Yo vannen kretyen yo tankou ble

YON ti tan anvan Jezi te mouri, li te bay disip li yo avètisman sa a : “ Koute ! Satan reklame nou pou l vannen nou tankou ble. ” ​(Lik 22:31). Ki sa Jezi te vle di lè l te di pawòl sa yo ?

Nan epòk Jezi t ap viv sou tè a, travay rekòlte ble te mande anpil tan ak anpil efò. Toudabò, kiltivatè ki t ap fè rekòt yo te konn anpile zepi ble yo. Ansuit, yo te konn bat zepi sa yo yon kote ki plat e ki solid. Oubyen yo te konn fè bèt ki travay nan fèm agrikòl rale yon treno pou pase sou zepi yo dekwa pou l kraze yo. Metòd sa yo te pèmèt yo retire grenn yo nan zepi yo ak nan pay fen ki vlope grenn yo. Ansuit, kiltivatè yo te vannen ni grenn yo ni zepi yo ni pay yo ansanm. Grenn ki depaye yo te retonbe sou sifas plat la, tandiske van an te pote ti pay fen yo ale. Alafen, yo te byen vannen grenn ble yo pou yo te retire tout sa k pa bon ladan yo.

Ann amoni ak pawòl Jezi te di yo, Satan pa t ezite atake disip Jezi yo ki t ap viv nan epòk li te di pawòl sa yo, e jodi a tou, Satan kontinye atake disip Jezi yo (Efe. 6:11). Se vre, se pa tout eprèv nou rankontre nan lavi a Satan lakòz dirèkteman (Ekl. 9:11). Sepandan, l ap veye pou l sèvi ak kèlkeswa mwayen li jwenn pou l kraze entegrite nou. Pa egzanp, li ka tante nou pou nou chèche mennen yon vi materyalis, pou nou chwazi divètisman ki malsen, oswa pou nou gen yon konduit ki imoral. Anplis de sa, li kapab sèvi ak kamarad lekòl nou, kòlèg travay nou oswa manm fanmi nou ki enkwayan pou yo fè presyon sou nou dekwa pou nou itilize tout tan nou pou nou pousuiv opòtinite monn sa a ofri nan domèn edikasyon ak nan karyè pwofàn. Satan kapab sèvi tou ak pèsekisyon dirèk pou l kraze entegrite nou anvè Bondye. Natirèlman, gen anpil lòt mwayen Satan itilize pou l vannen nou nan yon sans senbolik.

Ki jan nou kapab kenbe tèt ak ènmi pisan sa a ? Nou pa kapab konte sou pwòp fòs pa nou. Satan pi fò pase nou. Sepandan, nou konnen Jewova pi fò lontan pase Satan. Si nou mete tout konfyans nou nan Jewova, si nou priye l ak tout kè nou pou l ban nou sajès ak fòs pou nou andire, e si nou konte sou li pou l gide nou, l ap ban nou fòs pou nou andire kont atak Satan yo. — Sòm 25:4, 5.

Lè nou anba eprèv, nou bezwen gen kapasite pou nou “ distenge sa ki byen ak sa ki mal ” e pou nou pa kite riz Satan yo egare nou (Ebre 5:13, 14). Jewova kapab ede nou devlope kapasite sa a. Ansuit, nou bezwen rete atache ak chemen ki dwat la, kèlkeswa sa k rive. Si nou suiv direksyon Jewova ban nou, l ap ede nou san mank nan detèminasyon nou genyen pou nou fè sa ki dwat. — Efe. 6:10.

Satan kapab eseye vannen nou tankou ble. Men, grasa fòs Jewova ban nou, nou kapab kenbe tèt ak Satan, toutpandan nou rete solid nan lafwa (1 Pyè 5:9). Wi, Pawòl Jewova a ban nou asirans sa a : “ Opoze ak Dyab la, e l ap kouri pou nou. ” — Jak 4:7.