3 Aprann laverite sou Jezi

“Bondye sitèlman renmen lèzòm li bay sèl Pitit li a pou yo. Tout moun ki va mete konfyans yo nan li p’ap pèdi lavi yo. Okontrè y’a gen lavi ki p’ap janm fini an.” —Jan 3:16.

KI PWOBLÈM KI PREZANTE? Gen moun ki panse Jezi pa t janm egziste toutbonvre. Gen lòt moun ki panse li te egziste, men se te yon moun tankou tout moun ki mouri byen lontan.

KI SA POU W FÈ? Imite disip Natanayèl *. Filip, frè l, te di l li kwè li jwenn Mesi a, sètadi “Jezi, moun lavil Nazarèt, pitit gason Jozèf la”. Sepandan, Natanayèl pa t annik dakò ak sa Filip te di l la. Okontrè, li te mande l: “Ki bon bagay ki ka sòti Nazarèt?” Byenke li te gen dout, li te aksepte envitasyon Filip te fè l pou l ‘vin wè’ ak pwòp je l (Jan 1:43-51). Ou menm tou, ou kapab tire pwofi lè w egzamine ak pwòp je w prèv Labib bay sou Jezi yo. Ki sa w kapab fè?

Egzamine prèv istorik ki montre Jezi te egziste toutbonvre. Jozèf ak Tasit se te de gwo istoryen ki t ap viv nan premye syèk la, men ki pa t kretyen. Yo pale de Jezi Kris kòm yon moun ki te egziste toutbonvre. Tasit te dekri ki jan yon anperè women, Newon, te akize kretyen yo kòmkwa yo te mete dife nan Wòm nan ane 64 epòk pa nou an. Men sa li te ekri: “Newon te lage akizasyon sou do yon gwoup moun pèp la rele kretyen, yon gwoup moun yo te rayi poutèt bagay yo t ap fè yo pa t renmen, e li te tòtire yo alekstrèm. Se nan Christus [Kris] non yo genyen an soti, e se yon moun ki te resevwa pi gwo santans lan nan men Pons Pilat, youn nan gouvènè ki te genyen sou rèy Tibè.”

Piske gen istoryen ki pale de Jezi ak premye disip yo ni nan premye syèk la ni nan dezyèm syèk la, men sa yon ansiklopedi (Encyclopædia Britannica, edisyon 2002) di konsènan sa yo te ekri yo: “Sa yo te ekri yo demontre nan tan lontan menm moun ki te opoze ak krisyanis la pa t janm gen dout sou Jezi antanke yon moun ki te egziste toutbonvre. Premye fwa yo te kòmanse gen dout sou sa, yon dout ki te baze sou agiman ki pa solid, se nan fen 18^yèm syèk la, pandan 19^yèm syèk la ak nan kòmansman 20^yèm syèk la.” An 2002, nan yon atik nan yon jounal (The Wall Street Journal), yo te di: “Pifò istoryen, sof kèk nan yo ki ate, te deja aksepte Jezi, moun Nazarèt la, kòm yon moun ki te egziste toutbonvre.”

 Egzamine prèv ki montre Jezi te resisite. Lè moun ki te opoze ak Jezi yo te arete l, bon zanmi l yo te kite l poukont li. Youn ladan yo, apot Pyè, te pè e li te di li pa konn Jezi (Matye 26:55, 56, 69-75). Apre yo te fin arete l, disip li yo te gaye (Matye 26:31). Men, apre sa, yo te vin aktif. Pyè ak Jan te fè fas avèk kouraj ak moun ki te mete ansanm pou touye Jezi yo. Disip Jezi yo te tèlman dispoze simaye ansèyman yo t ap bay yo nan anpi women an, yo te prefere mouri, tan pou yo ta fè konpwomi ak lafwa yo.

Ki youn nan rezon ki fè yo te chanje atitid totalman konsa? Apot Pòl te esplike Jezi te leve vivan nan lanmò e li “te fè Pyè wè li. Lèfini li te fè douz apòt yo wè l”. Pòl ajoute: “Apre sa, li te fè pou pi piti senksan (500) frè wè l anmenmtan.” Majorite nan frè sa yo ki te wè l la te vivan toujou nan epòk Pòl te ekri pawòl sa yo (1 Korentyen 15:3-7). Li t ap pi fasil pou moun ki pa kwè yo gen dout sou temwayaj youn oswa de moun sèlman (Lik 24:1-11). Men, temwayaj plis pase senksan moun bay se yon prèv solid ki pwouve Jezi te leve soti nan lanmò.

KI BYENFÈ W AP JWENN? Moun ki gen lafwa nan Jezi e ki obeyi l kapab jwenn padon pou peche yo e yo kapab gen yon konsyans ki pwòp (Mak 2:5-12; 1 Timote 1:19; 1 Pyè 3:16-22). Si yo mouri, Jezi pwomèt l ap resisite yo “nan dènye jou a”. —Jan 6:40.

Pou w jwenn plis enfòmasyon, gade nan liv Ki sa Labib anseye toutbonvre? a *, nan chapit 4 la, ki gen tit “Kiyès Jezi Kris ye?” ak nan chapit 5 lan, ki gen tit “Ranson an: pi gwo kado Bondye bay”.

[Nòt anba paj]

[Foto nan paj 7]

Menm jan ak Natanayèl, annou egzamine prèv ki gen rapò ak Jezi yo.