1, 2. Ki pwoteksyon desandans fi a te bezwen, e poukisa?

PREMYE pwofesi nou jwenn nan Bib la jwe yon wòl enpòtan nan reyalizasyon objektif Jewova. Men sa vrè Dye a te deklare lè l t ap fè pwomès ann Edenn nan: “M ap mete rayisman ant ou menm [Satan] ak fi a, ant desandans ou ak desandans pa l.” Jis ki kote rayisman sa a t ap rive? Men sa Jewova te di: “L ap [desandans fi a] kraze tèt ou [Satan] e ou menm w ap blese l nan talon.” (Jen. 3:15, NW). Rayisman ant sèpan an ak fi a t ap tèlman rive lwen opwen Satan t apral fè tout sa l kapab pou l detwi desandans fi a.

² Se avèk rezon ki fè yon salmis te plenyen bay Bondye nan yon priyè l te fè konsènan pèp Bondye chwazi a. Men sa l te di: “Ènmi yo ap fè bri, y ap bat kò yo. Moun ki rayi w yo ap aji avèk awogans. Y ap fè konplo sou do pèp ou a an kachèt, y ap fè konplo sou do moun ou renmen yo. Yo di: ‘Annou detwi nasyon Izrayèl la.’” (Sòm 83:2-4, NW). Liy fanmi kote desandans fi a t ap soti a te dwe jwenn pwoteksyon yon fason pou liy fanmi sa a pa t disparèt epi pou l pa t kontamine. Pou Jewova te rive fè sa, li te pran plizyè dispozisyon legal ki t apral pèmèt objektif li reyalize.

3, 4. a) Ki lè alyans Lalwa a te antre an fonksyon, e ki sa nasyon Izrayèl la te dakò fè? b) Ki bagay alyans Lalwa a te la pou anpeche?

³ Etandone desandan Abraram, Izarak ak Jakòb yo te vin tounen plizyè milyon moun, Jewova te fè yo tounen yon nasyon ki se nasyon Izrayèl tan lontan an. Pa mwayen Moyiz, Jewova te fè yon alyans espesyal avè yo antanke nasyon lè l te ba yo Lalwa, e nasyon Izrayèl la te dakò pou yo respekte egzijans ki te nan alyans sa a. Bib la fè konnen: “[Moyiz] pran liv alyans lan e li li l byen fò devan pèp la. Apre sa, yo di: ‘Nou dakò fè tout sa Jewova di nou fè e n ap obeyi l.’ Lè sa a, Moyiz pran san [towo bèf yo te sakrifye yo], li wouze pèp la avè l epi li di: ‘Sa a se san alyans Jewova fè avèk nou an selon tout pawòl nou fèk tande yo.’” — Egz. 24:3-8, NW.

⁴ Alyans Lalwa a te antre an fonksyon sou mòn Sinayi nan ane 1513 anvan epòk nou an. Pa mwayen alyans sa a, nasyon Izrayèl tan lontan an te vin tounen yon nasyon Bondye met apa pou li, yon nasyon li chwazi. Apati moman sa a, Jewova te vin tounen ‘Jij yo, Sila a ki ba yo lwa pou yo suiv la, epi Wa yo’. (Iza. 33:22, NW.) Istwa nasyon Izrayèl la montre sa k te konn pase lè nasyon an te respekte prensip Bondye yo ki jis ak lè yo pa t respekte yo. Etandone Lalwa te entèdi yo marye ak payen epi l te entèdi yo patisipe nan fo adorasyon, Lwa a te la pou anpeche liy fanmi kote desandans lan t ap soti a vin kontamine. — Egz. 20:4-6; 34:12-16.

5. a) Ki opòtinite alyans Lalwa a te bay nasyon Izrayèl la? b) Poukisa Bondye te rejte nasyon Izrayèl la?

⁵ Alyans Lalwa a te pèmèt li posib pou gen yon klas prèt tou. Konsa, Lalwa te sèvi kòm lonbray pou pi gwo dispozisyon ki t apral vini an (Ebre 7:11; 10:1). Anfèt, grasa alyans sa a, nasyon Izrayèl la te gen opòtinite ak privilèj san parèy pou yo vin tounen “yon wayòm prèt” si yo te obeyi lwa Jewova yo. (Li Egzòd 19:5, 6.) Sepandan, nasyon Izrayèl la pa t respekte egzijans sa a. Olye pou nasyon an te kontan akeyi Mesi a ki se pati prensipal desandans Abraram nan, yo te pito rejte l. Kòm konsekans, Bondye te rejte nasyon sa a.

6. Ki sa Lalwa te akonpli?

⁶ Byenke nasyon Izrayèl la pa t ret fidèl anvè Jewova, sa ki te lakòz yo pa t vin tounen yon wayòm prèt, sa pa vle di Lalwa te echwe pou sa. Objektif Lalwa se te pwoteje desandans lan epi mennen lèzòm bay Mesi a. Yonfwa Kris la te vin parèt epi yo te fin idantifye l, objektif Lalwa a te reyalize. Se sa k fè Bib la di: “Kris se finisman Lalwa.” (Wom. 10:4). Sepandan, gen yon kesyon ki poko jwenn repons: Ki  nasyon ki t apral gen opòtinite pou yo vin tounen wayòm prèt la? Jewova Dye te vin ak yon lòt kontra legal pou l fòme yon nouvo nasyon.

7. Ki sa Jewova te fè konnen pa mwayen pwofèt Jeremi ki gen rapò ak yon nouvo alyans?

⁷ Byen lontan anvan alyans Lalwa a te sispann egziste, pa mwayen pwofèt Jeremi, Jewova te fè konnen L t apral fè “yon nouvo alyans” ak nasyon Izrayèl la. (Li Jeremi 31:31-33.) Alyans sa a pa t ap menm ak alyans Lalwa a paske l t apral fè l posib pou moun jwenn padon pou peche yo san yo pa bezwen fè sakrifis bèt. Ki jan l t ap rive fè sa?

8, 9. a) Ki sa san Jezi ki te koule a te akonpli? b) Ki opòtinite moun ki nan nouvo alyans lan vin genyen? (Gade foto ki nan kòmansman atik la.)

⁸ Plizyè syèk annapre, Jezi te selebre Soupe Seyè a nan dat 14 Nizan ane 33 epòk nou an. Men sa l te di 11 apot fidèl li yo konsènan koup ki te gen diven an: “Koup sa a reprezante nouvo alyans lan ki fèt grasa san m ki pral koule pou nou.” (Lik 22:20). Selon Evanjil Matye a, men sa Jezi te di konsènan diven an: “Sa a reprezante san m, ‘san alyans lan’, ki gen pou koule pou anpil moun pou yo ka jwenn padon pou peche yo.” — Mat. 26:27, 28.

⁹ Se san Jezi ki te koule a ki te valide nouvo alyans lan. San sa a te fè l vin posib tou pou moun jwenn padon pou peche yo yonfwa pou tout. Jezi pa nan nouvo alyans lan. Etandone l san peche, li pa bezwen jwenn padon. Men, Bondye te ka aplike valè san Jezi a genyen an pou desandan Adan yo. Mete sou sa, pa mwayen lespri sen, Bondye te ka chwazi kèk moun ki gen lafwa pou l adopte yo kòm “pitit”. (Li Women 8:14-17.) Etandone nan je Bondye moun sa yo san peche, nan yon sans, yo t ap tankou Jezi, Pitit gason Bondye a ki san peche. Moun sa yo Bondye chwazi pou al nan syèl la ap “gen menm eritaj ak Kris” e y ap gen opòtinite pou yo vin tounen “yon wayòm prèt”. Se te yon privilèj nasyon Izrayèl la te ka jwenn lè yo te anba Lalwa. Men sa apot Pyè te di konsènan “menm eritaj [yo gen] ak Kris” la: “Nou menm, nou se ‘yon ras yo chwazi, yon klas prèt k ap sèvi kòm wa, yon nasyon ki sen, yon pèp ki vin yon byen espesyal, dekwa pou nou fè konnen kalite estrawòdinè’ sila a ki te rele nou sot nan fènwa a pou nou vin nan bèl limyè l la.” (1 Pyè 2:9). Ala yon kokenn enpòtans nouvo alyans lan genyen! Li pèmèt disip Jezi yo vin tounen dezyèm pati desandans Abraram nan.

10. Ki lè nouvo alyans lan te antre an fonksyon, e poukisa se jis nan lè sa a sa te fèt?

¹⁰ Ki lè nouvo alyans lan te antre an fonksyon? Li pa t antre an fonksyon lè Jezi te fè referans avè l nan dènye nuit li te pase sou tè a. Pou l te antre an fonksyon, fòk san Jezi te koule epi yo te dwe prezante valè san sa a genyen an bay Jewova nan syèl la. Anplis de sa, lespri sen te dwe desann sou moun ki t apral “gen menm eritaj ak Kris” yo. Kidonk, nouvo alyans lan te antre an fonksyon nan Pannkòt ane 33 epòk nou an lè Bondye te chwazi disip fidèl Jezi yo pa mwayen lespri sen.

11. Ki fason nouvo alyans lan te fè l posib pou ni Juif ni moun lòt nasyon vin fè pati Izrayèl espirityèl la, e ki kantite moun ki t ap nan nouvo alyans lan?

¹¹ Byenke nan yon sans, ansyen alyans Lalwa a te vin “pase mòd” lè Jewova te fè konnen pa mwayen Jeremi Li t apral fè yon nouvo alyans ak nasyon Izrayèl la, se  jis lè nouvo alyans lan te antre an fonksyon an alyans Lalwa a te rive nan bout li (Ebre 8:13). Lè sa te rive, Bondye te ka konsidere ni Juif yo, ni moun lòt nasyon ki pa sikonsi e ki te vin kwayan yo menm jan an paske ‘sikonsizyon yo a se nan kè yo li te fèt. Se lespri a ki te fè l, se pa yon lwa yo ekri ki te fè l’. (Wom. 2:29.) Lefètke Bondye te fè nouvo alyans lan ak moun sa yo, Li te ka ‘met lwa l yo nan lespri yo, e l te ka ekri yo nan kè yo’. (Ebre 8:10.) Kantite moun ki nan nouvo alyans lan t ap vin 144 000, e yo t apral fòme yon nouvo nasyon ki se “Izrayèl Bondye a”, yon Izrayèl espirityèl. — Gal. 6:16; Rev. 14:1, 4.

12. Ki resanblans ki genyen ant alyans Lalwa a ak nouvo alyans lan?

¹² Ki resanblans ki genyen ant alyans Lalwa a ak nouvo alyans lan? Alyans Lalwa a te fèt ant Jewova ak Izrayèl selon lachè a, nouvo alyans lan te fèt ant Jewova ak Izrayèl espirityèl la. Moyiz te sèvi kòm medyatè alyans Lalwa a, Jezi se Medyatè nouvo alyans lan. Alyans Lalwa a te valide grasa san bèt, nouvo alyans lan te valide grasa san Jezi ki te koule a. Epi, pa mwayen alyans Lalwa a nasyon Izrayèl la te vin òganize anba direksyon Moyiz, konsa tou, moun ki nan nouvo alyans lan vin òganize anba direksyon Jezi ki se Chèf kongregasyon an. — Efe. 1:22.

13, 14. a) Nan ki sans nouvo alyans lan gen yon lyen ak Wayòm nan? b) Ki sa k nesesè pou pèmèt Izrayèl espirityèl la al dirije ak Kris nan syèl la?

¹³ Nouvo alyans lan gen yon lyen ak Wayòm nan nan sans li pèmèt yon nasyon ki sen vin gen privilèj pou yo vin wa ak prèt nan Wayòm sa a ki nan syèl la. Se nasyon sa a ki se dezyèm pati desandans Abraram nan (Gal. 3:29). Konsa, nouvo alyans lan te vin bay alyans ak Abraram nan plis fòs!

¹⁴ Gen yon lòt bagay konsènan Wayòm nan ki rete pou l fèt. Nouvo alyans lan pèmèt Izrayèl espirityèl la vin egziste epi l poze baz pou moun ki nan alyans sa a vin “gen menm eritaj ak Kris”. Sepandan, gen yon lòt dispozisyon legal ki nesesè pou pèmèt moun sa yo al dirije ak Jezi kòm wa ak prèt nan Wayòm li an ki nan syèl la.

15. Ki alyans Jezi te fè ak apot fidèl li yo?

¹⁵ Apre Jezi te fin selebre Soupe Seyè a, li te fè yon alyans ak disip fidèl li yo. Byen souvan, yo rele alyans sa a alyans Wayòm nan. (Li Lik 22:28-30.) Kontrèman ak lòt alyans yo kote Jewova se youn nan moun ki nan alyans sa yo, alyans Wayòm nan se yon alyans Jezi fè ant li menm ak disip li yo Bondye chwazi pou al nan syèl la. Lè Jezi te di “menm jan Papa m fè yon alyans avèk mwen” an, sanble l t ap pale konsènan alyans Jewova te fè avè l pou l vin “prèt pou toutan, menm jan ak Mèlkisedèk” la. — Ebre 5:5, 6.

16. Ki sa alyans Wayòm nan fè vin posib pou kretyen Bondye chwazi pou al nan syèl la?

¹⁶ Toule 11 apot fidèl Jezi yo te ‘toujou la ak Jezi nan eprèv li yo’. Alyans Wayòm nan te ba yo asirans yo t ap ansanm ak Jezi nan syèl la e yo t ap chita sou twòn pou yo dirije antanke wa e pou yo sèvi kòm prèt. Sepandan, se pa 11 apot yo sèlman ki t ap gen privilèj sa a. Men sa Jezi ki te glorifye te di apot Jan pandan l te parèt devan l nan yon vizyon: “Moun ki pote laviktwa a, m ap pèmèt li chita avè m sou twòn mwen an, menm jan mwen te pote laviktwa e mwen chita ak Papa m sou twòn li an.” (Rev. 3:21). Kidonk, alyans Wayòm nan se yon alyans ki fèt ak tout 144 000 kretyen Bondye chwazi pou al nan syèl yo (Rev. 5:9, 10;  7:4). Se alyans sa a ki fòme baz legal ki ba yo posiblite pou y al dirije ak Jezi nan syèl la. Se menm jan ak lè yon lamarye ki soti nan yon gran fanmi vin marye ak yon wa k ap dirije, e konsa, sa fè l vin nan pozisyon pou l pataje pouvwa wa a. Anfèt, Ekriti yo pale de kretyen Bondye chwazi pou al nan syèl yo kòm “lamarye” Kris la, “yon vyèj k ap mennen yon vi pwòp” e ki fiyanse ak Kris. — Rev. 19:7, 8; 21:9; 2 Kor. 11:2.

17, 18. a) Fè yon ti pale konsènan sis alyans nou sot egzamine yo ki gen rapò ak Wayòm nan. b) Ki sa k fè n kapab gen yon lafwa solid nan Wayòm nan?

¹⁷ Tout alyans nou sot egzamine nan de atik sa yo gen rapò ak youn oswa plizyè aspè enpòtan konsènan Wayòm nan. (Gade tablo ki gen tit “Fason Bondye pral reyalize objektif li” a ki nan atik ki vin anvan an.) Sa montre dispozisyon pou gen yon Wayòm nan se yon dispozisyon ki byen chita sou yon seri kontra legal. Se sa k fè n gen bonjan rezon pou n met tout konfyans nou nan Wayòm Mesi a epi pou n kwè se avè l Bondye pral sèvi pou l fè objektif li te gen okòmansman pou tè a ak pou limanite a vin yon reyalite. — Rev. 11:15.

¹⁸ Èske n ka gen dout pou n kwè sa Wayòm nan pral akonpli yo pral pèmèt limanite jwenn benediksyon pou toutan? Avèk yon konfyans total, nou kapab chofe pou n fè konnen Wayòm Bondye a se sèl solisyon dirab pou tout pwoblèm limanite. Kidonk, ann kontinye fè lòt moun konnen verite sa a avèk zèl! — Mat. 24:14.