Èske w pwofite tout okazyon w jwenn pou w pataje kwayans ou ?

“ÈSKE verite absoli egziste ? ” Kesyon sa a se te sijè yon konkou redaksyon nasyonal nan peyi Polòy. Men sa yo te di nan enstriksyon yo te bay yo : “ Nou pa bezwen verite absoli. Pa gen moun ki bezwen l. Dayè, verite absoli pa menm egziste. ” Agata, yon jèn fi Temwen Jewova ki gen 15 an e ki elèv nan yon lekòl segondè, te deside pwofite okazyon sa a pou l pataje kwayans li yo ak lòt moun.

Pou Agata te prepare redaksyon an, premye bagay li te fè, li te priye Jewova pou l dirije l, e apre sa, li te kòmanse fè rechèch. Li te jwenn enfòmasyon nan Toudegad 1^ye jiyè 1995 (fransè). Li te site kesyon Pons Pilat te poze Jezi a lè l te mande l : “ Sa k laverite a ? ” ​(Jan 18:38). Li te di kesyon sa a te reflete atitid negatif Pilat te genyen, se kòmsi Pilat te vle di : ‘ Verite ? Sa k laverite a ? Bagay konsa pa egziste. ’ Agata te di : “ Kesyon Pilat te poze a sanble ak sijè konkou a ansanm ak enstriksyon yo te bay yo. ”

Ansuit, li pale konsènan teyori relativis la, yon teyori ki fè konnen sa k vrè pou yon moun pa fòseman vrè pou yon lòt moun, epoutan toule de moun yo ka “ gen rezon ”. Men youn nan kesyon li te poze : “ Kiyès nan nou ki t ap janm monte yon avyon si l pa ta kwè lwa yo aplike ki pèmèt avyon yo vole yo se yon verite absoli ? ” Apre sa, li te atire atansyon sou Labib, li di : “ Konfyans nou gen nan Pawòl Bondye a se yon konfyans ki byen fonde sou bagay moun ka verifye. ” Li te di li espere moun k ap chèche verite absoli yo ap gen ase pasyans pou yo rive jwenn li.

Yo te bay Agata yon sètifika espesyal, anplis de sa, li te gen opòtinite pou l fè yon ekspoze devan tout klas la. Gen plizyè kamarad li ki te aksepte pou l etidye Labib avèk yo. Agata kontan anpil dèske li te pataje kwayans li ak anpil lòt moun. Vrèman, lè nou chèche opòtinite pou nou pale konsènan lafwa nou, sa ka pote fwi. E ou menm, ki okazyon ou ka pwofite ?