ÈSKE w konn pè ? — * Pifò moun konn gen santiman sa a. Ki sa w ka fè lè gen yon bagay ki fè w pè ? — Ou kapab chèche èd nan men yon moun ki pi gran pase w e ki gen plis fòs pase w. Petèt se papa w oubyen manman w ki ka ede w nan moman sa yo. David montre nou nan men ki moun nou kapab chèche èd. Men sa li te di nan yon chante li te chante pou Bondye : “ Se nan ou mwen mete tout konfyans mwen. Mwen gen konfyans nan Bondye. [...] Mwen pa pè anyen. ” — Sòm 56:3, 4.

Kiyès ou panse ki te aprann David pou l pa pè ? Èske se paran l ? — Pa gen dout se yo menm ki te aprann li sa. Jese, papa l, yon nonm fidèl, te yon zansèt Jezi Kris, “ Prens Lapè ” Bondye te pwomèt la (Izayi 9:6, NW ; 11:1-3, 10). Papa Jese, granpapa David, se te Obèd. Gen yon liv nan Bib la ki pote non manman Obèd. Èske w konn non sa a ? — Li rele Rit. Se te yon fi ki te fidèl ki te marye ak yon mesye yo rele Bowaz. — Rit 4:21, 22.

Byennantandi, Rit ak Bowaz te mouri lontan anvan David te fèt. Ou kapab konnen non manman Bowaz, anpalan de granmè granpapa David. Li t ap viv Jeriko e li te ede kèk espyon izrayelit sove. Lè miray Jeriko yo te tonbe, dam sa a ak fanmi l te jwenn pwoteksyon paske li te mare yon kòd wouj nan fenèt li. Ki jan li rele ? — Li rele Rahab. Li te vin yon adoratè Jewova e li se yon bon egzanp pou kretyen yo paske se yon moun ki te gen kouraj. — Jozye 2:1-21 ; 6:22-25 ; Ebre 11:30, 31.

Nou kapab gen asirans papa David ak manman l te pale l de tout moun sa yo ki t ap sèvi Jewova fidèlman, paske ann Izrayèl, paran yo te jwenn lòd pou yo pale ak pitit yo sou bagay sa yo (Detewonòm 6:4-9). Lè a te rive kote Bondye te dirije Samyèl, pwofèt li, pou l chwazi David, tigason Jese ki te pi jèn nan, pou l vin wa ann Izrayèl. — 1 Samyèl 16:4-13.

Yon jou, Jese voye David al pote manje pou twa gran frè David ki t ap patisipe nan batay yo t ap fè kont ènmi Bondye yo, sètadi Filisten yo. Lè David rive nan zòn kote yo te ye a, li kouri al pi pre kote batay la t ap fèt la. Li tande  Golyat k ap bay “ lame Bondye vivan an ” defi. Tout sòlda yo te pè goumen ak Golyat. Lè wa Sayil aprann David te dispoze goumen ak li, li te rele l. Men, lè li wè David, li di l konsa : “ Ou twò piti. ”

David fè Sayil konnen li te touye yon lyon ak yon lous ki te eseye pran mouton fanmi l yo e li di l ‘ se konsa l ap touye ’ Golyat. Lè sa a, Sayil di l : “ Ale non ! Mwen mande Seyè a pou l avèk ou ! ” Apre sa, David jwenn senk wòch byen lis, li mete yo nan valiz li, li pran flonn li epi li pati pou l al goumen ak jeyan an. Lè Golyat wè se yon tigason k ap vin sou li, li di byen fò : “ Vanse sou mwen pou ou wè si mwen p’ap pran kò ou pou m bay zwazo [...] manje. ” David reponn li, li di l : “ M ap mache sou ou nan non Seyè [a]. ” Apre sa, li di l byen fò : “ M ap vide ou atè. ”

David kouri sou Golyat, li pran youn nan wòch ki nan sak li a, li mete l nan flonn li e li tire l tou dwat nan fwon Golyat. Lè Filisten yo wè jeyan an mouri, yo panike e yo pran kouri. Lè Izrayelit yo wè sa, yo kouri dèyè yo e yo genyen batay la. Souple, li tout istwa a ak fanmi w. W ap jwenn li nan 1 Samyèl 17:12-54.

Antanke jèn, pafwa ou kapab pè suiv kòmandman Bondye yo. Jeremi te yon jèn e li te pè nan kòmansman ministè li, men, Bondye te di l : Ou pa bezwen pè, [...] m’ap kanpe la avè ou. ” Jeremi te pran kouraj e li te preche mesaj Bondye te ba l preche a. Menm jan ak David ak Jeremi, si w met konfyans ou nan Jewova, ou pap pè. — Jeremi 1:6-8.