4 Chèche efase dout ou genyen

“Moun ti lafwa, poukisa ou te doute?” —Matye 14:31, Bib Kreyòl La.

KI PWOBLÈM KI PREZANTE? Menm disip Jezi yo te konn gen dout pafwa (Matye 14:30; Lik 24:36-39; Jan 20:24, 25). Anfèt, Labib montre manke lafwa se yon ‘peche ki fasil pou vlope nou’. (Ebre 12:1.) Apot Pòl te ekri: “Lafwa se pa yon byen tout moun genyen.” ​(2 Tesalonisyen 3:2, NW). Sa pa vle di gen moun ki pa kapab gen lafwa, men, depreferans, sa vle di gen anpil moun ki pa chèche genyen l. Bondye ap beni efò moun ki chèche gen lafwa yo ap fè.

KI SA POU W FÈ? Idantifye rezon ki fè w gen dout yo. Pa egzanp, disip Toma te gen dout sou rezirèksyon Jezi, byenke gen lòt disip ki te di l yo te wè l. Toma te vle pou l  jwenn prèv. Ki sa k te rive? Jezi te ba l prèv li te bezwen an pou lafwa l te ka solid. —Jan 20:24-29.

Jewova Dye sèvi ak Bib la pou l ban nou repons nou bezwen pou nou efase dout nou genyen yo. Pa egzanp, anpil moun pèdi lafwa nan Bondye paske yo ba l responsab gè, zak vyolans ak mizè k ap fè lèzòm soufri yo. Moun sa yo akize Bondye konsa swa dirèkteman, swa endirèkteman. Ki sa Labib di sou sa?

Bondye pa sèvi ak gouvènman lèzòm yo pou l dirije. Jezi te pale de espri ki rele Satan an kòm “chèf k’ap dominen lemonn lan”. (Jan 14:30.) Satan te ofri Jezi pouvwa sou tout wayòm ki gen sou tè a si l fè yon jès adorasyon devan l. Li te di l: “M’ap ba ou tout pouvwa ak tout richès peyi [wayòm] sa yo. Yo renmèt tout bagay sa yo nan men mwen, mwen ka bay moun mwen vle yo.” Jezi pa t nye Satan gen otorite sa a. Okontrè, men sa l te di l: “Men sa ki ekri: Se Mèt la, Bondye ou, pou ou adore. Se li menm ase pou ou sèvi.” ​(Lik 4:5-8). Se Satan ansanm ak gouvènman lèzòm yo ki responsab soufrans ki gen nan monn nan, se pa Bondye. —Revelasyon 12:9, 12.

Talè konsa, Jewova Dye pral retire tout bagay ki lakòz n ap soufri yo. Li deja mete yon Wayòm, sètadi yon gouvènman, anplas anba dominasyon Jezi, Pitit li a, pou dirije limanite (Matye 6:9, 10; 1 Korentyen 15:20-28). Jan pwofesi ki nan Bib la te anonse sa, jodi a, y ap preche bon nouvèl konsènan Wayòm sa a sou tout tè a (Matye 24:14). Talè konsa, Wayòm sa a pral detwi tout moun ki opoze ak li e li pral efase tout bagay ki lakòz lèzòm ap soufri yo. —Dànyèl 2:44; Matye 25:31-33, 46; Revelasyon 21:3, 4.

KI BYENFÈ W AP JWENN? Moun ki gen dout yo tankou vag lanmè k ap fè ale vini akoz ‘tout van ansèyman k ap pote yo ale adwat agoch poutèt y al koute moun ki sèvi ak trik yo’. (Efezyen 4:14, NW; 2 Pyè 2:1.) Yon lòt bò, moun ki te gen kesyon e ki jwenn repons ki satisfè yo pou kesyon sa yo anmezi pou yo ‘kenbe fèm nan konfyans yo’. —1 Korentyen [1 Korent] 16:13.

Temwen Jewova yo, ki pibliye peryodik sa a, ta renmen ede w jwenn repons kesyon ou genyen ki fè w gen dout yo. Yo envite w frekante yo epi egzamine sa y ap anseye yo pèsonèlman. Si w fè sa, lafwa w gen nan Bondye a ap vin solid anpil.

Pou w jwenn plis enfòmasyon, gade nan liv Ki sa Labib anseye toutbonvre? a *, nan chapit 8 la, ki gen tit “Ki sa Wayòm Bondye a ye?” ak nan chapit 11 lan, ki gen tit “Poukisa Bondye pèmèt soufrans?”

[Nòt anba paj]

[Foto nan paj 9]

Lafwa moun ki jwenn repons ki satisfè yo pou kesyon yo konn poze yo chita sou yon baz solid.