Inite nou an pèmèt moun rekonèt vrè adorasyon an
Inite nou an pèmèt moun rekonèt vrè adorasyon an
“M ap fè yo vin fè yon sèl, tankou yon twoupo nan yon pak.” —MIKA 2:12, NW.
1. Kòman kreyasyon an montre sajès Bondye?
MEN sa yon salmis te di: “Senyè, ou fè anpil bagay! Ou fè yo avèk bon konprann [“sajès”, NW]. Latè plen ak bagay ou fè.” (Sòm 104:24). Sajès Bondye parèt klè nan relasyon ki genyen ant plizyè milyon varyete plant, ensèk ak lòt bèt ki egziste yo. Nan kò nou tou, gen plizyè milye diferan pati, soti nan ògàn ki pi gwo yo rive nan pati ki pi piti ki gen nan selil nou yo. Tout fonksyone ansanm yon fason pou fè nou yon moun ki pa manke anyen e ki anfòm.
2. Ki sa k fè inite ki te gen nan mitan kretyen premye syèk la te dwe sanble yon bagay estrawòdinè (gade paj 13)?
2 Jewova kreye lèzòm pou youn depann de lòt. Nou jwenn moun ki gen tout kalite fòm, tout kalite pèsonalite ak tout kalite kapasite. Mete sou sa, li te kreye de premye moun yo ak yon seri kalite li menm li genyen, sa ki t ap pèmèt yo kowopere youn ak lòt e youn t ap depann de lòt (Jen. 1:27; 2:18). Sepandan, pou lemoman, lèzòm an jeneral lwen Bondye, e antanke gwoup, yo pa janm rive fè anyen nan tètansanm (1 Jan 5:19). Se sa k fè, inite ki te gen nan kongregasyon premye syèk la te dwe sanble yon bagay estrawòdinè, lè nou sonje diferans ki te genyen pami kretyen yo: Te gen Efezyen ki te esklav, fi grèk ki te gen gwo renome, gason juif ki te gen gwo edikasyon ak moun ki te konn adore zidòl anvan yo te vin kretyen. —Tra. 13:1; 17:4; 1 Tes. 1:9; 1 Tim. 6:1.
3. Kòman Labib pale de inite ki egziste pami kretyen yo, e ki kesyon nou pral egzamine nan atik sa a?
3 Vrè adorasyon an pèmèt moun kowopere byen youn ak lòt menm jan ak manm nan kò nou. (Li 1 Korentyen 12:12, 13.) Men kèk kesyon nou pral egzamine nan atik sa a: Ki jan vrè adorasyon an ini moun? Sa k fè se sèl Jewova ki ka mete inite nan mitan plizyè milyon moun ki soti nan tout nasyon? Ki defo Jewova ede nou venk ki te ka anpeche nou rete ini? Sou kesyon inite a, nan ki sans vrè kretyen yo diferan ak moun ki fè pati lakretyente yo?
Kòman vrè adorasyon an ini moun?
4. Ki sa k fè vrè adorasyon an ini moun?
4 Moun ki nan vrè adorasyon an rekonèt piske se Jewova ki kreye tout bagay, se li menm ki gen dwa pou l Souvren linivè (Rev. 4:11). Se sa k fè, byenke vrè kretyen yo ap viv nan diferan peyi e sitiyasyon yo chak diferan, yo tout obeyi lwa Bondye bay yo e yo viv selon prensip biblik yo. Tout vrè kretyen yo gen rezon rele Jewova “Papa”. (Iza. 64:8; Mat. 6:9.) Konsa, yo tout se frè ak sè espirityèl, e yo gen posiblite pou yo pwofite bèl inite salmis la pale de li a lè l te di: “Ala bèl bagay, ala bon sa bon lè frè ak frè ap viv ansanm [nan inite]!”—Sòm 133:1.
5. Ki kalite ki pèmèt gen inite nan mitan vrè adoratè Jewova yo?
5 Byenke vrè kretyen yo enpafè, yo adore Bondye ansanm nan inite paske youn aprann renmen lòt. Jewova anseye yo pou youn renmen lòt e se sèl li ki ka fè sa. (Li 1 Jan 4:7, 8.) Men sa l di nan Pawòl li: “Se pou nou abiye nou avèk yon konpasyon ki pwofon anpil, ak bonte, imilite, dousè ak pasyans. Menmsi yon moun gen dekwa pou l plenyen kont yon lòt, se pou youn kontinye sipòte lòt e se pou youn kontinye padone lòt ak tout kè nou. Menm jan Jewova padone nou ak tout kè l, nou menm tou nou dwe fè menm jan an. Men, anplis tout bagay sa yo, abiye nou ak lanmou, paske li se yon chenn ki ini moun yon fason ki san fay.” (Kol. 3:12-14). Chenn sa a ki ini moun yon fason ki san fay la, sa vle di lanmou, se kalite prensipal ki pèmèt moun idantifye vrè kretyen yo. Selon eksperyans pa w, èske w pa wè inite sa a pèmèt moun rekonèt vrè adorasyon an? —Jan 13:35.
6. Lefètke n ap tann Wayòm nan, ki jan sa ede nou gen inite nan mitan nou?
6 Lòt bagay ki pèmèt gen inite nan mitan vrè adoratè Jewova yo se lefètke y ap tann Wayòm Bondye a ki se sèl espwa pou limanite. Yo konnen talè konsa Wayòm Bondye a pral ranplase gouvènman lèzòm yo e li pral beni moun ki obeyisan yo ak bonjan lapè, yon lapè k ap dire (Iza. 11:4-9; Dàn. 2:44). Se poutèt sa, kretyen yo aji ann amoni ak sa Jezi te di sou disip li yo: “Yo pa fè pati monn nan, menm jan mwen menm mwen pa fè pati monn nan.” (Jan 17:16). Vrè kretyen yo pa patisipe nan chirepit ki gen nan monn nan. Konsa, yo gen posiblite pou yo ini menm lè moun bò kote yo ap fè lagè.
Moun ki sèl Sous enstriksyon espirityèl la
7, 8. Nan ki sans enstriksyon ki soti nan Labib yo pèmèt nou gen inite?
7 Kretyen ki t ap viv nan premye syèk la te gen inite nan mitan yo paske enstriksyon yo te resevwa yo te soti nan menm sous la. Yo te rekonèt se Jezi ki t ap anseye kongregasyon an e ki t ap dirije l pa mwayen kolèj santral la ki te gen ladan l apot yo ansanm ak ansyen ki nan Jerizalèm yo. Mesye sa yo, ki te bay tout yo menm nan sèvis Bondye a, te baze desizyon yo sou Pawòl li a, e te gen siveyan itineran ki te la pou transmèt enstriksyon mesye sa yo bay kongregasyon yo nan diferan peyi. Men sa Labib di anrapò ak kèk nan siveyan sa yo: “Etan y ap vwayaje, yo fè moun ki nan vil kote yo pase yo konnen desizyon apot yo ak ansyen ki nan Jerizalèm yo te pran, pou moun yo ka soumèt devan desizyon sa yo.” —Tra. 15:6, 19-22; 16:4.
8 Menm jan an tou jodi a, gen yon Kolèj santral, ki gen ladan l kretyen Bondye chwazi pou y al nan syèl la e ki resevwa lespri sen l, ki pèmèt gen inite nan mitan kongregasyon mondyal la. Kolèj santral la pibliye piblikasyon ki parèt nan plizyè lang e ki ankourajan nan domèn espirityèl. Manje espirityèl sa yo baze sou Pawòl Bondye a. Konsa, ansèyman ki ladan yo pa soti nan lèzòm, men yo soti nan Jewova. —Iza. 54:13.
9. Ki jan travay Bondye ban nou fè a ini nou?
9 Siveyan yo pèmèt gen inite tou lè yo pran latèt nan travay predikasyon an. Relasyon sere moun k ap travay ansanm nan sèvis Bondye a genyen youn ak lòt se yon relasyon ki pi solid lontan pase relasyon ki egziste pami moun nan monn nan, ki senpleman reyini ansanm pou yo fè zanmi e pou yo pale. Jewova pa t fòme kongregasyon kretyen an pou moun jwenn yon kote pou yo reyini senpleman pou yo fè zanmi e pou yo pale, men li te fòme l pou l onore L, pou l fè travay predikasyon bon nouvèl la ak travay fè disip la e pou fòtifye moun ki ladan l yo (Wom. 1:11, 12; 1 Tes. 5:11; Ebre 10:24, 25). Se sa k fè apot Pòl te ka di kretyen yo: “N ap kenbe fèm nan yon sèl espri, e nou fè yon sèl nanm pou nou lite kòtakòt pou lafwa nan bon nouvèl la.” —Fil. 1:27.
10. Bay kèk rezon ki fè nou ini antanke pèp Bondye.
10 Menm jan an tou, antanke pèp Jewova, nou ini paske nou aksepte Jewova kòm Souvren nou, nou renmen frè nou yo, nou met espwa nou nan Wayòm Bondye a, e nou respekte moun Bondye mete alatèt nou yo. Jewova ede nou venk yon seri abitid nou te genyen akoz enpèfeksyon nou ki ta ka anpeche nou ini. —Wom. 12:2.
Fason nou ka rejte ògèy ak jalouzi
11. Ki jan ògèy divize moun, e kòman Jewova ede nou rejte ògèy?
11 Ògèy divize moun. Yon moun ki ògeye kwè li siperyè lòt moun e jeneralman li pran plezi vante tèt li. Men, byen souvan sa konn anpeche gen inite paske moun ki tande moun k ap vante tèt li a kapab vin jalou. Disip Jak di byen klè: “Tout mòd fyète sa yo pa bon.” (Jak 4:16). Lè nou konsidere lòt moun pi ba pase nou, nou pa montre nou gen lanmou. Jewova se yon gwo egzanp pou nou nan domèn imilite lefètke li gen relasyon avèk moun ki enpafè. Gade sa David te ekri sou Jewova: “Se imilite w ki fè m gran.” (2 Sam. 22:36, NW). Pawòl Bondye a ede nou venk ògèy paske li anseye nou pou nou byen rezone. Anba enspirasyon, men kesyon Pòl te poze: “Ki sa k fè w pa menm ak yon lòt moun? Wi, ki sa w genyen se pa resevwa w te resevwa l? Ebyen, si vrèman sa w genyen an se resevwa w te resevwa l, poukisa w ap vante tèt ou kòmsi se pa resevwa w te resevwa l?” —1 Kor. 4:7.
12, 13. a) Sa k fè li fasil pou moun vin jalou? b) Ki sa k ap rive si nou gen menm pwennvi ak Jewova sou lòt moun?
12 Yon lòt bagay ki lakòz divizyon se jalouzi. Piske nou enpafè, nou tout gen tandans “anvi” posede sa lòt moun genyen, e menm moun ki kretyen depi lontan konn jalou lòt moun pafwa pou sitiyasyon yo nan lavi a, pou sa yo posede, pou privilèj yo genyen oubyen pou kapasite yo (Jak 4:5). Pa egzanp, yon frè ki gen madanm ak pitit ka jalou privilèj yon frè ki nan sèvis aplentan genyen san l pa rann li kont frè ki nan sèvis aplentan an ka yon ti jan jalou tou paske chèf fanmi an gen pitit. Ki sa nou ka fè pou nou anpeche jalouzi konsa kraze inite nou genyen an?
13 Yon bagay ki ka ede nou pou nou pa jalou se lè nou sonje fason Labib konpare moun Jewova chwazi pou fè pati kongregasyon kretyen an ak divès pati nan yon menm kò. (Li 1 Korentyen 12:14-18.) Pa egzanp, moun wè je nou, men yo pa wè kè nou, poutan, èske toule de ògàn sa yo pa gen anpil enpòtans pou nou? Menm jan an tou, chak moun nan kongregasyon an gen anpil valè pou Jewova, menmsi pandan yon ti tan kèk nan yo ka plis parèt pase lòt. Donk, annou gen menm pwennvi ak Jewova sou frè nou yo. Olye nou jalou lòt moun, pito nou demontre nou gen sousi pou yo e nou enterese nan yo. Konsa, n ap fè diferans ki genyen ant vrè kretyen yo ak moun ki nan legliz lakretyente yo parèt aklè.
Lakretyente chaje ak divizyon
14, 15. Ki jan krisyanis aposta a te vin divize?
14 Inite vrè kretyen yo gen nan mitan yo a diferan nèt ak divizyon ki gen nan legliz lakretyente yo. Ozanviwon katriyèm syèk la, apostazi a te tèlman gaye nan krisyanis lan, sa te fè yon anperè women, yon payen, te pran kontwòl krisyanis aposta a, e sa te bay lakretyente jarèt. Tikras pa tikras, plizyè wayòm ki t ap suiv Wòm nan domèn relijyon te vin separe avè l, e yo te vin fòme pwòp relijyon pa yo nan peyi yo.
15 Anpil nan wayòm sa yo te fè lagè youn ak lòt pandan plizyè syèk. Pandan epòk 17yèm ak 18yèm syèk la, nan Grann Bretay, Lafrans ak Etazini, moun peyi sa yo te tèlman vin nasyonalis, se kòmsi peyi yo te tounen yon dye pou yo. Pandan epòk 19yèm ak 20yèm syèk la, kesyon nasyonalis la te vin pami bagay ki te pi enpòtan pou pifò moun nan monn nan. Finalman, legliz lakretyente yo te divize fè plizyè ti gwoup e pifò nan yo tolere moun ki nasyonalis. Gen manm legliz ki menm rive al nan lagè pou y al batay ak moun ki gen menm kwayans avèk yo ki nan yon lòt nasyon. Konsa, jodi a, gen divizyon nan krisyanis aposta a, nonsèlman paske gen divès ti gwoup ki gen kwayans pa yo, men tou paske moun yo nasyonalis.
16. Ki sijè ki divize moun ki nan lakretyente yo?
16 Nan 20yèm syèk la, gen kèk nan plizyè santèn ti gwoup ki nan lakretyente yo ki te kòmanse ak yon mouvman ekimenik, sètadi yon mouvman ki te sipoze pèmèt yo vin gen inite nan mitan yo. Men, se pa anpil legliz ki rive fè youn, malgre yo gen plizyè dizèn ane depi y ap fè efò pou sa. Mete sou sa, jis kounye a, anpil manm legliz divize sou yon seri kesyon tankou evolisyon, avòtman, omoseksyalite, ak kesyon pou fi vin prèt la. Nan kèk relijyon nan lakretyente, moun ki alatèt yo eseye fè moun ki nan diferan ti gwoup relijye vin fè yon sèl lè yo minimize enpòtans yon seri doktrin ki lakòz divizyon nan mitan yo genyen. Sepandan lè yo fè sa, sa lakòz lafwa moun yo vin fèb e se sèten sa pa ini relijyon lakretyente yo.
Moun ki nan vrè adorasyon an pa nasyonalis
17. Ki jan Mika te predi vrè adorasyon an t apral ini moun “nan dènye pati jou yo”?
17 Byenke jodi a limanite pi divize lontan pase jan sa te ye nan nenpòt lòt epòk, inite ki egziste nan mitan vrè adoratè Bondye yo pèmèt moun rekonèt yo. Men sa Mika, yon pwofèt Bondye, te predi: “M ap fè yo vin fè yon sèl, tankou yon twoupo nan yon pak.” (Mika 2:12). Dapre Mika, Bondye t apral mete vrè adorasyon an pi wo pase kèlkeswa lòt fòm adorasyon, kit se adorasyon fo dye, kit se adorasyon moun bay peyi yo. Men sa l te ekri: “Nan dènye pati jou yo, mòn mezon Jewova a pral chita byen djanm anlè tèt mòn yo, e san mank l ap monte pi wo pase tèt kolin yo, e yon bann pèp dwe vini an foul nan direksyon l. Paske tout pèp yo, bò kote pa yo, yo chak pral mache nan non dye pa yo. Men nou menm, bò kote pa nou, nou pral mache nan non Jewova Bondye nou an.” —Mika 4:1, 5, NW.
18. Ki chanjman vrè adorasyon an ede nou fè?
18 Mete sou sa, Mika te dekri ki jan vrè adorasyon an t apral ini moun ki te ènmi youn ak lòt. Men sa l te ekri: “E anpil nasyon prale san mank e y ap di : ‘Vini, annou monte nan mòn Jewova a, nan mezon Bondye Jakòb la, e l ap enstwi nou konsènan wout li yo e n ap mache nan chemen li yo.’ [...] E yo gen pou yo bat epe yo fè yo tounen pyès chari, e yo gen pou yo bat lans yo, fè yo tounen sekatè. Yo pap leve epe nasyon kont nasyon, e yo pap aprann lagè ankò.” (Mika 4:2, 3, NW). Tout moun sou tè a ki sispann adore dye lèzòm fè yo e ki sispann adore peyi yo vin ini grasa adorasyon y ap bay Jewova a, Sila ki aprann yo gen lanmou nan kè yo a.
19. Lefètke plizyè milyon moun ini nan vrè adorasyon an, ki sa sa pwouve aklè?
19 Inite ki genyen jodi a sou tout tè a nan mitan vrè kretyen yo san parèy, e se yon prèv klè ki montre Jewova kontinye gide pèp li a pa mwayen lespri l. Nan tout istwa limanite, se premye fwa gen yon gwo foul moun konsa ki soti nan tout nasyon e ki ini. Sa reyalize yon fason estrawòdinè pawòl ki nan Revelasyon 7:9, 14 la e sa montre talè konsa zanj Bondye yo pral lage “van” destriksyon ki pral frape sistèm mechan ki la kounye a. (Li Revelasyon 7:1-4, 9, 10, 14.) Ala yon bèl privilèj nou genyen pou nou ini ansanm antanke frè ak sè sou tout kò tè a! Kòman nou chak kapab kowopere pou inite sa a kontinye? Se sa nou pral egzamine nan atik ki vin apre a.
Ki repons nou ta bay?
• Ki jan vrè adorasyon an ini moun?
• Kòman nou ka anpeche jalouzi kraze inite ki gen nan mitan nou an?
• Ki sa k fè santiman nasyonalis pa divize vrè adoratè Jewova yo?
[Kesyon]
[Foto nan paj 13]
Kretyen nan premye syèk la te soti tout kote ak nan kilti diferan.
[Foto nan paj 15]
Lefètke w patisipe nan konstriksyon Sal Wayòm yo, ki jan sa favorize inite?