‘ Moun ki mande Jewova lespri sen, l ap ba yo l ’

“ Si nou menm, malgre nou mechan, nou konnen pou nou bay pitit nou bonjan kado, alewè pou Papa a ki nan syèl la, moun ki mande l lespri sen, l ap ba yo l ! ”—LIK 11:13.

1. Ki lè espesyalman nou bezwen èd lespri sen ?

‘ MWEN pap ka fè fas ak sitiyasyon sa a poukont mwen. Se sèlman grasa èd lespri sen m ap ka andire eprèv sa a ! ’ Èske sa konn rive ou santi w konsa ? Sa konn rive pifò kretyen. Petèt, ou te santi w konsa apre w te fin aprann ou fè yon maladi grav. Oubyen petèt, nan moman kote konjwen w tonbe l mouri apre plizyè ane maryaj. Oubyen ankò, petèt sa te rive w lè depresyon, ki tankou yon nyaj ki tou nwa, te vin bouche jwa ki t ap briye nan ou. Nan moman soufrans sa yo nan lavi w, ou ka te santi sa k fè w te andire se sèlman paske lespri sen Jewova te ba w “ pisans ki depase sa ki nòmal la ”. — 2 Korentyen 4:7-9 ; Sòm 40:1, 2.

2. a) Ak ki eprèv vrè kretyen yo ap fè fas ? b) Ki kesyon nou pral egzamine nan atik sa a ?

² Vrè kretyen yo dwe fè fas ak presyon ansanm ak opozisyon k ap vin pi plis chak jou nan monn jodi a ki lwen Bondye (1 Jan 5:19). Anplis de sa, Satan Ledyab li menm l ap atake moun ki disip Kris yo, l ap mennen yon lagè fewòs kont moun k ap “ obsève kòmandman Bondye yo e ki gen kòm travay pou yo rann temwayaj konsènan Jezi ”. (Revelasyon 12:12, 17.) Se sa k fè, kounye a plis pase nenpòt lòt lè, nou vrèman bezwen sipò lespri Bondye. Ki sa nou kapab fè pou nou sèten n ap kontinye resevwa lespri sen Bondye ann abondans ? E poukisa nou ka sèten Jewova trè dispoze ban nou fòs nou bezwen nan moman eprèv yo ? Nou jwenn repons kesyon sa yo nan de egzanp Jezi te bay.

Priye avèk pèsistans

3, 4. Ki premye egzanp Jezi te bay, e kòman li te aplike l ak lapriyè ?

³ Yon lè, youn nan disip Jezi yo te mande l : “ Seyè, montre nou ki jan pou n priye. ” ​(Lik 11:1). Kòm repons, Jezi te bay disip li yo de egzanp ki gen rapò ak lapriyè. Premye egzanp lan se egzanp yon mesye k ap akeyi yon vizitè, e dezyèm nan se egzanp yon papa k ap koute yon pitit li. Annou egzamine de egzanp sa yo.

⁴ Jezi te di : “ Kiyès nan nou k ap gen yon zanmi e ki pral lakay li a minui pou l di l : ‘ Zanmi, prete m twa pen, paske mwen gen yon zanmi m ki fèk vin lakay mwen sot nan yon vwayaj e mwen pa gen anyen pou m mete devan l ’ ? E etan lòt la anndan an, li reponn li di : ‘ Sispann nui m. Pòt la take deja, e tipitit mwen yo nan kabann ansanm avè m. Mwen pa ka leve vin ba w anyen. ’ Mwen di nou sa : Menmsi li pap leve pou l ba li kichòy paske se zanmi l, l ap leve kanmenm pou l ba l tout sa l bezwen, akoz pèsistans tenas li. ” Apre sa, Jezi esplike ki fason egzanp sa a aplike ak lapriyè, li di : “ Donk, mwen di nou : Kontinye mande e y ap ban nou, kontinye chèche e n ap jwenn, kontinye frape e y ap ouvri pou nou. Paske tout moun ki mande yo resevwa, e tout moun ki chèche yo jwenn, e tout moun ki frape y ap ouvri pou yo. ” — Lik 11:5-10.

5. Ki sa egzanp sou mesye pèsistan an aprann nou sou atitid nou dwe genyen nan lapriyè ?

⁵ Egzanp frapan sa a sou mesye pèsistan an  demontre ki atitid nou dwe genyen lè n ap priye. N ap remake, Jezi di mesye sa a te reyisi jwenn sa l te bezwen an “ akoz pèsistans tenas li ”. (Lik 11:8.) Ekspresyon “ pèsistans tenas ” la parèt yon sèl fwa nan Bib la. Li soti nan yon mo grèk ki vle di literalman “ san wont ”. An jeneral, ekspresyon san wont lan gen yon sans negatif. Sepandan, lè moun gen yon atitid san wont, sètadi yon atitid pèsistan, pou yon bon koz, sa ka vin tounen yon kalite ki louwab. Se te ka pa mesye nan egzanp lan ki t ap akeyi zanmi l lan. Li pa t santi l wont ditou pou l te kontinye mande sa l bezwen avèk pèsistans. Piske Jezi te bay mesye sa a kòm yon egzanp pou nou, sa montre menm jan an tou nou ta dwe pèsistan nan priyè nou yo. Jewova vle pou nou ‘ kontinye mande, pou nou kontinye chèche, e pou nou kontinye frape ’. “ Moun ki mande l lespri sen, l ap ba yo l ” anretou.

6. Nan tan Jezi, ki jan moun yo te konsidere koutim yo te genyen pou yo demontre ospitalite ?

⁶ Nonsèlman Jezi montre nou ki fason nou ta dwe priye — avèk yon pèsistans tenas — li montre nou tou rezon ki fè nou ta dwe fè sa. Pou nou konprann leson sa a pi byen, nou dwe egzamine fason moun ki t ap koute egzanp Jezi te bay la te konsidere koutim yo te genyen pou yo demontre ospitalite. Gen anpil istwa nan Ekriti yo ki montre, nan tan biblik yo, moun yo, sitou sèvitè Bondye yo, te bay koutim yo te genyen pou yo pran swen vizitè yo anpil enpòtans (Jenèz 18:2-5 ; Ebre 13:2). Lè yon moun pa t montre li gen ospitalite, se te yon wont (Lik 7:36-38, 44-46). Pandan nou gen sa nan lespri nou, annou egzamine istwa Jezi te bay la ankò.

7. Poukisa nan egzanp Jezi a, mesye ki t ap akeyi vizitè a pa t wont leve zanmi l lan ?

⁷ Nan egzanp lan, mesye a te resevwa yon vizitè nan mitan lannuit. Li te santi se yon obligasyon pou l sèvi vizitè l la manje, men li pa t gen ‘ anyen pou l mete devan l ’. Se te yon sitiyasyon ki ijan pou li. Li te dwe jwenn kèk pen, kèlkeswa sa sa koute. Sa fè l al kay yon zanmi l e li pa t wont leve l. Men sa l te di : “ Zanmi, prete m twa pen. ” Li pèsiste nan demann li a jiskaske li jwenn sa l bezwen an. Se sèlman lè sa a, lè l te fin gen pen yo nan men l, li te kapab montre li se yon moun ki konn akeyi moun byen.

Plis nou bezwen, plis nou mande

8. Ki sa k ap pouse nou priye avèk pèsistans pou nou jwenn lespri sen ?

⁸ Ki sa egzanp sa a montre konsènan rezon nou genyen pou nou priye avèk pèsistans ? Mesye a pa t sispann mande pen yo, paske li te santi li vrèman nesesè pou l gen pen yo pou l ka ranpli obligasyon l antanke moun k ap akeyi vizitè (Izayi 58:5-7). Si li pa gen pen yo, li pap ka ranpli devwa l. Menm jan an tou, nou kontinye priye Bondye pou nou mande l lespri li, paske nou rann nou  kont li vrèman nesesè pou nou gen lespri Bondye pou nou akonpli ministè nou antanke vrè kretyen (Zekarya 4:6). Si nou pa genyen l, nou pap ka kenbe ladan l (Matye 26:41). Èske w wè ki konklizyon enpòtan nou ka tire nan egzanp sa a ? Si nou konprann lespri Bondye se yon bagay nou bezwen ann ijans, n ap plis ka kontinye mande l avèk pèsistans.

9, 10. a) Bay yon egzanp pou montre poukisa nou bezwen pèsistan nan demann n ap fè Bondye pou l ban nou lespri l. b) Ki kesyon nou ta dwe poze tèt nou, e poukisa ?

⁹ Annou pran yon sitiyasyon jodi a pou ede nou konprann pwen sa a. Imajine ou gen yon moun nan fanmi w ki tonbe malad nan mitan nuit. Èske w t apral leve yon doktè pou w mande l èd li ? Petèt ou pa t ap fè sa si se pa yon maladi grav. Men, si se yon atak kadyak li fè, ou pa t ap wont rele doktè a. Sa k fè sa ? Paske ou devan yon sitiyasyon ki ijan. Ou reyalize sa vrèman nesesè pou w jwenn èd yon moun ki konpetan. Si w pa mande èd, moun nan ka mouri. Menm jan an tou, nan yon sans figire, vrè kretyen yo ap fè fas ak yon sitiyasyon ki ijan. Annefè, Satan ap sikile tankou “ yon lyon k ap gwonde ”, l ap chèche devore nou (1 Pyè 5:8). Pou nou rete an vi espirityèlman, li vrèman nesesè pou nou jwenn èd lespri Bondye. Si nou pa chèche èd nan men Bondye, sa ka gen konsekans grav pou nou. Kidonk, annou mande Bondye lespri sen li avèk yon pèsistans ki tenas (Efezyen 3:14-16). Se sèlman lè nou fè sa, n ap toujou gen fòs ki nesesè pou nou “ andire jiska lafen ”. — Matye 10:22 ; 24:13.

¹⁰ Se poutèt sa, li endispansab pou nou pran tan pafwa pou nou mande tèt nou : ‘ Èske vrèman mwen pèsistan nan priyè m ap fè yo ? ’ Pa bliye, lè nou rann nou kont ak tout kè nou nou bezwen èd Bondye, n ap vin pi pèsistan toujou nan priyè n ap fè pou nou mande lespri sen.

Ki sa k pouse nou priye avèk konfyans ?

11. Nan kesyon lapriyè, kòman Jezi te aplike egzanp papa a ak pitit li a ?

¹¹ Egzanp Jezi te bay sou mesye pèsistan an dekri atitid moun k ap priye a, sètadi kwayan an. Egzanp ki vin annapre a dekri atitid moun k ap koute priyè a, sètadi Jewova Dye. Jezi te poze kesyon sa a : “ Annefè, ki papa pami nou, si pitit li mande l yon pwason, k ap kapab lonje yon sèpan ba li olye l ba l yon pwason ? Oubyen, si l mande l yon ze tou, ki pral lonje yon eskòpyon ba li ? ” Jezi te fè aplikasyon an, lè l te di : “ Kidonk, si nou menm, malgre nou mechan, nou konnen pou nou bay pitit nou bonjan kado, alewè pou Papa a ki nan syèl la, moun ki mande l lespri sen, l ap ba yo l ! ” — Lik 11:11-13.

12. Kòman egzanp papa ki koute demann pitit li a montre dispozisyon Jewova genyen pou l reponn priyè nou yo ?

¹² Avèk egzanp sa a Jezi te bay sou jan yon papa reponn demann pitit li, li te revele fason Jewova santi l anrapò ak moun ki pwoche  bò kote l pa mwayen lapriyè (Lik 10:22). Toudabò, remake gen yon kontras ant de egzanp sa yo. Kontrèman ak mesye nan premye egzanp lan ki pa t dispoze bay èd yo t ap mande l la, Jewova tankou yon papa ki gen afeksyon e ki chofe pou l reponn demann pitit li fè l (Sòm 50:15). Anplis, Jezi revele bon dispozisyon Jewova genyen anvè nou nan konparezon li te fè ant yon papa sou tè a ak papa nou ki nan syèl la. Li di, si yon papa imen, malgre li “ mechan ” akoz enpèfeksyon li eritye, ap bay pitit li bon kado, alewè pou Papa nou ki nan syèl la ki donan, nou ka espere l ap bay tout pitit li yo, anpalan de adoratè l yo, lespri sen ! — Jak 1:17.

13. De ki sa nou ka sèten lè nou priye Jewova ?

¹³ Ki leson nou tire ? Nou ka gen konfyans lè nou mande Papa nou ki nan syèl la lespri sen, li trè dispoze pou l egzose demann nou fè a (1 Jan 5:14). Lè nou pwoche bò kote Jewova avèk ensistans pa mwayen lapriyè, li pap janm di pawòl tankou : “ Sispann nui m. Pòt la take deja. ” ​(Lik 11:7). Men okontrè, Jezi te di : “ Kontinye mande e y ap ban nou, kontinye chèche e n ap jwenn, kontinye frape e y ap ouvri pou nou. ” ​(Lik 11:9, 10). Wi, Jewova “ ap reponn nou nan jou nou rele a ”. — Sòm 20:9 ; 145:18.

14. a) Ki move panse ki konn twouble anpil moun k ap rankontre eprèv ? b) Lè n ap rankontre eprèv, poukisa nou bezwen priye Jewova avèk konfyans ?

¹⁴ Egzanp Jezi te bay sou papa ki gen afeksyon an montre tou bonte Jewova pi gran lontan pase bonte nenpòt paran imen demontre. Kidonk, okenn nan nou pa ta dwe konsidere eprèv l ap rankontre kòm yon siy ki montre li pa gen apwobasyon Bondye. Se Satan, pi gwo ènmi nou an, ki vle nou reflechi konsa (Jòb 4:1, 7, 8 ; Jan 8:44). Pa gen okenn kote nan Ekriti yo ki ankouraje refleksyon konsa, kote moun ap kondane tèt yo. Jewova pa pase nou anba eprèv “ ak bagay ki mal ”. (Jak 1:13.) Li pap mete devan nou yon eprèv ki tankou yon sèpan oswa ki tankou yon eskòpyon. Papa nou ki nan syèl la bay “ moun ki mande l yo bon bagay ”. (Matye 7:11; Lik 11:13.) An reyalite, plis nou konprann bonte Jewova ak bon dispozisyon li genyen pou l ede nou, se plis n ap santi nou pouse pou nou priye avèk konfyans. Pandan n ap fè sa, n ap vin anmezi tou pou nou eksprime menm santiman ak yon salmis ki te ekri pawòl sa yo : “ Vrèman Bondye tande. Li prete atansyon ak vwa priyè m. ” — Sòm 10:17 ; 66:19.

Fason lespri sen se asistan nou

15. a) Anrapò ak lespri sen, ki pwomès Jezi te fè ? b) Ki youn nan fason lespri sen ede nou ?

¹⁵ Yon ti tan anvan Jezi mouri, li te rebay asirans li te deja bay nan egzanp li yo. Pandan l t ap pale apot li yo de lespri sen, li te  di yo : “ M ap mande Papa a e l ap ban nou yon lòt asistan ki pou avèk nou toutan. ” ​(Jan 14:16). Konsa, selon pwomès Jezi te fè, asistan an, sètadi lespri sen, t ap avèk disip li yo alavni, menm nan epòk pa nou an. Ki youn nan fason enpòtan nou jwenn sipò sa a jodi a ? Youn nan fason enpòtan, sèke lespri sen ede nou andire divès kalite eprèv. Kòman sa fèt ? Apot Pòl, ki te konn rankontre eprèv, te dekri fason lespri Bondye te vin yon sipò pou li, nan yon lèt li te ekri kretyen Korent yo. Annou egzamine rapidman sa l te ekri.

16. Kòman sitiyasyon nou ka menm jan ak sitiyasyon Pòl ?

¹⁶ Toudabò, Pòl te di kwayan parèy li yo byen klè li t ap fè fas ak yon eprèv ki te tankou “ yon pikan nan chè ” li. Ansuit, li di : “ An twa fwa mwen sipliye Seyè a [Jewova] pou sa ta kite m. ” ​(2 Korentyen 12:7, 8). Menmsi Pòl te mande Bondye retire pwoblèm sa a ki te aflije l, pwoblèm nan te rete la. Petèt, ou menm tou, w ap fè fas kounye a ak yon sitiyasyon ki menm jan an. Tankou Pòl, siman ou konn priye avèk pèsistans e avèk konfyans pou w mande Jewova retire eprèv la. Malgre tout priyè ou fè, pwoblèm nan toujou la nan kò w. Èske sa vle di Jewova pa reponn priyè w yo e lespri l pa ede w ? Se pa sa ditou (Sòm 10:1, 17) ! Remake sa apot Pòl te di annapre.

17. Kòman Jewova te reponn priyè Pòl yo ?

¹⁷ Pou Bondye te reponn priyè Pòl yo, li te di l : “ Bonte m moun pa merite a sifi pou ou, paske pisans mwen ap vin pafè nan feblès. ” Pòl di : “ Kidonk, m ap byen kontan vante tèt mwen pito anrapò ak feblès mwen, poutèt pou pisans Kris la ka rete sou mwen tankou yon tant. ” ​(2 Korentyen 12:9 ; Sòm 147:5). Donk, Pòl te konnen pa mwayen Kris, pwoteksyon pisan Bondye bay la te kouvri l tankou yon tant. Jodi a, Jewova konn reponn priyè nou yo menm fason an. Li kouvri sèvitè l yo ak pwoteksyon li ki tankou yon abri.

18. Ki sa k fè nou anmezi pou nou andire eprèv ?

¹⁸ Natirèlman, yon tant pa fè lapli pa tonbe, ni li pa fè van pa soufle, men li bay pwoteksyon kont bagay sa yo. Menm jan an tou, abri “ pisans Kris la ” reprezante a pa fè eprèv pa tonbe sou nou, ni l pa fè difikilte pa frape nou. Men, li bay pwoteksyon espirityèl kont tout sa ki nuizib nan monn nan e kont atak chèf monn nan, Satan (Revelasyon 7:9, 15, 16). Donk, menmsi w ap fè fas ak yon eprèv ki ‘ pa kite w ’, ou mèt gen asirans Jewova konnen ki konba w ap mennen e li reponn “ bri rèl ou yo ”. (Izayi 30:19 ; 2 Korentyen 1:3, 4.) Pòl te ekri : “ Bondye fidèl, e li pap kite nou tante depase sa nou ka sipòte, men ansanm ak tantasyon an l ap ouvri yon chemen tou dekwa pou nou ka andire l. ” — 1 Korentyen 10:13 ; Filipyen 4:6, 7.

19. Ki sa w detèmine pou w fè, e poukisa ?

¹⁹ Se vre, se “ tan ki kritik e ki difisil pou moun sipòte ” ki mak fabrik “ dènye jou ” monn sa a ki san atachman pou Bondye (2 Timote 3:1). Malgre sa, nan ka sèvitè Bondye yo, tan sa yo pa enposib pou yo sipòte. Sa k fè sa ? Paske yo jwenn sipò ak pwoteksyon lespri sen Bondye. Tout moun ki mande Jewova lespri sen avèk pèsistans e avèk konfyans, li byen kontan ba yo l ann abondans. Pou rezon sa a, annou detèmine pou nou kontinye priye pou nou jwenn lespri sen chak jou. — Sòm 34:6 ; 1 Jan 5:14, 15.

Ki repons nou ta bay ?

• Ki sa nou dwe fè pou nou resevwa lespri sen Bondye ?

• Poukisa nou mèt gen konfyans Jewova ap reponn priyè nou fè pou nou mande l lespri sen ?

• Kòman lespri sen ede nou andire eprèv ?

[Kesyon]

[Foto nan paj 13]

Ki sa nou aprannnan egzanp Jezi te bay sou mesye pèsistan an ?

[Foto nan paj 14]

Èske w priye avèk pèsistans pou w resevwa lespri sen Bondye ?

[Foto nan paj 15]

Ki sa nou aprann sou Jewova nan egzanp papa ki gen afeksyon an ?