Lektè nou yo ta renmen konnen

Èske gen twa nèg save ki t al vizite Jezi toutbonvre lè l te yon tibebe?

Sot Amerik disid travèse al Ewòp de Lès pou rive ann Azi, selon tradisyon ki makònen ak epòk Nwèl la, yo toujou montre sèn nesans Jezi ak twa wa maj ladan l ki pote kado ki gen valè pou Jezi ki te yon tibebe. Èske se konsa sa te fèt vre? Annou wè sa.

Evanjil Matye a ak Evanjil Lik la pale de nesans Jezi. Yo montre se yon seri bèje enb ki pa t soti twò lwen nan yon savann ki te vin wè Jezi jou li te fèt la. An reyalite, moun yo rele wa maj yo se astwològ yo te ye. Yo pa t wa. Anplis, yo pa bay ki kantite yo te ye. Lè astwològ yo t al wè Jezi, li pa t yon tibebe ki te fèk fèt ki te nan yon manjwa. Li te yon timoun ki t ap viv nan yon kay. Prezans yo te menm mete lavi Jezi an danje!

Byen gade pasaj ki pale de nesans Jezi a nan liv Lik la e w ap wè li di: “Te gen gadò mouton ki t’ap pase nwit la deyò ap veye mouton yo. Lè sa a, yon zanj Bondye parèt devan yo. [...] [Li] di yo konsa: [...] N’a jwenn yon tibebe vlope nan kouchèt, kouche nan yon kay kote yo bay bèt manje. [...] [Lè] yo prese ale, yo jwenn Mari ak Jozèf, ansanm ak tipitit la kouche kote yo bay bèt yo manje a.” —Lik 2:8-16.

Se sèlman Jozèf, Mari ak gadò mouton yo ki te la ansanm ak Jezi. Dapre sa Lik te ekri, pa t gen lòt moun la.

Kounye a, annou egzamine pasaj ki nan Matye 2:1-11 lan. Men sa yo di nan pasaj sa a: “Jezi te fèt lavil Betleyèm nan peyi Jide, sou tan wa Ewòd. Apre li te fèt, kèk nèg save ki konn etidye zetwal yo sòti nan peyi solèy leve, yo rive lavil Jerizalèm [...]. Yo antre nan kay la, yo wè ti pitit la ansanm ak Mari, manman li.”

Remake pasaj la di “kèk nèg save,” li pa di “twa nèg save”. Anplis, li di yo soti nan peyi solèy leve yo pou y al Jerizalèm anvan. Yo pa t al Bètleyèm anvan, vil kote Jezi te fèt la. Finalman, lè yo rive Bètleyèm, Jezi te gentan yon “ti pitit”. Li pa t yon tibebe ankò e li pa t ap viv nan yon kay kote yo bay bèt manje. Li te nan yon kay nòmal lè sa a.

Tradiksyon Bib yo rele Bib la mete “nèg save”, men gen lòt Bib ki mete “maj” oswa “astwològ”. Men sa yon liv (A Handbook on the Gospel of Matthew) ki pale sou Evanjil Matye a di: Mo grèk lè yo tradui l ki bay ekspresyon “nèg save” a se “yon mo, alorijin, yo te itilize lè yo t ap pale de prèt ki t ap viv nan peyi Pès e ki te fò nan astwoloji.” Gen yon diksyonè pou mo ki nan Bib la (The Expanded Vine’s Expository Dictionary of New Testament Words) ki dekri mo sa a konsa: “Yon majisyen, yon sòsye, yon moun ki pretann li gen pouvwa pou l fè maji, yon moun ki anseye maji.”

Byenke anpil moun pratike astwoloji ak maji jodi a, Bib la avèti nou pou nou pa pratike bagay sa yo (Izayi [Ezayi] 47:13-15). Yo fè pati espiritis, e Jewova Dye rayi pratik sa yo (Detewonòm 18:10-12). Se sa k fè se pa t okenn nan zanj Bondye yo ki te fè astwològ yo konnen Jezi te fèt. Sepandan, annapre, Bondye te avèti yo nan yon rèv pou yo pa retounen al jwenn wa Ewòd, piske wa Ewòd t ap chèche touye Jezi. Se sa k fè “yo [te] fè yon lòt wout pou yo tounen al nan peyi yo”. —Matye 2:11-16.

Èske vrè kretyen yo ta dwe kontinye ap suiv tradisyon ki makònen ak epòk Nwèl la ki pa prezante laverite konsènan nesans Jezi? Pa gen dout repons lan se non!