Ede pitit ou sipòte lapenn li genyen

NAN yon libreri ki te gen anpil aktivite, men sa yon manman ki te enève te di yon dam ki te la pou ede moun k ap achte yo : “ Libreri a chaje ak liv, men pa gen youn ladan yo ki ka ede pitit mwen an ! ” Manman an t ap chèche yon liv ki te ka ba l konsèy sou fason pou l ede tigason l lan andire lanmò yon manm fanmi pwòch yo ki te mouri san yo pa t atann.

Manman sa a te gen rezon gen sousi pou pitit li a. Sa vrèman difisil pou yon jèn fè fas ak reyalite sa a, sètadi lanmò ! Lè timoun bò kot fanmi yo k ap pran swen yo, sa ede yo byen devlope, sepandan lanmò kapab pase men pran youn nan moun sa yo ki te pwòch yo. Antanke paran, ki jan ou kapab ede pitit ou lè li gen yon fanmi l ki prèt pou l mouri oswa ki deja mouri ?

Nòmalman, lè w gen yon moun pa w ki mouri, ou kapab ap lite pou w jere efè sa genyen sou ou. Nan lespri w, ou kapab ap soufri e sa ka trakase w anpil. Sepandan, ou pa dwe bliye pitit ou a bezwen santi w ap soutni l. Selon yon liv yon etablisman nan Minesota, nan peyi Etazini, pibliye : “ Timoun yo kapab tande ti moso konvèsasyon ou genyen e souvan yo ka mal entèprete sa yo tande a. ” Apre sa, liv la di : “ Timoun yo bezwen konnen laverite. ” Se sa k fè li kapab saj pou nou di timoun nan laverite toutpandan nou pran laj li an konsiderasyon. Sa difisil paske tout timoun pa gen menm kapasite pou yo konprann sa k pase a. — 1 Korentyen 13:11 (1 Korent).

Fason ou ka esplike l sa lanmò ye

Dapre kèk moun k ap fè rechèch, lè paran yo ap pale ak pitit yo konsènan lanmò, yo ta dwe veye pou yo pa itilize kèk ekspresyon tankou “ l ap dòmi ” oswa “ l al nan peyi san chapo ”. Si nou itilize ekspresyon konsa san nou pa ba yo esplikasyon, sa kapab mete yo nan konfizyon. Se vre, Jezi te itilize mo dòmi an pou l pale de lanmò e se te yon trè bon egzanp. Sepandan, fòk nou sonje li pa t ap pale ak timoun piti. Anplis, li te bay esplikasyon sou sa l te di a. Jezi te di disip li yo : “ Laza, zanmi nou an, al repoze. ” ​(NW) Byenke disip yo se granmoun yo te ye, yo te “ konprann [Jezi te di] se dòmi Laza t’ap dòmi ”. Se sa k fè Jezi te klarifye bagay yo, li te di yo : “ Laza mouri. ”  (Jan 11:11-14). Si granmoun ki granmoun bezwen esplikasyon konsa, alewè pou timoun !

Men sa Mary Ann Emswiler ak James P. Emswiler, de redaktè, di : “ Yon paran gendwa eseye adousi pawòl li lè l ap bay pitit li esplikasyon sou lanmò, men, lè l fè sa, li kapab mete lide nan tèt li ki pa t la anvan ki ka fè l pè oswa ki ka fè l ditò. ” Pa egzanp, si li annik di timoun ki gen yon moun pa l ki mouri a se dòmi moun nan ap dòmi, timoun nan gendwa vin panse si li menm l al dòmi aswè, li gendwa pa janm leve ankò. Si paran an di timoun nan moun ki mouri a se “ nan peyi san chapo l ale ”, timoun nan gendwa pa konprann, li gendwa panse moun nan pa renmen l ankò oubyen se abandone l abandone l.

Anpil paran ki eseye esplike pitit yo sa lanmò ye twouve timoun pi fasil konprann esplikasyon ki senp, ki dirèk, pase esplikasyon ki difisil pou konprann oswa pawòl ki adousi reyalite a, men ki pa klè (1 Korentyen 14:9). Gen moun k ap fè rechèch ki rekòmande paran yo pou yo ankouraje pitit yo poze kesyon e pou yo ankouraje yo pale ak yo sou enkyetid yo genyen. Si paran yo pale ak pitit yo sou kesyon sa a souvan, sa ap pèmèt yo klarifye bagay pitit yo pa byen konprann e sa ka ede yo wè lòt fason yo kapab ede yo.

Yon gid ou ka fè konfyans

Nan peryòd kote timoun nan tris la, l ap konte sou ou pou w di l sa pou l fè, pou w soutni l e pou w reponn kesyon li genyen. Donk, ki kote ou ka jwenn bonjan enfòmasyon konsènan lanmò ? Anpil moun twouve Bib la se yon gwo sous rekonfò ak esperans, e yo ka fè l konfyans. Li bay bonjan enfòmasyon sou kote lanmò soti, sou sitiyasyon mò yo e sou esperans moun ki mouri yo genyen. Nan Eklezyas 9:5, Labib di “ moun mouri yo pa konn anyen ”. Verite sa a kapab ede pitit ou a konprann moun li genyen ki mouri yo pa nan soufrans. Anplis, Bib la ban nou esperans n ap rewè moun pa nou yo ki mouri nan paradi ki pral gen sou tè a. — Jan 5:28, 29.

Si w sèvi ak Bib la, w ap kapab ede pitit ou konnen Bib la se yon gid nou ka fè konfyans e ki ka rekonfòte nou kèlkeswa sitiyasyon difisil nou rankontre nan lavi a. Anmenmtan, l ap remake, antanke paran, ou konte sou Pawòl Bondye a pou w jwenn bonjan enfòmasyon sou tout kalite kesyon enpòtan nan lavi a. — Pwovèb 22:6 ; 2 Timote 3:15.

Repons kesyon ou ka ap poze tèt ou

Lè w ap ede pitit ou sipòte lanmò yon moun li te renmen, ou kapab rankontre sitiyasyon kote w pa konn sa pou w fè. Lè sa a, ki sa w ka fè * ? Ann egzamine kèk kesyon ou ka genyen.

• Èske m ta dwe kite timoun nan wè lapenn mwen genyen ? Li toutafè natirèl pou w anvi pwoteje pitit ou. Men, èske sa mal pou pitit ou wè w nan lapenn ? Gen anpil paran ki twouve li pi bon pou timoun nan wè tristès yo paske konsa timoun nan ap konprann se yon bagay ki nòmal pou l nan lapenn. Gen kèk paran ki egzamine ak pitit yo kèk egzanp moun nan Bib la ki te kite moun wè yo nan lapenn. Pa egzanp, Jezi te kriye lè Laza, zanmi li te renmen anpil la, te mouri. Li pa t kache sa l santi. — Jan 11:35.

• Èske timoun nan ta dwe al nan ponp finèb la oswa nan simityè a, oubyen èske li ta dwe asiste tout antèman an ? Si timoun nan ap la, l ap saj pou w esplike l sa k pral pase a alavans e pou w di l poukisa y ap fè antèman an. Nan kèk sikonstans, paran yo gendwa deside timoun nan pap asiste antèman an menm oswa l ap asiste yon pati  ladan l sèlman. Timoun ki asiste antèman Temwen Jewova yo fè kapab tire pwofi nan diskou k ap bay la ki baze sou Labib. Anplis, “ afeksyon ki gen tandrès ” ​(NW) moun ki la yo demontre youn pou lòt kapab gen yon efè pozitif sou timoun nan e anmenmtan li kapab rekonfòte l. — Women 12:10, 15 ; Jan 13:34, 35.

• Èske mwen ta dwe pale de moun ki mouri a ak timoun nan ? Gen kèk moun k ap fè rechèch ki di si yon paran pa pale ak timoun nan ditou de moun ki mouri a, timoun nan gendwa konprann paran an ap eseye kache kèk bagay sou moun ki mouri a oswa l ap eseye fè l bliye moun nan. Men sa Julia Rathkey, yon ekriven, di : “ Li enpòtan pou timoun yo pa bliye moun nan e pou yo pa pè. ” Lè w pale alèz de moun ki mouri a e ou mansyone aspè pozitif li te gen nan pèsonalite l e nan lavi l, sa kapab byen ede timoun yo soti nan lapenn yo ye a. Paran ki Temwen Jewova yo rekonfòte pitit yo grasa esperans Bib la bay konsènan rezirèksyon ki pral gen sou tè a ki pral tounen yon paradi kote moun pap malad ankò e yo pap mouri ankò. — Revelasyon 21:4.

• Ki sa m ka fè pou m ede pitit mwen sipòte lapenn li genyen an ? Pandan timoun nan nan lapenn nan, li kapab vin malad. Li kapab vin fache, oswa li kapab pa santi l byen paske li wè li pa ka fè anyen e li dekouraje. Pinga w sezi si li santi l koupab, si l kole sou ou plis oswa si l panike lè w rantre lakay ou anreta oswa lè w vin malad. Ki sa w ka fè pou w jere sitiyasyon sa a ? Timoun nan pa dwe janm gen enpresyon ou pa remake gen yon bagay ki pa sa. Kidonk, se pou w toujou ap veye sou li pou w wè kòman l ye. Fè tout sa w kapab pou w pa mal jije sitiyasyon an e pou w pa souzestime efè lanmò a gen sou li. Toujou pale avè l epi ankouraje l pou l poze w kesyon e pou l santi l alèz pou l pale avè w. Ou kapab fòtifye esperans pitit ou a ansanm ak esperans pa w grasa “ ankourajman ” Ekriti yo bay. — Women 15:4.

• Konbyen tan mwen ta dwe ret tann anvan m reprann aktivite fanmi an ak lòt aktivite ankò ? Espè yo di li bon pou nou kenbe aktivite nou te genyen yo otank sa posib. Lè w kenbe bon abitid ou te genyen se yon mwayen efikas pou w jere lapenn ou. Pami Temwen Jewova yo, gen anpil paran ki twouve lè yo kenbe aktivite espirityèl yo, pa egzanp, yo etidye Labib an fanmi regilyèman e yo pa sispann asiste reyinyon yo, sa kapab fè fanmi an rete stab e sa kapab fòtifye l. — Detewonòm 6:4-9 ; Ebre 10:24, 25.

Annatandan Jewova met fen nan maladi ak lanmò, timoun yo ap gen moun yo renmen ki mouri e sa ka gen yon gwo efè sou yo (Izayi 25:8, [Ezayi]). Sepandan, si yo jwenn èd, y ap kapab sipòte avèk siksè lanmò moun yo renmen.

[Nòt anba paj]

[Antrefilè nan paj 19]

Ankouraje pitit ou pou l poze w kesyon e pou l pale de enkyetid li.

[Foto nan paj 20]

Kenbe aktivite espirityèl yo, san wete etid familyal la.