Èske w kapab janbe al Masedwàn?

TWOWAS se yon vil ann Azi Minè ki gen yon waf ladan l. Se la apot Pòl te resevwa yon vizyon. Nan vizyon sa a, te gen yon Masedonyen ki te di l: “Vin nan peyi Masedwouàn, vin pote nou sekou.” Apre Pòl fin wè vizyon an, li menm ak konpayon ki t ap vwayaje avè l yo ‘te sèten se Bondye menm ki te rele yo pou y al pote bon nouvèl la’ bay Masedonyen yo. Ki rezilta yo te jwenn? Nan Filip, prensipal vil Masedwàn nan, Lidi ansanm ak moun lakay li te vin kwayan. Apre yo, gen lòt moun ankò nan koloni sa a ki te vin kwayan. —Tra. 16:9-15.

Jodi a, Temwen Jewova yo gen menm zèl sa a. Anpil ladan yo dispoze depanse kòb yo pou yo deplase al kote yo bezwen plis pwoklamatè Wayòm nan. Ann pran egzanp Lisa, yon sè ki te vle fè plis nan ministè a. Li te deplase sot Kanada pou l al nan peyi Kenya. Trevor ak Emily tou se de Kanadyen ki te deplase al Malawi paske yo te vle fè plis nan ministè a. Paul ak Maggie soti ann Angletè. Yo te deplase al viv ann Afrik de Lès, paske lè yo te pran retrèt yo, yo te panse se yon bèl okazyon ki te prezante pou yo fè plis nan sèvis Jewova a. Èske w dispoze fè sakrifis ? Èske w ka fè yon deplasman konsa? Si w kapab, ki prensip biblik ak ki sijesyon ki kapab itil ou pou w reyisi nan ministè w?

Analize tèt ou

Yon bagay ou bezwen reflechi sou li se mobil ou. Men kòmandman Jezi te di ki pi gwo kòmandman an: “Se pou ou renmen Mèt la, Bondye ou ak tout kè ou, ak tout nanm ou, ak tout lide ou.” Se sa k fè rezon prensipal ki fè yon moun ta dwe al sèvi aletranje se lanmou pou Bondye ak dezi pou l ranpli misyon kretyen  yo genyen pou yo fè disip la. Men sa Jezi te di apre sa: “Men dezyèm kòmandman an ki gen menm enpòtans ak premye a: se pou ou renmen frè parèy ou [“pwochen w”, NW] tankou ou renmen pwòp tèt pa ou.” Ou montre ou renmen pwochen w lè w vle ede yo sensèman (Mat. 22:36-39; 28:19, 20). An jeneral, pou yon moun sèvi aletranje, sa mande pou l fè anpil efò e pou l gen espri sakrifis. Se lanmou ki dwe motive yon moun pou l al sèvi aletranje. Se pa paske li pran plezi pou l vwayaje oswa pou l pran vakans nan zòn ki difisil pou moun viv. Remco ak Suzanne soti Peyiba. Kounye a y ap sèvi nan peyi Namibi. Men sa yo di: “Se lanmou ki fè nou rete isi a.”

Men sa Willie, yon siveyan sikonskripsyon nan Namibi, remake: “Moun ki kontinye sèvi aletranje yo pa vini avèk entansyon pou frè yo pran swen yo. Yo vini avèk ide pou yo travay kòtakòt avèk frè yo e pou yo ede yo nan travay predikasyon an.”

Lè w fin egzamine mobil ou, mande tèt ou: ‘Ki eksperyans mwen genyen ki ta kapab itil mwen si m al sèvi aletranje? Èske mwen se yon pwoklamatè ki efikas? Konbyen lang mwen pale? Èske mwen dispoze aprann yon lòt lang?’ Pale seryezman sou sa avèk fanmi w. Pale ak ansyen yo nan kongregasyon w. Se sèten tou, ou ta dwe priye Jewova sou sa. Si w egzamine tèt ou onètman konsa, sa ap ede w wè si w vrèman kapab al sèvi aletranje e si w vrèman vle fè sa. —Gade kare ki gen tit  “Egzamine tèt ou” a.

Ki kote w ka ale?

Yo te mande Pòl pou l al Masedwàn nan vizyon an. Jodi a, Jewova pa sèvi ak mwayen  sinatirèl pou l dirije nou. Sepandan, nan peryodik sa a ak nan lòt piblikasyon nou yo, nou menm ki fè pati pèp Bondye a, nou aprann gen anpil tèritwa ki bezwen plis moun pou preche ladan yo. Pou kòmanse, fè yon lis epi mete tèritwa ou konnen ki bezwen plis pwoklamatè yo. Si w pa dispoze aprann yon lòt lang oubyen si w pa vle rete nèt nan yon lòt peyi, prefere w sèvi nan yon peyi ou deja pale lang yo plis pale ladan l lan. Apre sa, chèche konnen ki jan w ka rive jwenn yon viza. Chèche enfòmasyon sou kesyon transpò nan tèritwa sa a ak kesyon sekirite. Chèche konnen tou si lavi a pap twò chè pou ou e si klima a ap bon pou ou. Li t ap bon pou w pale ak moun ki te fè yon deplasman konsa deja. Priye Bondye pou l ede w pran yon bon desizyon. Petèt ou sonje “Sentespri pa t kite Pòl [ak konpayon l yo] al anonse pawòl Bondye a nan pwovens Lazi a.” Malgre yo te vle ale Bitini, “Lespri Jezi a pa t pèmèt yo” fè sa. Menm jan an tou, sa ka pran yon ti tan anvan w rive konnen ki kote èd ou ap vrèman fè anpil byen. —Tra. 16:6-10.

Petèt ou gentan idantifye kèk kote ou kapab ale k ap bon pou ou. Si w ta renmen al sèvi aletranje, ekri filyal Temwen Jewova ki nan peyi ou ta renmen al sèvi yo. Fè yo konnen ki privilèj ou genyen nan kongregasyon an. Poze yo kesyon ou genyen tou konsènan kèk bagay tankou si lavi a chè, kalite lojman ou kapab jwenn, konsènan lopital ak posiblite travay ki genyen. Apre sa, bay komite sèvis kongregasyon w lan lèt la oswa lèt yo, si w ekri plizyè lèt. Komite a ap voye lèt yo bay filyal ou te ekri yo ansanm ak yon lèt rekòmandasyon l ap prepare pou ou. Repons filyal yo voye ba ou ap ede w deside ki kote k ap pi bon pou ou.

Men sa Willie, siveyan sikonskripsyon nou te mansyone anvan an, di: “Leplisouvan, moun ki reyisi yo t al vizite peyi a anvan epi yo te chèche kote yo t ap vrèman santi yo alèz. Gen yon koup ki te admèt li t ap difisil pou yo pou yo sèvi nan yon zòn ki izole. Se sa k fè yo te rete nan yon ti vil ki te gen bezwen, men ki te yon kote yo te santi yo t ap kapab viv alèz.”

Fason pou w fè fas ak nouvo defi yo

Lè w ap kite lakay ou pou w al viv nan yon anviwònman ki diferan nèt parapò ak anviwònman ou t ap viv la, se sèten w ap jwenn difikilte. Men sa Lisa, sè nou te mansyone anvan an di: “Lè w santi ou poukont ou, sa ka ba w pwoblèm anpil.” Ki sa ki te ede l? Li te fè efò pou l vin pwòch ak moun ki nan kongregasyon an nan nouvo tèritwa l la. Li te fikse objektif pou l aprann non tout moun yo. Pou l te ka fè sa, li te vin nan reyinyon yo bonè, e apre reyinyon yo, li te rete pou l pale ak frè ak sè yo. Li preche ak lòt moun nan ministè a, li envite anpil moun lakay li e li fè nouvo zanmi. Men sa li di ankò: “Mwen pa regrèt sakrifis mwen te fè yo. Jewova vrèman beni m.”

 Apre Paul ak Maggie te fin elve pitit yo, yo te demenaje kite kay yo, yon kay yo te gen trant an depi yo t ap viv ladan l. Men sa Paul di: “Nou te panse li pa t ap fasil pou nou debarase nou ak bagay nou te posede yo, men sa te pi fasil pase sa nou te panse. Sa ki te vrèman difisil pou nou se kite fanmi nou dèyè. Sa te pi difisil pase sa nou te panse. Nou te kriye anpil nan avyon an. Byen fasilman nou te kapab di tèt nou: ‘Ou kwè n ap kapab fè sa?’ Men, nou te konte sou Jewova. Lè w fè nouvo zanmi, sa ba w fòs pou w kontinye sèvi aletranje.”

Greg ak Crystal te deside pou yo kite Kanada pou y al viv Namibi paske yo te pale anglè, lang ofisyèl peyi a. Men, yo te vin rann yo kont sa t ap itil anpil pou yo aprann yon lang moun yo pale nan zòn kote yo ye a. Men sa yo di: “Pafwa, nou te santi nou dekouraje. Sepandan, se sèlman apre nou te fin aprann yon lang yo pale nan zòn nou an nou te vin konprann kilti moun yo. Lefètke nou te pwòch frè ak sè yo, sa te ede nou adapte nou ak nouvo anviwònman nou ladan l lan.”

Lè nou enb e nou byen dispoze pou nou sèvi lòt moun, sa kapab gen yon bon efè sou frè yo nan zòn nan tou. Jenny se yon sè ki leve ann Ilann. Lè l sonje kèk fanmi ki te deplase vin nan peyi sa a, sa fè kè l kontan. Men sa li di: “Yo te renmen akeyi moun. Yo te vrèman vini pou yo sèvi. Yo pa t vini pou lòt moun sèvi yo. Yo te tèlman zele, kè yo te tèlman kontan, mwen te santi fòk mwen menm tou m al sèvi kote gen bezwen.” Jodi a, Jenny ak mari l ap sèvi kòm misyonè nan peyi Ganbi.

Benediksyon Jewova, se sa ki “fè yon moun rich”

Nan ki pwen eksperyans Pòl te fè Masedwàn nan te fè l rich? Anviwon dizan apre, men sa li te ekri frè nan vil Filip yo: “Mwen di Bondye mwen an mèsi pou nou chak fwa lide m frape sou nou.” —Fil. 1:3.

Trevor ak Emily te sèvi Malawi anvan yo te envite yo Lekòl Gileyad. Yo panse menm jan ak Pòl. Men sa yo di: “Pafwa nou te konn mande tèt nou si se yon bon desizyon nou te pran. Sepandan, nou te jwenn kè kontan. Nou te santi relasyon nou te genyen youn ak lòt te vin pi sere e nou te santi Jewova beni nou.” Greg ak Crystal, youn nan koup nou te mansyone anvan yo, di: “Pa gen okenn lòt bagay nou ta pito fè.”

Se pa tout moun ki kapab al sèvi nan peyi etranje. Pou kèk moun, Ii gendwa pi bon pou yo deplase al sèvi kote ki gen plis bezwen nan peyi yo. Gen lòt ki gendwa fikse objektif pou y al sèvi nan lòt kongregasyon ki pa lwen lakay yo. Sa ki pi enpòtan se pou w fè tout sa w kapab nan sèvis Jewova a (Kol. 3:23). Konsa, pawòl enspire nou pral site la yo ap reyalize nan ka pa w: “Benediksyon Jewova, se sa ki fè yon moun rich, e li pa ajoute okenn doulè avè l.” —Pwo. 10:22, NW.

[Foto nan paj 5]

 Egzamine tèt ou

Pou w egzamine tèt ou pou w wè si w kapab sèvi aletranje, reflechi sou kesyon yo poze apre yo. Apre w fin priye sou sa, gade pou w wè onètman si w kapab fè yon deplasman konsa. Enfòmasyon ki nan kèk ansyen Toudegad an fransè kapab ede w fè egzamen sa a.

• Èske m se yon moun ki espirityèl? —“La clé du vrai bonheur” ​(15 oktòb 1997, paj 6).

• Èske m efikas nan ministè a? —“Comment être un pionnier efficace” ​(15 me 1989, paj 21).

• Èske m ka viv lwen fanmi m ak zanmi m? —“Comment surmonter le mal du pays dans le service de Dieu” ​(15 me 1994, paj 28).

• Èske m ka aprann yon lòt lang? —“Comment s’investir dans une congrégation d’expression étrangère” ​(15 mas 2006, paj 17).

• Èske mwayen ekonomik mwen ap pèmèt mwen fè deplasman an? —“Pouvez-vous vous rendre utile à l’étranger?” ​(15 oktòb 1999, paj 23).

[Foto nan paj 6]

Si w enb e ou dispoze sèvi lòt moun, sa ka gen yon bon efè sou frè ak sè yo.

[Foto nan paj 7]

Moun ki vin ede yo jwenn bon rezilta.