Y ap preche moun soud bon nouvèl la

“ YO FÈ w vin espirityèl ! ” Se sa direktè yon azil nan Navalcarnero, nan vil Madrid, nan peyi Espay, te di tou dènyèman konsènan kèk Temwen Jewova ki te vin vizite sant l ap dirije a. Ki sa k te pouse l di sa ?

Gen plizyè rezidan nan sant Rosas del Camino ki soud. Sepandan, piske Temwen yo te fè efò pou yo aprann lang siy espayòl, yo te anmezi pou yo kominike avèk rezidan sa yo. Direktè a te fè elòj pou Temwen yo ki bay tan yo pou yo anseye moun sa yo prensip espirityèl, e yo fè sa gratis pou moun sa yo ki bezwen sa. Li remake tou bon efè ansèyman bon nouvèl Wayòm nan gen sou rezidan yo. E rezidan yo, sitou sa ki gen pwoblèm pou tande oswa ki pa wè byen, renmen vizit Temwen yo anpil.

Eulogio se yon rezidan ki avèg e ki soud, e aktyèlman l ap etidye Labib avèk Temwen Jewova yo. Yon jou, pandan l ap fè etid, gen yon mesye aje ki apwoche e ki bay Temwen an yon powèm rezidan yo te konpoze pou eksprime rekonesans yo. Tit powèm nan se : “ Pou yon moun Temwen. ” Gen yon pati nan powèm nan ki di : “ Y ap viv yon bèl vi, yo gen disiplin nan vi yo, e Jewova ba yo sajès ak lajwa. Yo pa sispann al lakay moun yo, paske yo gen konfyans nan Jewova. ”

Se egzakteman konfyans sa a nan Jewova ki fè anpil Temwen sou tout tè a aprann lang siy moun soud nan peyi kote y ap viv la konnen. Nan fason sa a, yo rive bay moun sa yo mesaj ankourajan, mesaj espwa, ki gen nan Bib la.