‘ Abiye nou avèk imilite ’
‘ Abiye nou avèk imilite ’
SOL te moun yon vil ki enpòtan. Li te yon sitwayen women e sandout li te sot nan yon gwo fanmi. Li te resevwa youn nan pi gwo edikasyon yon moun ta ka resevwa nan premye syèk epòk nou an, li te pale omwen de lang e li te fè pati Farizyen yo, yon gwoup relijye juif tout moun te konnen.
Sandout, Sol te aprann pou l meprize moun ki te fè pati pèp la e pou l te santi l fyè de pwòp jistis li (Lik 18:11, 12 ; Travay 26:5). Farizyen menm jan ak Sol yo te santi yo siperyè lòt moun e yo te montre yo renmen gwo pozisyon ak gwo tit (Matye 23:6, 7 ; Lik 11:43). Lefètke Sol te avèk moun sa yo, siman sa te rann li awogan. Nou konnen li te konn pèsekite kretyen yo avèk detèminasyon. Plizyè ane apre, lè l te vin apot Pòl, li te di lontan li te “ yon blasfematè, yon pèsekitè, yon moun ki ensolan. ” — 1 Timote 1:13.
Sol te vin kretyen, li te vin apot Pòl, e pèsonalite l te chanje nèt. Antanke yon apot, li di avèk imilite li te “ yon nonm ki pi piti pase pi piti nan tout sen yo ”. (Efezyen 3:8.) Li te yon evanjelizatè ki te efikas, poutan li pa t bay tèt li okenn merit pou sa. Okontrè, se Bondye li te bay tout onè a (1 Korentyen 3:5-9 ; 2 Korentyen 11:7). Se Pòl ki te bay konpayon kretyen l yo egzòtasyon sa a ki di : “ Se pou nou abiye nou avèk tandrès, afeksyon, konpasyon ansanm ak bonte, imilite, dousè ak pasyans. ” — Kolosyen 3:12.
Èske konsèy sa a gen valè pou nou k ap viv nan 21yèm syèk la ? Èske yon moun ap jwenn byenfè lè l enb ? Èske imilite se yon kalite ki kapab demontre yon moun gen fòs moral ?
Èske Kreyatè toupisan an enb ?
Kèlkeswa sa n ap di konsènan imilite, nou ta dwe pran pwennvi Bondye an konsiderasyon. Poukisa ? Se paske li se Souvren nou e li se Kreyatè nou. Kontrèman ak li, nou dwe rekonèt nou gen limit nou e nou depann de li. Men sa Eliyou, yon mesye ki saj ki t ap viv nan tan lontan, te di : “ Kanta pou Toupisan an, nou pa rive dekouvri l. Pisans li gran anpil. ” (Jòb 37:23). Se vre, paske lè n ap gade linivè ki antoure nou an, sa kont pou fè nou santi nou piti. Men sa pwofèt Izayi envite nou fè : “ Leve je w anlè epi gade. Kiyès ki kreye bagay sa yo ? Se Sila a ki pwodui lame yo fòme a selon kantite a, li rele yo tout nan non yo. Grasa pakèt enèji aktif li genyen, paske li gen anpil pisans tou, pa gen youn nan yo ki manke. ” — Izayi 40:26.
Byenke Jewova Dye toupisan, li enb. Men sa wa David te di nan yon priyè li te fè : “ W ap ban m boukliye delivrans ou an, e se imilite w ki fè m gran. ” (2 Samyèl 22:36). Bondye enb paske li demontre li gen sousi pou moun ki enb k ap fè efò pou yo fè l plezi e li fè yo jwenn mizèrikòd li. Nan yon sans, se kòmsi detan Jewova nan syèl la, li bese pou l aji avèk bonte anvè moun ki krenn li yo. — Sòm 113:5-7.
Anplis, Jewova bay imilite sèvitè l yo anpil valè. Men sa apot Pyè te ekri : “ Bondye kont moun ki ògeye yo, men li bay moun ki enb yo bonte moun pa merite. ” (1 Pyè 5:5). Gen yon ekriven biblik ki te fè remak sa a konsènan pwennvi Bondye sou ògèy : “ Nenpòt moun ki gen ògèy nan kè l, li se bagay detestab pou Jewova. ” (Pwovèb 16:5). Men, ki jan imilite kapab yon kalite ki demontre yon moun gen fòs moral ?
Sa imilite pa vle di
Imilite se pa menm bagay avèk imilyasyon. Nan kèk kilti nan tan lontan, yon moun ki te enb se te yon esklav, yon moun ki te nan yon pozisyon ba, ki te mizerab e ki te fè moun gen pitye pou li. Kontrèman ak pwennvi sa a, Labib montre lè yon moun enb, sa fè yo ba l onè. Pa egzanp Salomon, wa saj la, te ekri pawòl sa yo : “ Rezilta imilite ak lakrentif pou Jewova, se richès, glwa ak lavi. ” (Pwovèb 22:4). E men sa nou li nan Sòm 138:6 : “ Jewova byen wo, epoutan li wè moun ki enb lan. Men moun ki ògeye a se sèlman de lwen li konnen l. ”
Lè yon moun enb, sa pa vle di li pa gen okenn kapasite oubyen li pa reyalize anyen. Pa egzanp, Jezi Kris pa t janm pretann se pa li ki sèl Pitit Bondye a e li pa t janm pretann ministè l sou tè a pa t gen valè (Mak 14:61, 62 ; Jan 6:51). Sepandan, Jezi te demontre li gen imilite lefètke se Papa l li te bay tout merit pou sa l te fè yo e lefètke li te itilize pouvwa li pou l te ka sèvi lòt moun e pou l te ka ede yo olye pou l te domine sou yo oswa pou l te toupizi yo.
Yon kalite ki montre yon moun gen fòs moral
Pa gen dout nan sa, anpil moun ki t ap viv nan epòk Jezi a te konnen l “ grasa zèv pisans ” li te fè yo (Travay 2:22). Sepandan, nan je kèk moun, li te “ moun ki pi enb pami lèzòm ”. (Dànyèl 4:17.) Nonsèlman li te viv yon fason ki modès, men tou, se toutan li te konn fè konnen valè imilite genyen (Lik 9:48 ; Jan 13:2-16). Sepandan, lefètke l te enb, sa pa t vle di li te yon moun ki manke kouraj. Li te defann non Papa l e li te akonpli ministè l avèk kran (Filipyen 2:6-8). Nan Labib, yo dekri Jezi kòm yon lyon ki gen kouraj (Revelasyon 5:5). Egzanp Jezi montre nou imilite makònen ak fòs moral ak detèminasyon.
Ofiramezi n ap fè efò pou nou kiltive vrè imilite a, nou rann nou kont nou bezwen fè bonjan efò pou nou fè l antre nan tout aspè nan lavi nou. Sa mande pou nou toujou soumèt nou anba volonte Bondye olye pou nou chwazi fè sa k pi fasil pou nou oswa pou nou tonbe nan fè sa lachè pouse nou fè. Pou nou kiltive imilite, sa mande pou nou gen fòs moral, paske nou bezwen mete enterè pèsonèl nou apre sèvis Jewova e apre enterè lòt moun.
Byenfè yon moun jwenn lè li gen imilite
Yon moun ki enb se yon moun ki pa gen ògèy ak awogans. Nou kapab gen yon etadespri ki enb si nou gen yon pwennvi ki reyalis sou tèt nou, sa vle di konsènan pwen fò ak pwen fèb nou e konsènan reyisit ak echèk nou. Pòl te bay bonjan konsèy nan domèn sa a lè l te ekri pawòl sa yo : “ M ap di chak moun nan mitan nou pou l pa panse de tèt li plis pase sa l dwe panse, men pou l panse dekwa pou l vin gen bonsans. ” (Women 12:3). Moun ki suiv konsèy sa a se moun ki gen imilite.
Nou ka manifeste imilite tou lè nou mete enterè lòt moun anvan enterè pa nou. Pòl te resevwa enspirasyon pou l te bay kretyen yo egzòtasyon sa a : “ Pa fè anyen nan diskisyon ni paske nou vle toujou devan, men avèk imilite, annou konsidere lòt moun yo siperyè nou. ” (Filipyen 2:3). Sa ann amoni ak lòd Jezi te bay disip li yo lè l te di yo : “ Moun ki pi gran pami nou an dwe sèvitè nou. Nenpòt moun ki glorifye tèt li y ap imilye l, e nenpòt moun ki imilye tèt li y ap glorifye l. ” — Matye 23:11, 12.
Vrèman, moun ki enb yo gen anpil valè nan je Bondye. Disip Jak te mete aksan sou sa lè l te ekri pawòl sa yo : “ Imilye tèt nou nan je Jewova e l ap leve nou byen wo. ” (Jak 4:10). Kiyès ki pa ta renmen Bondye leve l byen wo ?
Lè moun pa gen imilite sa konn lakòz gen pwoblèm ak konfli antre yo. Men yon lòt bò, lè nou enb, sa pote bon rezilta. N ap jwenn apwobasyon Jewova (Mika 6:8). N ap gen lapè nan lespri nou, paske yon moun ki enb pi fasil pou l gen kè kontan e pou l satisfè pase yon moun ki ògeye (Sòm 101:5). N ap ka boule pi byen ak fanmi nou, ak zanmi nou e ak kòlèg travay nou, e relasyon nou avèk yo ap pi agreyab. Moun ki enb yo bat pou yo pa dezagreyab ni pou yo pa egzijan paske yon konpòtman konsa ka fè moun an kòlè fasil, li ka fè moun frèt youn ak lòt e li ka lakòz resantiman ak rankin. — Jak 3:14-16.
Vrèman, lè nou kiltive imilite, se yon bon fason pou nou gen bon relasyon ak lòt moun. Li ka ede nou fè fas ak pwoblèm ki gen nan monn sa a ki egoyis e ki agresif. Apot Pòl te rive venk awogans ak ògèy li te genyen grasa èd Bondye. Menm jan an tou, n ap fè byen si nou kontwole kèlkeswa panchan nou ta genyen pou nou ògeye oswa pou nou panse nou pi bon pase lòt moun. Labib ban nou avètisman sa a : “ Anvan ruin gen ògèy, e anvan yon fo pa gen yon espri awogan. ” (Pwovèb 16:18). Lè nou suiv egzanp Pòl ak konsèy li te bay yo, n ap rive wè ki jan li saj pou nou ‘ abiye nou avèk imilite ’. — Kolosyen 3:12.
[Foto nan paj 4]
Pòl te rive venk ògèy ak awogans li te genyen.
[Foto nan paj 7]
Lè nou gen imilite, sa ede nou kontinye gen bon relasyon ak lòt moun.
[Liy kredi pou foto nan paj 5]
Anglo-Australian Observatory/David Malin Images