1. Ki fason liv Levitik la ka ede n?

YO FÈ referans ak mo sen an plis fwa nan liv Levitik la pase nenpòt lòt liv nan Bib la. Etandone Jewova egzije tout vrè adoratè l yo pou yo demontre kalite sa a, lè n rive konprann liv Levitik la epi n apresye liv sa a, sa ap ede n montre nou se moun ki sen.

2. Bay kèk bagay ki gen nan liv Levitik la.

² Se pwofèt Moyiz te ekri Liv Levitik la e liv sa a fè pati “tout sa ki nan Ekriti yo” ki itil pou anseye (2 Tim. 3:16). An mwayèn, non Jewova parèt dis fwa nan chak chapit ki nan liv sa a. Lè n rive konprann sans liv Levitik la sa ap fè n pran plis detèminasyon pou n evite fè nenpòt bagay ki kapab lage vèni sou non Bondye (Lev. 22:32, NW). Ekspresyon “mwen se Jewova” ki parèt souvan nan liv sa a dwe fè n sonje nou dwe obeyi Bondye. Kidonk, nan atik sa a ak nan atik k ap vin apre a, nou pral egzamine kèk pwen enteresan nou jwenn nan liv Levitik la ki se yon kado Bondye ban nou pou ede n patisipe nan adorasyon ki sen an.

3, 4. Ki sa benyen Arawon ak pitit gason l yo te benyen an reprezante? (Gade foto ki nan kòmansman atik la.)

³ Li Levitik 8:5, 6. Jewova te chwazi Arawon pou l sèvi kòm gran prèt ann Izrayèl e pitit gason Arawon yo t ap gen pou yo  sèvi kòm prèt pou nasyon an. Arawon te reprezante Jezi Kris e pitit gason Arawon yo te reprezante disip Jezi Bondye chwazi pou al nan syèl la. Kidonk, lefètke Arawon te dwe benyen èske sa vle di Jezi t ap gen pou l benyen tou? Non. Piske Jezi te san peche e l te “san tach”, li pa t bezwen benyen (Ebre 7:26; 9:14). Sepandan, benyen Arawon te benyen an te montre Jezi se yon moun ki pwòp e ki jis. Kounye a, ki sa benyen pitit Arawon yo te benyen an reprezante?

⁴ Benyen pitit Arawon yo te benyen an te prefigire pwòpte yo t ap gen pou pwòpte moun Bondye chwazi pou fè pati klas prèt la nan syèl la. Èske batèm moun Bondye chwazi yo gen rapò ak benyen pitit Arawon yo te benyen an? Non. Batèm nan pa retire peche moun, olye de sa, li se yon senbòl ki montre yon moun vwe lavi l bay Jewova Dye san kondisyon. Se ak “Pawòl Bondye a” yo lave moun Bondye chwazi yo, e netwayaj sa a mande pou yo suiv ansèyman Kris yo ak tout kè yo pandan tout vi yo (Efe. 5:25-27). Konsa, moun sa yo sen e yo pwòp. Men, ki sa n ka di konsènan “lòt mouton” yo? — Jan 10:16.

5. Ki sa k fè n ka di lòt mouton yo vin pwòp grasa Pawòl Bondye a?

⁵ Pitit Arawon yo pa t reprezante “gwo foul” lòt mouton Jezi yo (Rev. 7:9). Men, èske moun batize sa yo vin sen epi yo vin pwòp grasa Pawòl Bondye a tou? Wi! Lè moun ki gen esperans pou yo viv sou tè a li sa Bib la di konsènan enpòtans ak valè san Jezi ki te vèse a genyen, sa fè yo met lafwa yo nan pawòl sa yo epi yo bay Bondye yon “sèvis sakre lajounen kou lannuit”. (Rev. 7:13-15.) Lefètke moun Bondye chwazi yo ansanm ak lòt mouton yo kontinye kenbe yon “bon konduit”, sa montre byen klè yo kontinye yo kontinye ap travay pou yo sen (1 Pyè 2:12). Se pa ti kontan Jewova dwe kontan lè l ap gade jan moun li chwazi yo ansanm ak lòt mouton yo pwòp epi yo ini, yo menm ki kontinye koute Jezi, Bèje yo a, e ki kontinye ap suiv li fidèlman!

6. Ki kalite egzamen nou bezwen fè k ap pote byenfè pou nou?

⁶ Egzijans Jewova te fè pou klas prèt ann Izrayèl la pwòp nan domèn fizik la gen yon gwo siyifikasyon pou pèp Jewova a jodi a. Byen souvan, moun n ap etidye Labib avèk yo konn wè jan kote n ap adore Bondye a pwòp, epi yo konn wè jan nou pwòp e nou byen abiye. Sepandan, pwòp klas prèt la te pwòp la ede n rann nou kont nenpòt moun k ap monte nan mòn Jewova a ki wo pou vin adore l dwe gen yon “kè [ki] pwòp”. (Li Sòm 24:3, 4; Iza. 2:2, 3.) Nou dwe bay Bondye sèvis sakre n ap ba li a ak yon lespri ki pwòp e ak yon kè ki pwòp toutpandan nou kenbe kò nou pwòp. Sa mande pou n egzamine tèt nou detanzantan, e annapre, kèk nan nou gendwa bezwen fè kèk gwo chanjman yon fason pou n ka vin sen (2 Kor. 13:5). Pa egzanp, yon moun batize ki pran plezi gade pònografi ta dwe mande tèt li: ‘Èske m montre m sen?’ Apre sa, li dwe chèche èd pou l sispann vye abitid sa a. — Jak 5:14.

7. Anrapò ak Levitik 8:22-24, ki egzanp Jezi kite?

⁷ Lè yo t ap enstale klas prèt la ann Izrayèl, yo te pran enpe san e yo te mete l sou zòrèy dwat gran prèt Arawon ak pitit li yo, sou pous men dwat yo ak sou gwo zòtèy pye dwat yo. (Li Levitik 8:22-24.) Fason sa a yo te sèvi ak san an te montre prèt yo t apral fè tout sa yo kapab pou yo fè travay yo avèk obeyisans. Menm jan an tou, Jezi, Gran prèt la, kite yon egzanp pafè pou moun Bondye  chwazi pou al nan syèl la ansanm ak lòt mouton yo. Zòrèy Jezi te toujou pare pou l koute konsèy Bondye, li te sèvi ak men l pou l fè volonte Jewova, epi, pye l pa t janm sispann mache sou wout ki sen an. — Jan 4:31-34.

8. Ki sa tout moun k ap adore Jewova dwe fè?

⁸ Moun Bondye chwazi pou al nan syèl la ansanm ak lòt mouton Jezi yo dwe suiv egzanp entegrite Gran prèt yo a te demontre a. Tout moun k ap adore Jewova dwe obeyi konsèy nou Jwenn nan Pawòl li a san grate tèt, e konsa, yo pap fè lespri Jewova lapenn (Efe. 4:30). Yo dwe ‘fè chemen yo dwat pou pye yo’. — Ebre 12:13.

9. Ki pawòl twa frè ki te travay kòtakòt ak manm Kolèj santral la te di, e ki jan sa yo di yo ka ede w kontinye montre w se yon moun ki sen?

⁹ Ann konsidere kèk bèl pawòl twa frè te di. Frè sa yo te gen esperans pou yo viv sou tè a e yo te travay kòtakòt ak manm Kolèj santral la pandan plizyè dizèn ane. Gen youn ki te di: “Menmsi se te yon privilèj san parèy sa te ye pou mwen, detanzantan, travay kòtakòt ak frè sa yo te fè m rann mwen kont byenke yo se moun Bondye chwazi pou al nan syèl grasa lespri sen, yo enpafè tou. Sepandan, pandan tout ane sa yo, youn nan objektif mwen te fikse tèt mwen se obeyi moun ki pran latèt yo.” Men sa dezyèm frè a te di: “Gen kèk vèsè ki mande pou n ‘obeyi Kris’, tankou 2 Korentyen 10:5, ki te ede m obeyi moun ki pran latèt yo epi kowopere ak yo. Se yon obeyisans ki soti nan kè m.” Men sa twazyèm frè a te di: “Renmen sa Jewova renmen, rayi sa l rayi, kontinye chèche direksyon l epi fè sa ki fè l plezi vle di pou n obeyi òganizasyon l lan ansanm ak moun l ap itilize pou l reyalize objektif li sou tè a.” Frè sa a te aprann frè Nathan Knorr ki te vin manm Kolèj santral la te aksepte san grate tèt kèk pwen ki te parèt an 1925 nan yon atik Toudegad ki te gen tit “Nesans nasyon an” (anglè) alòske gen lòt moun ki te gen dout sou pwen sa yo. Obeyisans frè Knorr te fè yon gwo efè sou frè a. Lè w reflechi ak pawòl twa frè sa yo di yo sa ka ede w montre w se yon moun ki sen lè w obeyi.

10. Jis nan ki pwen l enpòtan pou n obeyi lwa Bondye bay sou san an?

¹⁰ Li Levitik 17:10. Jewova te mande Izrayelit yo pou yo pa t manje “kèlkeswa san an”. Kretyen yo tou gen obligasyon pou yo evite kèlkeswa san an, kit se san bèt kit se san moun (Tra. 15:28, 29). Annik panse Bondye ap ‘vire do ban nou’ epi l ap retire n nan kongregasyon l lan ka fè n fremi. Nou renmen Bondye e nou vle obeyi l. Menm lè n ap fè fas ak yon sitiyasyon ki met lavi n an danje nou pran detèminasyon pou n pa kite moun ki pa konn Jewova e ki pa vle obeyi l fè n fè sa k pa bon nan je l. Se vre lefètke n evite san nou atann pou yo pase n nan rizib, men, nou chwazi obeyi Bondye (Jid 17, 18). Ki pwennvi nou bezwen genyen sou sijè sa a k ap ede n “pran detèminasyon” pou n pa manje san oswa pou n pa aksepte bay san oubyen pran san? — Det. 12:23, NW.

11. Ki sa k fè n kapab di sa yo te konn fè chak ane nan jou Pwopisyasyon an pa t yon senp seremoni?

¹¹ Nan Izrayèl tan lontan an, fason gran prèt la te konn sèvi ak san bèt nan jou Pwopisyasyon an ede n konprann pwennvi Bondye sou san. Yo te rezève san an pou yon itilizasyon espesyal. Yo te sèvi avè l pou fè pwopisyasyon pou peche moun ki t ap chèche jwenn padon nan men Jewova yo. Yo te dwe voye san towo bèf la ak san kabrit la nan direksyon  kouvèti lach alyans lan ak devan kouvèti lach la (Lev. 16:14, 15, 19). Aksyon sa a te ouvri chemen pou Jewova padone peche Izrayelit yo. Anplis de sa, Jewova te fè konnen si yon moun te touye yon bèt pou l manje, li te dwe jete san an atè epi kouvri l ak pousyè “paske nanm tout kalite kreyati vivan se san l”. (Lev. 17:11-14, NW.) Èske tout bagay sa yo te yon seremoni ki pa t enpòtan? Non. Fason yo te konn sèvi ak san nan jou Pwopisyasyon an ansanm ak kòmandman pou jete san an atè a te ann amoni ak kòmandman Jewova te bay Noye ansanm ak desandan Noye yo konsènan san (Jen. 9:3-6). Jewova Dye te entèdi moun manje san pou yo ret anvi. Ki siyifikasyon sa genyen pou kretyen yo?

12. Ki fason lèt Pòl te ekri kretyen Ebre yo montre rapò ki genyen ant san ak padon?

¹² Lè apot Pòl t ap ekri kretyen Ebre yo konsènan pouvwa san genyen pou l pirifye moun, li te di: “Selon Lalwa, san pirifye prèske tout bagay, e si pa gen san ki vèse, pa ka gen padon.” (Ebre 9:22). Anplis de sa, Pòl te fè konnen byenke sakrifis bèt yo te gen valè, yo te sèlman la pou fè Izrayelit yo sonje yo se pechè e yo te bezwen yon lòt bagay ki te ka elimine peche yo nèt. Vrèmanvre, Lalwa te sèlman “lonbray bon bagay ki gen pou vini yo, men se pa[ t] bagay yo vre”. (Ebre 10:1-4.) Ki jan l te fè vin posib pou moun jwenn padon pou peche yo?

13. Ki jan w santi w lefètke Jezi te ofri Jewova valè san l lan genyen an?

¹³ Li Efezyen 1:7. Sakrifis lanmò Jezi Kris la, li menm ki te dispoze ‘livre tèt li pou nou’ an, gen yon gwo siyifikasyon pou tout moun ki renmen l e ki renmen Papa l (Gal. 2:20). Sepandan, se sa Jezi te fè apre l te fin mouri epi l resisite a ki te libere nou toutbon, sa ki fè l vin posib pou n jwenn padon pou peche nou. Jezi te akonpli sa k te konn fèt nan jou Pwopisyasyon an dapre Lwa Bondye te bay pa mwayen Moyiz la. Nan jou sa a, gran prèt la te antre nan Trèsen tabènak la, pi devan nan tanp Salomon an,  ak enpe nan san bèt yo te sakrifye yo epi l te konn prezante san sa a devan Bondye kòmsi Bondye te la toutbon (Lev. 16:11-15). Menm jan an tou, Jezi te antre nan syèl la avèk valè san l te vèse a genyen an epi l te prezante l bay Jewova (Ebre 9:6, 7, 11-14, 24-28). Se pa ti kontan nou kontan dèske n jwenn padon pou peche nou epi n gen yon konsyans ki pwòp paske n egzèse lafwa nan san Jezi a!

14, 15. Poukisa l enpòtan pou n konprann lwa Jewova te bay konsènan san an epi pou n obeyi lwa sa a?

¹⁴ Kounye a, èske w pi byen konprann rezon ki fè Jewova mande n pou n pa manje “kèlkeswa san an”? (Lev. 17:10.) Èske w konprann rezon ki fè Bondye konsidere san kòm yon bagay sakre? Li konsidere san kòm yon bagay ki gen menm valè ak lavi (Jen. 9:4). Èske w dakò nou dwe aksepte pwennvi Bondye genyen sou san epi n dwe obeyi kòmandman l bay pou n evite san an? Sèl fason nenpòt nan nou ka rive fè lapè ak Bondye se lè n gen lafwa nan sakrifis ranson Jezi a epi n dakò san gen yon siyifikasyon espesyal pou Kreyatè nou an. — Kol. 1:19, 20.

¹⁵ Sanzatann, nenpòt nan nou kapab twouve n nan sitiyasyon ki gen rapò ak kesyon san. Oswa, sanzatann, yon manm fanmi nou oubyen yon zanmi nou renmen anpil kapab twouve l nan yon sitiyasyon kote l dwe chwazi si l ap aksepte pran san oswa si l pap aksepte. Nan yon sitiyasyon difisil konsa n ap bezwen pran desizyon tou konsènan fraksyon san ansanm ak tretman medikal n ap aksepte. Sepandan, li vrèman enpòtan pou n fè rechèch epi pou n prepare n pou si ta vin gen ijans. Lè n pran desizyon sa yo e nou priye sa ap ede n rete tennfas e sa ap ede n evite fè konpwomi. Pa gen dout nan sa, nou pa ta renmen fè kè Jewova tris lè n aksepte yon bagay Pawòl li a kondane! Gen anpil moun k ap travay nan domèn lasante ak anpil lòt moun k ap defann zafè transfizyon san ki konn mande moun al bay san nan objektif pou yo sove lavi lòt moun. Sepandan, pèp Jewova a, yon pèp ki sen, rekonèt se Kreyatè a ki gen dwa di ki fason moun dwe sèvi ak san. Pou li menm “kèlkeswa san an” se bagay ki sakre. Nou dwe pran detèminasyon pou n obeyi lwa l bay konsènan san an. Lè n gen yon konduit ki sen, nou montre l nou vrèman apresye pouvwa san Jezi a genyen pou l sove lavi moun, paske se sèl san ki kapab fè moun jwenn padon pou peche yo e ki ka fè yo jwenn lavi ki pap janm fini an. — Jan 3:16.

16. Poukisa pèp Jewova a dwe sen?

¹⁶ Men sa Bondye te di Izrayelit yo lè l t ap delivre yo nan esklavaj ann Ejip: “Se mwen menm Jewova ki fè nou soti nan peyi Ejip pou m ka vin Bondye nou. Se pou nou sen paske mwen menm mwen sen.” (Lev. 11:45, NW). Jewova te vle pou pèp Izrayèl la sen paske li menm li sen. Antanke Temwen Jewova, nou menm tou nou dwe sen. Liv Levitik la klè sou pwen sa a.

17. Kounye a, ki jan w konsidere liv Levitik la?

¹⁷ Pa gen dout nan sa, egzamen sa a nou sot fè sou kèk pati nan liv Levitik la te vrèman pwofitab. Se sèten etid sa a te fè n vin gen plis apresyasyon pou liv sa a Bondye te fè ekri nan Bib la. Lè n medite sou kèk enfòmasyon enpòtan nou jwenn nan liv Levitik la, sandout, sa ap fè n pi byen konprann rezon ki fè n dwe sen an. Sepandan, ki lòt bèl enfòmasyon espirityèl k ap tann nou nan liv sa a ki nan Pawòl Bondye a? Ki lòt bagay nou ka aprann nan liv sa a sou kesyon bay Jewova yon sèvis sakre a? Nou pral reponn kesyon sa yo nan atik ki vin apre a.