Yo pa pè lafen an ankò

NAN fen ane 1970 yo, Gary ak Karen te vin kwè lafendimonn pa lwen rive. Se sa k fè yo te kite vil kote yo t ap viv la pou y al ret an pwovens e yo te deside mennen yon lavi ki senp nèt. Yo te vle sove lè lafen an rive.

Pou yo te kapab prepare yo pou lafen an, yo te achte yon pakèt liv, yo t al nan yon pakèt kou, yo te asiste anpil seminè, e yo te pale sou sa ak plis moun yo te kapab. Yo te fè yon ti jaden ki te gen 50 pyebwa ki rete toupiti men ki bay fwi. Yo te sere semans pou fè jaden ansanm ak yon bann zouti. Yo te aprann fè jaden e yo te aprann ki jan pou yo konsève manje pou yo pa gate. Gen yon zanmi ki te montre yo kòman pou yo touye bèt e pou yo konsève vyann. Karen te aprann konnen ki plant ak ki rasin ki gen nan forè yo ta ka manje si manje yo ta fini. Gary li menm te aprann fè gaz pou machin avèk mayi, li te fè yon fou an metal pou kuit manje sou dife bwa, e l te bati yon ti kay ki gen tout sa l bezwen ki pa depann de anyen ki sot deyò tankou kouran, dlo, gaz, elatriye.

Men sa Karen esplike: “Piske sitiyasyon monn nan te terib nan epòk la, mwen te santi lavi a pa t ap pran tan pou l chavire tèt anba.” Men sa Gary di: “Menm jan ak lòt jèn parèy mwen, mwen te fè tout sa m kapab pou m eseye rezoud pwoblèm rasis la, pou m met fen nan lagè Vyetnam nan ak nan koripsyon. Men, sa pa t pran anpil tan pou m rann mwen kont mwen pa t ap ka fè anyen pou m ranje bagay yo. Pou mwen menm, se te kòmsi lèzòm te sou wout pou yo detwi tèt yo.”

 Gary te kontinye esplike: “Yon jou swa, piske m pa t gen anyen pou m fè, mwen te pran yon Bib e m te li soti nan Matye rive nan Revelasyon. Mwen te li pati sa a ankò moso pa moso nan kat nuit ki te vin apre yo. Apre katriyèm nuit lan, nan maten, mwen te di Karen: ‘N ap viv nan dènye jou yo. Bondye pral aji byen vit pou l netwaye latè. Nou dwe chèche jwenn moun k ap chape yo.’” Gary ak Karen te kòmanse al nan diferan relijyon pou yo te ka chèche moun ki te dispoze prepare yo pou lafen an.

Yon ti tan apre sa, yon Temwen Jewova te frape pòt kay yo, e yo te kòmanse etidye Labib. Men sa Karen rakonte: “Se pa ti kontan mwen te kontan! Yo te esplike m Pawòl Bondye a trè byen. Se laverite mwen t ap chèche sou tan lafen an, e anfen mwen te resi jwenn li. Mwen te vin aprann gen yon bèl avni k ap tann nou. Men, sa ki te pi bèl la, mwen te kòmanse vin zanmi Papa m ki nan syèl la, Kreyatè a, ki se Bondye tout linivè a.”

Men sa Gary di: “Lavi m te vin gen yon sans. Lè m te kòmanse etidye Labib, mwen pa t ka sispann. Mwen te li pwofesi yo, mwen te egzamine prèv biblik ki montre yo te reyalize vre, e mwen te kwè toutbon Bondye t apral aji san pèdi tan. Mwen te di tèt mwen, ‘olye pou moun yo ta ap prepare yo pou yon dezas, yo ta dwe ap prepare yo pou lavi Bondye pwomèt nou an.’” Gary ak Karen te vin konprann lavni rezève bon bagay pou yo. Olye yo bay tèt yo pwoblèm sou lafendimonn, yo te vin gen konfyans Bondye pral efase tout pwoblèm k ap boulvèse lèzòm e l ap fè tè a tounen yon paradi.

Vennsenk an gentan pase depi Gary ak Karen te fè eksperyans sa a, men, ki sa y ap fè kounye a? Men sa Karen di: “Mwen kontinye aprann renmen Jewova pi plis toujou e m fè efò pou m fè l plis konfyans, e m eseye ede lòt moun pou yo fè menm jan an. Gary avè m, nou youn soutni lòt yon fason pou fanmi nou ka ret djanm e pou nou rete ini nan adorasyon n ap bay Bondye a. Nou bat pou nou kontinye byen òganize lavi nou, e nou fè tout sa nou kapab pou nou mennen yon vi ki senp yon fason pou nou konsantre nou sou ede lòt moun ki nan bezwen.”

Men sa Gary ajoute: “Mwen priye Bondye regilyèman pou Wayòm li an vini e pou l pote soulajman pou tout milyon moun sa yo. Chak fwa m patisipe nan travay predikasyon an, mwen priye pou m kapab bay omwen yon moun espwa grasa mesaj ki nan Bib la. Pandan plis pase 25 an, Jewova toujou reponn priyè sa a. Karen avè m, nou rete kwè Jewova pral pote yon pakèt gwo chanjman sou tè a, men, nou pa pè lafen an ankò.” —Matye 6:9, 10; 2 Pyè 3:11, 12.

[Foto nan paj 9]

Kounye a, Gary ak Karen pran plezi nan ede lòt moun vin gen espwa grasa mesaj ki nan Bib la.