Valè “ yon veso ki pi fèb ” genyen

“ NOU menm mari, se pou nou kontinye viv avèk [madanm nou] selon konesans, pou nou ba yo onè tankou yon veso ki pi fèb, veso feminen an. ” ​(1 Pyè 3:7). Èske vèsè sa a apot Pyè te ekri a ki pale de fi kòm “ yon veso ki pi fèb ” yon jan rabese medam yo ? Annou gade ki sa ekriven enspire a te vle di lè l te di pawòl sa yo.

Mo grèk lè l tradui ki bay “ onè ” a vle di “ pri, valè, [...] respè ”. Konsa, yon mari kretyen dwe trete madanm li avèk tandrès, li dwe ba li konsiderasyon li merite antanke yon veso ki delika, ki presye. Sa pa rabesan ditou. Ann pran egzanp yon lanp Tiffany lotus. Vrèmanvre, yo kapab konsidere bèl lanp rafine sa a kòm yon lanp ki delika. Lefètke lanp sa a frajil, èske sa diminye valè l ? Ditou ! Nan ane 1997, nan yon vant ozanchè, yo te vann orijinal lanp sa a pou 2,8 milyon dola. Lefètke yo fabrike l yon fason ki delika, sa te ogmante valè l, li pa t diminye l.

Menm jan an tou, bay yon madanm onè tankou yon veso ki pi fèb pa fè l pèdi valè, sa pa diminye l. Yon mari ap kontinye viv avèk madanm li “ selon konesans ”, sa vle di mari a ap teni kont de fòs madanm li ak limit li, sa l renmen ak sa l pa renmen, pwennvi li ak santiman li. Yon mari ki gen afeksyon rekonèt diferans ki genyen ant pèsonalite pa l ak pèsonalite madanm li e li respekte sa. Li demontre konsiderasyon pou li “ yon fason pou priyè [pa l] pa bloke ”. (1 Pyè 3:7.) Yon mari ki pa respekte karakteristik feminen madanm li genyen mete pwòp relasyon l avèk Bondye an danje. Li klè, Pawòl Bondye a pa rabese fi. Okontrè, li ba yo diyite, li ba yo onè.

[Liy kredi pou foto nan paj 32]

© Christie’s Images Limited 1997