon djòb ki onèt. Kat mwa apre mwen te kòmanse etidye Labib, mwen te vin kalifye pou mwen patisipe nan travay predikasyon an, e kat mwa apre sa, mwen te batize antanke Temwen Jewova. ”

Ki sa vrè krisyanis la te fè pou Manuel ak fanmi l ? Men sa l di : “ Si se pa t enstriksyon ki soti nan Bib la, mwen sèten, mwen t ap gentan mouri depi plizyè ane. Ansèyman Jezi bay sou fason pou moun viv fè fanmi m vin gen bon relasyon avè m ankò. De pitit mwen yo pa oblije pase anba sa mwen te pase lè m te jèn. Mwen santi mwen fyè e mwen gen anpil rekonesans pou Jewova pou bon relasyon mwen gen ak madanm mwen kounye a. Gen kèk nan moun mwen te konnen lontan ki felisite m e ki di m yo panse fason  m ap viv kounye a se pi bon fason pou moun viv. ”

Nan lavi kretyen yo, pwòpte moral mache ak pwòpte fizik. John, k ap viv nan yon katye pòv ann Afrik Disid, te rive konprann sa. Li esplike : “ Pitit fi nou an te konn pase pafwa yon semèn san l pa fè twalèt li, se kòmsi pa gen youn nan nou ki wè sa. ” Madanm John te admèt kay yo a te lèd anpil. Men, grasa enstriksyon krisyanis la, bagay yo te vin chanje. John te retire kò l nan yon gang ki te konn ap vòlè machin e li te kòmanse bay fanmi l plis atansyon. “ Nou aprann antanke kretyen, kò nou ak rad nou dwe toujou pwòp. Mwen renmen pawòl ki nan 1 Pyè 1:16 la ki egzòte nou pou nou sen paske Jewova Dye sen. Kounye a, nou fè efò tou pou nou fè ti kay senp nou an bèl. ”

Ou ka jwenn pi bon enstriksyon an

Eksperyans nou sot mansyone la yo se pa ka izole yo ye. Grasa enstriksyon ki baze sou Bib la, gen plizyè milye moun ki aprann yon pi bon fason pou yo viv. Piske yo onèt e yo travay di, patwon yo apresye yo. Yo vin bon vwazen, bon zanmi, yo vin enterese nan byennèt pwochen yo. Yo detèmine pou yo evite vis ak tandans chanèl, konsa yo pran swen pwòp sante yo pi byen, ni sante mantal yo, ni sante fizik yo, ni sante afektif yo. Olye pou yo gaspiye resous yo nan vis, yo itilize yo pou pwòp byennèt yo ak byennèt fanmi yo (1 Korentyen 6:9-11 ; Kolosyen 3:18-23). Nou pa gen okenn dout sou sa, rezilta yon moun jwenn lè li mete an pratik sa Jewova anseye nan Bib la montre vrè krisyanis la se meyè fason pou yon moun viv, e se li ki bay pi bon enstriksyon ki egziste a. Konsènan moun k ap viv ann amoni ak lwa Bondye yo, Bib la di : “ Tout sa l fè ap reyisi. ” — Sòm 1:3.

Sa ankourajan lè nou konnen Bondye Toupisan an, anpalan de Jewova, gen volonte pou l enstwi nou. Men sa li di konsènan pwòp tèt li : “ Mwen menm Jewova, mwen se Bondye w, Sila k ap anseye w pou byen w lan, Sila k ap fè w mache sou wout ou dwe mache a. ” ​(Izayi 48:17). Wi, Jewova te montre chemen an pa mwayen egzanp ak ansèyman Pitit li a, Jezi Kris. Ansèyman li yo te pote gwo chanjman nan lavi anpil moun ki te konnen l lè li te sou tè a, e se menm bagay la tou pou anpil moun jodi a k ap viv selon ansèyman Jezi yo. Nou ankouraje w pran yon ti tan pou w aprann plis bagay konsènan ansèyman sa yo. Temwen Jewova ki nan zòn kote w rete a ap byen kontan ede w resevwa enstriksyon sa a ki gen anpil valè.

[Nòt anba paj]

[Kare/Foto nan paj 6]

Enfliyans Jezi ak ansèyman l yo genyen

Zache se te yon prepoze kontribisyon. Li te sèvi ak pozisyon l pou l fè richès nan dechèpiye moun ak nan fè lajan nan move kondisyon sou pèp la. Men li te vin chanje fason li t ap viv la lè li te aplike ansèyman Jezi yo. — Lik 19:1-10.

Sol ki te fèt nan vil Tas te sispann pèsekite kretyen yo, li te konvèti nan krisyanis la e li te vin apot Pòl. — Travay 22:6-21 ; Filipyen 3:4-9.

Gen kèk kretyen nan vil Korent, anvan yo te vin kretyen, ki te ‘ fònikatè, ki te konn adore zidòl, ki te konn fè adiltè, ki te omoseksyèl, ki te vòlè, ki te afre, ki te bwasonyè, ki te konn joure moun, ki te konn dechèpiye moun ’. Sepandan, lè yo te vin konnen vrè krisyanis la, yo te ‘ lave, yo te sangtifye, e yo te deklare yo jis nan non Seyè yo a Jezi Kris ’. — 1 Korentyen 6:9-11.

[Foto nan paj 7]

Bib la ka montre w ki jan pou w reyisi.