“Jodi a se jou pa nou”
Gradyasyon 129yèm klas Gileyad
“Jodi a se jou pa nou”
NAN jou ki te 11 septanm 2010 la, anviwon 8 000 moun te asiste yon evènman espesyal: gradyasyon 129yèm klas Lekòl Gileyad. Men sa frè Samuel Herd, youn nan manm Kolèj santral Temwen Jewova yo, te di etidyan yo: “Jodi a se jou pa nou, nou la pou nou fete avèk nou!”
“Zòrèy pou nou ka tande”
Nan kòmansman pwogram nan, frè Herd te pale sou enpòtans pou chak kretyen byen sèvi ak ‘zòrèy yo pou yo ka tande’, sa vle di pou yo koute Pawòl Bondye a (Pwovèb 20:12). Frè Herd te di klas la: “Nou te koute Jewova pandan mwa ki sot pase yo e n ap kontinye fè sa pou toutan.”
Ki jan nouvo misyonè yo ap montre yo saj nan fason yo sèvi ak zòrèy yo? Frè Herd te di yo: “Se lè nou koute Pawòl Bondye a avèk atansyon.” Li te di tou: “Gen anpil bagay nou pral tande jodi a nan pwogram nan k ap prepare nou pou travay nou pral fè antanke misyonè nan ane k ap vini yo.”
“Mete konfyans nou nan Jewova ak tout kè nou”
Gerrit Lösch, yon manm Kolèj santral la, te pale ak elèv yo sou tèm sa a ki pouse anpil moun reflechi. Li te montre kòman pèp Bondye a te montre yo fè Bondye konfyans, nan plizyè sitiyasyon, ni nan tan lontan, ni nan epòk nou an.
Frè Lösch te montre “misyonè yo bezwen fè Jewova konfyans nan nouvo asiyasyon yo resevwa a” menm jan an tou. Li te di: “Pa egzanp, nou ka ap mande tèt nou: ‘Ou kwè m ap kapab aprann lang peyi kote m prale a? Èske m ap kapab adapte m ak fason moun yo viv? Kòman m ap fè lè m sonje lakay?’” Repons frè Lösch te bay la te tou sèvi kòm konsèy pou klas la, li te di: “Mete konfyans nou nan Jewova.”
Epitou, frè Lösch te li Pwovèb 14:26, ki di: “Lè yon moun gen krentif pou Bondye, li gen kote pou l apiye.” N ap vin gen plis konfyans nan Jewova si nou reflechi sou tout fason li beni nou.
Bib la di moun ki mete konfyans li nan Jewova “ap tankou pyebwa yo plante bò larivyè, k’ap plonje rasin li nan dlo. Li pa pè anyen lè sezon chalè rive, paske fèy li yo ap toujou vèt.” — Jeremi 17:7, 8.
Leson an klè. Frè Lösch te di: “Kèlkeswa sa k ka rive, nou dwe fè Jewova konfyans.”
“Imite zanj ki fidèl yo”
Se frè Stephen Lett, yon manm Kolèj santral la, ki te bay diskou sa a. Zanj yo se yon bèl egzanp pou nou. Men sa frè Lett te di: “Labib pale an byen de zanj yo, e yo merite pou nou imite yo.” Apre sa, li te idantifye kat bagay li ta bon pou nou imite lakay zanj fidèl yo. Li te di yo gen andirans, imilite, yo dispoze ede moun e yo gen entegrite.
Bib la fè konnen gen yon zanj ki te kenbe tèt ak yon demon ki pisan, “zanj chèf peyi Pès la”, pandan 21 jou (Dànyèl 10:13). Zanj fidèl sa a te montre li gen andirans. Frè Lett te fè elèv yo sonje kretyen yo tou “gen yon lit [y] ap mennen [...] kont espri mechan yo”. (Efezyen 6:12.) Li te di yo: “Se pou nou lite ak tout fòs nou pou nou kontinye nan asiyasyon nou.”
Lè Manowa, papa Sanson, te mande yon zanj non l, zanj lan te refize di l non l. Zanj sa a te montre li gen imilite (Jij 13:17, 18). Men sa frè Lett te di elèv yo: “Lè yon moun soti pou l fè lwanj pou nou oswa pou kapasite nou genyen, avèk imilite, fè l konnen se Jewova ak òganizasyon l lan ki merite lwanj sa a.” — 1 Korentyen 4:7.
Yon ti tan anvan Jezi mouri, pandan l te nan jaden Jetsemane a, “yon zanj ki sot nan syèl la parèt devan l, e zanj lan ba l fòs”. (Lik 22:43.) Zanj sa a te montre li dispoze ede moun. Frè Lett te di elèv yo: “Priye Jewova epi mande l pou l ede nou wè ki sa moun yo vrèman bezwen nan zòn kote nou prale antanke misyonè a, epi eseye ede yo toutpandan n ap konte sou Jewova.”
Piske kantite zanj ki te suiv Satan lè l te vire do bay Jewova a pa t anpil, nou kapab di pifò zanj yo ban nou yon bèl egzanp entegrite. — Revelasyon 12:4.
Frè Lett te ankouraje elèv yo pou yo “reziste kont Dyab la menm jan ak zanj fidèl sa yo” e li te di yo pou yo “opoze ak Dyab la, e l ap kouri kite [yo]”. — Jak 4:7.
Twa lòt diskou enpòtan
“Kontinye kenbe Jewova tankou yon wòch k ap pwoteje kè w.” Frè Gary Breaux, yon manm Komite filyal peyi Etazini, te pale sou sijè sa a ki enteresan anpil e ki baze sou Sòm 73:26 (NW). Li te ede elèv yo wè enpòtans pou yo konte sou Jewova. Nan ki sans Jewova tankou yon wòch? Frè Breaux te esplike: “Yon wòch kapab kenbe yon moso papye pou gwo van pa pote l ale. Menm jan an tou, Jewova ka pwoteje kè nou lè l fè l vin fèm.” Nòmalman, kè nou kapab twonpe nou lè nou anba eprèv k ap teste andirans nou (Jeremi 17:9). Gen plizyè bagay ki ka fè nou anvi kite sèvis la, tankou nouvo anviwònman nou pral viv ladan l lan, manje nou pa t abitye manje, viv nan menm kay ak misyonè parèy nou. Frè Breaux te di: “Nou pral rankontre sitiyasyon kote n ap gen plizyè chwa devan nou e n ap gen pou n pran desizyon. Èske n ap pran desizyon k ap fè Jewova plezi? Si nou fè sa, Jewova ap tounen wòch k ap pwoteje kè nou an. L ap gide nou nan tout sa n ap fè.”
“Èske nou gen ase lafwa pou nou mete pye nou nan dlo a?” Sam Roberson, yon enstriktè nan Lekòl Gileyad, te bay diskou sa a ki baze sou Jozye chapit 3. Ki jan plizyè milyon Izrayelit t ap fè janbe rivyè Jouden an pandan dlo a t ap desann? Jewova te di Jozye pou l bay prèt yo lòd pou yo “antre nan dlo a”. Men pwomès Bondye te fè yo: ‘Lè prèt yo va mete pye yo nan dlo larivyè Jouden an, larivyè a pral sispann koule desann, dlo a pral gonfle yon sèl kote.’ (Jozye 3:8, 13). Frè Roberson te di elèv yo: “N ap rankontre difikilte nan lavi nou ki kapab tankou ‘rivyè Jouden an’, e si nou pa fè atansyon, difikilte sa yo ka anpeche nou jwenn benediksyon Jewova.” Pa egzanp, gen bagay ki ka fè l difisil pou nou antann nou ak lòt misyonè yo. Frè Roberson te di, solisyon an se: “Konsantre nou sou travay la, pa konsantre nou sou travayè yo.” Men yon konsèy li te bay klas la: “Si nou gen ase lafwa pou nou mete pye nou nan dlo [nan yon sans senbolik], Jewova ap ede nou fè fas ak tout difikilte n ap gen pou n rankontre nan lavi nou antanke misyonè ki kapab tankou ‘rivyè Jouden an’.”
“Plan nou yo ap reyisi san mank.” Se William Samuelson, yon enstriktè nan Lekòl Gileyad, ki te bay diskou sa a. Diskou a te baze sou Pwovèb 16:3 (NW) ki di: “Mete Jewova nan tout sa w ap fè, e plan w yo ap reyisi san mank.” Frè Samuelson te mande elèv yo: “Dapre vèsè sa a, èske sa vle di nou pa bezwen fè anyen pou plan nou yo reyisi depi nou annik ‘mete Jewova nan tout sa n ap fè’?” Li te reponn non, e li te site Pwovèb 16:1 pou l bay rezon an. Vèsè sa a di: “Lèzòm fè lide nan kè yo.” Frè Samuelson te di: “Jewova pap fè yon mirak pou l ranje lide nou gen nan kè nou. Se nou menm ki pou asire nou nou mete bon lide nan kè nou k ap pouse nou nan bon direksyon. Lè nou etidye, nou priye, e nou kenbe kontak ak biwo filyal peyi kote n ap ye a, n ap fòme kè nou yon fason pou l ka toujou ede nou pran bon desizyon. Lè sa a, Jewova ap fè plan nou yo reyisi san mank.”
Eksperyans ak entèvyou
Pandan Lekòl la, elèv yo te patisipe nan predikasyon kay an kay ansanm ak Temwen Jewova ki nan kongregasyon kote yo te asiste reyinyon yo, paske sa antre nan fòmasyon yo. Mark Noumair, yon lòt enstriktè nan Lekòl la, te fè entèvyou ak plizyè elèv sou eksperyans yo te fè nan predikasyon. Youn nan bagay yo te mete aksan sou li nan eksperyans sa yo se wòl lapriyè jwe nan jwenn moun ki sensè yo nan tèritwa a.
Pa egzanp, pandan yon frè ak madanm li te nan yon restoran, youn nan anplwaye yo te remake yo t ap priye nan kè yo. Li te pwoche kote yo e li te mande yo si yo se Temwen Jewova. Apre yo te fin di l wi, anplwaye a te fè yo konnen li te grandi nan yon fanmi Temwen Jewova, men li te vin kite sa. Li te menm rive fè yon bagay ki ilegal e yo te mete l nan prizon. Kounye a, jèn gason sa a anvi tounen vin jwenn Jewova. Li te di yo tou, anvan yo te antre nan restoran an, li t ap priye Bondye pou Bondye ede l fè sa ki dwat. Jewova te koute priyè l la.
Frè Rudi Hartl, se yon frè k ap travay nan depatman ki la pou reponn kesyon ki gen rapò ak Labib oswa ak piblikasyon Temwen Jewova yo. Patisipasyon pa l la te gen tèm: “Goute e n a wè jan Jewova bon.” Li te fè yon entèvyou ak frè Wayne Wridgway ki soti nan peyi Mozanbik, ak Jason Reed ki soti Chili e ak Kenji Chichii ki soti Nepal. Twa frè sa yo se ansyen elèv Lekòl Gileyad k ap sèvi kòm misyonè. Frè sa yo te pale byen klè sou kèk nan difikilte yo te jwenn antanke nouvo misyonè, tankou lè yo t ap aprann lang peyi kote yo te voye yo a oswa lè yo t ap adapte yo ak kilti peyi a. Pafwa tou, yo te konn sonje lakay yo. Men sa frè Chichii te di: “Youn nan bagay ki te ede mwen menm ak madanm mwen, sèke nou pa t pran tan pou n fè zanmi ak frè ak sè nan nouvo kongregasyon nou te ye nan peyi yo te voye nou an. Tank nou te vin pi pwòch ak moun nan kongregasyon an, se tank li te vin pi fasil pou nou pa twò sonje lakay.”
Apre yo te fin remèt tout 56 elèv yo diplòm yo, youn ladan yo te li yon lèt ki te montre jan yo tout te rekonesan pou fòmasyon yo te jwenn nan. Men yon pati nan sa yo te di Kolèj santral la: “Antanke klas, nou te wè ak je nou kòman lanmou te pouse nou fè tout sa nou kapab pou nou prepare pwogram pou kou yo, pou nou vizite nou e pou nou ban nou bonjan enstriksyon ki ede nou nan relasyon nou ak Bondye. Lè nou rive nan tèritwa nou, n ap fè tout sa nou kapab tou pou nou imite bèl egzanp lanmou, pasyans, imilite ak enterè nou te demontre pou nou.”
[Antrefilè nan paj 28]
“Lè yon moun soti pou l fè lwanj pou nou [...], fè l konnen se Jewova ak òganizasyon l lan ki merite lwanj sa a.”
[Antrefilè nan paj 29]
“N ap rankontre difikilte nan lavi nou ki kapab tankou ‘rivyè Jouden an’.”
[Tablo/Kat jeyografik nan paj 31]
ENFÒMASYON SOU KLAS LA
Kantite peyi kote elèv yo soti: 9
Kantite elèv: 56
Kantite koup marye: 28
Mwayèn laj: 33 an
Mwayèn ane nan laverite: 17,9 an
Mwayèn ane nan sèvis aplentan: 13,3 an
[Kat jeyogafik]
(Gade peryodik la)
25 peyi ki pi ba yo se peyi kote yo voye yo.
PEYI KOTE YO VOYE YO
BOLIVI
BOTSWANA
BILGARI
KONGO (KINCHASA)
KOTDIVWA
GANBI
ALMAY
END
ENDONEZI
KENYA
LIBERYA
MASEDWÀN
MADAGASKA
MALEZI
MOZANBIK
PANAMA
PEWOU
POLÒY
WOUMANI
SÈBI
SYERA LEYÒN
SWAZILANN
TANZANI
OUGANDA
ZIMBABWE
[Foto nan paj 30]
Elèv Gileyad yo k ap fè yon demonstrasyon sou youn nan eksperyans yo te fè nan predikasyon.
[Foto nan paj 31]
Gradyasyon 129yèm klas Lekòl Gileyad
Nan lis ki vin apre a, yo nimewote ranje yo sot devan al dèyè e yo mete non elèv yo sot nan bò goch rive nan bò dwat pou chak ranje.
1) R. Munaretto; Y. Olofsson; K. Budden; L. Najdzion; G. Moya; G. Treviño; A. Dion; A. Fleegle
2) J. Smith; J. Michael Raj; S. Smith; A. Paramo; J. McDonald; M. Deans; S. Joyal; L. Watson
3) C. Joyal; T. Crawley; D. Hacker; J. Shynkarenko; T. Knapp; J. Ayling; C. Highley; B. Olofsson
4) M. Fitzpatrick; B. Najdzion; L. Skallerud; A. Harris; S. Harris; R. Budden; Y. Paramo; K. Skallerud
5) B. Crawley; J. Michael Raj; A. Lodge; R. Lodge; N. Herms; J. Fitzpatrick; R. Moya; P. Munaretto
6) S. Watson; M. Deans; J. Hacker; J. McDonald; J. Treviño; S. Harris; C. Herms; P. Harris
7) V. Shynkarenko; T. Highley; A. Smith; J. Dion; R. Ayling; B. Smith; T. Knapp; B. Fleegle
