‘ Mirak ki fèt pou geri moun ’ nan epòk pa nou an : Èske se nan Bondye yo soti ?

NAN kèk peyi, li kouran pou w wè moun k ap fè pelerinaj pou y al vizite kèk kote moun konn al bay adorasyon. Anpil moun konn di yo te jwenn gerizon nan kote sa yo pou yon maladi yo “ pa t ka jwenn gerizon ” pou li. Nan kèk lòt peyi, gen medsen fèy ki konn di yo geri moun ak pouvwa sinatirèl yo di yo genyen. Nan lòt peyi toujou, konn gen kwazad k ap fèt e nan kwazad sa yo konn gen moun ki leve sou chèz woulant yo oswa ki voye beki yo jete paske yo pretann yo te jwenn gerizon.

An jeneral, moun k ap fè gerizon sa yo soti nan diferan relijyon, e souvan youn di relijyon lòt la se yon sèk, se yon fo relijyon oswa se yon relijyon payen. Kesyon nou kapab poze se : Èske Bondye itilize moun nan diferan relijyon, souvan ki pa wè bagay yo menm jan, pou l fè mirak ? Men sa Bib la di : “ Bondye pa mele ak dezòd. Li se yon Bondye lapè. ” ​(1 Korentyen [1 Korent] 14:33, Bib Kreyòl La : Nouvo Testaman). Donk, èske se Bondye ki fè swadizan ‘ mirak sa yo pou geri moun ’ ? Gen gerisè ki di se grasa pouvwa Jezi yo rive geri moun. Annou wè ki jan Jezi li menm li te konn geri moun.

Fason Jezi te konn geri moun

Jezi te konn geri moun malad yon fason ki diferan nèt parapò ak fason moun yo fè gerizon jodi a. Li te konn geri tout moun ki te vin mande l èd nan sans sa a. Li pa t konn geri kèk moun li te chwazi nan yon foul, epi apre sa, li voye lòt moun yo lakay yo san li pa geri yo. Anplis, lè l te geri yon moun, li te geri l totalman, e souvan, se tousuit moun yo te konn santi yo geri. Men sa Bib la di : “ Tout moun t’ap chache manyen l, paske te gen yon fòs ki t’ap soti nan Jezi ki t’ap geri yo tout. ” — Lik 6:19.

Kontrèman ak moun k ap fè gerizon jodi a ki konn di si yo pa ka geri yon moun se paske moun nan pa gen lafwa, Jezi te konn geri menm moun ki potko met lafwa yo nan li. Pa egzanp, gen yon lè Jezi te pwoche bò kot yon mesye avèg e li te geri l san l pa t menm mande l sa. Apre sa, Jezi mande l : “ Èske ou kwè nan moun Bondye voye nan lachè a ? ” Mesye a reponn li : “ Mèt, di m ki moun li ye pou m ka kwè nan li. ” Jezi di l : “ Se li menm k’ap pale avè ou la a. ” — Jan 9:1-7, 35-38.

Ou kapab ap mande tèt ou : ‘ Si yon moun pa t oblije gen lafwa anvan Jezi geri l, poukisa, souvan, li te konn di moun li geri yo : “ Se konfyans ou nan Bondye ki geri ou ” ? ’ ​(Lik 8:48 ; 17:19 ; 18:42). Lè l te di sa, li t ap fè konnen moun ki te vin bò kote l paske yo gen lafwa nan li te jwenn gerizon, alòske moun ki te chwazi pou yo pa fè sa yo te pèdi okazyon pou l geri yo. Anfèt, moun ki te jwenn gerizon yo se pa lafwa yo ki te geri yo, men se te pouvwa Bondye. Konsènan Jezi, Bib la di : “ Bondye te vide pouvwa Sentespri l sou Jezi, moun Nazarèt la. Jezi mache nan tout peyi a, li t’ap fè byen, li t’ap geri tout moun ki te anba pouvwa Satan paske Bondye te kanpe avèk li. ” — Travay 10:38.

Dabitid, sanble lajan jwe yon wòl enpòtan nan swadizan gerizon k ap fèt jodi a. Moun k ap fè gerizon yo, se moun ki fò nan konvenk moun pou yo bay lajan. Pandan yon ane, gen yon gerisè ki te rantre 89 milyon dola ameriken nan aktivite li t ap fè sou tout tè a pou l rantre lajan. Gen legliz tou ki konn fè anpil kòb lè gen moun k al nan pelerinaj pou yo ka jwenn gerizon. Sepandan, Jezi pa t janm mande moun li te geri yo lajan. Pafwa, li te menm konn ba yo manje tou (Matye 15:30-38). Lè li t ap voye disip li yo preche, li te di yo : “ Geri moun ki malad. Fè moun mouri yo leve. Geri moun ki malad ak lalèp. Chase move lespri yo. Se gratis nou resevwa, se gratis tou pou nou bay. ” ​(Matye 10:8). Poukisa fason moun  nan epòk nou an fè gerizon diferan anpil ak fason Jezi li menm li te konn fè gerizon ?

Ki kote “ gerizon ” sa yo soti ?

Nan ane ki pase yo, gen kèk pwofesyonèl nan domèn medikal ki fè rechèch sou swadizan gerizon sa yo pou yo wè si sa gerisè sa yo di yo se vre. Ki sa yo dekouvri ? Dapre yon jounal (Daily Telegraph) ki nan vil Lonn, men sa yon doktè ki te pase 20 an ap fè rechèch sou sa te di : “ Pa gen okenn prèv medikal ki montre sa moun ap di anrapò ak gerizon k ap fèt nan reyinyon karismatik yo se bagay ki fèt toutbonvre. ” Men, gen anpil moun ki kwè ak tout kè yo yon objè yo panse ki sakre te geri yo. Gen lòt ki panse yo te geri anba maladi yo te genyen lè yo t al vizite yon kote yo panse ki sakre oswa paske yo t al wè yon gerisè oswa yon pastè. Èske petèt se twonpe yo te twonpe yo ?

Nan Sèmon anpil moun konnen Jezi te bay sou montay la, li te di moun ki pretann y ap sèvi l yo gen pou yo di l : “ Mèt, Mèt, [...] se sou non ou nou te fè anpil mirak. ” Sepandan, li te di l ap reponn yo konsa : “ Mwen pat janm konnen nou. Wete kò nou sou mwen, nou menm k’ap fè sa ki mal. ” ​(Matye 7:22, 23). Nan yon avètisman apot Pòl te bay, men sa li te di konsènan sous pouvwa moun sa yo pretann yo genyen an : “ Mechan an va vini ak tout pouvwa Satan an. Li va fè anpil mirak, anpil mèvèy ak anpil gwo siy pou bay manti. Li va fè tout kalite bagay mal pou twonpe moun. ” — 2 Tesalonisyen 2:9, 10.

Anplis, “ gerizon ” ki gen rapò ak objè moun konsidere kòm bagay ki sakre, zidòl ak imaj pa ka sot nan Bondye. Poukisa ? Paske Pawòl Bondye a mande nou byen klè pou nou “ pa mele nan sèvis zidòl ” e pou nou “ veye kò nou ak zidòl ”. (1 Korentyen 10:14 ; 1 Jan 5:21.) Gerizon sa yo fè pati manèv Satan itilize pou l fè moun pa rekonèt vrè adorasyon an. Bib la di : ‘ Satan ka ranje kò l pou l pran pòz li se yon zanj limyè. ’ — 2 Korentyen [2 Korent] 11:14.

Rezon ki fè Jezi ak apot li yo te konn geri moun

Mirak Jezi ak apot li yo te fè pou yo geri moun yo te fèt toutbonvre e yo te montre byen klè Bondye te avèk ni li menm ni apot li yo (Jan 3:2 ; Ebre 2:3, 4). Gerizon Jezi te fè yo te bay mesaj li t ap preche a jarèt. Men sa nou li nan Matye 4:23 : “ Jezi t’ap mache toupatou nan peyi Galile a. Li t’ap moutre moun yo anpil bagay nan sinagòg yo. Li t’ap anonse Bon Nouvèl [Wayòm nan]. Li t’ap geri tout kalite maladi. ” ​(Matye 4:23). Jezi te fè yon pakèt zèv pisans ki ede nou wè sa li pral akonpli lè se Wayòm li an k ap dirije tè a. Èske se pa yon bon nouvèl ? Pami zèv pisans sa yo, li te geri moun ki malad, li te bay foul moun manje, li te montre li kapab kontwole tan an e li te menm resisite moun ki mouri.

Sepandan, apre lanmò Jezi ak apot li yo, e apre lanmò lòt moun ki te resevwa don sa yo nan men apot yo, pa gen lòt moun ankò ki resevwa don lespri yo ki ta pèmèt yo fè zèv pisans sa yo. Men sa apot Pòl ekri : “ Pouvwa pou bay mesaj ki sòti nan men Bondye a pa la pou tout tan. Pouvwa pou pale langay [moun te resevwa pa mirak] gen pou fini yon lè, konesans [Bondye bay pa mwayen revelasyon] gen pou disparèt. ” ​(1 Korentyen 13:8). Poukisa ? Se paske yo te atenn objektif yo : idantifye Jezi antanke Mesi yo te pwomèt la e idantifye kongregasyon kretyen an kòm kongregasyon Bondye fè favè a. Donk, zèv pisans sa yo pa nesesè ankò, se sa k fè yo “ disparèt ”. Gerizon yo ladan l tou.

Sepandan, mirak Jezi te konn fè pou l geri moun yo gen yon mesaj enpòtan pou nou jodi a. Si nou koute sa Jezi anseye konsènan Wayòm Bondye a e nou demontre nou gen lafwa nan yo, nou kapab espere wè epòk kote pwofesi enspire ki site pi ba a pral reyalize nan domèn espirityèl e nan domèn fizik. Men sa pwofesi a di : “ Pèsonn nan peyi a p’ap plenyen di li malad ankò. ” — Izayi 33:24 ; 35:5, 6 ; Revelasyon 21:4.