Ekriti yo fè konnen: “Bagay tankou move rezònman, zak asasinay, adiltè, fònikasyon, vòl, fo temwayaj, vye pawòl, se nan kè a yo soti.” (Mat. 15:19). Kè senbolik nou an kapab trayi nou e li kapab fè n ap chèche eskiz pou n jistifye yon bagay nou fè ki pa ann amoni ak volonte Bondye. Petèt, se kapab apre nou fin fè yon move bagay nou rann nou kont nou te mal aji. Ki sa k kapab ede nou idantifye entansyon ki nan kè nou anvan nou pran yon move direksyon?

Li Labib chak jou epi medite sou sa n li yo.

Apot Pòl te ekri: “Pawòl Bondye a vivan e li pisan, li pi file pase yon epe ki file de bò, epi li pèse fon jis li separe nanm nan ak lespri a.” Mesaj Bondye fè ekri nan Bib la “kapab rive disène panse ak entansyon ki nan kè yon moun”. (Ebre 4:12.) Vrèmanvre, lè nou egzamine tèt nou dapre sa Ekriti yo di, sa ka yon bon mwayen pou nou rive idantifye entansyon ki nan kè nou. Se pa ti enpòtan li enpòtan pou nou li Pawòl Bondye a chak jou epi pou nou medite sou sa n li yo yon fason pou nou ka rive konnen panse Bondye yo ak fason li wè bagay yo!

Lè nou aksepte konsèy ki nan Ekriti yo epi nou aplike prensip biblik yo nan lavi nou, sa ap gen yon efè sou konsyans nou ki se kapasite nou gen lakay nou k ap bay “temwayaj” la (Wom. 9:1). Konsyans nou kapab ede n pou n pa chèche jistifye yon move konduit. Anplis de sa, Bib la chaje ak egzanp ki kapab “sèvi nou  avètisman”. (1 Kor. 10:11.) Egzanp sa yo kapab anpeche nou pran yon move direksyon. Ki sa nou chak dwe fè?

Priye Bondye pou l ede n idantifye entansyon ki nan kè nou.

Jewova se “Bondye ki konn egzamine kè” a (1 Kwo. 29:17, NW). Li “pi gran pase kè nou, e li konn tout bagay”. (1 Jan 3:20.) Pèsonn pa ka twonpe Bondye. Si nan priyè nou yo nou ouvè kè nou bay Jewova pou n di l pwoblèm nou, sa nou santi ansanm ak sa nou bezwen, li kapab ede nou disène entansyon ki nan kè nou. Nou kapab menm mande Bondye pou l fè n vin gen “yon kè ki pwòp”. (Sòm 51:10, NW.) Se sa k fè, lè n ap chèche konnen entansyon ki nan kè nou, nou pa dwe neglije priye Jewova.

Ret konsantre sou sa y ap di nan reyinyon yo.

Lè nou rete konsantre sou sa y ap di nan reyinyon yo, sa kapab ede n analize kè nou oswa moun nou ye pa anndan an, yon fason ki onèt. Byenke nou ka pa jwenn nouvo enfòmasyon nan chak reyinyon, men, lè nou asiste reyinyon yo sa ap pèmèt nou pi byen konprann prensip ki gen nan Bib la e n ap jwenn bonjan rapèl k ap ede nou egzamine entansyon ki nan kè nou. Kòmantè frè ak sè nou yo enpòtan anpil tou pou ede nou rafine moun nou ye pa anndan an (Pwo. 27:17). Si nou izole tèt nou olye n pwofite frekantasyon frè ak sè nou yo nan reyinyon yo regilyèman, nou kapab fè tèt nou ditò. Sa kapab pouse nou ‘chèche pwòp dezi egoyis nou’. (Pwo. 18:1, NW.) Donk, li saj pou nou mande tèt nou: ‘Èske m gen abitid asiste tout reyinyon yo epi pwofite sa yo di ladan yo?’ — Ebre 10:24, 25.

Kè nou an ki trèt kapab mennen nou plizyè kote nan lavi a. Nou pral egzamine kat ladan yo: Kouri dèyè bagay materyèl, sèvi ak bwason ki gen alkòl, moun n ap chwazi pou zanmi nou ansanm ak sa nou fè pou n detann nou.

Kouri dèyè bagay materyèl.

Se yon bagay nòmal pou n gen anvi satisfè bezwen fizik nou yo. Sepandan, Jezi te bay yon egzanp ki sèvi nou avètisman konsènan sa k ka rive yon moun ki bay bagay materyèl twòp enpòtans. Nan youn nan egzanp Jezi yo, li te pale konsènan yon mesye ki rich anpil ki te gen plizyè depo ki ranpli ak manje angren. Akoz de sa, mesye a pa t gen plas ankò nan depo yo pou l met manje ki te soti nan yon lòt bon rekòt. Mesye a te gen entansyon kraze depo l te genyen yo pou l te ka bati depo ki pi gwo. Men ki jan l te rezone: “M ap mete tout manje angren m yo ak tout bon bagay mwen genyen yo ladan yo. Apre sa, m ap di tèt mwen: ‘Monchè, ou gen anpil bon bagay la a pou anpil ane. Pran lèz kò w, manje, bwè, epi pran plezi w.’” Sepandan, mesye rich sa a te bliye yon bagay li pa t kapab evite: Li te ka mouri nan menm nuit lan. — Lik 12:16-20.

Toutpandan n ap granmoun, nou ka tèlman vin enkyete n konsènan aranjman n ap fè pou n gen sekirite nan domèn materyèl lè n granmoun, sa fè nou vin kòmanse ap jistifye siplemantè n ap fè nan travay nou pandan sware ki gen reyinyon yo oswa, nan kèk domèn, nou ka kòmanse neglije responsablite nou genyen antanke kretyen. Èske nou pa dwe pran gad nou kont kalite panse sa yo? Konsa tou, nou kapab jèn epi nou rann nou kont pa gen pi bon karyè yon moun ka chwazi pase sèvis aplentan. Kidonk, èske n ap voye sèvis pyonye a pou pita paske nou panse nou dwe chèche sekirite nan domèn ekonomik  anvan? Èske n pa dwe fè tout sa n kapab depi kounye a pou nou rich devan Bondye? Ki moun ki konnen si n ap vivan demen?

Sèvi ak bwason ki gen alkòl.

Pwovèb 23:20 di nou: “Pa fè zanmi avèk moun k’ap bwè twòp.” Si yon moun gen gwo anvi pou l bwè bwason ki gen alkòl, li gendwa fè konprann pa gen anyen ki mal pou l bwè chak jou. Li kapab di li bwè pou l detann li, li pa bwè pou l sou. Si n panse nou oblije bwè bwason ki gen alkòl pou n detann nou, petèt li tan pou n fè yon egzamen onèt sou entansyon ki nan kè nou.

Moun n ap chwazi pou zanmi nou.

Se vre, li enposib pou n evite pran kontak ak kèk moun ki pa kwayan tankou nan lekòl nou, nan travay nou ak lè n ap patisipe nan travay predikasyon an. Sepandan, lè n nan pran plezi ak yo e nou menm vin gen zanmitay sere sere ak yo, se yon lòt bagay sa ye. Èske n ap chèche jistifye relasyon sa yo lè nou di moun sa yo gen anpil bon kalite lakay yo? Men ki avètisman Bib la ban nou: “Pinga nou twonpe tèt nou. Move frekantasyon gate abitid ki pwofitab.” (1 Kor. 15:33). Menm jan yon ti kal bagay ki gate kapab kontamine yon dlo ki pwòp, lè nou fè zanmi ak moun ki pa gen okenn respè pou Bondye, sa kapab kontamine relasyon nou gen ak Bondye a epi fè nou vin adopte pwennvi monn nan, abiye menm jan ak moun nan monn nan, pale menm jan ak yo e gen menm konduit ak yo.

Sa nou fè pou n detann nou.

Dènye teknoloji ki genyen yo ban nou posiblite pou nou jwenn tout kalite detant byen fasil e gen anpil nan detant sa yo moun gen dout sou yo oswa yo pa konvnab pou yon kretyen. Apot Pòl te ekri ‘depi se salte sou kèlkeswa fòm nan, nou pa dwe menm pale de yo nan mitan nou’. (Efe. 5:3.) Ki sa n ka fè si kè nou gen tandans pou l gade oswa tande yon bagay ki pa pwòp? Nou gendwa panse tout moun bezwen yon ti tan pou yo detann yo oswa yon ti moman plezi, e nou gendwa panse fason yon moun ap chèche detann li se yon bagay pèsonèl. Sepandan, annou suiv konsèy Pòl bay la ak tout kè nou, e nou pa dwe kite okenn bagay ki pa pwòp devan je nou oswa antre nan zòrèy nou.

Si nou te viktim paske nou te kite tandans ki nan kè nou ki trèt mennen nou epi nou vin gen abitid jistifye yon move konduit, nou kapab fè chanjman (Efe. 4:22-24). Ann konsidere de egzanp nan epòk nou an ki montre sa.

Miguel * te gen pou l fè ajisteman nan fason l konsidere bagay materyèl. Men sa l di: “Mwen menm, madanm mwen ak pitit gason m nan ap viv nan yon peyi kote posede teknoloji dènye kri yo ansanm ak viv yon fason konfòtab, se bagay yo bay anpil enpòtans. Pandan yon tan, mwen te konsakre tout vi m nan chèche jwenn tout sa m ka genyen nan monn nan paske m te panse mwen te ka fè sa san m pa vin yon moun ki materyalis. Mwen te vin rann mwen kont byen vit, yon moun k ap kouri dèyè byen materyèl sanble ak yon moun k ap kouri sou yon wout ki pa gen kote l fini. Mwen te priye Jewova konsènan fason m panse ak entansyon ki nan kè m. Mwen te fè Jewova konnen, antanke fanmi, nou te vle sèvi l ak tout kè n. Nou te pran desizyon pou nou senplifye lavi nou e nou t al sèvi kote yo bezwen plis pwoklamatè Wayòm nan. Nou te pran sèvis pyonye tousuit apre. Nou te vin rann nou kont, nou pa bezwen gen anpil bagay materyèl pou nou gen yon vi ki ranpli ak kè kontan.”

Lee te fè yon eksperyans ki montre lè yon moun egzamine tèt li onètman, sa kapab ede l vire do bay move frekantasyon. Men sa Lee di: “Akoz travay mwen, chak jou mwen te rankontre kèk etranje ki vann antrepriz la machandiz kredi. Mwen te konnen t ap gen anpil alkòl nan reyinyon sa yo, men, mwen te anvi asiste yo anpil. Pandan plizyè fwa, mwen pa t manke anyen pou m te sou, e mwen te santi m regrèt apre sa. Mwen te egzamine kè m yon fason ki onèt. Konsèy mwen te jwenn nan Pawòl Bondye a ansanm ak sijesyon ansyen yo te fè m te ede rann mwen kont, sa m ap chèche toutbonvre se vin zanmi ak moun ki pa renmen Jewova. Kounye a, mwen fè tout sa m kapab pou m jere antrepriz mwen an grasa telefòn epi m diminye kontak mwen gen ak moun sa yo.”

Nou bezwen onèt ak tèt nou epi chèche idantifye entansyon ki nan kè nou. Toutpandan n ap fè sa, nou dwe chèche direksyon Jewova nan lapriyè, epi pa bliye li “konn sekrè ki nan kè tout moun”. (Sòm 44:21.) Bondye ban nou Pawòl li a tou ki kapab sèvi tankou yon glas pou nou (Jak 1:22-25). Se pa ti enpòtan konsèy ak rapèl nou jwenn nan piblikasyon yo ak nan reyinyon yo enpòtan tou! Bagay sa yo kapab ede nou pou nou prezève kè nou e pou nou kontinye mache nan chemen jistis la.