PÈP Jewova a gen yon eritaj ki rich anpil. Nonsèlman nou kapab wè bèl eritaj sa a nan piblikasyon nou yo, men tou, nou kapab wè l nan foto, nan lèt, nan eksperyans moun fè, nan objè ki gen rapò ak vrè adorasyon an nan epòk pa nou an, nan travay predikasyon an e nan istwa nou antanke pèp. Men, ki enterè nou genyen pou nou konsève bagay sa yo e pou nou fè yon ti bak nan istwa nou? Ann Izrayèl, chèf fanmi yo te dwe fè pitit yo konnen lwa Bondye yo ak bèl aksyon Bondye te fè, yon fason pou timoun yo te ka “mete konfyans yo nan Bondye”. — Sòm 78:1-7.

Te toujou gen moun ki fè rechèch nan kèk achiv, sa ki te pèmèt objektif Jewova reyalize. Nan epòk Dariyis la, te gen kèk moun ki t ap eseye kanpe travay ki t ap fèt nan tanp Jerizalèm nan. Lè sa a, te gen yon rechèch ki te fèt nan achiv ki te Ekbatàn nan, kapital peyi Mèd, e se konsa Dariyis te vin konnen Siris te bay lòd pou yo rebati tanp Jerizalèm nan (Esd. (Ezra) 6:1-4, 12). Konsa, yo te rebati tanp lan ann amoni ak volonte Jewova. Lik tou, ki te ekri youn nan Evanjil yo e ki te “chèche konnen tout bagay avèk presizyon depi nan kòmansman”, te fouye nan achiv ki te genyen nan epòk pa l la. — Lik 1:1-4.

Istwa òganizasyon Bondye a gen anpil enpòtans pou Kolèj santral la. Men sa youn nan moun ki fè pati Kolèj  santral la te di pandan li t ap pale de nesesite pou nou konsève dokiman ak lòt bagay ki gen rapò ak istwa nou antanke pèp Bondye: “Si nou pa konn kote n soti, nou pap konn kote n prale.” Se sa k fè gen yon sèvis ki rele Sèvis achiv yo fèk met sou pye nan syèj mondyal la, nan Bwouklin, Nouyòk, ki anba sipèvizyon Komite redaksyon an.

“ALBÒM FOTO” NOU AK LÒT “ERITAJ”

Plis tan ap pase, se plis moun gen tandans bliye istwa yo. Pifò nan nou gendwa regrèt nou pa t pi byen konsève istwa fanmi nou. Aktyèlman, Sèvis achiv la ap travay san pran souf pou l konsève e pou l klase bagay òganizasyon an genyen ki pa sispann ogmante e ki fè pati eritaj nou genyen an ki rich. Nou ta kapab konsidere foto nou genyen nan achiv nou yo kòm “albòm foto” nou antanke pèp. Nan achiv nou yo tou gen piblikasyon, eksperyans moun te fè ak objè ki gen anpil valè pou nou. Bagay sa yo se “eritaj” nou genyen ki ede nou byen konprann istwa nou antanke pèp Bondye e ki ede nou wè lavni avèk konfyans.

Nou envite nou fè yon ti gade nan Sèvis achiv la grasa nouvo ribrik ki rele “Bagay ki nan achiv nou”. Nouvo ribrik sa a ap parèt detanzantan nan Toudegad ki gen atik etid yo. Nan youn nan Toudegad k ap vini yo, n ap vin ak yon atik ak tout foto ki pral reponn kesyon sa yo: Ki sa “Dawn Mobile” la te ye? Kiyès ki te konn sèvi avè l? Ki lè yo te konn sèvi avè l, e pou ki rezon?

Menm jan yon albòm foto fè moun sonje kèk moman yo te pase, atik ki pral parèt nan ribrik sa a ap ede nou konprann òganizasyon an e y ap aprann nou anpil bagay sou kèk moun nan epòk nou an ki t ap sèvi Jewova anvan nou. Atik sa yo pral ede nou wè jan moun sa yo te gen lafwa, kouraj ak kran. Yo pral ede nou wè bon moman ak difikilte kèk nan yo te jwenn nan sèvis Jewova, Papa nou ki nan syèl la ki renmen nou an, ansanm ak fason Jewova gide pèp li a e li soutni l fidèlman (Det. 33:27). Nou gen konfyans Jewova ap beni efò nou kontinye ap fè pou n konsève istwa nou antanke pèp yon fason pou nou ka vin plis ini e pou nou ka gen plis fòs pou nou fè volonte l.

[Kare/Foto nan paj 31]

Men ki jan travay la fèt

Lè ekriven nou yo, atis nou yo, moun k ap fè rechèch pou nou yo ak lòt moun ankò bezwen enfòmasyon pou yo prepare piblikasyon nou yo, DVD yo ak lòt bagay ankò ki gen enfòmasyon ki baze sou Bib la, yo fè rechèch nan achiv nou yo. Se sa k fè Sèvis achiv la fè anpil demach pou l rasanble e pou l konsève tout kalite bagay ki gen rapò ak istwa nou. Bagay sa yo soti nan filyal yo, nan Betèl yo, nan kongregasyon yo ak lòt kote ankò. Pafwa se moun oswa kèk òganizasyon nan monn nan ki bay yo. Men kèk etap Sèvis achiv la pase pou l fè travay sa a:

Fason nou jwenn yo e nou analize yo: Sèvis achiv la kontinye ap resevwa yon seri bagay moun pa jwenn fasil. Anpil nan bagay sa yo se moun fanmi yo gen plizyè dizèn ane depi y ap sèvi Jewova fidèlman ki bay yo oswa ki prete òganizasyon an yo. Lè nou analize bagay sa yo e nou konpare yo youn ak lòt, sa ede nou pi byen konprann istwa nou e sa aprann nou anpil bagay sou moun ki te konn sèvi ak bagay sa yo.

Nou klase yo: Gen plizyè milye bagay nan achiv nou yo. Genyen ladan yo ki gen plis pase santan depi yo egziste. Yo pa gen menm fòm, yo pa gen menm gwosè, yo pa nan menm fòma, e fòk nou klase yo yon fason pou nou ka jwenn yo lè nou bezwen yo.

Nou repare yo e nou konsève yo: Gen liv ak objè ki frajil nou repare e nou konsève selon metòd pwofesyonèl yo itilize. Nou konvèti dokiman, foto, paj jounal ki dekoupe, fim ak anrejistreman nan fòma elektwonik. Konsa, lè nou bezwen yo nou kapab jwenn yo e nou pa bezwen ap manyen dokiman orijinal yo ak lòt bagay ki gen valè istorik.

Nou stoke yo yon fason k ap pèmèt nou jwenn yo: Nou stoke bagay nou gen nan achiv nou yo kote solèy ak imidite pa kapab detwi yo. Nou fè sa avèk lòd e avèk prekosyon yon fason pou nou pa pèdi yo. Gen yon baz done n ap prepare kounye a k ap fè li fasil pou nou jwenn bagay sa yo ki gen valè istorik pou nou.

[Foto nan paj 32]

1. Afich “Fotodram kreyasyon” an 2. Rejis pou abònman. 3. Yon machin ki gen opalè sou tèt li. 4. Paj kouvèti Toudegad 15 avril 1912. 5. Papye ki fè konnen J. F. Rutherford t apral nan prizon. 6. Yon mikwofòn estasyon radyo WBBR la. 7. Fonograf. 8. Yon bwat pou pote liv. 9. Nòt yon moun te pran. 10. Telegram yo te voye bay J. F. Rutherford.