1, 2. Poukisa gen kèk moun ki bay fig frans anpil enpòtans?

ÈSKE W renmen manje fig frans? Gen anpil moun ki renmen fè sa, se sa k fè, yo kiltive fig frans ki bon pou manje anpil kote sou tè a. Juif nan tan lontan yo te bay fwi sa a anpil enpòtans (Naw. 3:12; Lik 13:6-9). Piske fig gen yon seri bagay ladan l ki bon pou sante nou, gen kèk moun ki fè konnen li bon pou kè a.

² Yon lè, Jewova te itilize fig kòm imaj pou l pale de kè moun. Bondye pa t ap dekri byenfè yon moun jwenn lè l manje fig, men, li t ap pale pito nan yon sans senbolik. Pawòl li te di pa mwayen pwofèt Jeremi yo konsène ni kè nou ni kè moun nou renmen yo. Toutpandan nou pral konsidere pawòl Bondye te di yo, reflechi pou n wè ki sa pawòl sa yo ka vle di pou kretyen yo.

3. Ki sa fig yo pale de yo nan Jeremi chapit 24 la reprezante?

³ Toudabò, ann konsidere yon bagay Bondye te di nan epòk Jeremi an konsènan fig frans. Nan ane 617 anvan epòk nou an, nasyon Jida a te nan yon move sitiyasyon nan domèn espirityèl. Nan yon vizyon Bondye te bay konsènan sa k t apral rive yo, li te pran egzanp de kalite fig, sa ki “bon anpil” ak sa ki “pa bon menm”. (Li Jeremi 24:1-3.) Vye fig yo reprezante wa Sidkiya ansanm ak moun ki te sibi move tretman menm jan avè l yo anba men wa Neboukadnetsa ansanm ak lame l la. Men, ki sa nou ka di konsènan Ezekyèl, Dànyèl ak twa konpayon l yo ki te deja nan vil Babilòn ansanm ak kèk Juif yo pa t ap pran tan pou mennen nan vil sa a? Moun sa yo te tankou bon fig. Yon rès nan moun sa yo t ap retounen vin rebati Jerizalèm ansanm ak tanp li a. Sa te fèt kèk tan annapre. — Jer. 24:8-10; 25:11, 12; 29:10.

4. Ki ankourajman nou ka jwenn nan pawòl Bondye te di konsènan bon fig yo?

⁴ Men sa Jewova di konsènan moun bon fig yo reprezante yo: “M ap ba yo yon kè pou yo ka konnen se mwen menm ki Jewova; yo dwe vin pèp mwen.”  (Jer. 24:7, NW). Se pa ti ankourajan vèsè sa a ki se tèm atik la ankourajan! Bondye dispoze bay moun “yon kè pou yo ka konnen” l. Nan ka sa a, “kè” a gen rapò ak moun ki dispoze konnen l yo. Se sèten, nou ta renmen gen yon kè konsa epi pou n vin fè pati pèp Jewova a. Nan etap nou dwe franchi pou nou rive fè sa yo, nou jwenn: Etidye Labib epi aplike sa nou aprann ladan l, repanti epi kase tèt tounen, vwe lavi nou bay Bondye, epi fè nou batize nan non Papa a, Pitit la ak lespri sen an (Mat. 28:19, 20; Tra. 3:19). Petèt, nou gendwa franchi etap sa yo deja oswa nou gendwa asiste reyinyon Temwen Jewova yo regilyèman oswa nou ka menm ap travay pou n atenn objektif sa yo.

5. Ki moun pawòl Jeremi yo te konsène prensipalman?

⁵ Menmsi nou deja franchi kèk nan etap sa yo oswa yo tout, nou dwe toujou reflechi sou atitid nou ak konduit nou. Nou kapab konprann rezon ki fè n dwe fè sa lè nou egzamine lòt pawòl Jeremi te ekri konsènan kè a. Gen kèk chapit nan liv Jeremi an ki pale de nasyon ki te ozalantou yo, men, liv sa a te konsantre l plis sou nasyon Jida a pandan rèy senk wa ki t ap dirije l (Jer. 1:15, 16). Wi, pawòl Jeremi te ekri yo te konsène prensipalman gason, fi ansanm ak timoun ki te vwe lavi yo bay Jewova. Zansèt moun sa yo te chwazi volontèman vin yon nasyon pou Jewova (Egz. 19:3-8). Anplis de sa, nan epòk Jeremi an, pèp la te rekonèt yo se yon nasyon ki vwe bay Bondye. Men sa yo te di: “Nou tounen vin jwenn ou. Wi, se ou menm Senyè a ki Bondye nou!” (Jer. 3:22). Men, nan ki kondisyon nou panse kè moun sa yo te ye?

6. Poukisa nou bezwen pran pawòl Bondye te di konsènan kè a trèzoserye?

⁶ Doktè nan epòk nou an ka sèvi ak teknoloji dènye kri pou yo wè nan ki kondisyon kè yon moun ye ak fason l ap fonksyone. Sepandan, Jewova ka fè plis bagay lontan pase sa, menm jan li te fè sa nan epòk Jeremi an. Nou ka rive wè jan Jewova pi kalifye lontan lè l te di pawòl sa yo: “Kè a pi trèt pase nenpòt ki lòt bagay e li pa bon menm. Ki moun ki ka konnen l? Mwen menm, Jewova, mwen fouye kè a, [...] pou m bay chak moun selon aksyon l, selon rezilta fason l aji.” (Jer. 17:9, 10, NW). Ekspresyon “fouye kè a” pa vle di se yon egzamen medikal Jewova ap fè pou kè literal la, yon kè ki ka bat anviwon twa milya fwa nan 70 oswa 80 an. Olye de sa, Jewova t ap pale de kè senbolik la. “Kè” a reprezante tout sa yon moun ye pa anndan, sa gen ladan l sa moun nan anvi, fason l panse, tanperaman l, fason l wè bagay yo ak objektif li. Ou gen yon kè konsa. Bondye kapab egzamine l, e, nan yon sèten degre, ou kapab fè sa tou.

7. Ki fason Jeremi te pale konsènan kè pifò Juif nan epòk li a?

⁷ Pou nou prepare n pou egzamen sa a, nou ka mande tèt nou: ‘Nan ki kondisyon kè senbolik pifò Juif ki t ap viv nan epòk Jeremi an te ye?’ Pou n reponn kesyon sa a, ann konsidere yon deklarasyon Jeremi te fè moun pa abitye tande. Men sa l te di: “Tout pèp Izrayèl la pa sikonsi nan kè yo.” Jeremi pa t ap pale de sikonsizyon nòmal gason Juif yo te konn fè a, paske li te gentan di: “‘Gade! Jou yo pral rive,’ se sa Jewova deklare, ‘e lè sa a, mwen pral fè tout moun ki sikonsi, men k ap aji tankou moun ki pa sikonsi yo rann mwen kont.’” Kidonk, menm gason Juif ki te sikonsi yo “pa [t] sikonsi nan kè yo”. (Jer. 9:25, 26, NW.) Men, ki sa pawòl sa yo te vle di?

8, 9. Anrapò ak kè yo, ki sa pifò Juif te bezwen fè?

⁸ Nou jwenn yon enfòmasyon ki ede n konprann ekspresyon yo “pa sikonsi nan kè yo” a nan konsèy Bondye te bay Juif yo. Men sa nou li: “Retire tout move bagay  nan kè nou, nou menm moun peyi Jida ansanm ak moun ki abite Jerizalèm, yon fason pou kòlè m pa boule n [...] akoz zak mechanste nou yo.” Men, ki kote zak mechanste Juif yo te konn fè yo te soti? Yo te soti anndan yo, sa vle di nan kè yo. (Li Mak 7:20-23.) Sa klè, pa mwayen Jeremi, Bondye te montre egzakteman ki kote zak mechanste Juif yo te soti. Kè moun sa yo te di e yo te rebèl. Fason yo te konn aji ak fason yo te panse pa t fè Bondye plezi. (Li Jeremi 5:23, 24; 7:24-26.) Jewova te di yo: “Se pou nou sikonsi pou Jewova, retire tout move bagay nan kè nou.” — Jer. 4:4, NW; 18:11, 12.

⁹ Se sa k fè, menm jan ak Juif nan epòk Moyiz la, Juif nan epòk Jeremi an te bezwen opere kè senbolik yo a, sa vle di, yo te dwe ‘sikonsi kè yo’. (Det. 10:16; 30:6.) Ekspresyon ‘retire tout move bagay nan kè yo’ a te vle di pou yo jete tout bagay ki te fè kè yo lou tankou fason yo panse, sa yo renmen ak aksyon ki pa ann amoni ak volonte Bondye. — Tra. 7:51.

10. Menm jan ak David, ki sa nou ta dwe fè?

¹⁰ Se pa ti rekonesan nou rekonesan dèske Bondye ede n byen konprann kè senbolik la! Sepandan, kèk moun gendwa ap mande ‘poukisa Temwen Jewova nan epòk nou an dwe enterese nan kè senbolik la?’ Se pa paske anpil frè ak sè nan kongregasyon an ap fè sa k mal oswa yo vin tounen “vye fig” tankou anpil Juif nan tan lontan. Okontrè, sèvitè Bondye yo jodi a vwe lavi yo ba li, e yo se yon pèp ki pwòp. Sepandan, reflechi sou priyè David te fè Jewova a lè l te di: “Sonde m, Bondye! Wè tou sa ki nan kè m! Fouye m! Wè tou sa ki nan lide m! Gade [pou w] wè si m sou yon move chemen.” — Sòm 17:3; 139:23, 24.

11, 12. a) Poukisa nou chak dwe egzamine kè nou? b) Ki sa Bondye pap fè?

¹¹ Jewova vle pou nou chak vin gen yon bon relasyon avè l e pou nou kenbe relasyon sa a. Konsènan moun ki jis la, men sa Jeremi te di: “Ou menm, o Jewova Chèf lame yo, ou egzamine moun ki jis la, ou wè sa k nan ren ak sa k nan kè.” (Jer. 20:12, NW). Si Bondye ki Toupisan an ap egzamine kè menm moun ki jis la, èske nou pa ta dwe analize tèt nou yon fason ki onèt? (Li Sòm 11:5.) Toutpandan n ap fè sa, nou ka rive disène yon atitid, yon objektif oswa yon santiman ki byen fon nan kè nou ki merite korije. Nou ka wè gen bagay ki fè kè nou manke sansib, sa vle di kèk ‘move bagay ki nan kè nou’, nou ta dwe retire. Lè n fè sa, se opere nou opere kè senbolik la. Si n dakò sa bon pou n egzamine kè senbolik nou an, ki sa n ta dwe chèche ladan l? E ki fason n ka rive fè chanjman ki nesesè yo? — Jer. 4:4.

¹² Gen yon bagay ki klè: Nou pa dwe atann Jewova pral fòse nou chanje. Li te di moun ki sanble ak “bon fig yo” l ap “ba yo yon kè pou yo ka konnen” l. Li pa t di li t ap fòse yo chanje kè yo. Moun sa yo te dwe anvi gen yon kè ki sansib, yon kè ki montre yo konnen Bondye. Èske nou pa ta dwe gen menm kè sa a?

13, 14. Nan ki sans kè yon kretyen kapab mete l an danje?

¹³ Jezi te di: “Bagay tankou move rezònman, zak asasinay, adiltè, fònikasyon,  vòl, fo temwayaj, vye pawòl, se nan kè a yo soti.” (Mat. 15:19). Li klè, si yon frè kite kè l vin ensansib jiskaske l rive komèt adiltè oswa fònikasyon e li kontinye pa repanti, li kapab pèdi apwobasyon Bondye pou toutan. Sepandan, menm yon moun ki pa t komèt yon peche grav konsa gendwa kite yon move dezi grandi nan kè l. (Li Matye 5:27, 28.) Nan ka sa a, si n egzamine kè nou pèsonèlman, sa ka ede nou. Lè w byen analize kè w, èske w remake ou gen yon move dezi pou yon moun ki pa menm sèks avè w, yon seri dezi Bondye kondane ou kenbe an sekrè, e w dwe retire nan kè w?

¹⁴ Se kapab tou yon frè ki pa komèt “zak asasinay”, men, ki kite rankin anvayi kè l jiskaske l vin rayi yon kretyen parèy li (Lev. 19:17). Èske l ap fè tout sa l kapab pou l retire santiman sa yo ki kapab fè kè l vin lou? — Mat. 5:21, 22.

15, 16. a) Bay yon egzanp sou fason yon kretyen ka montre li ‘pa sikonsi nan kè l’. b) Ki sa k fè w panse yon moun ki ‘pa sikonsi nan kè l’ pap ka fè Jewova plezi?

¹⁵ Erezman, pifò kretyen pa gen ‘pwoblèm kè’ nou sot pale la yo. Sepandan, Jezi te pale konsènan “move rezònman” tou. Bagay sa yo se pwennvi nou oswa fason nou wè bagay yo ki kapab gen efè nan anpil domèn nan lavi n. Pa egzanp, yon moun gendwa gen yon pwennvi ki defòme anrapò ak atachman li dwe gen pou fanmi l. Nòmalman, kretyen yo vle demontre “afeksyon” pou moun ki nan fanmi yo. Konsa, yo pa sanble ak anpil moun k ap viv nan “dènye jou yo” ki pa gen “afeksyon pou moun parèy yo”. (2 Tim. 3:1, 3.) Sepandan, li posib pou nou egzajere nan fason n ap demontre afeksyon sa a. Gen anpil moun ki panse pa gen relasyon ki pi fò oswa ki pi enpòtan pase relasyon ki egziste ant moun ki nan menm fanmi. Konsa, yo gendwa defann fanmi yo kèlkeswa sa sa mande kòmsi se yo menm yo ofanse si yon moun ofanse fanmi yo. Reflechi sou aksyon yon santiman ki fò konsa te pouse frè Dina yo fè (Jen. 34:13, 25-30). Reflechi tou sou fason santiman ki te nan kè Absalòm nan te pouse l asasinen Amnòn, demi frè l la (2 Sam. 13:1-30). Èske se pa t “move rezònman” ki te pouse moun sa yo aji konsa?

¹⁶ Nou konnen vrè kretyen yo pa komèt zak asasinay. Sepandan, èske moun sa yo kenbe yon frè oswa yon sè nan kè yo paske l te ofanse yon moun nan fanmi yo? Oswa yo kenbe nan kè yo yon moun yo panse ki te aji konsa? Yo ka menm refize demontre ospitalite anvè yon kwayan parèy yo yo panse ki te mal aji ak yon moun nan fanmi yo oswa yo gendwa pa janm demontre ospitalite anvè l (Ebre 13:1, 2). Nou pa ka bay eskiz pou nou pase konsa konsa sou  santiman negatif sa yo e pou n pa montre nou akeyan, paske lè n aji konsa nou montre nou manke lanmou. Vrèmanvre, Moun ki egzamine kè a kapab konsidere n tankou moun ki “pa sikonsi nan kè yo”. (Jer. 9:25, 26.) Sonje moun Jewova te avèti yo lè l te di: “Retire tout move bagay nan kè nou.” — Jer. 4:4.

17. Lè nou gen lakrentif pou Jewova, kòman sa kapab ede nou vin gen yon kè ki pi sansib?

¹⁷ Ki sa w dwe fè si lè w fin egzamine kè senbolik ou a, ou ta wè li pa tèlman sansib ak konsèy Jewova yo jan sa ta dwe ye, e nan yon sans li “pa sikonsi”? Petèt, ou ka wè li gen lakrentif pou lòm, li gen anvi gen gwo renome oswa viv nan liks, oswa li menm gen tandans fè tèt di oswa fè sa l vle. Se pa ou menm sèl ki nan sitiyasyon sa a (Jer. 7:24; 11:8). Jeremi te fè konnen Juif ki pa t fidèl ki t ap viv nan epòk li a te ‘gen tèt di, e yo pa t vle koute’. Li te kontinye pou l di: “Sa pa janm vin nan lide yo pou yo di: ‘Annou gen krentif pou Senyè a, Bondye nou an, li menm ki voye lapli lè pou n gen lapli.’” (Jer. 5:23, 24). Èske sa pa ede n konprann lè nou fè efò pou nou “retire tout move bagay nan kè nou” sa ap fè nou vin gen plis lakrentif ak plis apresyasyon pou Jewova? Yon bonjan lakrentif konsa kapab ede nou chak vin gen yon kè ki pi sansib pou kalite moun Bondye vle nou ye a.

18. Ki pwomès Jewova te fè moun ki nan nouvo alyans lan?

¹⁸ Etandone Jewova ban nou ‘yon kè pou nou ka konnen’ l, nou kapab travay ansanm avè l. Dayè, nan nouvo alyans lan, se sa li te pwomèt l ap fè pou kretyen li chwazi pou al nan syèl yo. Men sa l te di: “M ap mete lwa mwen anndan yo, e nan kè yo m ap ekri l. E m ap vin Dye yo, e yo menm y ap vin pèp mwen.” (NW). E konsènan moun k ap chèche konnen l toutbonvre yo? Li te ajoute: “Pèsonn pap bezwen moutre lòt moun nan peyi a kouman pou yo chache konnen Senyè a, paske yo tout ap konnen m, depi sa ki pi piti a jouk sa ki pi gran an [...] M’a padonnen sa yo fè ki mal, mwen pap chonje peche yo ankò.” — Jer. 31:31-34 *.

19. Ki bèl avni k ap tann vrè kretyen yo?

¹⁹ Kit se nan syèl la oswa sou tè a n ap tann benediksyon etènèl Bondye pwomèt grasa nouvo alyans lan, nou ta dwe konnen Jewova epi fè pati pèp li a. Youn nan premye bagay pou n fè pou n jwenn benediksyon sa yo se chèche jwenn padon pou peche nou sou baz sakrifis ranson Kris la. Lefètke nou konnen nou ka jwenn padon pou peche nou, sa ta dwe pouse nou padone lòt moun ki peche kont nou, menm moun nou ta ka gen yon bagay nan kè nou kont yo. Lè n fè efò pou n retire tout kalite rankin nou ta kapab genyen nan kè n, sa ap bon pou kè nou. Konsa, n ap montre nou pa sèlman anvi sèvi Jewova, men n ap montre nou vin konnen l pi byen tou, e n ap vin tankou moun Jewova te di pa mwayen Jeremi yo: “N’a chache m, n’a jwenn mwen paske n’a chache m ak tout kè nou. Wi, m’a kite nou jwenn mwen.” — Jer. 29:13, 14.