1, 2. Bay kèk rezon enpòtan ki fè sèvo nou san parèy.

LÈZÒM gen kapasite pou yo li, ekri, pale, pou yo konprann sa lòt moun di, pou yo priye e pou yo chante louwanj pou Jewova grasa lang yo pale. Chak aksyon sa yo fè moun ret bouch ouvè e yo rive fè yo grasa kèk pati nan sèvo a ansanm ak koneksyon ki ladan l yo, yon seri bagay syantifik yo pa fin byen konprann. Piske sèvo nou estrawòdinè, nou kapab aprann yon lang. Men sa yon pwofesè lang te di: “Kapasite timoun genyen pou yo aprann yon lang se youn nan mak fabrik lèzòm.”

² Kapasite lèzòm genyen pou yo pale yon lang lan se yon kado Bondye ba yo, se yon mirak (Sòm 139:14; Rev. 4:11). Sèvo Bondye ban nou an san parèy pou yon lòt rezon ankò. Kontrèman ak bèt yo, Bondye kreye lòm “pòtre ak li”. Lèzòm gen libète pou yo chwazi e yo kapab sèvi ak kapasite yo genyen pou yo pale a pou yo bay Bondye glwa. — Jen. 1:27, NW.

3. Ki bèl kado Jewova ban nou k ap ede nou gen sajès?

³ Bondye bay tout moun ki vle onore l antanke Sila a ki kreye lang nan yon bèl kado, anpalan de Labib. Bib la disponib ann antye oubyen an pati nan anviwon 2 800 lang. Lè w etidye liv sakre sa yo, w ap ranpli lespri w ak panse Bondye (Sòm 40:5;  92:5; 139:17). Konsa, w ap kapab pran plezi pou w medite sou bagay ki “kapab ba w sajès k ap pèmèt ou delivre”. — Li 2 Timote 3:14-17.

4. Ki sa medite vle di e ki kesyon nou pral egzamine nan atik sa a?

⁴ Medite vle di fikse panse w sou yon bagay, egzamine l oswa reflechi sou li, kit se yon bon bagay, kit se yon move bagay (Sòm 77:12; Pwo. 24:1, 2). Medite sou Jewova Dye ak Pitit Gason l lan, Jezi Kris, se pi bon meditasyon nou ka fè (Jan 17:3). Petèt n ap mande tèt nou: Ki rapò ki genyen ant li ak medite? Ki okazyon nou genyen pou n medite e ki sa n ka fè pou n pran plezi nan meditasyon nou yo?

5, 6. Lè n ap li, ki sa k kapab ede n pi byen konprann sa n ap li a epi rive sonje sa n te li a?

⁵ Sèvo nou ka reyalize yon seri gwo bagay, pafwa san nou pa fè efò pou sa. Pa egzanp, respire, monte bisiklèt, oswa tape san n pa gade klavye a se yon seri bagay moun kapab fè otomatikman san yo pa menm bezwen reflechi. Nan yon sèten degre, se menm bagay la tou lè n ap li. Kidonk, li enpòtan pou nou reflechi sou sans sa n ap li a genyen. Lè n rive nan fen yon paragraf oswa anvan n kòmanse yon nouvo soutit nan yon piblikasyon, nou ka pran yon ti poz pou n reflechi sou sa n sot li a yon fason pou n asire n nou byen konprann sa n sot li a. Sa ka rive gen bagay ki distrè nou oswa n pa ka konsantre sou sa n ap li a e sa fè lespri nou ap panse ak lòt bagay, konsa, nou pa rive pwofite lekti nou fè a. Ki jan n ka anpeche sa rive?

⁶ Syantifik yo fè rechèch ki montre lè yon moun li mo yo awotvwa, sa fè l pi fasil pou l sonje sa l te li. Sila a ki kreye sèvo a konn sa. Se sa k fè l te bay Jozye enstriksyon pou l li liv Lalwa a “tou ba”. (NW.) (Li Jozye 1:8.) N ap rann nou kont lè nou li Bib la tou dousman, oswa tou ba, sa gen yon gwo efè sou lespri nou. Sa ka ede n pi byen konsantre sou sa n ap li a.

7. Ki pi bon moman pou yon moun medite sou Pawòl Bondye a? (Gade foto ki nan kòmansman atik la.)

⁷ Byenke lè yon moun ap li sa ka pa mande anpil efò, men, lè yon moun ap medite, sa mande pou l ret konsantre. Piske lòm enpafè, sèvo l gen tandans fè travay ki pi fasil, ki pa mande anpil efò. Se sa k fè, pi bon moman pou yon moun medite se lè l pran bonjan repo epi l al yon kote ki kalm, ki pa gen anpil bagay pou distrè l. Gen yon salmis ki te twouve pi bon moman pou l medite se lè l nan kabann li e l pa ka dòmi nan nuit (Sòm 63:6). Jezi, ki te gen yon sèvo pafè, te konnen avantaj sa genyen lè l al kote ki trankil pou l medite e pou l priye. — Lik 6:12.

8. a) Apre Pawòl Bondye a, sou ki sa n ka medite ankò? b) Ki jan Jewova santi l lè n pran tan pou n pale de li?

⁸ Lè n reflechi sou sa nou li nan Bib la, se yon bon fason pou n medite, men, gen lòt fason toujou. Pa egzanp, lè n ap gade mèvèy ki gen nan kreyasyon an, nou ka pran ti tan pou n reflechi. Sandout, sa ap pouse nou bay Jewova louwanj pou bon bagay li fè yo e si n ansanm ak yon lòt moun, nou ka pale avè l sou bon efè refleksyon konsa gen sou nou (Sòm 104:24; Tra. 14:17). Èske Jewova bay refleksyon nou fè sou li ak pawòl nou di de li anpil valè? Ann kite Pawòl li  ban nou repons lan. Men pwomès Bondye fè konsènan dènye jou sa yo n ap viv la: “Lè sa a, moun ki gen lakrentif pou Jewova yo t ap pale youn ak lòt, chak moun t ap pale ak konpayon l, e Jewova t ap suiv yo, li t ap koute sa yo t ap di. Jewova te bay lòd pou yo ekri non moun ki gen lakrentif pou li yo ak moun k ap reflechi sou non l yo nan yon liv yon fason pou l sonje yo.” — Mal. 3:16, NW.

9. a) Sou ki sa apot Pòl te ankouraje Timote pou l medite? b) Ki jan n ka suiv konsèy apot Pòl la lè n ap prepare pou travay predikasyon an?

⁹ Apot Pòl te di Timote pou l “reflechi” oswa medite sou efè pawòl li, konduit li ak ansèyman l genyen. (Li 1 Timote 4:12-16.) Menm jan ak Timote, nou ka reflechi sou yon pakèt aktivite espirityèl. Pa egzanp, nou bezwen tan pou n medite lè n ap prepare pou n al kondui yon etid biblik. Lè n panse ak chak etidyan, nou ka reflechi sou yon kesyon nou ka poze etidyan an pou n konn sa l panse, oswa yon egzanp k ap ede l pwogrese. Tan nou pase ap medite a ka vrèman ankourajan, paske lè n reflechi sou bagay konsa, sa fè lafwa n vin pi solid, sa ede n pi byen kondui etid biblik nou yo e n ap fè sa yon fason ki vivan. Se menm bagay la tou lè n ap prepare kè n pou n al nan predikasyon. (Li Ezra 7:10.) Lè n li yon chapit nan liv Travay la, sa ap fè n “pa neglije” travay predikasyon an e n ap chofe nan travay sa a. Lè n medite sou vèsè nou gen entansyon itilize jou sa a ak piblikasyon nou konte ofri yo, sa ap ede n fè travay nou ki se yon privilèj (2 Tim. 1:6). Panse ak moun yo nan tèritwa a ansanm ak sa k ka fè yo vin enterese nan mesaj nou an. Tout preparasyon sa yo ap pouse n bay temwayaj yon fason ki “demontre pisans lespri a” ki soti nan Pawòl Bondye a. — 1 Kor. 2:4.

10. Ki lòt okazyon nou genyen pou n medite sou bagay espirityèl yo?

 ¹⁰ Èske pafwa nou pran nòt lè n ap asiste diskou piblik yo, asanble yo ak kongrè yo? Lè n ap repase nòt sa yo, sa ban nou bonjan okazyon pou n medite lè n reflechi sou sa n te aprann nan Pawòl Bondye a ak sa n aprann grasa òganizasyon l lan. Epitou, atik Toudegad ak Réveillez-vous! ki parèt chak mwa yo ak nouvo piblikasyon nou resevwa nan kongrè yo ban nou bèl enfòmasyon pou n li e pou n medite. Lè n li Annuaire la, nou ka twouve li itil pou n pran yon ti poz anvan nou kite yon eksperyans pou n al nan yon lòt. Sa ap ban n tan pou n reflechi sou sa nou li e pou n kite eksperyans sa yo touche kè nou. Nou ka vle souliye ide kle yo, oubyen pran nòt nan maj piblikasyon an ki ka itil nou lè n ap prepare yon nouvèl vizit, yon vizit pastoral oubyen yon diskou. Sa k pi enpòtan an, lè n pran tan pou n fè yon ti poz pou n medite detanzantan sou sa n ap li nan piblikasyon ki baze sou Bib la, sa ap ede n byen konprann enfòmasyon an e n ap gen posiblite pou n priye Jewova pou n di l mèsi pou tout bon bagay n ap aprann yo.

11. Sou ki sa n ta dwe medite an premye, e poukisa? (Gade nòt anba paj la tou.)

¹¹ Byennantandi, premye bagay nou ta dwe medite sou li se Pawòl Bondye te fè ekri a. Ann imajine yo ta anpeche n sèvi ak Labib *. Yo pap janm kapab anpeche n medite sou sa n te deja gen nan memwa nou, tankou vèsè nou plis renmen yo ak pawòl kantik yo (Tra. 16:25). Epi, lespri Bondye ka ede n sonje bon bagay nou te aprann yo. — Jan 14:26.

12. Ki fason nou ka pran abitid li Labib k ap ede n anpil?

¹² Nou ka rezève kèk jou nan semèn nan pou n li e pou n medite sou lekti Labib yo fè chak semèn nan pwogram Lekòl ministè teyokratik la. Nou ka rezève lòt jou pou n medite sou sa Jezi te di ak sa l te fè. N ap dakò Evanjil yo pami liv nan Bib la pifò moun konnen ki pale sou lavi Jezi ak travay predikasyon li te fè a (Wom. 10:17; Ebre 12:2; 1 Pyè 2:21). Pèp Bondye a gen yon piblikasyon ki menm rakonte eksperyans Jezi te fè ak tan li te fè sou tè a nan lòd evènman yo te pase. Piblikasyon sa a se yon bon zouti, sitou lè n pran tan pou n li lòt vèsè yo site nan chak chapit ki rakonte menm istwa n ap li a e n medite sou yo. — Jan 14:6.

13, 14. Poukisa l enpòtan anpil pou n kontinye medite sou bagay espirityèl yo, e ki sa sa pral pouse n fè?

¹³ Lè yon moun medite sou bagay espirityèl, sa ap ede l vin yon kretyen ki gen matirite (Ebre 5:14; 6:1). Yon moun ki pase yon tikras tan ap reflechi sou Jewova ak Jezi pap gen yon lafwa ki djanm. Nenpòt pwoblèm ka pote yon moun konsa ale lwen laverite oswa fè l kite laverite (Ebre 2:1; 3:12). Jezi te di si n pa tande oswa aksepte Pawòl Bondye a “ak yon kè ki pwòp e ki bon”, nou pap ka “kenbe pawòl la”. Sa ka rive byen fasil nou kite “enkyetid, richès ak plezi ki gen nan lavi sa a pran tèt” nou e n “pa pwodui anyen ki bon nèt”. — Lik 8:14, 15.

¹⁴ Kidonk, ann kontinye reflechi sou Pawòl Bondye a. Sa ap fè n anvi reflete glwa Bondye, kalite l yo ak pèsonalite l jan sa parèt nan Bib la (2 Kor. 3:18).  Ki sa k ka pi bon pase sa? Chèche gen plis konesans sou Bondye epi chèche jwenn posiblite pou n reflete glwa li se yon gwo privilèj e se yon bagay n ap toujou kontinye fè tank n ap kontinye aprann fason pou n imite Papa nou ki nan syèl la ki renmen nou. — Ekl. 3:11.

15, 16. a) Ki byenfè n ap jwenn pèsonèlman lè n reflechi sou bagay espirityèl yo? b) Poukisa pafwa li ka difisil pou n medite, men, pou ki rezon nou pa dwe bay legen?

¹⁵ Lè n kontinye reflechi sou bagay espirityèl yo, sa ap fè n chofe pou laverite. Sa ap fè n vin yon sous ankourajman pou frè ak sè n yo ak moun nou rankontre nan travay predikasyon an ki enterese nan laverite. Lè n medite sou pi gwo kado Bondye fè n nan, anpalan de sakrifis ranson Jezi a, sa ap ede n bay privilèj nou genyen dèske n gen yon bon relasyon ak Jewova, Papa nou ki sen an, anpil valè (Wom. 3:24; Jak 4:8). Men sa Mark, yon kretyen ki moun Afrik disid e ki te pase twazan nan prizon akoz netralite l te di: “Nou ka konpare meditasyon ak yon bèl vwayaj. Plis nou medite sou bagay espirityèl se plis n ap dekouvri nouvo bagay sou Jewova, Bondye nou an. Pafwa, lè m santi m dekouraje oswa m santi m boulvèse pou sa ki ka rive demen, mwen pran Bib la e m medite sou yon pati ladan l. Mwen santi sa vrèman kalme m.”

¹⁶ Vrèmanvre, lavi nan monn nan jodi a tèlman chaje ak distraksyon, sa fè l vin pi difisil pou yon moun medite sou bagay espirityèl yo. Men sa yon lòt frè fidèl ki rele Patrick, ki fèt ann Afrik, di: “Lespri m tankou yon bwat kourye ki chaje ak enfòmasyon ladan l. Gen enfòmasyon mwen bezwen, gen lòt mwen pa bezwen, e m bezwen triye enfòmasyon sa yo chak jou. Pandan m ap egzamine sa k nan lespri m, byen souvan, m konn jwenn kèk ‘panse k ap trakase m’, donk, pou m ka medite sou bagay espirityèl yo ak yon lespri ki poze, mwen oblije priye Jewova sou sa. Byenke lè m fè sa, sa ka pran yon ti tan anvan m kòmanse medite sou bagay espirityèl yo, mwen santi m pi pwòch Jewova. Sa louvri lespri m pou m rive konprann laverite pi byen.” (Sòm 94:19, nòt, NW). Li klè, tout moun ki “egzamine Ekriti yo chak jou” e ki medite sou sa yo aprann nan jwenn bonjan byenfè. — Tra. 17:11.

17. Ki jan w fè jwenn tan pou w medite?

¹⁷ Gen moun ki leve bonè nan maten pou yo li, medite epi priye. Gen lòt ki fè sa pandan poz yo pran pou yo manje nan travay yo. Nou ka wè l posib pou n fè sa byen bonè nan aprèmidi oswa anvan n kouche. Gen moun ki pran plezi li Labib nan maten e yo fè sa ankò anvan y al dòmi. Konsa, yo “li l [...] lajounen kou lannuit” oswa regilyèman (Joz. 1:8). Sa k pi enpòtan an, se pou n pran tan sou bagay ki pa gen twòp enpòtans yo pou n jwenn tan pou n medite chak jou sou Pawòl Bondye a. — Efe. 5:15, 16.

18. Ki sa Bib la di konsènan tout moun ki medite sou Pawòl Bondye a chak jou e ki fè efò pou yo aplike sa yo aprann yo?

¹⁸ Pawòl Bondye a gen plizyè pwomès ki montre benediksyon tout moun ki medite sou li e ki fè efò pou aplike sa yo aprann yo ap jwenn. (Li Sòm 1:1-3.) Men sa Jezi te di: “Byennere moun ki tande pawòl Bondye e ki pratike l!” (Lik 11:28). Sa k pi enpòtan an, lè n medite sou bagay espirityèl chak jou, sa ap ede n onore Gran Kreyatè a ki fè sèvo nou ki estrawòdinè. L ap rekonpanse nou, l ap fè n gen kè kontan depi kounye a e l ap fè n jwenn lavi ki pap janm fini an nan monn nouvo ki jis la. — Jak 1:25; Rev. 1:3.