2 Chèche gen konesans egzak sou Bondye

“Lavi ki p’ap janm fini an, se pou yo konnen ou, ou menm ki sèl Bondye tout bon an.”—Jan 17:3.

KI PWOBLÈM KI PREZANTE? Gen moun ki di Bondye pa yon moun reyèl. Gen lòt ki kwè li se yon fòs ki pisan anpil. Moun ki panse li se yon moun reyèl yo anseye yon seri doktrin ki depaman konsènan kiyès li ye e konsènan kalite li genyen.

KI SA POU W FÈ? Youn nan fason nou kapab vin gen konesans sou Bondye se lè nou obsève bagay li kreye yo. Men sa apot Pòl te di: “Kalite [Bondye] yo ki envizib, sètadi pisans li ki etènèl e lefètke se li menm reyèlman ki Bondye, parèt klè depi nan kreyasyon monn nan.” ​(Women 1:20, NW). Lè w byen obsève kreyasyon an, ou kapab aprann anpil bagay sou sajès Kreyatè nou an ak pisans li. —Sòm 104:24; Izayi 40:26.

Sepandan, pou nou byen konnen pèsonalite Bondye, se nou chak ki  pou ouvri Pawòl Bondye a, Labib, pou nou egzamine l pèsonèlman. Pa kite se lòt moun k ap di w sa pou w panse. Okontrè, ou bezwen suiv konsèy sa a Bib la bay: “Sispann konfòme nou selon sistèm sa a, men transfòme tèt nou, lè nou bay entèlijans nou yon lòt direksyon, dekwa pou nou ka teste pèsonèlman sa ki volonte Bondye, yon volonte ki bon, ki agreyab e ki pafè.” ​(Women 12:2, NW). Pa egzanp, annou konsidere kèk enfòmasyon Bib la bay sou Bondye.

Bondye gen yon non. Depi lè yo te fèk ekri Bib la, non sa a Bondye genyen an te parèt ladan l plizyè milye fwa. Gen anpil tradiksyon Labib ki mete l nan Sòm 83:18. Sòm sa a di: “Se pou lèzòm konnen ou menm, non w sèl se Jewova a, ou se trèwo sou tout tè a.” —Labib Wa Jak (ann anglè).

Fason lèzòm aji gen efè sou Jewova Dye. Apre Jewova te fin libere pèp Izrayèl nan esklavaj ann Ejip, pafwa yo te konn pa vle suiv konsèy saj li te ba yo. Fason rebèl yo te aji a te “fè l lapenn”. Aksyon yo te fè yo te “atriste Sen Izrayèl la”. —Sòm 78:40, 41, NW.

Jewova pran swen nou chak. Yon lè, pandan Jezi t ap pale ak disip li yo, men sa li te di yo: “Eske yo pa vann ti zwazo de pou senk kòb? Malgre sa, pa gen yon sèl ki tonbe atè san Papa nou pa konnen. Pou nou menm menm, ata grenn cheve nan tèt nou, yo tout konte. Se sa k fè, nou pa bezwen pè menm: nou vo pi plis pase anpil ti zwazo.” —Matye 10:29-31.

Bondye pa renmen yon ras oswa yon kilti plis pase yon lòt. Nan vil Atèn, Apot Pòl te di Grèk yo Bondye te “fè [...] tout [moun] sòti nan yon sèl moun”. Li te di yo tou Bondye “pa pi lwen okenn nan nou pase sa”. (Travay 17:26, 27.) Men sa apot Pyè te di: “Mwen rekonèt Bondye pa nan patipri. Okontrè, nan tout nasyon, si yon moun genyen krentif pou Bondye epi li fè sa ki jis, Bondye asepte li.” —Travay 10:34, 35, Bib Kreyòl La.

KI BYENFÈ W AP JWENN? Gen moun ki “zele pou yo sèvi Bondye, men se pa ann amoni ak konesans egzak la”. (Women 10:2, NW.) Si w konnen sa Labib anseye toutbonvre sou Bondye, ou pap kite moun twonpe w e w ap gen posiblite pou w “pwoche bò kote Bondye”. —Jak 4:8.

Pou w jwenn plis enfòmasyon, gade nan liv Ki sa Labib anseye toutbonvre? a *, nan chapit 1 an, ki gen tit “Ki sa ki verite konsènan Bondye?”

[Nòt anba paj]

[Foto nan paj 6]

Youn nan fason nou kapab vin gen konesans sou Bondye se lè nou obsève bagay li kreye yo.