Fè pwogrè nou parèt aklè pou tout moun

“Reflechi sou bagay sa yo, plonje nèt nan yo, yon fason pou pwogrè w ka parèt aklè pou tout moun.” —1 TIM. 4:15, NW.

1, 2. Ki sa nou konnen konsènan jenès Timote, e ki chanjman ki te rive nan lavi l lè l te gen anviwon 20 an?

LÈ Timote te yon tigason, li t ap viv Galasi, yon koloni women ki fè pati peyi Tiki kounye a. Pandan plizyè dizèn ane ki te pase apre lanmò Jezi, te gen plizyè kongregasyon ki te fòme nan zòn sa a. Rive yon lè, Timote, ki te yon jèn tigason, ansanm ak manman l ak grann li te vin kretyen e yo te aktif nan youn nan kongregasyon sa yo (2 Tim. 1:5; 3:14, 15). Se sèten Timote te renmen vi li t ap mennen antanke jèn kretyen nan zòn sa a kote l te leve a. Sepandan, sanzatann, gen plizyè chanjman ki t apral fèt nan lavi l.

² Chanjman sa yo te kòmanse nan dezyèm vizit Pòl te fè nan zòn nan. Lè sa a, petèt Timote te nan fen adolesans li oswa nan kòmansman ventèn li. Pandan vizit Pòl la, petèt nan vil Lis, li te remake nan kongregasyon nan zòn nan, “frè [...] yo te bay bon rapò” sou Timote (Tra. 16:2). Timote dwe te montre li gen yon matirite ki depase laj li. Apre sa, anba direksyon lespri sen, Pòl ansanm ak kolèj ansyen ki nan zòn nan te poze men yo sou Timote pou yo konfye l yon travay espesyal nan kongregasyon an. —1 Tim. 4:14; 2 Tim. 1:6.

3. Ki gwo privilèj sèvis Timote te resevwa?

³ Timote te resevwa envitasyon espesyal pou l vin konpayon vwayaj apot Pòl (Tra. 16:3). Imajine jan Timote dwe te sezi e jan li te dwe te kontan anmenmtan! Pandan plizyè ane, Timote t apral vwayaje ak Pòl e pafwa ak lòt moun tou. Li te konn akonpli divès misyon pou apot yo ak ansyen yo. Pòl ak Timote te konn vwayaje pou y al vizite kongregasyon yo, e sa te pèmèt yo fòtifye frè yo anpil nan domèn espirityèl. (Li Travay 16:4, 5.) Konsa, anpil kretyen te vin konnen Timote byen pou pwogrè li te fè nan domèn espirityèl. Apre apot Pòl te pase anviwon dizan ap travay ansanm ak Timote, men sa li te ekri kretyen nan vil Filip yo konsènan Timote: “Timote se sèl moun [...] ki vle wè byen nou. Mwen pa gen lòt. [...] Nou menm tou nou konnen jan Timote se yon nèg serye. Tankou papa ak pitit nou travay ansanm pou bon nouvèl la.” —Fil. 2:20-22.

4. a) Ki gwo responsablite Timote te resevwa? b) Ki kesyon nou kapab poze konsènan pawòl Pòl nou jwenn nan 1 Timote 4:15 lan?

⁴ Nan menm epòk Pòl te ekri kretyen nan vil Filip yo, li te bay Timote yon gwo responsablite: se te responsablite pou l nome ansyen ak asistan ministeryèl (1 Tim. 3:1; 5:22). Pa gen dout nan sa, Timote te vin yon siveyan Pòl te ka konte sou li e li te ka fè l konfyans. Sepandan, nan menm lèt la, Pòl te ankouraje Timote pou l fè ‘pwogrè l parèt aklè pou tout moun’. (1 Tim. 4:15.) Èske Timote pa t deja fè pwogrè l parèt aklè nan yon degre estrawòdinè? Donk,  ki sa Pòl te vle di lè li te di pawòl sa yo, e ki jan konsèy li a kapab pwofitab pou nou?

Se pou bèl kalite nou genyen parèt aklè

5, 6. Ki sa ki te menase pwòpte espirityèl kongregasyon Efèz la, e ki sa Timote te dwe fè pou l konbat danje sa a?

⁵ Annou egzamine kontèks 1 Timote 4:15 lan. (Li 1 Timote 4:11-16.) Anvan Pòl te ekri pawòl sa yo, li te vwayaje al Masedwàn, men li te mande Timote pou l rete Efèz. Poukisa? Gen kèk kretyen nan vil sa a ki t ap divize kongregasyon an ak fo ansèyman yo t ap bay. Timote te dwe kenbe kongregasyon an pwòp espirityèlman. Ki jan li t apral fè sa? Youn nan fason li t apral fè sa se grasa bon egzanp li t apral bay pou frè yo imite.

⁶ Men sa Pòl te ekri Timote: “Se pou w vin yon egzanp pou moun ki fidèl yo, nan pawòl ou, nan konduit ou, nan lanmou w, nan lafwa w ak nan vi pwòp w ap mennen an.” Apre sa, Pòl te di l: “Reflechi sou bagay sa yo, plonje nèt nan yo, yon fason pou pwogrè w ka parèt aklè pou tout moun.” ​(1 Tim. 4:12, 15, NW). Pwogrè sa a te gen rapò ak bèl kalite Timote te genyen yo. Li pa t gen rapò ak pozisyon otorite li te genyen. Se pwogrè konsa tout kretyen ta dwe chèche fè.

7. Ki sa yo atann pou tout moun nan kongregasyon an fè?

⁷ Menm jan sa te ye nan epòk Timote a, jodi a tou, moun ka ranpli divès responsablite nan kongregasyon an. Gen moun ki sèvi antanke ansyen oswa asistan ministeryèl. Gen lòt ki nan sèvis pyonye. Gen lòt toujou ki sèvi kòm siveyan itineran, nan Betèl oubyen antanke misyonè. Ansyen yo patisipe nan diferan pwogram ansèyman tankou nan asanble yo. Sepandan, tout kretyen, kit se gason, kit se fi, kit se jèn, gen posiblite pou yo fè pwogrè espirityèl yo parèt aklè (Mat. 5:16). Anfèt, menm jan sa te ye nan ka Timote, yo atann pou menm kretyen ki gen responsablite espesyal yo fè bèl kalite li genyen yo parèt aklè pou tout moun.

Se pou nou vin yon egzanp nan pawòl nou

8. Ki enpak pawòl nou genyen sou adorasyon n ap bay Jewova?

⁸ Youn nan domèn Timote te bezwen bay yon egzanp se te nan pawòl li. Ki jan nou kapab fè pwogrè nou parèt aklè nan domèn sa a? Pawòl ki sot nan bouch nou di anpil bagay sou nou. Men sa Jezi te di: “Sa ki nan kè yon moun, se sa ki soti nan bouch li.” ​(Mat. 12:34.) Jak, frè Jezi bò kot manman, te konnen li menm tou enpak pawòl nou kapab genyen sou adorasyon n ap bay Jewova a. Men sa l te ekri: “Si yon moun kwè l’ap sèvi Bondye, pou anmenmtan li pa bride lang li, se tèt li l’ap twonpe. Sèvi Bondye jan sa a pa vo anyen.” —Jak 1:26.

9. Ki fason nou dwe yon egzanp nan pawòl nou?

⁹ Pawòl k ap soti nan bouch nou kapab fè moun nan kongregasyon an wè nan ki pwen nou fè pwogrè nan domèn espirityèl. Se sa k fè, kretyen ki gen matirite yo pa pale yon fason ki degradan, ki negatif, yo pa kritike moun ni yo pa di pawòl ki chokan, okontrè yo fè tout sa yo kapab pou yo fòtifye moun, pou yo rekonfòte yo e pou yo ankouraje yo (Pwo. 12:18; Efe. 4:29; 1 Tim. 6:3-5, 20). Lè nou pare pou nou pale ak lòt moun de konviksyon nou genyen sou sa ki byen ak sa ki mal e nou pare pou nou defann prensip wo nivo Bondye yo, sa ka montre nan ki pwen nou gen atachman pou Bondye (Wom. 1:15, 16). Se sèten, moun ki jis yo ap remake fason nou sèvi ak don nou genyen pou nou pale a e y ap suiv egzanp nou. —Fil. 4:8, 9.

Annou bay egzanp nan konduit nou ak nan vi pwòp n ap mennen an

10. Si nou vle fè pwogrè nan domèn espirityèl, poukisa nou bezwen gen yon lafwa san ipokrizi?

¹⁰ Pou yon kretyen kapab yon bon egzanp, li bezwen fè plis pase pale yon fason pou l fòtifye moun. Si yon moun toujou di sa ki byen, men li pa fè sa k byen, li se yon ipokrit. Pòl te byen konnen jan Farizyen yo te ipokrit e li te konnen move rezilta sa te bay lefètke yo te konsa. Li te avèti Timote plizyè fwa kont jan de ipokrizi sa a (1 Tim. 1:5; 4:1, 2). Men, Timote pa t yon ipokrit.  Nan dezyèm lèt Pòl te ekri Timote a, men sa l te di l: “Mwen pa janm bliye jan ou gen konfyans nan Bondye ak tout kè ou [“yon lafwa ki san ipokrizi”, NW].” ​(2 Tim. 1:5). Malgre sa, Timote te bezwen aji yon jan pou l montre aklè li se yon vrè kretyen. Li te dwe vin yon egzanp nan konduit li.

11. Ki sa Pòl te ekri Timote konsènan richès?

¹¹ Nan de lèt Pòl te ekri Timote yo, li te bay konsèy konsènan plizyè domèn ki gen rapò ak konduit yon moun. Pa egzanp, Timote pa t dwe ap chèche pou l vin rich. Men sa Pòl te ekri l: “Renmen lajan fè moun fè tout kalite bagay ki mal. Gen moun ki sitèlman anvi gen lajan, yo pèdi chemen lafwa a nèt: se pa de [...] soufrans ki tonbe sou yo.” ​(1 Tim. 6:10). Lè yon kretyen renmen richès, se yon siy ki montre li gen yon feblès espirityèl. Yon lòt bò, yon kretyen ki kontante l ak yon vi senp, sa vle di ki kontante l ak ‘manje ak rad’, montre byen klè li fè pwogrè espirityèl. —1 Tim. 6:6-8; Fil. 4:11-13.

12. Ki jan nou kapab montre byen klè nan vi prive nou nou fè pwogrè espirityèl?

¹² Pòl te fè Timote konnen jan sa enpòtan pou kretyèn yo “fè bèbèl ak tèt yo ak abiman ki kòrèk” e pou yo “fè sa yon jan ki senp e avèk bonsans”. (1 Tim. 2:9, NW.) Medam ki senp e ki gen bonsans nan fason yo abiye ak nan aparans yo, e nan lòt domèn ankò nan vi prive yo, bay bon egzanp (1 Tim. 3:11). Prensip sa a valab pou frè yo tou. Nan konsèy Pòl te bay yo, li te di yon ansyen “dwe modere nan abitid li, li dwe gen bonsans, li dwe gen lòd”. (1 Tim. 3:2, NW.) Lè nou montre nou gen kalite sa yo nan lavi nou, pwogrè espirityèl nou yo ap parèt aklè pou tout moun.

13. Menm jan ak Timote, ki jan nou ka montre nou se yon egzanp nan fason nou mennen yon vi ki pwòp?

¹³ Pou Timote te ka bay bon egzanp, li te dwe gen yon konduit ki pwòp tou. Lè Pòl te itilize ekspresyon sa a, li t ap pale konsènan yon domèn byen presi: imoralite seksyèl. Timote te  dwe veye pou l gen yon konduit ki san repwòch sitou nan fason li konpòte l ak fi. Li te dwe trete ‘granmoun fi yo kòmsi yo te manman l e li te dwe trete jèn medam yo kòmsi yo te sè l, san okenn move lide’. (1 Tim. 4:12; 5:2.) Menm aksyon imoral yon moun fè an kachèt Bondye konnen yo menmsi yo parèt sekrè, e se sèten finalman lòt moun ap vin konnen yo tou. Menm jan an tou, bèl aksyon yon kretyen fè pa ka rete kache (1 Tim. 5:24, 25). Tout moun nan kongregasyon an gen posiblite pou yo montre pwogrè y ap fè aklè nan konpòtman yo ak nan konduit yo ki pwòp.

Lanmou ak lafwa enpòtan anpil

14. Ki jan Bib la montre li enpòtan pou nou gen lanmou youn pou lòt?

¹⁴ Lanmou se yon aspè enpòtan anpil nan vrè krisyanis la. Jezi te di disip li yo: “Si nou yonn renmen lòt, lè sa a tout moun va konnen se disip mwen nou ye.” ​(Jan 13:35). Ki sa nou ka fè pou nou montre nou gen lanmou sa a? Pawòl Bondye a ankouraje nou pou nou “yonn sipòte lòt avèk renmen nan kè nou”, pou nou ‘aji byen yonn ak lòt, pou nou montre nou gen bon kè, pou nou yonn padonnen lòt’, e pou nou konn resevwa moun (Efe. 4:2, 32; Ebre 13:1, 2). Apot Pòl te di: “Se pou lanmou nou gen pou frè nou yo makònen ak afeksyon ki pwofon nou gen youn pou lòt”. —Wom. 12:10, NW.

15. Poukisa li enpòtan pou tout moun, e sitou siveyan yo, montre yo gen lanmou?

¹⁵ Si Timote te konn aji yon fason ki di ak lòt kretyen yo oswa si l pa t konn montre li janti avèk yo, sa te ka anile tout bon aksyon li te akonpli antanke anseyan e antanke ansyen. (Li 1 Korentyen 13:1-3.) Men, Timote te gen afeksyon sensè pou frè l yo, li te konn resevwa yo byen e li te konn aji byen avè yo. Konsa, se sèten pwogrè espirityèl li te fè yo te parèt aklè pou tout moun. Donk, li te toutafè nòmal pou apot Pòl chwazi mansyone lanmou kòm youn nan kalite Timote te bezwen montre li genyen pou l te ka yon bon egzanp pou frè ak sè yo.

16. Poukisa Timote te bezwen montre li gen yon lafwa ki solid?

¹⁶ Pandan tan Timote te pase Efèz la, lafwa l te rankontre anpil eprèv. Gen nan frè yo ki t ap anseye doktrin ki pa ann amoni ak laverite. Gen lòt kretyen ki t ap gaye “istwa san fondman” oswa ki t ap chèche ide ki pa t ap ranfòse espirityalite kongregasyon an ditou. (Li 1 Timote 1:3, 4.) Pòl te dekri moun sa yo kòm “moun ki gen lògèy, ki pa konn anyen”, ‘ki gen yon maladi pou y ap diskite tout tan, pou y ap fè kont pou nenpòt ti mo’. (1 Tim. 6:3, 4). Èske Timote te ka jwe ak ide danjere ki t ap antre nan kongregasyon an? Non, paske Pòl te konseye l pou l “mennen batay pou lafwa a byen” e pou l pa pèdi tan l “nan diskou san sans ki pa dakò ak verite a, ni nan diskisyon pou bagay anpil moun pran pou konesans”. (1 Tim. 6:12, 20, 21.) Pa gen dout, Timote te suiv konsèy saj Pòl te ba li a. —1 Kor. 10:12.

17. Ki jan lafwa nou kapab jwenn eprèv jodi a?

¹⁷ Yon bagay ki enteresan, sèke Pòl te di Timote nan “tan k ap vini yo, kèk moun ap abandone lafwa, y ap koute pawòl blòf movèzespri enspire, ak ansèyman demon.” ​(1 Tim. 4:1, NW). Tout moun nan kongregasyon an, san wete moun ki gen responsablite yo, bezwen montre yo gen yon lafwa ki solid e ki pa ka brannen, menm jan ak Timote. Lè nou pran yon pozisyon fèm e nou rejte pwopagann aposta yo ap fè san pèdi tan, pwogrè nou ap parèt aklè pou tout  moun e n ap yon bon egzanp pou yo anrapò avèk lafwa.

Annou fè tout sa nou kapab pou pwogrè nou parèt aklè

18, 19. a) Ki sa nou ka fè pou pwogrè nou parèt aklè pou tout moun? b) Sou ki sa yo pral pale nan atik ki vin apre a?

¹⁸ Pa gen dout nan sa, se pa ni aparans yon kretyen, ni kapasite natirèl li genyen, ni pozisyon li genyen nan kongregasyon an ki montre li fè bonjan pwogrè nan domèn espirityèl. Anplis, se pa otomatikman kantite ane yon kretyen genyen depi l ap sèvi nan kongregasyon an ki montre sa. Olye de sa, bonjan pwogrè espirityèl nou fè yo ap parèt byen klè lè nou obeyi Jewova nan fason nou panse, nan pawòl nou ak nan konduit nou (Wom. 16:19). Nou ta dwe suiv konsèy nou jwenn pou nou renmen youn lòt la e pou nou bat pou lafwa nou vin pi solid. Wi, annou reflechi sou pawòl Pòl te di Timote yo e annou plonje ladan yo yon fason pou pwogrè nou ka parèt aklè pou tout moun.

¹⁹ Yon lòt kalite k ap montre nou fè pwogrè nan domèn espirityèl e nou gen matirite antanke kretyen se lajwa. Kalite sa a se yon aspè nan fwi lespri sen Bondye a (Gal. 5:22, 23). Atik ki vin apre a pral pale sou fason nou ka kiltive lajwa e li pral montre sa nou ka fè pou nou toujou gen kalite sa a nan moman difisil yo.

Ki repons nou ta bay?

• Ki sa lòt moun kapab aprann sou nou nan fason nou pale?

• Ki jan pwogrè nou ka parèt aklè nan konduit nou e nan vi pwòp n ap mennen an?

• Poukisa kretyen yo dwe bay egzanp nan domèn lanmou ak lafwa?

[Kesyon]

[Foto nan paj 11]

Pandan Timote te jèn, li te montre li gen yon matirite ki depase laj li.

[Foto nan paj 13]

Èske pwogrè nou parèt aklè pou lòt moun?