1. Nan ki move sitiyasyon limanite twouve l?

JEWOVA pa t janm gen entansyon pou moun soufri akoz move konsekans laj pote. Okontrè, objektif li se te pou ni gason ni fi viv ak yon sante pafè nan Paradi a. Sepandan, jodi a “tout kreyasyon an kontinye ap plenn ansanm e yo kontinye ap soufri ansanm”. (Wom. 8:22.) Ki jan w panse Bondye dwe santi l lè l ap gade tout pwoblèm peche pote pou lèzòm? Anplis de sa, yo konn neglije anpil moun ki aje nan moman kote yo plis bezwen èd nan lavi yo. — Sòm 39:5; 2 Tim. 3:3.

2. Ki sa k fè kretyen yo gen yon konsiderasyon espesyal pou moun aje yo?

² Pèp Jewova a kontan lefètke gen moun ki aje pami yo nan kongregasyon yo. Nou jwenn byenfè grasa sajès moun sa yo genyen, e bèl egzanp lafwa yo demontre ankouraje nou tou. Anpil nan nou gen youn oswa plizyè nan moun aje sa yo ki fanmi nou. Sepandan, kit nou gen frè oswa sè aje ki fanmi nou, kit nou pa genyen, nou dwe montre nou enterese nan byennèt moun sa yo (Gal. 6:10; 1 Pyè 1:22). Nou tout ap jwenn byenfè lè n chèche konnen ki jan Bondye konsidere moun ki aje yo. Nou pral egzamine responsablite ni fanmi moun aje yo, ni kongregasyon an genyen anvè moun sa yo nou renmen anpil.

3, 4. a) Ki bagay enpòtan moun ki te ekri Sòm 71 lan te mande Jewova? b) Ki sa moun aje ki nan kongregasyon an kapab mande Bondye?

³ Men ki jan moun ki te ekri Sòm 71:9 (NW) la te sipliye Bondye: “Pa voye m jete nan peryòd vyeyès mwen. Lè fòs mwen ap bese, pa kite m.” Sanble Sòm sa a se suit Sòm 70 la, yon Sòm kote ti nòt ki ekri anlè l la fè konnen se “David” ki te ekri l. Kidonk, sanble se David ki te di pawòl nou jwenn nan Sòm 71:9 la. David t ap sèvi Bondye depi l te toupiti pou jis li vin granmoun, e Jewova te sèvi avè l pou l akonpli anpil gwo bagay (1 Sam. 17:33-37, 50; 1 Wa 2:1-3, 10). Aktout sa, David te wè l nesesè pou l mande Jewova kontinye fè l favè. — Li Sòm 71:17, 18.

⁴ Jodi a, gen anpil moun ki menm jan ak David. Malgre moun sa yo granmoun anpil, e y ap fè fas ak “peryòd vyeyès”, yo kontinye bay Bondye louwanj selon sa fòs yo pèmèt yo (Ekl. 12:1-7). Anpil nan yo gendwa pa kapab fè tout aktivite yo te konn fè nan lavi a, san wete ministè a. Sepandan, yo menm tou, yo kapab sipliye Jewova pou l kontinye fè yo favè epi pou l pran swen yo. Moun aje sa yo ki fidèl kapab gen asirans Bondye ap reponn priyè yo. Dayè, priyè sa yo montre moun sa yo gen menm santiman ak santiman nou jwenn nan pawòl Jewova te pouse David ekri yo.

5. Ki jan Jewova konsidere moun aje ki fidèl yo?

⁵ Ekriti yo montre byen klè Jewova bay moun aje ki fidèl yo anpil valè, e li atann pou sèvitè l yo montre konsiderasyon pou moun sa yo (Sòm 22:24-26; Pwo. 16:31; 20:29). Men sa Levitik 19:32 (NW) fè konnen: “Ou dwe leve kanpe devan cheve gri, ou dwe montre konsiderasyon pou moun ki aje, e ou dwe gen lakrentif pou Bondye w la. Mwen se Jewova.” Vrèmanvre, lè yo te ekri pawòl sa yo, se te yon gwo responsablite sa te ye pou moun te montre konsiderasyon pou moun ki aje yo, e jodi a, sa toujou yon gwo responsablite. Kidonk, jodi a, ki sa n ka fè pou n pran swen moun sa yo? Ki moun ki gen responsablite sa a?

6. Anrapò ak pran swen paran nou, ki egzanp Jezi kite pou nou?

⁶ Men sa Pawòl Bondye a di: “Onore papa w ak manman w.” (Egz. 20:12, NW; Efe. 6:2). Jezi te montre jan kòmandman sa a enpòtan anpil lè l te kondane kèk Farizyen ak kèk espè nan Lalwa ki te refize pran swen paran yo (Mak 7:5, 10-13). Jezi li menm te kite yon bèl egzanp nan sans sa a. Pa egzanp, lè Jezi te prèt pou l mouri sou poto a, li te chèche gen asirans Jan, disip li te renmen anpil la, t ap pran swen manman l ki sanble te vèv nan moman sa a. — Jan 19:26, 27.

7. a) Ki prensip apot Pòl te bay konsènan pran swen paran nou? b) Nan ki kontèks Pòl te ekri pawòl sa yo?

⁷ Bondye te enspire apot Pòl pou l fè konnen kwayan yo ta dwe bay moun ki sou kont yo sa yo gen bezwen. (Li 1 Timote 5:4, 8, 16.) Ann wè nan ki kontèks Pòl te ekri Timote pawòl sa yo. Pòl t ap pale konsènan moun ki ta dwe oswa ki pa ta dwe resevwa èd nan domèn ekonomik nan kongregasyon an. Li te montre byen klè se pitit moun aje ki kwayan yo, pitit pitit yo ansanm ak lòt manm fanmi moun sa yo ki ta dwe premye moun ki bay èd yo. Konsa, li pa t nesesè pou kongregasyon an bay lajan pou sa. Jodi a, menm jan an tou, youn nan fason kretyen yo montre yo gen “atachman pou Bondye” se lè yo pran swen manm fanmi yo ki gen bezwen nan domèn materyèl.

8. Ki sa k montre l saj lefètke Bib la pa di ki fason pratik yon moun dwe pran swen paran l ki aje?

⁸ Yon fason senp, nou kapab di timoun ki fin gran yo gen obligasyon pou yo asire yo paran yo jwenn sa yo bezwen nan domèn materyèl. Se vre Pòl t ap pale ak ‘manm fanmi ki kwayan yo’, men, nou pa dwe neglije paran nou yo ki pa kwayan. Sepandan,  se pa tout timoun ki pran swen paran yo menm jan, paske tout sitiyasyon pa menm. Chak moun gendwa pa gen menm bezwen, pèsonalite yo gendwa diferan, epi, eta sante yo gendwa pa menm. Gen moun aje ki gen anpil pitit, gen lòt ki gen youn sèlman. Gen kèk nan yo ki kapab konte sou èd gouvènman yo ap bay tandiske gen lòt ki pa kapab. Mete sou sa, chak moun ki bezwen swen yo gen pwòp gou pa yo. Kidonk, nou pa t ap montre nou saj oswa nou pa t ap montre nou gen lanmou si n ta kritike fason moun sa yo ap pran swen moun nan fanmi yo ki aje. Dayè, Jewova kapab beni nenpòt desizyon nou pran ki ann amoni ak Ekriti yo, e li montre sa depi nan epòk Moyiz la. — Nonb 11:23.

9-11. a) Ak ki sitiyasyon difisil kèk moun gendwa ap fè fas? (Gade foto ki nan kòmansman atik la.) b) Poukisa moun ki nan sèvis aplentan e ki gen paran yo ki aje pa dwe prese kite asiyasyon yo?

⁹ Li kapab difisil anpil pou kèk timoun ki fin gran k ap viv lwen paran yo ki aje bay paran yo sa yo gen bezwen. Gen kèk pitit ki kapab oblije vizite manman yo ak papa yo san pèdi tan akoz yon pwoblèm sante paran yo kapab genyen sanzatann. Petèt paske paran yo te tonbe, yo gen yon zo ki kase oswa akoz lòt pwoblèm ankò. Konsa, petèt pandan yon ti tan oswa pandan anpil tan, yo kapab bezwen pou yon moun ede yo *.

¹⁰ Moun ki nan sèvis aplentan ki resevwa yon asiyasyon byen lwen lakay yo, kapab bezwen pran yon seri desizyon ki difisil. Moun k ap sèvi antanke Betelit, misyonè e antanke siveyan itineran gen anpil konsiderasyon pou asiyasyon yo e yo konsidere l kòm yon benediksyon Jewova ba yo. Sepandan, si paran yo malad, men premye bagay ki ka vin nan lespri yo: ‘Nou bezwen kite asiyasyon nou an pou n retounen lakay nou yon fason pou n ka pran swen paran nou.’ Men, li t ap pi saj pou yo priye Jewova epi reflechi sou sa yon fason pou yo konnen si wi ou non se sa k ap pi bon pou paran yo toutbon oswa se sa paran yo ta renmen. Yon moun pa dwe prese kite yon privilèj sèvis li genyen, e petèt, li gendwa pa janm nan obligasyon pou l fè sa. — Pwo. 21:5.

¹¹ Pa egzanp, ann konsidere sitiyasyon de frè chanèl ki te jwenn asiyasyon byen lwen lakay yo. Youn ladan yo te misyonè ann Amerik disid e lòt la t ap travay nan syèj mondyal Temwen Jewova yo ki nan Bwouklin, Nouyòk. Paran yo ki te aje te bezwen èd. Frè sa yo ansanm ak madanm yo te vizite paran yo ki t ap viv ann Ekstrèm Oryan, yon fason pou yo te ka wè ki pi bon fason yo te ka pran swen yo. Annapre, koup ki t ap viv ann Amerik disid la te anvi kite asiyasyon yo epi retounen lakay yo. Apre sa, kowòdonatè gwoup ansyen ki nan kongregasyon kote paran yo ye a te telefone yo. Ansyen sa yo te egzamine sitiyasyon an e yo te vle misyonè yo rete nan asiyasyon yo otank posib. Yo te apresye travay koup sa a t ap fè nan sèvis yo a, e yo te detèmine pou yo fè tout sa yo kapab pou yo pran swen paran de frè sa yo. Se pa ti apresye tout moun nan fanmi an te apresye bèl jès sa a!

12. Ak ki sa yon fanmi kretyen ta dwe panse lè y ap pran nenpòt desizyon ki konsène moun aje ki bezwen swen yo?

¹² Pa gen dout nan sa, kèlkeswa dispozisyon yon fanmi kretyen ta pran pou l pran swen paran ki aje yo, tout moun ki konsène yo dwe asire yo se yon dispozisyon ki onore non Bondye. Nou pa t ap janm renmen vin menm jan ak chèf relijye ki t ap viv nan epòk Jezi a (Mat. 15:3-6). Nou vle pou desizyon nou yo onore Bondye ak kongregasyon an. — 2 Kor. 6:3.

13, 14. Poukisa nou ka di, selon Labib, kongregasyon yo enterese nan byennèt moun aje ki nan bezwen yo?

¹³ Se pa tout moun ki kapab ede moun ki nan sèvis aplentan yo jan kongregasyon  nou te pale de li pi wo a te fè sa. Sepandan, gen yon sitiyasyon ki te pase nan premye syèk la ki montre aklè, jan kongregasyon yo enterese nan pran swen frè ak sè ki aje e ki bay bèl egzanp yo. Bib la fè konnen ‘pa t gen pèsonn nan kongregasyon Jerizalèm nan ki te nan bezwen’. Anfèt, se pa t yo tout ki te bezwen èd nan domèn materyèl. Se vre, gen kèk nan yo ki te gen ti mwayen, men ‘yo te separe sa yo te genyen yo bay chak moun, selon sa moun nan te bezwen’. (Tra. 4:34, 35.) Apre sa, gen yon lòt bagay ki te vin pase nan kongregasyon sa a. Bib la fè konnen “yo te neglije vèv ki pale grèk yo nan distribisyon manje ki te konn fèt chak jou a”. Se sa k fè, apot yo te bay kèk gason ki kalifye jere sitiyasyon an. E mesye sa yo bò kote pa yo te asire yo tout vèv yo jwenn sa yo bezwen kòmsadwa (Tra. 6:1-5). Dispozisyon yo te pran pou yo te bay manje a pa t la pou lontan, paske li te la nan objektif pou yo te pran swen moun ki te vin kretyen nan Pannkòt ane 33 epòk nou an e ki te ret Jerizalèm pandan yon ti tan yon fason pou yo te ka ranfòse espirityalite yo. Men, aktout sa, dispozisyon apot yo te pran an, montre frè ak sè nan kongregasyon an kapab ede moun ki nan bezwen yo.

¹⁴ Jan nou ka remake sa, Pòl te bay Timote enstriksyon ki montre ki lè kongregasyon an kapab ede vèv ki kretyen yo nan domèn materyèl (1 Tim. 5:3-16). Nan menm sans lan, konsèy Jak te bay nou jwenn nan liv Bondye te pouse l ekri a, montre kretyen yo gen obligasyon pou yo voye je sou òfelen yo, sou vèv yo ak lòt moun k ap viv nan sitiyasyon ki difisil anpil oswa ki nan bezwen (Jak 1:27; 2:15-17). Men ki rezònman apot Jan te fè bò kote pa l: “Yon moun ki gen mwayen nan monn sa a, ki wè frè l nan nesesite, epi malgre sa li pa gen pitye pou li, ki jan nou ka di moun sa a gen lanmou pou Bondye?” (1 Jan 3:17). Si se chak kretyen ki gen obligasyon konsa anvè moun ki nan bezwen yo, èske menm bagay la pa valab tou pou kongregasyon yo?

15. Ki bagay nou dwe pran an konsiderasyon lè n ap ede frè ak sè ki aje yo?

¹⁵ Nan kèk peyi, gen gouvènman ki pran dispozisyon pou pèmèt moun aje yo jwenn pansyon, èd nan byennèt sosyal, oswa ki pèmèt moun aje ki nan peyi a jwenn yon moun ki pou ede yo lakay yo (Wom. 13:6). Gen lòt peyi ki pa bay sèvis sa yo. Pou rezon sa a, èd manm fanmi moun ki aje yo ak kongregasyon an kapab bay nan domèn fizik varye selon sitiyasyon an. Si timoun ki kwayan yo ap viv lwen paran yo, sa ka gen yon efè sou fason yo kapab ede paran yo nan yon mezi ki rezonab. Li t ap bon pou timoun sa yo gen konvèsasyon ki fran ak ansyen ki nan kongregasyon paran yo ye a, yon fason pou tout  ansyen yo konprann sitiyasyon fanmi an. Pa egzanp, ansyen yo gendwa bay èd yo lè yo fè paran yo konnen dispozisyon gouvènman yo pran oswa yo kapab fè yo konn kèk pwogram sosyal ki disponib nan zòn kote paran yo abite a, epi yo kapab ede yo benefisye èd sa yo. Konsa tou, si yo ta remake gen kèk anvlòp ki pa ouvè oswa gen kèk medikaman moun aje yo pa pran, yo ka fè timoun yo konn sa. Si ansyen yo ak timoun yo toujou kenbe bon kontak e yo byen kominike youn ak lòt, sa ap anpeche sitiyasyon an vin pi mal e y ap kapab jwenn solisyon ki pratik. Vrèmanvre, lè gen yon moun ki la pou ede moun k ap viv lwen paran yo ki aje, e ki ka ba yo konsèy, sa ka retire yon pwa lou sou do fanmi an.

16. Ki sa kèk frè ak sè fè pou yo ede moun aje ki nan kongregasyon an?

¹⁶ Gen kèk frè ak sè ki pote yo volontè nan sans sa a. Yo bay tan yo ak enèji yo pou ede frè ak sè aje yo renmen anpil yo jwenn kèlkeswa sa yo bezwen depi sitiyasyon yo pèmèt yo fè sa. Yo bay posiblite yo genyen pou yo pran swen moun aje ki nan kongregasyon an anpil enpòtans. Gen kèk nan yo ki chwazi pataje travay y ap fè yo ak lòt moun nan kongregasyon e yo pran swen moun aje yo pa relèv. Byenke yo rekonèt sitiyasyon yo pa pèmèt yo antre nan sèvis aplentan, yo kontan ede moun k ap viv lwen paran yo yon fason pou moun sa yo ka kontinye nan karyè yo chwazi a otank posib. Se pa ti bon etadespri frè sa yo demontre! Se sèten, èd y ap bay la pa retire responsablite timoun yo genyen pou yo fè tout sa yo kapab pou ede paran yo.

17, 18. Ki efè atitid moun ki aje yo ak tout moun k ap ede yo kapab genyen?

¹⁷ Ni frè ak sè ki dispoze ede yo, ni moun aje yo ansanm ak fanmi yo kapab kontribye pou fè sitiyasyon an agreyab. Si w se youn nan moun ki konsène yo, fè tout sa w kapab pou w kontinye panse yon fason pozitif. Nan kèk ka, lè yon moun ap antre nan laj, sa ka lage l nan gwo lapèn e li ka menm fè depresyon. Pou rezon sa a, ou gendwa bezwen fè yon efò espesyal pou w toujou gen konvèsasyon ki ankourajan ak yo yon fason pou w onore yo epi ankouraje yo. Moun sa yo ki gen lontan depi y ap sèvi Bondye fidèlman merite felisitasyon. Ni Jewova, ni frè ak sè yo pa bliye sa moun sa yo te fè nan sèvis y ap bay Jewova a. — Li Malaki 3:16; Ebre 6:10.

¹⁸ Anplis de sa, dispozisyon yo pran pou ede moun aje yo chak jou a kapab vin pi fasil si, nan moman apwopriye, ni moun ki aje yo ni moun k ap bay èd yo chèche kote ki amizan nan sitiyasyon an (Ekl. 3:1, 4). Gen anpil moun aje ki fè tout sa yo kapab pou yo pa twò egzijan. Yo rann yo kont bonjan dispozisyon yo demontre kapab fè yo jwenn plis atansyon e sa ka fè moun vizite yo pi souvan. Byen souvan, anpil vizitè konn di, “mwen t al vizite yon zanmi m ki aje pou m te ka ankouraje l, men, apre m fin kite l mwen santi se li menm ki ankouraje m”. — Pwo. 15:13; 17:22.

19. Ki sa k ka ede ni moun aje yo, ni jèn yo fè fas ak moman detrès?

¹⁹ Se pa ti tann n ap tann jou kote soufrans ak konsekans peche pote yo pral disparèt. Annatandan, sèvitè Bondye yo dwe fikse je yo sou esperans yo genyen pou yo viv pou toutan an. Lafwa nou genyen an tankou yon lank batiman ki ka ede nou nan moman detrès. Grasa lafwa sa a, “nou pap abandone. Okontrè, menmsi kò nou ap depafini, se sèten, moun nou ye pa anndan an ap vin pi fre de jou an jou”. (2 Kor. 4:16-18; Ebre 6:18, 19.) Sepandan, ki lòt bagay ankò, apa de mete lafwa nan pwomès Bondye yo, ki kapab ede moun ki gen responsablite pou pran swen moun ki aje yo? Atik ki vin apre a pral ban nou kèk konsèy ki pratik.