Èske Jezi te gen yon Bib ?

NON, Jezi pa t gen yon Bib. Poukisa ? Paske nan epòk Jezi a, Labib potko egziste okonplè jan nou genyen l jodi a. Sepandan, te toujou gen woulo yo te ekri ki te nan sinagòg yo. Sa ki te nan woulo sa yo vin fè pati Bib nou gen nan men nou an jodi a. Jezi te li yon pòsyon nan woulo Izayi a nan sinagòg Nazarèt la (Lik 4:16, 17). Nan yon sinagòg nan Antyòch ki nan peyi Pizidi, apot Pòl t ap koute lè yo t ap “ fè lekti Lalwa ak Pwofèt yo an piblik ”. (Travay 13:14, 15.) Anplis, disip Jak te di yo te konn li liv Moyiz te ekri yo “ awotvwa nan sinagòg yo chak saba ”. — Travay 15:21.

Nan premye syèk la, èske gen moun ki te gen woulo Ekriti Sakre yo ? Wi. Enik etyopyen an ki te yon fonksyonè nan lakou wayal rèn Kandas te gen youn, piske li te “ chita sou cha li e li t ap li liv pwofèt Izayi a awotvwa ” lè Filip te rankontre l sou wout ki mennen Gaza a (Travay 8:26-30). Apot Pòl te mande Timote pou l pote “ woulo yo, sitou pachemen yo ”. (2 Timote 4:13.) Byenke Pòl pa t di ki woulo yo te ye, li byen posib pou se te kèk pati nan Ekriti ebrayik yo.

Selon yon pwofesè lang semitik ki rele Alan Millard, pami Juif yo, petèt se sèlman “ mesye ki te privilejye nan Palestin yo, moun ki te prezante tèt yo kòm moun ki enstwi ansanm ak kèk Farizyen ak anseyan Lalwa tankou Nikodèm ” ki te gen woulo Ekriti yo. Youn nan rezon ki fè sa, se paske woulo yo te koute chè. Selon Millard, “ yon kopi liv Izayi a te koute sis a dis denye ”, e li di tout liv ki te fòme Ekriti ann ebre yo “ t ap pran 15 a 20 woulo ”, e pou yon moun genyen l, sa t ap koute l anviwon mwatye nan salè yon ane travay.

Labib pa di si Jezi oswa disip li yo te gen woulo pa yo. Sepandan, pa gen dout nan sa, Jezi te byen konnen Ekriti yo, piske li te kapab fè referans ak yo e li te kapab site yo detèt (Matye 4:4, 7, 10 ; 19:4, 5). Èske sa pa ta dwe motive nou jodi a pou nou chèche byen konnen Bib la, piske an jeneral, li pa koute anpil lajan e li fasil pou moun jwenn ?