MEN sa Ernst * ki gen plis pase 70 an fè konnen: “Pwoblèm sante m nan pran pye sou mwen plis toujou.” Èske se yon bagay ki fèt souvan? Si w ap antre nan laj epi w santi sante w ap depafini e w ap pèdi fòs, ou ka santi pawòl ki nan Eklezyas chapit 12 la konsène w. Nan vèsè 1 an, yo pale de “jou malè yo” oswa “jou kalamite yo” (nòt). Menm lè sa, ou pa t fèt pou w mennen yon vi mizerab. Donk, ou ka toujou gen yon bèl vi nan sèvis Jewova a.

Frè ak sè aje nou renmen anpil yo, se pa nou menm sèl k ap rankontre eprèv sa yo. Nan tan biblik yo, gen kèk sèvitè Jewova ki aje ki te konn fè fas ak menm difikilte sa yo. Pa egzanp, Izarak, Jakòb ak Ayiya te vin avèg (Jen. 27:1; 48:10; 1 Wa 14:4). Sara te santi l “fin granmoun”. (Jen. 18:11, 12, NW.) Wa David “pa t janm santi l cho”. (1 Wa 1:1, NW.) Bazilayi ki te rich pa t ka pran gou manje e l pa t ka tande mizik (2 Sam. 19:32-35). Abraram ak Nawomi te pèdi konjwen yo. — Jen. 23:1, 2; Rit 1:3, 12.

Ki sa k te ede chak moun sa yo rete fidèl anvè Jewova epi pou yo kenbe jwa yo? Lefètke Abraram te gen konfyans nan pwomès Bondye yo, aktout li te fin granmoun “lafwa l te fè l vin pisan”. (Wom. 4:19, 20.) Nou menm tou nou bezwen vin solid nan lafwa. Lafwa sa a pa depann de laj nou, kapasite nou oswa sitiyasyon nou. Pa egzanp, menm lè patriyach Jakòb te vin fèb, li te avèg epi l te pran kabann, li te toujou gen yon lafwa solid nan pwomès Bondye yo (Jen. 48:1-4, 10; Ebre 11:21). Men sa yon sè ki rele Ines ki gen 93 an e k ap soufri akoz mis li yo ki fèb pa janm sispann di: “Chak jou ki pase, m jwenn anpil benediksyon nan men Jewova. Se chak jou m panse ak Paradi a. Sa fè m gen espwa.” Ala yon bèl etadespri pozitif li genyen!

Lafwa n ap vin pi solid lè n priye, lè n egzamine Pawòl Bondye a ak lè n asiste reyinyon yo. Aktout pwofèt Dànyèl te fin granmoun, li te konn priye twa fwa pa jou e l te konn etidye Pawòl Bondye a regilyèman (Dàn. 6:10; 9:2). Àn, yon moun aje ki te vèv, “pa t janm pa nan tanp lan”. (Lik 2:36, 37.) Lè w asiste reyinyon yo otank posib epi w patisipe ladan yo toutotan w kapab, nonsèlman w ap ankouraje tèt ou men w ap ankouraje tout moun ki nan asistans lan. Jewova toujou pran plezi nan priyè w fè yo menmsi w limite nan sa w ka fè. — Pwo. 15:8.

Antanke moun fidèl, gen anpil nan nou ki ta renmen wè pou n ka fè lekti e ki ta renmen gen ase fòs pou n asiste reyinyon, sepandan, nou rann nou kont ofiramezi sa ap vin pi difisil e petèt menm enposib pou n fè sa. Ki sa n ka fè nan ka sa a? Byen sèvi ak kèlkeswa sa n genyen ki disponib la. Gen anpil moun ki pa ka asiste reyinyon, men, ki pran plezi koute yo nan telefòn. Inge gen 79 an e aktout li gen gwo pwoblèm nan je, pou l prepare reyinyon yo li sèvi ak yon òdinatè ki enprime an lèt gwo karaktè yon frè nan kongregasyon an te fè l jwenn.

Petèt ou gen yon bagay lòt moun ta renmen genyen. Nou vle pale de tan. Poukisa w pa sèvi avè l pou w koute anrejistreman Bib la, piblikasyon biblik yo, diskou yo ak dram odyo yo? Anplis de sa, ou gendwa pran inisyativ telefone kwayan parèy ou yo yon fason pou w pataje yon don espirityèl ak yo e pou “youn ka ankouraje lòt”. — Wom. 1:11, 12.

Men sa Christa ki gen plis pase 80 an di avèk tristès: “Sa terib pou w wè jan w ap vin mwens aktif kontrèman ak jan w te ye anvan.” Nan ka sa a, ki fason moun aje yo ka kenbe jwa yo? Peter ki gen 75 an fè konnen yo ka fè sa “lè yo gen yon pwennvi pozitif, lè yo pa plede ap panse ak sa yo pa ka fè ankò e yo pran plezi nan sa yo ka fè”.

 Èske w ka reflechi ak tout posiblite w genyen pou w bay temwayaj? Heidi pa ka al preche pòt an pòt ankò. Byenke l gen plis pase 80 an, li aprann sèvi ak yon òdinatè pou l ekri lèt. Gen kèk pwoklamatè aje ki kòmanse yon konvèsasyon biblik pandan yo sou yon plas piblik oswa pandan y ap tann bis. Oswa, si kounye a w ap viv nan yon mezon retrèt, èske l posib pou w gen pwòp tèritwa pa w lè w preche moun k ap pran swen moun aje yo ansanm ak lòt moun ki nan mezon retrèt la?

Lè wa David te rive nan fen lavi l, li te fè tout sa l kapab pou l soutni vrè adorasyon an. Li te bay kòb epi l te òganize èd yo te bay pou konstriksyon tanp lan (1 Kwo. 28:11–29:5). Menm jan an tou, ou ka montre w enterese nan sa k ap fèt pou travay Wayòm nan nan lemonnantye. Poukisa w pa ede pyonye yo oswa lòt pwoklamatè zele nan kongregasyon w lan lè w di yo kèk pawòl ankourajan, lè w ba yo yon ti kado oswa yon ti bagay pou yo bwè epi pou yo manje? Lè w ap lapriyè, ou ka priye pou jèn yo, fanmi yo, sèvitè aplentan yo, moun ki malad yo ak moun ki gen anpil responsablite yo.

Ni ou menm ni sèvis w ap bay la gen anpil enpòtans. Ou menm nou renmen anpil ki vin granmoun, Papa nou ki nan syèl la pap janm voye w jete (Sòm 71:9). Jewova renmen w e w gen anpil valè pou li. Talè konsa, nou pral kontinye pran laj san nou pa gen okenn jou malè oswa okenn kalamite k ap frape nou. Olye de sa, nou pral chaje ak enèji e n ap gen yon sante pafè pou n kontinye sèvi Jewova, Bondye nou renmen anpil la, pou tout letènite!