Èske se Bondye ki bay moun don pou yo pale nan lòt lang?

MEN sa Devon di: “Mwen pa ka konprann bagay sa a. Chak semèn, gen yon pakèt moun nan legliz mwen an sanble ki gen lespri sen e yo pran pale nan lòt lang. Gen ladan yo k ap mennen yon vi imoral. Men, mwen menm k ap fè efò pou m mennen yon vi ki pwòp, mwen pa janm ka gen lespri malgre tout priye m priye pou sa. Kòman sa fè fèt?”

Se menm bagay la pou Gabriel, yon moun ki nan yon lòt legliz kote moun yo sanble konn gen lespri sen e yo konn pale nan lòt lang. Men sa l esplike: “Sa k ban m pwoblèm nan, sèke moun sa yo deranje m lè m ap priye paske y ap di yon seri bagay byen fò ni mwen ni yo menm pa konprann. Pèsonn pa aprann anyen nan sa y ap di a. Lè lespri Bondye bay yon moun yon don ki pèmèt li fè yon seri bagay espesyal, èske don sa a pa ta dwe itil?”

Eksperyans Devon ak Gabriel fè a fè nou poze yon kesyon ki gen anpil enpòtans: Èske se Bondye ki bay moun don pou yo pale nan lòt lang, jan sa fèt nan kèk legliz jodi a? Anvan nou reponn kesyon sa a, li t ap bon pou nou analize don kretyen nan premye syèk la te genyen pou yo pale nan lòt lang nan. Don sa a se te yon mirak.

Yo te “kòmanse pale divès lang”

Nan Labib, nou jwenn istwa kèk gason ak kèk fi ki te vin gen pouvwa pou yo pale yon seri lang yo pa t janm aprann pale anvan. Premye fwa sa te fèt se te nan Pannkòt ane 33 epòk nou an, kèk semèn apre Jezi Kris te fin mouri. Jou sa a, nan vil Jerizalèm, anviwon 120 disip Jezi te “vin ranpli ak lespri sen, e yo kòmanse pale divès lang”. Moun ki te soti nan lòt peyi pou yo vin Jerizalèm “pa t konprann sa k ap pase a paske yo chak te tande disip yo k ap pale nan lang pa yo”. —Travay 1:15; 2:1-6.

Labib pale de kèk lòt disip pami premye disip Jezi yo ki te gen don espesyal sa a tou. Pa egzanp, grasa lespri sen, apot Pòl te gen pouvwa pou l pale nan plizyè lang (Travay 19:6; 1 Korentyen 12:10, 28; 14:18). Men, lojikman, Bondye ta dwe gen yon bon rezon pou l bay moun yon don konsa. Donk, ki objektif Bondye te genyen ki fè l te bay moun nan tan biblik yo don pou yo pale nan lòt lang?

Yon siy ki te montre Bondye avèk yo

Nan lèt Pòl te voye bay kretyen ki te nan vil Korent yo, e sanble kèk ladan yo te konn pale nan lòt lang, Pòl te esplike “pale nan lòt lang [...] se yon siy pou moun ki pa kwayan”. (1 Korentyen 14:22.) Se sa k fè, menm jan ak lòt don lespri  sen te bay yo, pouvwa pou moun pale nan lòt lang nan se te yon siy ki montre moun k ap gade yo kongregasyon kretyen ki fèk fòme a gen favè Bondye ak apwobasyon l. Don sa yo te tankou pano yo mete nan lari pou montre moun k ap chèche laverite yo ki wout yo te dwe fè pou yo jwenn pèp Bondye chwazi a.

Yon bagay enpòtan pou n konnen, sèke Labib pa di ni Jezi ni okenn nan pwofèt ki te la anvan premye kretyen yo te konn pale nan lang yo pa t aprann. Se yon bagay ki klè, don disip Jezi yo te vin genyen pou yo pale nan lòt lang nan te gen lòt objektif toujou.

Yon mwayen pou gaye bon nouvèl la

Lè Jezi te fèk kòmanse preche, li te di disip li yo pou yo pote bon nouvèl Wayòm Bondye a bay Juif yo sèlman (Matye 10:6; 15:24). Se sa k fè, disip yo pa t fasil al nan zòn kote pa gen anpil Juif. Men, sa pa t ap rete konsa.

Yon ti tan apre Jezi mouri nan ane 33 epòk nou an, apre l fin resisite, li te bay disip li yo lòd pou yo “fè disip pami moun tout nasyon”. Li te di yo tou yo t ap gen pou yo sèvi l temwen “rive jis nan zòn ki pi lwen sou tè a”. (Matye 28:19; Travay 1:8.) Pou yo te ka rive gaye bon nouvèl la konsa sou tout tè a, sa t ap mande pou yo pale lòt lang ki pa Ebre.

Men, anpil nan premye disip yo se te moun “ki pa t fè gwo etid, e [ki te] moun òdinè”. (Travay 4:13.) Alò, kòman yo t ap fè preche yon seri kote byen lwen nan divès lang moun yo te pale yo, yon seri lang petèt yo pa t janm tande moun pale anvan, alewè pou yo ta konn pale yo? Lespri sen te bay kèk nan pwoklamatè zele ki te pami premye disip yo don pou yo byen pale lòt lang yo pa t aprann pale anvan.

Konsa, don pou pale nan lòt lang nan te gen de gwo objektif. Premyèman, se te yon siy ki te montre Bondye te avèk kretyen yo. Dezyèmman, se te yon mwayen efikas kretyen nan premye syèk la te genyen pou yo akonpli misyon pou yo preche moun ki pale lòt lang. Nan legliz yo jodi a, lè moun yo pale nan lòt lang, èske sa pèmèt yo atenn de objektif sa yo?

Pale nan lòt lang jodi a — Èske se yon siy ki montre Bondye dakò ak yon relijyon?

Si w ta gen pou w mete yon ansèy yon kote pou pifò moun nan zòn w ap viv la ka wè l, ki kote w t ap mete l? Anndan yon ti kay? Non! Istwa a fè konnen, jou Pannkòt ane 33 a, te gen “yon gwo foul moun” ki t ap pase ki te wè siy lan, sa vle di yo te wè disip Jezi yo ki t ap pale nan lòt lang. Kòm rezilta, jou sa a, gen “anviwon 3 000 moun ki te vin ajoute” nan kongregasyon kretyen an (Travay 2:5, 6, 41)! Jodi a, si se anndan legliz sèlman moun ki di yo pale nan lòt lang yo fè sa, kòman pale yo pale nan lòt lang nan ka sèvi kòm yon siy pou gwo foul moun ki pa kwayan yo?

Pawòl Bondye a pale de fònikasyon ak lòt “zèv lachè” kòm zèv ki anpeche lespri sen aji, e li di “moun k ap pratike bagay sa yo pap benefisye wayòm Bondye a”. (Galat 5:17-21.) Si w wè gen moun ki pa gen bon konduit e k ap pale nan lòt lang, ou ta ka gen rezon pou w mande tèt ou: ‘Èske sa pa t ap kontrè ak sa Labib di si lespri sen Bondye ta desann sou yon seri moun ki lage kò yo nan yon konduit Pawòl li a kondane? Èske sa pa ta ka menm twonpe kèk moun?’ Se t ap tankou yon pano yo mete nan lari k ap fè moun fè move wout.

Pale nan lòt lang jodi a — Èske se yon mwayen pou gaye bon nouvèl la?

Annou konsidere dezyèm rezon ki fè gen moun ki te gen don pou yo pale nan lòt lang nan premye syèk la. Èske lè yo pale nan lòt lang nan legliz yo jodi a se yon mwayen pou yo preche lòt moun bon nouvèl la nan divès lang? Pa bliye, moun ki te Jerizalèm jou Pannkòt ane 33 epòk nou an, ki t ap gade kretyen k ap pale nan lòt lang yo te soti nan divès peyi e yo te byen konprann lang disip yo t ap pale yo. Men, se pa menm bagay la jodi a, paske an jeneral, moun k ap pale nan lang yo pale yon lang pèsonn pa ka konprann.

Sa klè, pale moun yo pale nan lòt lang jounen jodi a vrèman diferan ak don lespri sen  premye disip Jezi yo te resevwa a. Anfèt, pa gen okenn kote nou jwenn yon istwa nou ka fè konfyans ki fè nou konnen gen pèsonn moun ki te resevwa don sa a apre lanmò apot yo. Moun ki abitye li Labib yo konn sa byen. Anrapò ak don moun te konn resevwa pa mwayen mirak yo, san wete don pou moun pale nan lòt lang nan, men sa apot Pòl ki te anba pouvwa lespri sen te predi: “Y ap disparèt.” ​(1 Korentyen 13:8). Si se konsa, ki jan nou ka rive konnen si yon moun gen lespri sen jodi a?

Ki moun ki montre yo gen lespri sen?

Jezi te byen konnen don pou moun pale nan lòt lang nan t ap gen pou disparèt yon ti tan apre kongregasyon kretyen an te fin fòme. Yon ti tan anvan Jezi mouri, li te bay yon siy ki t ap pèmèt moun rive rekonèt vrè disip li yo kèlkeswa epòk la. Men siy nan: “Tout moun ap konnen nou se disip mwen si nou gen lanmou nan mitan nou.” ​(Jan 13:35). Anfèt, menm vèsè kote Pawòl Bondye a te fè konnen don pou moun fè mirak la t ap gen pou disparèt, fè konnen tou: “Lanmou pa janm fayi.” —1 Korentyen 13:8.

Pami nèf fasèt ki gen nan “fwi lespri” Bondye a, yo site lanmou an premye (Galat 5:22, 23). Donk, moun ki gen lespri Bondye toutbon yo, sa vle di moun Bondye avèk yo toutbon yo, ta dwe gen bonjan lanmou youn pou lòt nan mitan yo. Epitou, twazyèm fasèt nan fwi lespri a se lapè. Kidonk, ta dwe gen lapè pami moun ki gen lespri sen Bondye jodi a, yo ta dwe fè tout sa yo kapab pou yo lite kont yon seri defo tankou prejije, rasis e pou yo pa vyolan.

Sonje tou pwofesi Jezi te bay ki nan Travay 1:8 la. Li te fè konnen disip li yo t ap gen pou resevwa pouvwa pou yo sèvi l temwen “rive jis nan zòn ki pi lwen sou tè a”. Jezi te di tou travay sa a t ap gen pou l kontinye fèt “jis lafen di monn rive”. (Matye 28:20, Bib Kreyòl La.) Konsa, travay predikasyon k ap fèt nan lemonnantye a t ap gen pou l kontinye sèvi kòm yon siy pou pèmèt yo rekonèt moun ki gen lespri sen toutbon yo.

Dapre sa w remake, ki gwoup moun, jodi a, ki montre yo gen lespri sen? Ki gwoup moun sou tout tè a ki demontre yo gen fwi lespri a, espesyalman lanmou ak lapè, jis nan pwen pou yo soufri anba men gouvènman yo paske yo refize patisipe nan lagè (Izayi 2:4)? Ki gwoup moun ki fè tout sa yo kapab pou yo evite zèv lachè yo tankou fònikasyon, ki mete moun ki lage kò yo nan peche sa yo deyò nan mitan yo lè yo pa repanti (1 Korentyen 5:11-13)? Ki gwoup moun k ap preche bon nouvèl Wayòm Bondye a sou tout tè a kòm sèl espwa limanite? —Matye 24:14.

Moun ki pibliye peryodik ki nan men w lan pa pè pou yo di se Temwen Jewova yo ki menm jan ak moun Labib di ki gen lespri Bondye yo. Sa w panse si w ta chèche konnen yo pi byen epi wè ak pwòp je w si Bondye avèk yo toutbonvre?