Daniel ansanm ak ensiy kongrè li

JEZI te reprimande chèf relijye ki te jis nan je pa yo e ki te endiye lè yo te wè plizyè tigason k ap louwe Bondye piblikman. Nan sikonstans sa a, Jezi te mande yo : “ Nou pa t janm li sa : ‘ Se nan bouch tibebe ak nan bouch timoun ki nan tete ou fè louwanj soti ’ ? ” — Matye 21:15, 16.

Daniel ki gen sizan, ki fè pati yon kongregasyon lang ris ann Almay, se yon prèv ki montre toujou gen jèn k ap bay Jewova louwanj. Li te asiste yon kongrè Temwen Jewova nan Duisburg ansanm ak manman l ak sè l. Se te premye fwa li te asiste yon gwo kongrè konsa. Tout bagay te nouvo pou li : li te desann nan otèl, li te wè anpil moun, li te ret chita pandan twa jou, li te asiste batèm yo, san pale de dram nan. E ki jan Daniel te konpòte l ? Li te gen yon konduit egzanplè.

Nan lendi apre kongrè a, apre Daniel te fin retounen lakay li, li te leve bonè pou l al nan kindègadenn li te ye a. Men, ki sa ki te toujou sou rad li ? Ensiy kongrè a ! Manman l di l : “ Kongrè a fini. Ou mèt retire ensiy lan jodi a. ” Men, Daniel reponn : “ Mwen vle tout moun wè kote mwen te ye e mwen vle yo konnen sa mwen te aprann. ” Donk, pandan tout jounen an nan kindègadenn nan, li te mete ensiy li byen chèlbè. Lè matmwazèl li te poze l kesyon sou sa, li dekri pwogram kongrè a pou li.

Konsa, Daniel te suiv egzanp plizyè milye tigason ak tifi k ap bay Jewova louwanj piblikman depi plizyè syèk.