Poukisa nou dwe toujou di laverite ?

A 18 an, Fred t ap fè yon staj nan yon biwo *. Konpayi li t ap travay pou li a te voye li menm ak kèk lòt stajyè al suiv yon kou nan yon lekòl pwofesyonèl de fwa pa semèn. Yon jou, kou a te fini pi bonè pase lòt jou yo. Selon règ konpayi a te fikse, stajyè yo te sipoze retounen nan travay yo pou fè rès jounen an. Olye yo fè sa, yo tout te al pran plezi yo, sof Fred ki te retounen nan travay li. Pa konwensidans, direktè konpayi a, ki te responsab stajyè yo, te fè yon pase. Lè l wè Fred, li mande l : “ Poukisa w pa al nan kou jodi a ? Epi kote lòt yo ? ” Ki sa Fred dwe reponn ?

Sitiyasyon difisil Fred te twouve l la rive souvan. Èske l ta dwe di laverite, oswa èske l ta dwe kouvri pou kòlèg li yo ? Si l di laverite, sa ap fè lòt yo tonbe nan pwoblèm e sa ap fè yo rayi l. Èske li bon pou yon moun bay manti nan sikonstans sa yo ? Ki sa w t ap fè si se te ou ? N ap tounen sou Fred talè konsa, men anvan, ann wè ki sa ki enplike lè nou dwe deside si n ap di laverite ou non.

Verite ak manti : Yon opozisyon fondamantal

Nan kòmansman istwa limanite, tout bagay te baze sou laverite. Yo pa t konn defòme enfòmasyon yo, ni nonplis yo pa t konn tòde laverite, sètadi fè l parèt yon lòt jan. Jewova, Kreyatè a, se “ Bondye verite a ”. Pawòl li se laverite. Li pa ka bay manti, li kondane manti e li kondane moun k ap bay manti. — Sòm 31:5 ; Jan 17:17 ; Tit 1:2.

Nan ka sa a, kòman manti te fè vin egziste ? Jezi Kris te bay vrè repons lan lè li te di opozan relijye ki t ap chèche touye l yo : “ Nou menm, nou soti nan papa nou Dyab la, e nou vle akonpli volonte papa nou. Li menm, se yon asasen li te ye depi lè li te kòmanse, e li pa t kenbe fèm nan laverite, paske laverite pa nan li. Lè l ap bay manti, li pale dapre pwòp panchan pa l, paske li se yon mantè e li se papa manti. ” ​(Jan 8:44). Se sèten, Jezi t ap fè referans ak sa k te pase nan jaden Edenn nan, lè Satan te pouse premye koup la dezobeyi Bondye, sa ki te lakòz yo vin viktim peche ak lanmò. — Jenèz 3:1-5 ; Women 5:12.

 Pawòl Jezi yo idantifye Satan aklè kòm “ papa manti ”. Se li ki te vin ak manti e ki te vin ap di sa ki pa laverite. Satan kontinye rete prensipal moun k ap soutni manti e anfèt, l ap “ twonpe tout latè ki abite ”. Li pote yon gwo responsablite sou do l pou dega manti ki gaye toupatou fè sou lèzòm jodi a. — Revelasyon 12:9.

Opozisyon fondamantal ki egziste ant laverite ak manti Satan Ledyab te etabli a kontinye avèk fòs jodi a. Li antre nan tout nivo nan sosyete a e li afekte chak moun an patikilye. Fason yon moun ap viv fè li pran pozisyon nan yon kan oswa nan yon lòt, parapò ak kesyon sa a. Moun ki nan kan Bondye baze lavi yo sou verite ki nan Pawòl Bondye a, Labib. Kèlkeswa moun ki pa suiv chemen laverite a, li tonbe anba men Satan, kit li rann li kont, kit li pa rann li kont, paske “ lemonnantye anba pouvwa mechan an ”. — 1 Jan 5:19 ; Matye 7:13, 14.

Poukisa moun gen tandans bay manti ?

Lefètke “ lemonnantye ” anba pouvwa Satan, sa fè nou konprann poukisa gen tout moun sa yo k ap bay manti. Men, nou ka ap mande : ‘ Poukisa Satan, “ papa manti ” a, te bay manti ? ’ Satan te konnen se Jewova ki gen dwa pou l Souvren sou tout bagay Li kreye, san wete premye koup la. Sepandan, Satan te vle gen bèl pozisyon san parèy sa a, yon pozisyon li pa t gen dwa genyen. Avidite, anbisyon ak egoyis te pouse l fè plan pou l pran plas Jewova. Pou Satan te rive fè sa, li te itilize manti ak twonpri. — 1 Timote 3:6.

E jodi a menm ? Èske w pa dakò jis kounye a se avidite, anbisyon ak egoyis ki pouse anpil moun bay manti ? Biznis ki plen ak avidite, politik ki chaje ak koripsyon, fo relijyon, yo tout plen ak twonpri, manti, magouy ak fwod. Sa k fè sa ? Èske, se pa paske byen souvan, moun yo gen avidite ak anbisyon pou yo pran devan oswa pou yo jwenn richès, pouvwa oswa pozisyon yo pa gen dwa genyen ? Wa Salomon, yon wa nan Izrayèl tan lontan an ki te saj, te bay avètisman sa a : “ Moun ki prese pou ranmase richès pap ret inosan. ” ​(Pwovèb 28:20). E men sa apot Pòl te ekri : “ Lanmou pou lajan se yon rasin tout kalite move bagay. ” ​(1 Timote 6:10). Menm bagay la aplikab tou anrapò ak dezi egzajere yon moun genyen pou l jwenn pouvwa oswa pozisyon.

Yon lòt bagay ki pouse yon moun bay manti se laperèz, sètadi lè moun nan pè sa k ka rive oswa sa lòt moun ka panse si l ta di laverite. Se yon bagay ki toutafè natirèl pou yon moun ta renmen lòt moun apresye l oswa aksepte l. Sepandan, dezi sa a ka fè l tòde laverite, menmsi se ta toupiti, yon fason pou l kouvri feblès li, pou l kache detay ki pa bèl yo, oswa senpleman pou l fè bèl enpresyon sou lòt moun. Se avèk rezon Salomon te ekri pawòl sa yo : “ Lè w tranble devan moun, se la a pyèj la ye ! Men moun ki met konfyans li nan Jewova ap jwenn pwoteksyon. ” — Pwovèb 29:25.

Fidelite anvè Bondye verite a

Ki sa Fred te di nan moman direktè konpayi a te poze l kesyon an ? Fred te di laverite. Men sa l te di : “ Pwofesè a te lage nou pi bonè jodi a, donk mwen vin travay. Kanta pou lòt yo, mwen pa ka pale pou yo. Petèt ou ka mande yo pèsonèlman. ”

Fred te ka bay yon repons entèlijan pou l pase sou direktè a, e konsa lòt stajyè yo t ap renmen l. Men, li te gen bonjan rezon pou l rete atache fidèlman ak laverite. Fred se yon Temwen Jewova. Onètete l te pèmèt li kenbe yon konsyans ki pwòp. Anplis, sa te fè  patwon l fè l konfyans. Rive yon moman nan staj la, yo te bay Fred travay nan depatman bijou, e nòmalman okenn stajyè pa t gen dwa travay la. Apre anviwon 15 an, Fred te jwenn pwomosyon pou l travay nan yon pòs responsablite nan konpayi a. Lè sa te rive, menm direktè sa a te telefone l pou l felisite l e pou l fè l sonje sa k te pase a, kote li te montre l fidèl ak laverite.

Piske Jewova se Bondye verite a, tout moun ki ta renmen gen relasyon etwat avèk li dwe “ voye kesyon bay manti a jete ” e yo dwe ‘ di laverite ’. Yon sèvitè Jewova dwe renmen laverite. Saj la te ekri : “ Yon temwen fidèl se yon temwen ki pap bay manti. ” Men, ki sa yon manti ye ? — Efezyen 4:25 ; Pwovèb 14:5.

Ki sa yon manti ye ?

Tout manti pa laverite, men se pa tout pawòl ki pa laverite ki manti. Sa k fè sa ? Gen yon diksyonè ki defini manti kòm “ yon bagay yon moun konnen oswa li kwè ki pa laverite epi li di l nan entansyon pou l twonpe moun ”. Wi, yon moun bay manti lè l di yon bagay nan entansyon pou l twonpe yon lòt moun. Se poutèt sa, lè yon moun di yon bagay ki pa laverite san se pa t nan entansyon l pou l fè sa — tankou l ta bay yon moun yon enfòmasyon oswa yon chif ki pa egzak san l pa fè espre — se pa menm bagay ak bay yon manti.

Mete sou sa, nou bezwen gade si moun k ap mande enfòmasyon an se yon moun ki gen dwa pou l konn tout detay. Pa egzanp, ann sipoze se direktè yon lòt konpayi ki te poze Fred menm kesyon sa a. Èske Fred t ap oblije di l tout bagay nèt ? Pa vrèman. Piske direktè sa a pa t ap gen dwa ak enfòmasyon sa a, Fred pa t ap oblije ba li l. E menm la ankò, li pa t ap bon pou l bay manti.

Ki egzanp Jezi te bay nan domèn sa a ? Nan yon okazyon, Jezi te gen yon konvèsasyon ak kèk moun ki pa t disip li, men ki te enterese nan aranjman li t ap fè pou yon vwayaj li te gen pou l fè. Men ki konsèy yo te ba li : “ Pase isit la pou w al nan Jide. ” Ki repons Jezi te ba yo ? “ Nou menm monte nan fèt la [nan Jerizalèm]. Mwen poko ap monte nan fèt sa a, paske tan mwen poko rive nèt. ” Yon tikras tan apre sa, Jezi te ale Jerizalèm pou l al nan fèt la. Poukisa li te reponn konsa ? Yo pa t an dwa pou yo konnen mwenn ti detay konsènan kote l prale. Nan ka sa a, Jezi pa t bay yon manti, men li te ba yo yon repons ki pa t konplè, yon fason pou l te limite tò yo ta ka fè li menm oswa disip li yo. Li pa t bay manti, paske apot Pyè te ekri pawòl sa yo konsènan Kris : “ Li pa t fè peche, e yo pa t jwenn twonpri nan bouch li. ” — Jan 7:1-13 ; 1 Pyè 2:22.

E Pyè li menm ? Èske Pyè pa t bay manti an twa fwa lè li te renye Jezi nan lannuit yo te arete Jezi a ? Wi, krent pou lòm te anvayi Pyè e li te bay manti. Men, menm moman an, li te  “ kriye ak anpil lapenn ”, li te repanti, e li te jwenn padon pou peche l la. Anplis, li te pran leson nan erè l la. Kèk jou apre, li te pale an piblik konsènan Jezi, e li te refize sispann malgre otorite Juif ki te nan Jerizalèm yo te menase l. San mank, moman feblès Pyè a, e lefètke li te reprann li rapidman ta dwe yon ankourajman pou nou tout, paske fasilman nou tout ka febli pandan yon moman, e nou ka trebiche an pawòl oswa ann aksyon. — Matye 26:69-75 ; Travay 4:18-20 ; 5:27-32 ; Jak 3:2.

Laverite pral tabli pou toutan

Pwovèb 12:19 fè konnen “ se lèv verite a k ap tabli solidman pou toutan, men lang manti a ap la pou yon ti moman sèlman ”. Se vre, pawòl veridik se pawòl ki dirab e ki pèmanan. E lè moun yo pran detèminasyon pou youn di lòt laverite e pou yo aji ann amoni avèk laverite, relasyon moun ak moun vin pi stab e sa pote plis satisfaksyon. Vrèmanvre, lè yon moun veridik, li jwenn byenfè depi kounye a. Pami byenfè sa yo gen yon konsyans ki pwòp, yon bon repitasyon, epi bonjan relasyon nan maryaj, nan fanmi, ant zanmi e menm nan biznis.

Yon lòt bò, nou konnen tou manti pa fon. Yon lang k ap bay manti ka twonpe moun pandan yon ti tan, men manti pa ka kenbe nètale. Anplis, Jewova, Bondye verite a, fikse yon delè pou l sispann tolere manti ansanm ak moun k ap bay manti. Labib fè pwomès Jewova ap efase enfliyans Satan Ledyab, papa manti a, k ap twonpe tout latè ki abite. Talè konsa Jewova pral mete fen nan tout manti e l ap detwi tout moun k ap bay manti. — Revelasyon 21:8.

Ala yon soulajman sa ap ye lè finalman “ lèv verite a ” ap tabli solidman e pou toutan !

[Nòt anba paj]

[Antrefilè nan paj 5]

Se avidite, anbisyon ak egoyis ki pouse anpil moun bay manti.

[Antrefilè nan paj 6]

Tout manti pa laverite, men se pa tout pawòl ki pa laverite ki manti.

[Antrefilè nan paj 6]

Ki sa nou aprann nan renye Pyè te renye Kris la ?

[Foto nan paj 7]

Lè youn di lòt laverite, sa fè yo gen relasyon ki stab e ki bay satisfaksyon.