Yon vizit ki fè yon moun chanje

“M WEN te tèlman anvi rakonte fanmi m Bondye te voye de ‘ zanj ’ kote m, mwen pa t ka tann ankò. ” Se sa yon mesye ki te resevwa vizit de jèn fi te ekri, jèn fi sa yo se Temwen Jewova. Kèk semèn anvan vizit la, mesye a te pèdi madanm li ki te gen 45 an. Sa te boulvèse l anpil. Pitit li yo ki majè te konsole li, men yo te abite lwen. Li pa t gen ni zanmi ni vwazen ki vin vizite l.

“ Mwen menm ak Bondye nou pa fin gen bon relasyon. ” Se sa mesye a te di jèn medam yo lè yo te vin vizite l la. Men, medam yo te senpatik, e yo te kite yon feyè ki baze sou Bib la nan men l. Feyè sa a gen tit Ki espwa ki genyen pou moun nou yo ki mouri ? Li te li l menm jou swa a e li te jwenn rekonfò.

Yon ti tan apre, de kretyèn yo te retounen wè l. Yo sonje jan mesye a te tris nan premye vizit la, donk yo pase wè ki jan l ye. Gade sa mesye a ekri annapre : “ Mwen te sezi anpil pou m wè de moun ki pa konnen m ditou enterese nan mwen e yo gen sousi pou byennèt mwen. ” Panse biblik yo te pataje avè l te ankouraje l. Medam yo te di y ap retounen. Mesye a te kontan e sa te pouse l ekri pawòl nou sot mansyone la yo nan yon lèt li te voye nan Sal Wayòm Temwen Jewova ki nan zòn nan.

Anvan mesye a deplase al abite nan yon zòn ki pi pre youn nan pitit li yo, li te asiste yon reyinyon Temwen Jewova e li te pataje yon repa avèk fanmi youn nan jèn fi yo. Men sa mesye a ekri : “ M ap kite zòn nan, men de moun sa yo ansanm ak legliz nou an ap toujou gen yon plas nan kè m ak nan priyè m. Wi, kounye a mwen priye, e mwen priye anpil. Mwen chanje konplètman. De jèn fi sa yo pou bokou nan sa, e m ap toujou montre rekonesans mwen pou yo. ”