Annou kontinye montre nou fidèl, san kè nou pa divize

“ M ap mache nan verite w la. Fè kè m fè yon sèl pou l krenn non w. ” — SÒM 86:11, NW.

1, 2. a) Selon Sòm 86:2, 11, ki sa k ap ede nou rete fidèl ak Jewova lè nou devan eprèv oswa tantasyon ? b) Ki lè nou bezwen fè efò pou nou fidèl devan Jewova ak tout kè nou ?

POUKISA gen kretyen ki rete fidèl pandan plizyè ane malgre yo pran prizon oswa malgre yo pèsekite yo, men ki tonbe nan materyalis apre sa ? Repons kesyon sa a gen rapò ak kè nou, sa vle di moun nou ye pa anndan an. Sòm 86 montre gen yon rapò ant fidelite yon moun genyen ak kè l ki konplè, sètadi ki pa divize. Men yon priyè salmis David te fè : ‘ O ! veye sou nanm mwen, paske mwen fidèl ! Sove sèvitè w la ki met konfyans li nan ou. Ou se Bondye mwen. ’ David te di tou nan priyè a : “ O Jewova, enstwi m konsènan chemen w lan ! M ap mache nan verite w la. Fè kè m fè yon sèl pou l krenn non w. ” — Sòm 86:2, 11, NW.

² Si nou pa mete konfyans nou nan Jewova ak tout kè nou, sousi nou genyen ak lòt bagay ki atiran kapab minen fidelite nou devan vrè Dye a. Dezi egoyis yo tankou yon pakèt eksplozif ki kache anba tè nan yon wout. Se vre, nou gendwa te rete fidèl ak Jewova nan sitiyasyon difisil, men nou kapab vin tonbe nan pyèj Satan. Se sa k fè, li trèzenpòtan depi kounye a pou nou fè efò pou nou fidèl devan Jewova ak tout kè nou, anvan nou jwenn eprèv oswa tantasyon. Men sa Labib di : “ Plis pase tout lòt bagay yon moun dwe prezève, prezève  kè w. ” (Pwo. 4:23, NW). Nan sans sa a, gen anpil bèl leson nou kapab aprann nan sa k te rive yon pwofèt ki te sot Jida Jewova te voye al kot Yawobam, wa Izrayèl la.

“ M’a fè ou kado kichòy ”

3. Ki jan Yawobam te reyaji devan mesaj jijman pwofèt Bondye a te ba li a ?

³ Imajine sèn nan. Pwofèt Bondye a bay wa Yawobam yon mesaj kondanasyon. Yawobam t ap dirije dis tribi wayòm nò a, sètadi Izrayèl, e li te mete adorasyon ti bèf la sou pye. Wa a te vin an kòlè e li te bay mesye l yo lòd pou yo met men sou pwofèt la. Men, Jewova te avèk sèvitè l la ; se sa k fè li te fè yon mirak pou li. Pandan wa a te an kòlè, li lonje men l sou sèvitè Bondye a, men, tousuit men an te seche epi lotèl li te sèvi pou l fè fo adorasyon an te fann de bò. Lamenm, Yawobam te chanje konpòtman. Li te di pwofèt la : “ Tanpri, lapriyè Seyè a, Bondye ou la, pou mwen. Mande l’ pou l’ geri men m’. ” Pwofèt la te priye pou wa a e men an te geri. — 1 Wa 13:1-6.

4. a) Lefètke wa a te ofri pwofèt la yon kado, ki jan sa te yon eprèv pou fidelite l ? b) Ki repons pwofèt la te ba l ?

⁴ Apre sa, men sa Yawobam te di pwofèt vrè Dye a : “ Ann al lakay avè m’. W’a manje. Lèfini, m’a fè ou kado kichòy. ” ​(1 Wa 13:7). Ki sa pwofèt la t apral fè ? Èske l t apral aksepte pou l al lakay wa a al manje apre l te fin ba l mesaj kondanasyon sa a (Sòm 119:113) ? Oubyen èske li t ap refize envitasyon wa a, alòske wa a sanble te repanti ? Sandout, Yawobam te gen mwayen pou l bay moun ki zanmi l gwo kado ki koute chè. Si pwofèt Bondye a te gen lanmou pou bagay materyèl nan kè l, sa wa a te ofri l la te ka yon gwo tantasyon pou li. Men, Jewova te ba l lòd ‘ pou l’ pa ni manje ni bwè anyen, ni pou l’ pa pran menm chemen li te vini an pou l’ tounen lakay li ’. Se sa k fè pwofèt la te bay wa a yon repons ki te klè e ki te fèm : “ Ou ta mèt ban mwen mwatye nan tout richès ou yo, mwen p’ap mete pwent pye m’ lakay ou. Mwen p’ap manje pen, ni mwen p’ap bwè dlo isit la. ” Apre sa, pwofèt la kite Betèl, li pase nan yon lòt chemen (1 Wa 13:8-10). Ki leson desizyon l te pran an ban nou anrapò ak lè yon moun montre l fidèl ak tout kè l ? — Wom. 15:4.

“ Sa dwe kont nou ”

5. Ki jan materyalis kapab mete fidelite nou aleprèv ?

⁵ Materyalis se youn nan bagay ki kapab mete fidelite nou aleprèv, menmsi li gendwa pa sanble sa. Èske nou gen konfyans nan pwomès Jewova fè nou pou l ban nou sa nou vrèman bezwen (Mat. 6:33 ; Ebre 13:5) ? Èske li pa t ap pi bon pou nou vag sou yon seri bagay materyèl ki ka fè nou viv “ pi byen ”, men ki depase mwayen nou ? (Li Filipyen 4:11-13.) Èske nou konn anvi sakrifye privilèj nou genyen nan kongregasyon an paske gen bagay nou anvi genyen kounye a ? Èske sèvi Jewova fidèlman se sa ki okipe premye plas nan lavi nou ? Repons n ap bay pou kesyon sa yo depann anpil de efò nou fè pou nou sèvi Bondye ak tout kè nou. Men sa apot Pòl te ekri : “ Sèvis Bondye a se yon gwo richès pou yon moun si l’ kontan ak sa li genyen an. Nou pa t’ pote anyen lè nou te vin sou latè. Pa gen anyen nou ka pote ale non plis lè n’a kite li. Se sa k fè, si nou gen dekwa manje, si nou gen rad pou mete sou nou, sa dwe kont nou. ” — 1 Tim. 6:6-8.

6. Ki “ kado ” yo ka ofri nou, men ki sa k ap ede nou deside si pou nou aksepte yo ?

⁶ Pa egzanp, yo gendwa ofri nou yon pwomosyon nan travay nou kote y ap peye nou pi byen e n ap tire lòt pwofi ankò. Oubyen nou ka panse si n al nan yon lòt peyi, nou ka jwenn yon travay k ap fè nou fè plis kòb. Nou gendwa santi yon okazyon konsa se yon benediksyon Jewova. Sepandan, anvan nou pran desizyon pou nou fè sa, èske li pa ta bon pou nou egzamine mobil nou ? Lè n ap pran yon desizyon, premye bagay nou ta dwe mande tèt nou se : “ Ki jan desizyon m ap pran an pral afekte relasyon m ak Jewova ? ”

7. Poukisa li enpòtan pou nou derasinen dezi materyalis nan nou ?

⁷ Sistèm Satan an pa sispann ankouraje moun pou yo vin materyalis. (Li 1 Jan 2:15, 16.) Objektif  Dyab la se kòwonp kè nou. Se poutèt sa nou bezwen veye pou nou idantifye dezi materyalis nou gen nan kè nou e pou nou derasinen yo (Rev. 3:15-17). Li pa t difisil ditou pou Jezi te rejte òf Satan te fè l pou l te ba l tout wayòm ki gen nan monn nan (Mat. 4:8-10). Men avètisman li te ban nou : “ Rete je ouvè epi evite tout kalite konvwatiz, paske menm lè yon moun nan abondans, lavi l pa depann de sa l posede. ” ​(Lik 12:15, NW). Lè nou fidèl, sa ap ede nou mete konfyans nou nan Jewova olye nou fè tèt nou konfyans.

Yon pwofèt ki granmoun ‘ te ba l manti ’

8. Ki jan yo te mete fidelite pwofèt Bondye a aleprèv ?

⁸ Si pwofèt la te kontinye vwayaj la pou l al lakay li, bagay yo t ap pase byen pou li. Men, yon ti tan apre, li te jwenn yon lòt eprèv. Labib di : “ Te gen yon pwofèt ki te rete lavil Betèl. Li te granmoun anpil. Pitit gason l’ yo [te] vin rakonte l’ ” tout sa k te pase jou sa a. Lè l te fin tande sa yo t ap rakonte l la, li di yo sele yon bourik pou li pou l al dèyè pwofèt Bondye a. Yon ti tan apre, li te jwenn li k ap pran yon ti repo anba yon pyebwa. Li di l : “ Ann al lakay avè m’. W’a manje kichòy ! ” Pwofèt la pa t aksepte envitasyon an. Apre sa, pwofèt ki granmoun nan te di l : “ Mwen menm tou, mwen se yon pwofèt tankou ou. Se Seyè a menm ki te voye yonn nan zanj li yo vin di m’ pou m’ fè ou tounen lakay ansanm avè m’, lèfini pou m’ ba ou manje, pou m’ ba ou bwè ! ” Men, Ekriti yo di “ se manti pwofèt lavil Betèl la t’ap ba li ”. — 1 Wa 13:11-18.

9. Ki sa Ekriti yo di konsènan moun k ap twonpe lòt moun, e ki moun yo fè ditò ?

⁹ Kèlkeswa rezon ki fè pwofèt ki granmoun nan te di sa l te di a, se yon manti li te bay. Petèt li te yon pwofèt Jewova lontan e li te fidèl lè a, men nan moman an, li te twonpe lòt pwofèt la. Sa se yon konpòtman Ekriti yo kondane. (Li Pwovèb 3:32.) Moun k ap twonpe lòt moun fè ni tèt yo ni lòt moun y ap twonpe yo ditò nan domèn espirityèl.

Li “ tounen ” avèk pwofèt ki granmoun nan

10. Ki jan pwofèt Bondye a te reyaji devan envitasyon pwofèt ki granmoun nan te fè l la, e ki jan sa te fini ?

¹⁰ Pwofèt Jida a te dwe konprann riz pwofèt ki granmoun nan te itilize a. Li te ka mande tèt li : ‘ Poukisa Jewova ta voye yon zanj pale ak yon lòt moun pou ba l yon nouvo enstriksyon pou l ban mwen ? ’ Li te ka pale ak Jewova pou l verifye si se vre. Men, Labib pa montre li te fè sa. Okontrè, li “ tounen lakay [pwofèt ki granmoun nan], li manje, li bwè avè l’ ”. Sa pa t fè  Jewova plezi. Apre yo te fin twonpe pwofèt la, li te pran wout pou l retounen Jida, men, pandan l nan wout, yon lyon bare avè l epi li touye l. Karyè pwofèt la te vrèman fini mal ! — 1 Wa 13:19-25 *.

11. Ki bon egzanp Ayiya kite pou nou ?

¹¹ Yon lòt bò, Ayiya ki te wenn Yawobam pou l vin wa se te yon pwofèt ki te kenbe fèm nan sèvis li pandan tout vi l. Lè l te vin granmoun e li te vin avèg, Yawobam te voye madanm li bò kote l pou l te mande si pitit gason yo a t ap geri. Avèk kran, Ayiya te anonse l ap mouri (1 Wa 14:1-18). Li te resevwa yon pakèt benediksyon. Pami yo, li te resevwa privilèj pou l ekri kèk bagay Ezra, yon prèt, te itilize annapre. — 2 Kwo. 9:29.

12-14. a) Ki leson nou ka aprann nan sa k te rive pwofèt ki te pi jèn nan ? b) Bay kèk sitiyasyon ki montre lè n ap pran yon desizyon, li nesesè pou nou priye e pou nou byen reflechi sou konsèy ansyen yo ban nou ki baze sou Bib la.

¹² Labib pa di nou poukisa pwofèt ki pi jèn nan pa t pale ak Jewova anvan l te retounen al manje, al bwè avèk pwofèt ki granmoun nan. Èske petèt se paske pwofèt ki granmoun nan te di l sa l te vle tande ? Ki leson nou kapab tire nan sa ? Nou bezwen gen yon konfyans total nan kòmandman Jewova bay yo ki dwat e nou bezwen detèmine pou nou suiv yo, kèlkeswa sitiyasyon ki ta ka devan nou.

¹³ Gen moun se sèlman konsèy ki fè yo plezi yo pran. Pa egzanp, yon pwoklamatè ka jwenn yon travay, men travay sa a gendwa ap fè l gen mwens tan pou l pase avèk fanmi l e pou l patisipe nan aktivite teyokratik yo. Li ka mande yon ansyen konsèy. Lè ansyen an ap ba l konsèy la, li ka fè l di l se li ki pou pran desizyon final la. Apre sa, li kapab egzamine avèk frè a danje sa ka pote nan domèn espirityèl si l aksepte travay sa a. Nan yon ka konsa, èske frè a ap sonje sèlman pawòl ansyen an te di nan kòmansman yo, oswa èske l ap reflechi seryezman sou tout sa l te di annapre yo ? Frè a dwe detèmine ki sa k ap pi bon pou li nan domèn espirityèl.

¹⁴ Annou pran yon lòt sitiyasyon ki ta ka rive. Yon sè kapab mande yon ansyen si l dwe separe ak mari l ki pa kwayan. Sandout, ansyen an ap esplike l se li ki pou deside si l ap separe ak mari l oswa si l pap separe avè l. Apre sa, li kapab egzamine konsèy Labib bay sou sijè a (1 Kor. 7:10-16). Men, èske sè a ap byen reflechi sou sa ansyen  an di l la ? Oubyen èske l te deja pran desizyon pou l kite mari a ? Anvan l pran yon desizyon, l ap saj pou l priye e pou l reflechi sou konsèy Labib bay yo.

Se pou nou soumèt devan Bondye

15. Ki sa nou aprann nan erè pwofèt Bondye a te fè a ?

¹⁵ Ki lòt bagay nou ka aprann nan erè pwofèt Jida a te fè a ? Men sa Pwovèb 3:5 di : “ Mete konfyans ou nan Jewova ak tout kè w epi pa apiye sou pwòp entèlijans ou. ” ​(NW) Olye pwofèt Jida a te kontinye mete konfyans li nan Jewova jan li te fè sa anvan, nan sikonstans sa a, li te mete konfyans nan tèt li. Erè sa a te fè l pèdi lavi l ansanm ak bèl non li te genyen devan Bondye a. Sa k te rive l la montre nou sa vrèman enpòtan pou nou soumèt devan Jewova e pou nou sèvi l avèk fidelite !

16, 17. Ki sa k ap ede nou rete fidèl devan Jewova ?

¹⁶ Tandans egoyis nou gen nan kè nou kapab twonpe nou. Labib di nou : “ Kè a pi trèt pase nenpòt ki lòt bagay e li pa bon menm. ” ​(Jer. 17:9, NW). Pou nou ka rete fidèl devan Jewova, nou dwe kontinye fè tout efò nou pou nou chanje ansyen pèsonalite nou ansanm ak tandans li yo ki ka fè nou pa suiv sa Jewova mande nou e ki ka fè nou mete konfyans nan tèt nou. Anplis, nou dwe abiye nou ak nouvo pèsonalite a, “ jan Bondye vle l’ la, pou nou sanble ak li [e] pou nou ka mennen yon lavi ki dwat, yon lavi ki apa pou Bondye, jan verite a mande l’ la ”. — Li Efezyen 4:22-24.

¹⁷ Men sa Pwovèb 11:2 di : “ Moun ki soumèt devan Bondye, se yo ki gen bon konprann. ” Lè nou gen konfyans nan Jewova e lè nou soumèt devan l, sa pèmèt nou evite fè yon seri erè ki ka koute nou chè. Yon bagay ki kapab defòme bon jijman nou fasil se dekourajman (Pwo. 24:10). Nou ka vin fatige ak kèk aspè nan sèvis sakre nou an e nou ka kòmanse santi nou te fè ase pandan ane ki pase yo. Petèt tou nou ka panse kounye a se moman pou lòt moun pote chay la. Oubyen nou gendwa ta renmen gen yon vi ki pi “ nòmal ”. Sepandan, lè ‘ nou fè jefò pou n’ antre nan pòt jis la ’ e lè nou “ toujou pi cho nan travay Seyè a ”, sa ap pwoteje kè nou. — Lik 13:24 ; 1 Kor. 15:58.

18. Ki sa nou kapab fè si nou pa konnen ki desizyon pou nou pran nan yon sitiyasyon ?

¹⁸ Pafwa, nou kapab bezwen pran kèk desizyon ki difisil, men nou ka pa fin konnen sa pou nou fè. Èske n ap rezoud pwoblèm yo selon nou menm ? Lè nou nan sitiyasyon konsa, l ap saj pou nou mande Jewova ede nou. Jak 1:5 di nou : “ Si yon moun pami nou manke bon konprann, se pou l’ mande Bondye, Bondye va ba li li. Paske, Bondye bay tout moun san mezire. ” Papa nou ki nan syèl la ap ban nou kantite lespri sen nou bezwen yon fason pou nou ka pran bon desizyon. — Li Lik 11:9, 13.

Annou pran detèminasyon pou nou rete fidèl

19, 20. Ki sa nou ta dwe detèmine pou nou fè ?

¹⁹ Ane ki te vini apre Salomon te vire do bay vrè adorasyon an te boulvèsan anpil. Yo te mete fidelite sèvitè Bondye yo aleprèv. Anfèt, anpil nan yo te fè konpwomi yon fason oswa yon lòt. Sepandan, genyen ki te rete fidèl devan Jewova.

²⁰ Nou menm tou nou kapab montre nou fidèl. Chak jou, nou gen chwa pou nou fè e nou gen desizyon pou nou pran, e yo mete fidelite nou aleprèv. Annou toujou rete fidèl devan Jewova, san kè nou pa divize, piske nou gen konfyans l ap kontinye beni moun ki fidèl devan l yo. — 2 Sam. 22:26.

[Nòt anba paj]

Ki repons nou ta bay ?

• Poukisa nou ta dwe fè efò pou nou derasinen dezi materyalis nan kè nou ?

• Ki sa k ap ede nou rete fidèl devan Jewova ?

• Lè nou soumèt devan Bondye, ki jan sa ka ede nou rete fidèl devan l ?

Kesyon]

[Foto nan paj 9]

Èske l difisil pou ou pou w reziste devan tantasyon ?

[Foto nan paj 10]

Lè w gen yon desizyon pou w pran, èske w ap priye e èske w ap reflechi sou konsèy biblik yo ba ou ?