Labib chanje lavi moun

Ki sa k te pouse yon jèn dam retounen adopte prensip li te genyen nan relijyon li te leve a? Annou wè sa l gen pou l di nou.

“Kounye a mwen gen yon vrè objektif nan lavi m.” — LISA ANDRÉ

ANE LI FÈT: 1986

PEYI KOTE L SOTI: LIKSANBOU

ANVAN: LI TE YON TIMOUN PÈDI

VI MWEN T AP MENNEN: Mwen grandi nan yon ti vil ki rele Bertrange ki toupre vil Liksanbou. Se yon ti kote ki pwòp, ki gen sekirite, kote ekonomi an ap mache. Mwen se pi piti nan yon fanmi ki gen senk pitit. Paran m se Temwen Jewova, e yo te fè anpil efò pou yo anseye ni mwen menm ni frè m ak sè m yo prensip kretyen yo.

Lè m te fèk antre nan adolesans mwen, mwen te kòmanse gen gwo dout sou ansèyman Temwen Jewova yo. Okòmansman mwen pa t bay sa enpòtans, men, tikras pa tikras, lafwa m t ap febli. Paran m te fè tout sa yo kapab pou yo fè m pran bon direksyon, men mwen te rejte èd yo te ban mwen. San yo pa konnen, mwen te konn pase tan ak jèn ki pa t respekte otorite. Lavi yo t ap mennen an te sanble ba yo libète e mwen te vle gen libète sa a. Nou te konn fete anpil, nou te konn kouche ak moun adwat agoch, nou te konn pran dwòg e nou te konn bwè anpil. Okòmansman mwen te byen kontan ret ansanm ak yon seri moun ki te sanble ap jwi lavi yo omaksimòm.

Men, an reyalite, mwen pa t gen kè kontan vre. Vi m t ap mennen ak moun sa yo pa t gen sans. Pa gen youn ladan yo ki te bay anyen enpòtans. Yon lòt bò, te gen yon seri kesyon ki t ap boulvèse m, tankou, enjistis ki gaye toupatou nan monn nan. Plis tan t ap pase, se plis mwen te vin santi m dekouraje.

FASON LABIB CHANJE LAVI M: Yon jou, lè m te gen 17 an, mwen te santi m vrèman dekouraje. Lè manman m te santi nan ki eta kè m pa t kontan, li te mande m pou m bay Labib yon lòt chans. Li te ankouraje m egzamine ansèyman ki ladan l yo e apre sa m a deside si m vle viv ann amoni avèk yo. Konvèsasyon fran sa a te fè m chanje. Mwen te aksepte etidye Labib ak gran sè m nan, Caroline, ansanm ak mari l, Akif. Akif pa t leve nan yon fanmi Temwen Jewova, se lè l vin gran li vin Temwen Jewova. Vi Akif t ap mennen anvan  an te fè m santi m alèz pou m pale avè l, sa te enpòtan pou mwen.

Mwen te konnen fason m t ap viv la pa t konvnab pou yon Temwen, men mwen te santi sa m te fè ak vi m se bagay ki te gade m. Men, etid mwen te fè nan Bib la te fè m rann mwen kont konduit mwen gen efè sou Jewova (Sòm 78:40, 41; Pwovèb 27:11). E mwen te vin konprann tou konduit mwen gen efè sou lòt moun.

Plis mwen t ap egzamine Bib la, se plis mwen te vin konprann gen plizyè rezon ki lojik e ki konvenkan pou m kwè li se Pawòl Bondye. Pa egzanp, mwen te aprann gen anpil pwofesi nan Bib la ki reyalize avèk yon presizyon ki etonan. Konesans sa a te ede m elimine dout mwen te genyen yo.

Anviwon ennan apre m te kòmanse etidye Labib, mwen menm ak paran m t al wè gran frè m nan ki t ap travay kòm volontè nan biwo filyal Temwen Jewova yo ann Almay. Lè m te wè jan frè m nan gen kè kontan, sa te fè gwo efè sou mwen. Se kè kontan sa a menm mwen t ap chèche! Lòt volontè ki te la tou te fè bèl enpresyon sou mwen. Yo pa t menm ditou ak moun malonèt, moun ki pran plezi nan riske lavi yo mwen t ap frekante yo. Yon ti tan apre, mwen te priye Jewova ak tout kè m, mwen te pwomèt li m ap sèvi l tout rès vi m. Lè m te gen 19 an, mwen te batize pou m demontre mwen vwe Jewova lavi m.

BYENFÈ MWEN JWENN: Kounye a, mwen gen yon vrè objektif nan lavi m. Mwen kontan anseye lòt moun Labib pou m ede yo aprann konn Jewova ak pwomès li fè pou lavni. Fanmi m jwenn byenfè tou, paske yo pa enkyete pou mwen ankò.

Mwen konnen mwen te fè erè nan tan pase yo, men mwen eseye pa ret sou sa. Okontrè, mwen konsantre m sou padon Jewova ak sou enterè plen lanmou li gen pou mwen. Mwen dakò ak tout kè m ak pawòl ki nan Pwovèb 10:22 a (NW) ki di: “Benediksyon Jewova, se sa ki fè yon moun rich, e li pa ajoute okenn doulè avè l.”

[Antrefilè nan paj 16]

“Nou te konn fete anpil, nou te konn kouche ak moun adwat agoch, nou te konn pran dwòg e nou te konn bwè anpil.”

[Antrefilè nan paj 17]

“Mwen konnen mwen te fè erè nan tan pase yo, men mwen eseye pa ret sou sa.”