Èske se lòt moun sèlman ki dwe toujou di laverite ?

“ MWEN rayi manti, e mwen rayi lè moun ban m manti ! ” Se sa yon jèn fi 16 an te di. Pifò nan nou menm jan avè l. Nou renmen santi enfòmasyon y ap ban nou yo — kit se an pawòl kit se alekri — se laverite. Men, èske nou menm nou di laverite lè n ap bay lòt moun enfòmasyon ?

Nan yon ankèt ki te fèt ann Almay, prèske tout moun yo te entèwoje te santi “ lè moun bay manti nan bagay ki piti yon fason pou yo pwoteje tèt yo oswa pou yo pwoteje lòt moun kont yon bagay ki ka fè yo mal, se yon bagay ki akseptab e ki menm nesesè pou moun byen viv youn ak lòt ”. Men sa yon jounalis te ekri : “ Di laverite e sèlman laverite tout tan se yon objektif ki nòb men ki annuiyan. ”

Èske an reyalite nou ta prefere pou se lòt moun ki toujou di laverite, alòske nou santi nou menm nou ka gen bonjan rezon pou nou bay manti ? Èske di laverite oswa pa di laverite gen enpòtans ? Ki konsekans bay manti genyen ?

Dega manti lakòz

Konsidere dega manti ka lakòz. Manti fè gen mefyans ant konjwen e ant manm fanmi. Tripotay ki pa baze sou laverite ka gen move efè sou repitasyon yon moun. Lè anplwaye fè vòl oswa fwod, sa fè antrepriz yo oblije fè plis depans pou yo fonksyone, e sa lakòz pri pwodui yo ogmante. Fo deklarasyon enpo anpeche gouvènman yo jwenn kantite kòb ki nesesè pou yo bay sèvis piblik. Fo enfòmasyon moun k ap fè rechèch bay kraze karyè yo, alòske moun sa yo te pwomèt, e sa tèni repitasyon enstitisyon moun te fè konfyans ki t ap soutni moun k ap fè rechèch sa yo. Pwojè malonèt moun antreprann pou yo rich vit fè moun ki nayif ki al envesti ladan yo pèdi tout ti ekonomi yo, e aktivite sa yo ka lakòz plis dega toujou. Se pa etonan si Labib di nou pami bagay Jewova Dye rayi, gen ladan yo “ yon lang k ap bay manti ” ak “ yon fo temwen k ap plede bay manti ” ! — Pwovèb 6:16-19.

Manti ki gaye toupatou ka lakòz dega, ni pou moun ni pou sosyete a an jeneral. Majorite moun ap dakò ak sa. Piske se konsa, poukisa moun yo chwazi bay manti ? E èske tout sa ki pa verite se manti ? Nou pral egzamine repons kesyon sa yo ak lòt ankò nan atik ki vin apre a.

[Foto nan paj 3]

Manti fè gen mefyans ant konjwen.